مذكرات جندي مجهول

ملاحضات عسكرية قبل البداية

الرعيل : هي تسمية تخص صنف الدفاع الجوي
عدد افرادها ٥٠ عسكري اضافة الى الضابط آمر الرعيل و يحتوي الرعيل على ٦ مدافع مضادة للطائرات

كل بطارية دفاع جوي تحتوي من ٣ الى ٤ رعيل و تحتوي على صنف صواريخ مخصص للطائرات و رادار يكشف الطائرات .

و كل كتيبة تحتوي بحدود ٤ الى ٦ بطاريات و حسب تعبئة الجيش فكل بلد تختلف تعبئتة عن الثاني
______________________________________

الجيش مكون من عدة فيالق و كل بلد له تعبئة خاصة :

الفيلق يحتوي من ٣ الى ٥ فرق
الفرقة تحتوي على ٤ الوية
اللواء يحتوي من ٣ الى ٤ افواج
الفوج يحتوي من ٤ الى ٦ سرايا
السرية تحتوي من ٤ و يصل الى ٨ فصائل
الفصيل : يحتوي من ٣ الى ٥ حضائر
الحضيرة : تحتوي من ١٠ تصل الى ١٥ جندي حسب التعبئة

الرتب العسكرية للضباط من الاعلى الى الاقل :

مشير ( مهيب بالجيش العراقي السابق ) _ فريق أول _ فريق _ لواء _ عميد _ عقيد _ مقدم _ رائد _ نقيب _ ملازم أول _ ملازم .

طبعا تسمية ركن مرات تسمع ( لواء ركن او مقدم ركن ) تعني ان الضابط مخلص كلية او دورة اركان حربية الي مدتهة تكون سنة أو اكثر سابقا و لازم عندة خدمة ٩ سنوات بالجيش على اقل تقدير يلا يقبلو بالدورة ولازم عندة خبرة عسكرية ميدانية ،، سابقا كانت من النوادر ان تشوف رتبة (رائد ركن) لان الحصول على شارة الركن يحتاجلهة دورة و خبرة ميدانية لهذا السبب تلاحظ ان كلمة ركن تجي وية المقدم و ما فوق اما الرائد فنادرا ما تشوف رائد ركن و ما مرت علية ابدا بالجيش السابق بس حاليا ماعرف لان النضام العسكري تغير ،، ميزة شارة الركن هي القيادة يسمحولك تقود لواء حتى لو كنت مقدم بس المهم عندك شارة ( ركن ) ، اما بدون شارة ركن فميزة القيادة تروح من عندك

____________________________________

ملاحضة عسكرية مهمة : نادرا ما تشوف طائرة حربية تطلع علمود تقصف جنود !! الطائرة الحربية تطلع حتى تدمر دبابات ضمن لواء مدرع لو تدمر دفاعات جوية لو تقصف مراكز قيادة بيهة قادة برتب عالية لو تقصف مطارات عسكرية ، ممكن تقصف مدن حتى تحقق مكاسب نفسية يعني كلشي تسوي الا قصف المشاة نادرا ما تسوي لان بالعسكرية صاروخ الطائرة الي سعرة غالي لازم من ينفجر يحقق مكسب عسكري واضح مو ينفجر على جنود او ضباط برتب صغيرة ممكن تعويضهم ،،
راح تشوفهة تستخدم رشاشاتهة عليهم بس مو صواريخهة .

ملاحضة رقم ٢ :

الحرس الجمهوري هي قوة تنفذ مهمات خاصة
يعني مو شغلتهة تمسك ارض لا هي بس شغلتهة ان اذا صار هجوم ايراني و تقدمو هي تجي تهاجمهم و ترجعهم او تصير كقوة اسناد بالدفاع
،، تم ادخالها و استخدامها بالحرب في نهاية عام ١٩٨٢

القوات الخاصة : هي قوة مشاة ما عدعم دبابات يعني و الدبابات ابي تجيهم فهي تكون دبابات اسناد يعني مو تابعة للواء مالتهم

ملاحضة رقم ٣ :

لواء مدرع يعني لواء يحتوي على كتيبة دبابات

لواء مشاة يعني لواء بس جنود مابي دبابات

اما كلمة جحفل : معناها لواء بي كلشي من مشاة الى دبابات الى هندسة عسكرية الى كتيبة دفاع جوي الى وحدة ميدان طبي ( يحتوي على كل الاصناف )

__________________________________

الدوشكة : سلاح رشاش ثقيل و يمتاز بقوتة و ثقل وزنه و يحتاج ان يتم نصبه على ارض او ساتر لان الارتداد مالتة قوي و هو سلاح ثكيل بالوزن ، يوصل مداه الى اكثر من كيلوين بالاشتباك الارضي ،، و يمكن استخداهه ضد الطائرات اذا كانت الطائرة على مدى كيلو و نص راح يكون فعال في هذا المدى اما المدى الابعد فممكن يسبب بعض الاصابات و المشاكل لكن مو بأذى كبير ، مشكلتة هي بالثقل يعني احيانا يحتاجلة شخصين حتى يحملو سرعة الرمي توصل الى اكثر من ١٠٠ طلقة بالدقيقة ،، جانو ينصبو فوك الدبابات باغلب الاوقات

مدفع ٢٣ ملم : مدفع مضاد للطائرات يوصل مداه بالاهداف الجوية الى كيلوين و يكون فعال و مدمر بالكيلوين للطائرات اما اذا اكثر فيكون مسبب لبعض الاضرار بدون اذى كبير طبعا هذا المدفع فازم يتم نصبه على الارض بقواعد مثبتة بالأرض و يتم حمله بواسطة ناقلات خاصة و هو يرمي ٢٠٠ طلقة بالدقيقة الوحدة

ار بي كي : سلاح رشاش للمشاة ،، الثكل مالتة تقريبا ٤ كيلوات أو اثكل ،، ممكن استخدامة بدون تنصيب و نكدر نكول هو مقارب للبيكيسي جدا بس الفرق ان البيكيسي اثكل بشوية و اقوى و مداها ابعد بشوية . يوصل مدى ال ار بي كي الى ٩٠٠ متر كمدى فعال

السمتية المقاتلة : طائرة هلكوبتر مقاتلة تحتوي على رشاشات خاصة و صواريخ ،، بالحروب تستخدم للقتال ضد المشاة و الدبابات و تستخدم كدعم بس ما يتم استخدامهة كقوة رئيسية بالضربة الجوية لكن يكون دورها اسناد فقط .