"تِمنيت الخير وجيتني من الله "

Part 20

_____________
انت والله حبيبي وانت والله داري
إن نظرة عيوني يم غيرك جماله
ماانقطع سيل حبك بالمعاليق جاري
_______________
وصلوا البيت
ابو محمد : نورت الدار بضي العين
ضي : مابعد نورك نور
ابو محمد : هو نايف سيارتك وينها
نايف : هذي سيارة مالك وسيارتي تعطلت فينا وماقصر مالك عطانا سيارته وودى السياره
ابو محمد : وسيارتك ليه ماتصلحها تنتظر الولد يصلحها
نايف : لا ماعليك بروح اشوفها واودي سيارة مالك
راحوا كلهم بيت ابو مالك للعشاء وساره نادت ضي تجي للغرفه
ساره : هلا هلا الحمدلله على السلامه اشتقت اشتقت
ضي : الله يسلمك مسرع تشتاقين
ساره : احد مايشتاق لضي مابعد الشوق لضي شوق
ضي وهي تضحك : خلاص اسكتي احرجتيني
ساره : شوفي شوفي كيف مخبيه وجهك لهدرجه تستحين
ضي وهي تضحك : اقول خلاص قلنا خلاص
ساره بمزح : طيب لو انه من الي ببالي تستحين
ضي وهي تمثل انها فاهيه: مين الي ببالك
ساره : واحد ضي عيونه ضي
ضي وهي عارفه وش تقصد : اها قصدك نايف اكيد لا ماراح استحي
ساره وهي جاها ايرور هي تقصد مالك بس ضي حشرتها بالكلام وجابت طاري نايف وسرعان ماحمر وجهها : هاه مدري خلاص خلاص ماعاد اسأل
ضي وهي تضحك : الحمدلله لا عاد تسألين هاه ذي الي تقول شوفي وجهك كيف مستحيه انتي وجهك صار طماطم يويسي ويساه
ساره : خلاص خلاص فكينا
مرت الايام وقبل العيد بيومين وصلوا عائلة غند فقط العمه حصه ماراحت المدينه لان اهل المدينه بيجون الديره
ضي : هلا والله نورت المدينه ياغند اشتقنا
ساره : اي والله تو مانورت المدينه
غند : النور نوركم كيف حالكم
ضي : تمام الحمدلله وانتي
غند : دامكم بخير بخير
ضي : يابنات ترا بنعيد بالديره ساره بتروحون معنا
غند : تكفين قولي انكم تروحون تعودت عليكم بالعيد
ساره : الصدق يارب اتمنى سمعت ابوي يقول ايه بنروح لاننا ماراح نروح ذي المره لخوالي
ضي : الله وناسه عاد الديره على ان عجايزنا ينقدون بس وناسه حتى للبقاله تمشين على رجلينك بس من بيتنا شوي بعيده
ساره : الله احب اجواء الديره احسها غير مع اننا ماعندنا ديره بس اشوف مقاطع احسهم غير عننا
غند : عاد تصدقين على ان حياتي كلها في جده بس احب العيد لاننا نروح الديره مره تجننن خصيصا لما نروح البقاله واحيانا يلحقنا كلب واحلى شي سمره ببيت الشعر بالحوش او بالسطح
ضي : اخ يامحلا الديره
كملوا سهرتهم البنات ببيت ابو محمد وساره راحت
"اليوم الثاني بيت ابو محمد "
صحت غند الساعه ٣ بتشرب موياء وترجع تنام الي نايمه مع ضي بالغرفه : ياربي الحين كيف اروح المطبخ لحالي اخاف من الظلام وكيف اصحي ضي اخاف ازعجها اقول بس خليني اخذ الجوال واشغل الكشاف واتكل على الله
راحت عند المطبخ الي كان ظلام وكان بيدها جوالها عشان تشغل الفلاش منه
عند عبدالعزيز الي ساري من الساعه ١٠ وتو يوصل بس ماعلم احد بيسوي مفاجأه الصبح لاهله وصل واتجهه لغرفته الي جنب المطبخ بس لاحظ الفلاش شغال وفيه شخص ومستحيل انه عاملتهم لانه سافرة من شهر وهو متعود على ضي تصحى ٣ تصلي الوتر بس ضي ذي المره ماصحت لان عليها عذر شرعي
عبدالعزيز الي حط يده على وجه غند وهي معطيته ظهره ومن الظلام ماشاف زولها زين : ياضي العيون ابشري بالسعد ابو العز وصل
غند الي قمطت ام العافيه وماردت ولا تحركت عبدالعزيز استغرب وسحب جوال غند الي على الطاوله وشغل الفلاش وكانت قدامه غند الي لابسه بجامه حرير وشعرها فاتحته قام ومسكها مع يدها ولف وجهها له : ضي انتي علامك ماتردين مايمديه يكمل كلمته الا وذا الوجه مو وجه ضي كانت بنت عيونها واسعه ورموشها كثيفه وغمازتها الي تبان حتى وهي خايفه وكانت دمعتها سابقتها تبكي بدون صوت من الخرشه على طول نزل عيونه وترك الجوال ومشى بسرعه
وغند الي جلست نص ساعه تبكي بالمطبخ مشاعر متلخبطه وكانت تحسبه حرامي لين ماقال ابو العز وعرفت انه عبدالعزيز واخذت جوالها ومشت للغرفه
عند عبدالعزيز الي جلس على فراشه يهوجس انسان مايهتم للنساء ولا يهتم حتى الحريم الي متعود عليهم خواته وامه شكلها الي ابداً مانساه وركز على غمازاتها : ياربي استغفرالله استغفرالله يارجال انت علامك ارقد ارقد واذكر الله
يتقلب يمين يسار معيي يجيه نوم واخذ دفتر وقلم وكتب : انا ميزت الوضح من بد الالواني ولقيت ذودٍ تميز عن بواقيها
وقام بعدها وشق الورقه : يارجال انت مسرع حبيت هدي وش هذا ياعبدالعزيز يوم وانت ناسيها وترا بالغلط
بعدها اذن الفجر وصلى ونام
" الصبح الساعه ١٠ في بيت ابو مالك :
نزل مالك للفطور : صباح الخير
الكل : صباح النور
مالك : يبه نروح مع ابو محمد نعيد بالديره
ابو مالك : الديره ماهي بديرتنا بنجلس هنا نعيد عند عمامك
مالك : يبه عماني بنفس المدينه وكل عيد واحنا عندهم وابو محمد لو يسمع هالكلام بيزعل يعتبرنا اهله وبنروح الله يحفظك
ابو مالك : خير ان شاءالله افكر وبعدين اقرر
ساره : يبه الله يسعدك خلنا نروح الناس بتمشي اليوم مايصير
ام مالك : وشفيه اذا مانتم معيدين بالمدينه نروح الرياض
مالك : يمه ونعم بخوالي وعماني بس بنروح مع اهل ابو محمد اليوم الناس بتمشي قرر من اليوم يبه ومقاضي العيد جهزناها والسياره موجوده
ابو مالك : انا قلت اقرر والا اسحب كلامي واذا تبون الديره مانروح الا ليلة العيد العيد ترا بعد بكره
ساره : طيب بنروح نجهز معهم
مالك : يبه وهي صادقه لازم نساعدهم
ام مالك : ابو مالك وش قررت
ابو مالك : اذا كثرتوا كلام ترا اكنسل
" بيت ابو محمد "
الي لازم الكل مايتعدى ٩ الا وهو صاحي
ضي : غند يلا انزلي بنفطر بالحوش الكل معنا بس البسي نقابك واخواني لا تستحين عندهم ترا كلنا اكل
غند : يابنتي النقاب مو مشكلة بس اني اتوتر مااعرف اكل
ضي : اجل بنفطر هنا بالغرفه بروح اجيب فطور بس اسمعي جهزتي اغراضك كلها لان بنمشي اليوم
غند : اي جهزت بس دقايق انتي ليش حاطه كعب ورجلك مو متعوره وعليها شاش
ضي : بسيطه والكعب مايأثر
غند : كيف مايأثر وكعبك طويله
ضي : ترا كلها يومين وبشيل الشاش لو بيدي فكيتها الحين بس اهلي ينتبهون
قامت ضي وراحت تجيب فطور
غند الي اكلها التفكير بعبدالعزيز وتتوتر اذا شافته بدون سبب وهي تعرف انه راعي نياق واكثر شخص هادي بالعيله بس تتتوتر
ضي : يوهه ياعبدالعزيز واصل اليوم وخرشني تو اشوفه قلك مفاجأه وكذا
غند الي تحاول ماتبين توترها : اما متى وصل
ضي : بالليل بس تو يعلمنا
غند : زين تعالي يلا حطي الفطور جوعانه
بعد مااكلوا ضي اتصلت على ساره تشوف بيروحون او لا
ضي : سوير القلب هاه بتمشون والا لا
ساره الي كانت بالصاله هي ومالك يتقهوون وامها بالمطبخ وابوها كالعاده بالشغل اشر مالك لها ب لا : اء لا
ضي الي تعرف انها تكذب من صوتها : وليش ان شاءالله ؟؟
ساره الي تناظر مالك يأشر على نفسه يعني قولي مالك عيا : مالك اقنع اهلي اننا مانروح
ضي الي تحس انها القصه فيها كذب وفيها مزح للحين ماتأكدت من الحب الي بينها وبين مالك : ومين هو عشان يقنع امك وابوك
ساره : اخوي الكبير بمثابة ابوي
ضي : مستحيل بحرش عليه عبدالعزيز
مايمديها تكمل الجمله الا وتعالت ضحكة مالك الي سمعتها وقال : انا هنا الامر الناهي
ضي : عشان اسمه مالك يحسب نفسه ملك كل شي
مالك وهو متأكد انها تسمعه : اي والي ببالي مِلكي انا
مايمديه يكمل الا وقفلت الخط ضي
ساره وهي تضحك : ترا ماتسمعك
اتصلت ساره ثاني مره
ضي : نعمممم
ساره : هدي هدي امزح عليك يابنتي بنمشي معكم بس بكره ليلة العيد ان شاءالله لان ابوي عنده شغل
ضي : يلا ماعليه اهم شي انكم موجودين
مالك الي يسوي نفسه مايسمع عشان ساره وهو لو مايخاف الله مسك الجوال ورد عليها وكلمة " اهم شي انكم موجودين " خلت قلبه يرقص
قفلت ضي المكالمه وهي تبتسم
غند : من ذا مالك
ضي : واحد غثيث وشايف نفسه
غند : اي وكملي
ضي بابتسامه : يحسب اني مِلكه والصدق احسه يحب من كل قلبه بس يتحكم وانا ذا الي ينرفزني
غند : ايش دا شكل من الابتسامه انتي نفس الشعور
ضي : يخسي
غند بغمز : الله يكتب الي فيه الخير
ضي : طيب اسمعي اخواني نايف وابو العز بيروحون بسياره وحده وانا معهم وامي وابوي  والبزارين والهنوف مع محمد شرايك تروحين معي
غند : مستحيل
ضي : يابت على قولتكم لا تصيرين دلوعه خلي امك وابوك يستانسون يوم واحد مو انتي معهم بالسياره
غند: يابنتي لا
ضي الي تمثل الحزن : افا تتركيني لحالي واخواني يطقطقون علي
غند وافقت عشان ضي : بشرط
ضي : وش شرطك
غند : تكونين انتي ورا الجهه الي يكون عبدالعزيز فيها
ضي : تم تم اهم شي انتي بالطريق معي مابي شي ثاني
الكل فرحان وركبوا السيارات واتجهوا ومالك الي كان واقف برا عند عبدالعزيز
عبدالعزيز : يارجال امشوا معنا اليوم
مالك : لو بيدي كان ماشي قبلكم بس اشغال الله يعين وهاه بكره ان شاءالله وانا عندكم
عبدالعزيز : بس ماش مايصلح الطريق الا وانت معي
مالك : انت تبيني شكلك الحين اقوم واخذ السياره وامشي
عبدالعزيز : يلا تبغى شي
مالك : سلامتك استودعتك الله ( هالكلمه يقصد فيها ضي وعبدالعزيز يستودعهم الله اثنيناتهم )
" بالطريق "
وقفوا سيارة ضي واخوانها عبدالعزيز كان السواق ووراه ضي ونايف قدام والمقعد الي ورا غند
عبدالعزيز : تبغون شي من البقاله
ضي : بنزل انا وغند تكفى
غند الي كانت ماتتكلم هي تمون على نايف بس عبدالعزيز ماتعرفه مره :  اشرت ب لا
عبدالعزيز : بس ياضي شوفي البقاله زحمه انا بنزل وقولوا وش تبغون
نابف : غند اعرف وش تجيب لها تعرفين ياضي صح
غند عندها فوبيا من البالون وصوته
ضي : يوهههه جبتها انزل انت بدال عبدالعزيز
غند : عبدالعزيز انتبه نايف ينزل ماوراه الا الشر
نابف : افا ماهقيتها منك يابنت العم انا ماوراي الا الشر
غند: خلني ساكته احسن
عبدالعزيز : اخلصوا وش تبغون غند تبغين شي
غند : لا ماابغى
ضي : تبغى بس مستحيه من الطلب جيب لها بالون
غند : ياويلك تجيب الحمدلله انه ماهو الي بينزل نايف والا يجيبه
عبدالعزيز الي انصدم من ردها وهو يضحك : طيب طيب ماعليك شي ثاني تبين
غند : هاه لا لا
ضي : جيب موياء ومفرحات على اختيارك
نايف : من المفرحات بلالين جب
غند : اهجد بس