#مذكرات جندي مجهول
#للكاتب عبد الله محمود
* بعد انتهاء المعركة ركضت على الجندي المقطوعة ايدة و اني جنت شاد ايدة حسب معرفتي و خسب المتوفر عندي حتى اوكف النزيف و تم ارسالة الى الطبابة العسكرية بعدها اعفي من الخدمة .
بلش كل جندي يفحص نفسة اذا جان مصاب بدون علم لان احيانا شضية صغيرة تصيبك و متحس بيهة نتيجة ارتفاع الادرينالين بالمعركة و الحمد لله ماكو اصابات ثانية .
* جريت الاسرى الطيارين الايرانيين اثنينهم و جان اكو واحد مكسورة رجلية و الثاني مكسور ضهرة ميكدر يتحرك فاخذتهم اثنينهم و من شفتهم
تذكرت النايب ضابط الي تفجر راسة كدامي
و بدون وعي حطيت الطيار و بلشت اضرب بي بوكسات على وجهة و الجنود بس يباوعون علية و اني اضرب و اغلط الى ان صحيت ع نفسي و رجعت لكيت نفسي كاسر سنونة الامامية و شاك حاجبة !!
بعدين رجعت ورة و جريت مسدسي حتى اموتة
بس نضرة الخوف الي بعين الطيارين وكفتني و ماعرف اكو شي وكفني هل هو شي ديني ؟ لو انساني ؟ ما قتلتهم و رجعت المسدس و بعدها سلمتهم للقيادة .
* سمعت اطلاق نار من جهة الرعيل الثاني الي بقربي على بعد نص كيلو و عرفت ان الطيار الي وكع عدهم قتلو لان آمر الرعيل جان احد ابناء عشيرتة من ضمن الرعيل الثالث الي استشهد معضمهم و تحول الموضوع الى عشائري و عاطفي فقتلو الطيار الاسير ،
ماستغربت لان اني شخصيا جريت مسدسي بسبب نايب ضابط و جنود علاقتي بيهم لا تتخطى ٣ ايام فشلون اذا جان هذا الشخص عندة طابع عشائري و استشهد احد افراد عشيرتة اكيد راح يفكر ينتقم .
* سحبو الكتيبة مالتنة لاعادة الهيكلة نتيجة فقدان رعيل و وصلونة الى معسكر قرب كركوك و بعدها آمر الكتيبة ارسل كتاب ذكر بي مجهودي بايقاف تقدم طائرات العدو و مساهمتة في تشتيت القوة و غيره من هالكلام و طبعا قدم اشادة بمجهود الشهيد آمر الرعيل الثالث و بكل من آمري الرعيل الثاني و الرابع و بعدها حصلت على كتاب شكر و تقدير .
* خلال عملية اعادة الهيكلة للكتيبة كنا نسمع الاغاني الوطنية و المؤثرة و الجميلة بذاك الوقت ( عراقيين و كلنا نحمي هاي الكاع )
و غيرها من الاغاني العضيمة و طبعا اخص بالذكر اغنية فاضل عواد الي تذكرني بفترتي بالمستشفى ( يمه ) و هواية غيرهن لان اغاني ذيج الفترة يحتاجلها مقالة وحدها صدك جان الهة دور و تأثير قوي .
* ما تأخرت اعادة الهيكلة فخلال اسبوعين تم اعادتنا الى قاطع غيلان غرب و جان تقدم قواتنا بطئ بسبب السهول و السلاسل الجبلية الصعبة بس برأيي هو ما كان تقدم صحيح ابدا يعني لمن جنت اصفن ع الخريطة !! احنة وين رايحين !؟ احنا داخلين بشكل لسان داخل الاراضي الايرانية !! يعني تصور وياي انتة داخل اراضيهم بمسافة ٨٠ كيلو بدون ما تأمن الجهة الشمالية و الجنوبية !! يعني يكدر يحاصرك بكل سهولة !! طبعا مالك حق تعترض ع الخريطة انتة بس مهمتك تنفذ الاوامر .
جان كل همي وين راح يذبونة ؟
يا مكان راح نلزم هالمرة ؟
هم راح اشارك بهجوم لو لا ؟
اني ماريد !
يكفيني الي شفتة بهاي المعركة !! هم اكو معارك اقوى راح ادخلهة !؟
يا رب بس يخلص هالشهر على خير و تجي اجازتي والله تعبت .
أنت تقرأ
مذكرات جندي مجهول
Ficción históricaقصة واقعية بكل تفاصيلها ،، كل احداثها و حواراتها واقعية ما عدا اسم بطل القصة و اسماء عائلته و كذلك ارقام الوحدات العسكرية ساتجنب ذكرها على حقيقتها حفاضا على خصوصية بطل القصة و تلبية لرغبته ، تركز القصة على ما مر به بطل القصة في الحرب العراقية الايرا...
