مذكرات جندي مجهول

١٢ _ آخر المعاقل

#مذكرات جندي مجهول
#للكاتب عبد الله محمود

* انتهت إجازتي مع بداية الشهر السابع و رجعت للرعيل مالتي و ماكو اي بادرة تبينلك ان الحرب راح تنتهي .

اقرب طريقة اوصفلكم الي ديصير بية :

مثل الي داخل غرفة ضلمة و ماكو اي ضوة يدليك على طريق الخروج ! كل جندي تقتلة يبعدك عن اهلك كل شخص يطلع اخر انفاسة كدامك و يموت تحس ان الدور الجاي عليك ! الموت ديتقربلك بكل يوم خطوة حتى ياخذ روحك وية كل قطرة دم تنزلهة و وية كل جندي تطلع روحة على ايدك و وية كل صديق او زميل يموت كدامك ، اتوقع هذا ادق وصف لحالتي .

* الجيش الايراني بعد ما خسر تقريبا ٦٠% من قوتة الجوية خلال اقل من سنة قرر يستخدم القوة الجوية الي باقية عندة على الجنوب اكثر من الوسط و الشمال و طبعا اقصد ( الطائرات الحربية مو السمتيات ) فمن هاي الناحية جنة مرتاحين بس مثل ما نكول الراحة متكمل بهيجي حرب مدمرة ،، اجتنة اوامر من قادة الفرق و آمر الفيلق ان يتم استخدام الوحدات المقاومة للطائرات كوحدة مشاة مساندة يعني بهاي الحالة صرنة نقاتل جو و بر .

* اول ما استلمت الرعيل مالتي و بعد ٥ ايام بالضبط طلبو من عدنة ان نترك الملاجئ و نتحول كخط مساندة لقوات الخط الامامي يعني وراهم بالضبط و الدافع من هاي الاوامر ان ايران دتستخدم الي باقي من مقاتلاتهة بالجنوب اما بالوسط و الشمال فهي راح تعتمد ع القتال البري مدعوم بسمتيات ،، تركنا مواقعنة و رجعنا للحضائر و السواتر و جان التوتر هو الشي السائد ،، راح ندخل كصنف مشاة !؟ يعني خط أول احنة !! بس دائما جملة الحمد لله متفارك لساني يعني قابل اني جنت مرتاح ورة ؟!

_ تجهزت قوات اللواء كلها و القادة اجتمعو بنفس اليوم حتى يسوون خطة هجوم للسيطرة على اخر معاقل الجيش الايراني بغيلان غرب الي تبلغ مساحتهة تقريبا ٧ كيلومتر .

* وصلو قادة كبار و جان اول الواصلين هو المقدم سلطان هاشم و جان آمر لواء بذاك الوقت و وصل العقيد ناظم حتى يشوفون وضع الجبهة الامامية و مرو على لواء المغاوير الي كدامنة و مرو على كل رعيل و سلمت عليهم ، خلصو استطلاع و صعدو يتابعون الوضع و جانت علاقة ناظم وية سلطان جدا قوية ،، جانت من طباع العقيد ناظم ان الجكارة يحركهة بحلكة يجيبهة يمنة و يفرهة يسرة :

سلطان هاشم : هاي شنو المصاصة الي مخليهة بحلكك ! دعوفهة و خلينة نشوف انسب مكان نعبر منة

ناظم : هسة انتة غاثتك جكارتي !

عقيد ناظم اخذ الناضور ديباوع على قطعاتهم و يفر بجكارتة :
دشوفهم شلون مكومين مثل النمل على الجهتين ! هااا و مسوين حركة على اساس منطينة مجال نعبر للجبل الاوسط من جهة الوادي ههههه حتى نعبر و يحاصرون القوة هناك ايي .