#مذكرات جندي مجهول
#للكاتب عبد الله محمود
* شغلت السيارة و حضرت نفسي داطلع للبار حتى ألتقي بالولد ابو الواسطة
جنت امشي بالسيارة و شريط ذكرياتي يمشي وياي
مرات متعرف قدراتك الا توكع باختبار حقيقي !!
منو جان يتوقع ان هذا الضابط الاحتياط الي الدورة مالتة ٦ أشهر و اصلا ممكمل ٦ اشهر
يطلع منة كل هذا !؟
اني نفسي ممصدك الي طلع مني
اخطط و اصد هجوم و اشارك بمعارك دفاع جوي !!
صحيح جان اكو الاحسن مني بس هذولي ضباط جيش مطوع يعني هي هاي شغلتة !! اما مقارنة بضباط الاحتياط بالقاطع مالتي اني جنت الاحسن !!
لا والي صفني من سلطان هاشم كال علية
( هذا الاحتياط عندي احسن من هواية ضباط نافخين نفسهم ع الخالي بلاش )
الحياة الي عشتهة اني من تصفنلهة راح يجي ابالك ان هذا شخص ميتحمل هيجي شي و لا يكدر يكمل معركة وحدة و احتمال يفلت اصلا بس الي صار عكس توقعي اني شخصيا
صحيح للتدريب يفيدك من ناحية التعود على سوط الاطلاقات و شلون ترمي و شلون تحدد الهدف و شلون تتبع الطيارة و شلون تسوي خط ناري ( طريقة دفاع جوي يدربونة عليهة ) يعنس الاساسيات كلهة من اجزاء المدافع الى طرق الدفاع الى طريقة توزيع القوة الى آلية عمل المدفع كلشي يعلموك علية و تتدرب علية و تضبطة
و الباقي عليك
التدريب مينطيك شجاعة ابدا
التدريب يعلمك كلشي حتى ع الخطط ينطيك دراسة مفصلة و يقويك جسديا بس الشجاعة و الاجتهاد من عندك انتة
المعارك الجوية كلهة مو مفاجئتني بكدما تفاجئت لمن سويت خطة صديت بيهة الهجوم البري بغيلان غرب
الهجوم الي انباد بي لواء عراقي كامل !!!
الهجوم الي انقطع بي راس العقيد الله يرحمه
شلون صديتة ماعرف شلون خططت و اجتي ابالي هيجي افكار ماعرف !! بس سويتهن
معناها المعدن الحقيقي للانسان يطلع لمن يكون على حافة السقوط
* وصلت للبار و وكفت برة كاعد بالسيارة ورة ما راجعت بذاكرتي كل الي مريت بي
اباوع على معن و على الضابط الي كاعد ويا
اني متردد
هذا الي سويتة كلة بعد محد يعترف بي اذا كملت هاي الواسطة
أنت تقرأ
مذكرات جندي مجهول
Historical Fictionقصة واقعية بكل تفاصيلها ،، كل احداثها و حواراتها واقعية ما عدا اسم بطل القصة و اسماء عائلته و كذلك ارقام الوحدات العسكرية ساتجنب ذكرها على حقيقتها حفاضا على خصوصية بطل القصة و تلبية لرغبته ، تركز القصة على ما مر به بطل القصة في الحرب العراقية الايرا...
