#مذكرات جندي مجهول
#للكاتب عبد الله محمود
* حسيتهة آخر نضرة ! آخر مرة اشوف عائلتي بصورة !
_ صورة احتفضت بيهة لأن جنت حاس راح يجي هيجي يوم الموت يكون بي شبه محسوم .
_ نشفت دموعي الي نزلت بصمت و بدون ما احد يشوفني و دخلت و لكيت الكل جاهز بس نضرة الخوف و التردد واضحة بعيونهم و بكلامهم .
_ خلص مليت و تعبت و كل هذا صار مو مهم عندي ؛؛ اني قررت و حلفت ما أهرب من معركة ، و رتبت اموري وية العريف و النايب ضابط حتى يقتلوني اذا تأسرت و كذلك رئيس العرفاء اتفقت ويا و اجتمعنة كلنة على نفس الهدف ( منروح أسرى ) و على نفس الطريقة ( موتوني قبل ما ياخذوني أسير )
_ الي جان مخوفني ان الكل يستشهد و أبقى وحدي و اتصوب و ياخذوني أسير لان مرات يتعمدون ميقتلون الضابط حتى يستجوبو
* رحت للعقيد ناظم و هو ديتابع تحركاتهم كتلة :
" سيدي انطي بلاغ للمقدم سلطان هاشم بخصوص الدعم ؟
العقيد ناظم : اي مو اني منتضرك تكلي استاذ فاروق ، سلطان صار عندة علم بالموقف بس ميكدر يفيدنة بشي هسة .
اني : ليش سيدي !! بس يدزلنة دعم حتى على الاقل تتساوى الكفة بينة و بينهم !
ناظم : الايرانيين مسوين هجوم بالمناطق الي ورانة على الجانب الشمالي من جهة سربيل زهاب و على الجانب الجنوبي من جهة سومار حتى يكطعون الجبهة و يفصلونة احنة كلنة عن قوات الدعم و نصير بمصيادة .
اني : زين سيدي همة ليش ما بدو الهجوم مالتهم ليهسة شمنتضرين !!؟
ناظم : مو هيجي الفكرة مالتهم ، همة مايريدون يهاجمون و يخسرون قوات حتى لو جانو يكدرون يسيطرون ، همة هسة منتضرين الهجمات الخلفية الشمالية و الجنوبية تكدر تقيد الامدادات العسكرية و الازراق و تمنعهة ان توصل النة حتى يضمنون شغلتين :
الأولى ميخسرون جنود بالهجوم
الثانية يجوعوك و يتعبون نفسيتك حتى يكون القتال ضدك سهل و هم حتى يخلون فكرة الاستسلام عندك و يحصلون على اكبر عدد من الاسرى
اني : زين سيدي احنة ليش ما نقرب الرعيل الثاني و الثالث و الرابع يمنة و السرايا الي بصفهم هم نقربهة ؟ و هيجي كدرنة نسوي قوة صعب يمرون منهة ؟
ناظم : اي حتى ننطيهم مجال همة و سمتياتهم يعبرون من الشمال و الجنوب و ننحصر حصرة مرتبة !! غير احنة موزعين هاي الوحدات و وية كل وحدة فوج حتى خاف يتسللون بين الجبال و هم خاف تهاجم سمتيات من الجهات و اذا صار انزال خلفنة همة يصفو؟! شبيك فاروق !!
اني : ماعرف سيدي انتة أدرة
ناظم : تعال راقب شديصير بينما اتصل و اشوف وضع مايخور و المناطق الي ورانة اذا كدرو يصدونهم معناها فشلت خطتهم
أنت تقرأ
مذكرات جندي مجهول
Historical Fictionقصة واقعية بكل تفاصيلها ،، كل احداثها و حواراتها واقعية ما عدا اسم بطل القصة و اسماء عائلته و كذلك ارقام الوحدات العسكرية ساتجنب ذكرها على حقيقتها حفاضا على خصوصية بطل القصة و تلبية لرغبته ، تركز القصة على ما مر به بطل القصة في الحرب العراقية الايرا...
