#مذكرات جندي مجهول
#للكاتب عبد الله محمود
* اول ما دخلت للشارع طلعو جيراني يصيحون !!
( وين جنت فاروق ! امك تفتر بس تريد تعرف وين انتة و ابوك كلب الدنيا راح يسأل معارفة عليك !! و سعد خطية كل ما يرجع واحد من الجبهة يسألة )
" هسة همة وين ؟؟
" امك بالبيت و ابوك يم صديقة ديسألة عليك
" تمام
_ دكيت الباب و جارتنا تصيح :
ام سعد عيني هذا فاروق وصل اطلعي
_ طلعت امي تركض و كامت تبوس براسي و تبجي !
سلمت عليهة كلتلهة : هسة متكليلي ليش تبجين !؟
مو واكف كدامج اني كلشي مابية
امي : هاي شبيهة ايدك
" يمة زين خلصت على هيج تعالي خلي نفوت جوة هسة
_ دخلت لكيت سمير و أحمد و خواتي !! كلهم ملتمين و كأنو متحضرين لخبر وفاتي !!؟
كلت : يمعودين شكو انتو احد كاللكم اكو شي ؟؟
أحمد : هذا جيرانة مو تدري بي يخدم بالشمال
" اي شبي ؟
أحمد : رجع من إجازتة و كال غيلان غرب اخذوهة الجيش الايراني و اللواء الي بيهة ما طلع منة ولا واحد
" هو صدك سقط اللواء بس حبكت يكولهة هيجي ؟ صار دقيق فجأة يعني !؟ ميكول هاي الناس خطية !
سمير : امي كامت تلطم و البنات كامن يبجن و ابوية طلع يركض بالشارع يريد يسأل اي شخص من معارفة
" ابوية وين ؟ اذا تعرفون وين راح اتصلو و كلولة فاروق رجع
أحمد : اي اني اعرف وين راح هسة اخابر على بيت صديقة
البنات ديبجن !!
" يمعودين مو ناقص نواح اني هسة قابل جابو جثتي ! كولو يا الله اكعدو استهدو بالله
_ رجع سعد و صفن علية و كال :
نعلة على ابليسك يمعود والله فززتني عبالي بيك شي !!
" اكو واحد خايف يدز جكاير وية ابو الارزاق !؟
كام يضحك و سلمت علية
سعد : لك مو هيجي السالفة انتة متعرف شكالولي !!؟
" شنو ؟
سعد : بالبداية كالو غيلان غرب حاصروهة و بعدين كالو صار هجوم عليهة و سقطت كلهة بايدهم و ما طلع ولا نفر !!
" والله لعد كل الي كالو صحيح ، اللواء الي كدامنة وكع بس بقت كتيبة دفاع جوي و كتيبة مدفعية
أنت تقرأ
مذكرات جندي مجهول
Ficción históricaقصة واقعية بكل تفاصيلها ،، كل احداثها و حواراتها واقعية ما عدا اسم بطل القصة و اسماء عائلته و كذلك ارقام الوحدات العسكرية ساتجنب ذكرها على حقيقتها حفاضا على خصوصية بطل القصة و تلبية لرغبته ، تركز القصة على ما مر به بطل القصة في الحرب العراقية الايرا...
