مذكرات جندي مجهول

٨ _ ثلاثة أيام

#مذكرات جندي مجهول
# للكاتب عبد الله محمود

خلص اني اقتنعت ان مصيري هنا

حياتي راح تصير هنا !

اتأقلم و خلص و إذا متتأقلم معناها راح تتعب نفسيتك و ممكن تتخبل او يصير بيك مرض نفسي

حاول تضحك حتى على المصيبة

حاول تصنع الضحكة بكل وقت لان اذا بقيت مهموم راح تموت من الهم و القلق

* تمركزت قواتنا على الارض المنبسطة و الي يتخللها بعض التلال و بعض السلاسل الجبلية الصغيرة بداخلهة مثل الكهوف و صرنا مطلين على قلب منطقة غيلان غرب اي بمعنى مجرد السيطرة على المناطق الامامية الي مساحتها ٨ كيلومتر مربع تقريبا و الي تبعد عنة نصف كيلو راح يعني السيطرة على غيلان غرب بشكل كامل ،، طبعا الفتحات الي تشبه الكهوف ارتاحو بيهة المشاة و بعضها خلو بيهة المدافع و المعدات اما الدبابات القليلة فخلوهة بصف التلال لزك حتى متنضرب .

* بلشنا نبني الدفاعات من نصب السواتر و حفر الخنادق و حفر الملاجئ للحماية من القصف المدفعي و بناء الحضائر و كذلك اجتنا اوامر بالاستعجال بهذا الشي قدر الامكان لان الجيش الايراني بلش يتحشد امامنة بشكل كبير وصل تعدادهة الى ٦ الوية تقريبا و احنا عددنا لوائين فقط مدعومة بكتيبة دفاع جوي و لواء قوات خاصة بقربنا يعمل عمل لواء استراتيجي

استراتيجي يعني اذا كان الهجوم على سومار الي هي القاطع الجنوبي من العمليات رح يتحركون باتجاهة و اذا كان الهجوم على سربيل زهاب من جهة الشمال كذلك يسندو و اذا كان الهجوم على الوسط من قلب غيلان غرب هم يسندو .

* الي جان فعلا مزعج هي التلال الجبلية الي هي ميزة لصاحب الارض لان يعرف كل تفاصيلهة و عائق للغريب لعدم خبرتة و معرفتة بيهة !

_ وضع الدفاعات عليهة جدا صعب و جنة نستعين بالبغال حتى تصعد الدوشكات و الاسلحة الي ميكدر الجندي يصعدهة و هو ديتسلق التلال ،، و المشكلة ان البغل بي شغلة متكدر تضغط علية بالشغل لان بس تضغط علية يذب نفسة من فوك الجبل و ينتحر و هذا جان شي غريب علية بصراحة !! و يتحاسب عليه الامر على فقدان اي بغل هههه لان بالمناطق الجبلية ما عندك سيارة تصعد تلال منحدرة بشكل قوي و ماعندك جندي يكدر يشيل عدة اسلحة ثقيلة مثل الدوشكة او العتاد الثكيل او الاكياس الرملية او العوارض الخشبية و حتى ادوات العمل الي تحتاجهة بحفر الخنادق و الملاجئ و يصعد التلال منحدرة بشكل قوي !! فللسرعة و السهولة جان يمدونة بعدد من البغال و نصعد عليهة المعدات و نريحة لازم من يتعب نخاف لا ينتحر و نتحاسب علية .

* كملنة نصب الخطوط الدفاعية بشكل كامل خلال يوم واحد و مدونا بقوات ثانية بس ما كان عددها مناسب حتى ع الاقل نوازن الكفة !! ( طبعا اللواء المدرع السابق ودو اعادة هيكلة و تنضيم بعد ما خسر ٧٠ بالمية من قوتة و جابو بدالة لواء مدرع ) وصلنة لواء مشاة و لواء حرس حدود !!؟ اني كلت بداخلي احنة هسة كتيبة دفاع جوي و لواء مشاة مغاوير و لواء مدرع ( يعني بي دبابات ) و عدنة دعم سريع من القوات الخاصة و دزولنة لواء مشاة كلش حلو !؟ زين حرس الحدود مو ذيج القوة حتى يكدرون يقاتلون بهيجي مناطق و على الخط الامامي !؟ يعني هيجي ديذبوهم بحلك المدفع و همة اصلا مو للقتال المباشر !! همة ممكن تخليهم كدعم بمعركة بسيطة !! احنة نحتاج قوة اكبر من ٤ الوية و كتيبة دفاع جوي !! كدامنة فرقتين !! يعني عددهم تقريبا ضعف عددنة !!