مذكرات جندي مجهول

١٠ _ شر البلية ما يضحك

#مذكرات جندي مجهول
#للكاتب عبد الله محمود

وصلت للجبهة و اني اكول بداخلي :

شبسرعة !!

شبسرعة خلصت اجازتي و راح ارجع للدم و الموت

و ارجع لاصوات المدافع و القصف و الاشتباكات

ارجع لصياح المصابين و الخوف من المجهول

رجعتلج غيلان

رجعت للقرف و التعب و التوتر و الاجواء القذرة

* بعد التحاقي بالجبهة كالو القيادة ان قواتنا صدت هجوم شرس من الجيش الايراني طبعا من الاخبار سمعتة و فهمت تفاصيلة اكثر من القيادة و طبعا ماكو دولة تنطي خسائرها بالمضبوط لازم تقلل من خسائرهة حتى ميصير إحباط للشعب و الجيش بس تكدر تعرف الخسائر من توصل للجبهة  ،، وصلت للوحدة و شفت خسائر جبيرة جانت يعني صد الهجوم الايراني كلفنة شهداء هواية و خسارة بالمعدات و الهجوم الايراني كان مستمر لمدة ٤ ايام !! و بعدها وقفو الهجوم لانه فشل باختراق الدفاعات العراقية ،، استلمت الرعيل مالتي من البديل الي صار بمكاني وقت اجازتي ( كان ملازم اول اسمة عبد الحميد مطوع مو احتياط )

ملاحظة عسكرية مهمة : معضم الجنود الي يكونون تحت امرة ضباط الاحتياط هم كذلك جنود احتياط لانو انتة لمن يسحبوك للتجنيد اذا جنت مخلص جامعة يدخلوك دورة ضباط ( و اذا ممخلص جامعة يذبوك جندي كبل ) و بس تنجح بالدورة يخيروك تريد تصير جندي لو ضابط ؟ الجندي الاحتياط وقت خدمتة اقل من الضابط بس الضابط راتبة اكثر و عندة امتيازات ثانية من انواط شجاعة الى كتب شكر و تقدير كلهة للضابط ماعدا الجوائز المالية الي تاخذهة بعد كل نوط شجاعة بس بنفس الوقت هو اكثر عسكري معرض للخطر لان العدو ميشيل هم للجندي مثل الضابط و الضابط يكون مستهدف بالقصف و الهاون و حتى بالأسر هو اقرب للموت ، و من المتعارف عليه بذاك الوقت ان ضباط الاحتياط سنتين خدمتهم و الجندي سنة واحدة فقط حتى و ان كان البلد بحالة حرب ،، فهواية ناس من سحبوهم ما قبلو يدخلون دورة ضباط و همة خريجين جامعة ( كالك اني اروح جندي و اخدم سنة و ارجع لبيتنة احسن ما اروح ضابط و ابقى سنتين بالحرب ) و اكو بيهم دخلو دورة و نجحو و هم اختارو يصيرون جنود و اكو بيهم رسبو بالدورة و خلوهم جنود و اكو بيهم ما قبلوهم لان بالفحص الطبي يكشفون ع جسم الواحد و اذا طلع عندة تشوه خلقي بسيط مثل تقوس الضهر او تقوس بالقدم و غيرهة كبل يكلة انتة مترهم ضابط خلو جندي و حتى الكصير اذا جان طولة ١٦٠ او اقل كبل يخلو جندي ،، فاني من اجتازيت الفحص و نجحت بالدورة اختاريت الضابط لان ماحسيت فرق بين السنة و السنتين و لا حسيت اكو فرق بالخطورة ( ماجانت عندي ذيج الخبرة بالعسكرية و كل الي اعرفة ان الضابط اثكل من الجندي ههه) المهم الي صار شنوو ؟؟ صدر امر ان ميرجع احد من الاحتياط سواء جندي او ضابط و يبقون بالحرب الى ما تنتهي و خطية الي اختار يصير جندي انضرب بوري من هذا المرتب .