_______________
هيه ياللي غرك الحسن واطغاك الجمال
والله ان اموت ماشفت لاوصافك شبيه
______________
" عند الرجال "
طلع مالك وهو مايشوف الا طيف ضي الي يمر قدامه جلس عند عبدالعزيز بالمجلس
عبدالعزيز : هيه وش فيك سرحان
مالك : ياويل قلبي ياعبدالعزيز
عبدالعزيز : بسم الله على قلبك وش فيه
مالك : يقول البارحه ريح الغلا داخلي هبّ
ومن هب واغصان المشاعر جذبها
اول اكف خطاي عن سكة الحب
والحين طحت وطيحتي من سببها جتني
تصب الحسن في ناظري صب
حتى تباشر كل عرق وشربها
عبدالعزيز بتعجب : يوههههه لا شكل طحت ومحد سمى عليك طلعت شاعر وحنا ماندري من سعيدة الحظ
مالك : اي والله طحت ومحد سمى علي عاد عن سعيدة الحظ ماتدري يمكن خيل
عبدالعزيز وهو يضحك : خيل وكل هالقصيد لو انه انك ضي ماقلت هالقصيد
مالك : خلها على ربك بس
" في مجلس الحريم "
ام ناصر جارة ام مالك : ماشاءالله مين هالحلوه ياام مالك
ام مالك : هذي بنت جارتنا ام محمد
ام ناصر : لا عجبتني تسمحين لي ياام محمد اخطبها لولدي واضح سنعه
ام محمد : ياام ناصر للحين بدري والخطبه لازم تعارف بالاول والبنت صغيره للحين لاحقين على الزواج بدري مو زي زمان الحين غير
ام مالك : اي والله إنك صادقه اول من يوم تبلغ يزوجونها
ساره وهي تهمس لضي : عاد يوه لو تشوفين ولدها استغفرالله يفشل ولحجي انا اقول اخوي اهون واحلى
ضي : لا هذا ولا هذاك كلهم لحوج
انتبهت الهنوف عليهم وهي تضحك : اقول ياام ناصر ليش ماتاخذين ساره لولدك ضي لاخوي ( تمزح الهنوف
ام ناصر : يوه ساره من زمان خاطبتها لولدي بس ولدي مايبيها
ساره وهي تهمس لضي والهنوف: من زينه ولدهم اعوه تراها كذوب تحسب ولدها محور الكون انا الي رفضت وبوجها قدام امي
ضي وهي تضحك : متى طلعتي جريئه كذا
ساره : من يوم تغير مالك وطبعا من صاحب قوم ٤٠ يوم اصبح منهم منك ياست الحسن والدلال
ضي : احمدي ربك فعلت بك خير
الهنوف وهي تضحك : لو ماصاحبتك تلقين اليوم هي زوجته
ساره وهي تشمق لهم : يوه خلاص يافله اصلا ماراح يرضون اهلي اني اتزوجه لسى انا بعمر الزهور
ضي وهي تضحك : خلاص لاتصيحين
"رجعوا كلهم لبيوتهم "
ضي صعدت فوق تبدل وبعدها تنزل تتسحر
انسدحت على سريرها وهي تفكر
ياربييي خلاص ياضي شفيك صرتي خفيفه كذا مو من زينه لايغرك شكله
استغفرالله نزلت وهي تتسحر وتجهز كالعاده البخور وجتهم موضي بتنام عندهم لان زوجها مسافر عشان شغل
ضي : هلا بشوقر مامي
موضي : ماعليك ماجبت الميك اب حقي هالمره انا الي بزرف منك
ضي : حلالك كل مكياجي
موضي : اي عشان بعدها اردها لك ومااقول شي
دخل نايف عليهم : وش فيها كلكم خواتي لو زرفتم من بعض حلالكم
موضي وهي تضحك : اختك الله يصلحها تزرف ولا ترجع
ضي : تجيني التهايم وانا نايمه من متى صار كذا عشانك اختي بسامحك احزن طيبه وعلى نياتي
موضي وهي تضحك : مايحتاج تسامحين امزح يابزر لا تصيحين
ضي وهي تضحك : اعرفك واعرف حركاتك
______
ابيك وارجع ابيك ... تقول وش جابك
ياابن الاوادم ... ترا مليت المح لك
انا اعزك واحبك واعشقك
دخل ابوهم وهو يسلم اسمعوني ترا الحين بيجي محمد والهنوف يتسحرون
الكل : حياهم الله
نايف وهو يضحك : يوه بيجي الحب حق بنتك ياموضي لقاء الاحبه
موضي : يخسي بنتي ماتاخذه هو يغريها بالعابه
ضي : وهي خفيفه والي تاكلها المسكينه سحاب
دخلوا الهنوف ومحمد وركض عساف يوم شاف غزل وضمها
وسحاب ضمت ضي
نايف : شفتوا شفتوا بس هالمره جت من عساف اشوا انه مو من غزل عشان ماتقول موضي يغري بنتي
موضي : قلت لكم بنتي مسكينه هو الي يتعلق بها
محمد وهو يضحك : وش فيها احسن من انه ياخذ غريبه ولدي خلوه يستانس بنت عمته
موضي : لا يكون بنتي تاخذ ولدك
محمد : وهو فيه غيره ولا بعد بخليه ياخذ اربع
موضي : يويلي ويلاه اربع على بنتي من الحين رافضين
نايف : مااتوقع انه اصلا يشوف غيرها من كثر الحب
ضي : وسحاب مثل عمتها ماتبي تاخذ احد
الهنوف : اكيد بنتي مثل عمتها فارسه وماتاخذ الا الرجال المزيون
ضي : اقول لك انا وسحاب عزابيه للابد
تنحنح ابو محمد : هذا اخر شي بيصير ان الحرمه ماتتزوج لايكون ناويه انك ماتتزوجين
تنتح عبدالعزيز وهو يعرف ان ابوه بيقلب السحور فطور عليهم : يبه باقي على الاذان نص ساعه يلا بنودي الموياء المسجد وعلى رجولنا اجر اكثر
نايف : اي يبه احسن من اننا نتأخر
ابو محمد : اول مره تقولون كلام زين عساه دوم
محمد : يبه الليله ان شاءالله بيمروني اخوياي من جده وفطورهم عندي وانتم بعد لاتسوون فطور كلكم عندي
ابو محمد : ماله داعي كلافه حنا الحمدلله بيت وكل شي وخواتك هنا يسوون الفطور والا خلهم يجون ببيتنا
محمد : يبه الله يحفظك لا كلافه ولا شي وبيتي بيتكم
ام محمد : اجل خل الحريم عندنا والرجال ببيتك ومنه نساعد هنوف
الهنوف : لا ياخالتي ماتقصرون حنا مجهزين من زمان انا ومحمد مانحتاج الا ان بيتنا ينور فيكم
ابو محمد : لعيون هنوف تكرم مدينه اجل توكلنا على الله يلا بنقوم نروح المسجد
خرجوا الرجال وضي وموضي يساعدون العامله باشغال البيت والهنوف وصلها محمد وراح المسجد
أنت تقرأ
"تِمنيت الخير وجيتني من الله "
General Fictionبسم الله الرحمن الرحيم ✨ الكاتبه : نهلاء آل صالح 🐎🤍 صلوا على النبي قبل تبدأ بالروايه ✨ " اول روايه لي واسأل الله ان تنال اعجابكم ✨ سبحان الله وبحمده سبحان الله العظيم 🌷💕 لا ابيح النقل بدون حقوق 🤍
