"تِمنيت الخير وجيتني من الله "

Part 19

__________________
طالع في  عيني وشوف احساسي
في فيني ترجمني
بصمت وأقرأ
كل مافيني
صفحة عمري
قصايد حب مكتوبه
كل التفاصيل فيها بينك وبيني
_________________
ابو محمد : قوم يانايف جيبها
محمد : مايحتاج نايف اصلا تعبان انا بروح اجيبها
"عند مالك بالطريق"
راجع للبيت شاف بقاله وجمبها مجموعة اطفال عددهم ٨
والفرحه مو سايعته لانه تطمن على ضي وصحت هي
وقف ونزل من السياره
مالك : السلام عليكم ورحمة الله وبركاته
الاطفال : وعليكم السلام
مالك : اسمعوني ادخلوا البقاله واشتروا الي تبغونه بحاسب عنكم
الطفل احمد : منجد ؟ نقدر نشتري الي تبغاه
مالك وهو مبتسم : اي والله صادق هيا ولا تبغوني اسحب كلامي
الطفله ميار : لا خلاص بندخل يلا
دخلوا الاطفال ومن الفرحه يرقصون وماخلوا شي بالبقاله ماشروه وعن مالك مايهمه السعر لو يشري لهم البقاله كلها اهم شي ضيه
طلعوا الاطفال وهم يشكرونه ووقفوا
الطفله ميار : طيب انت ليش سويت كذا
مالك : لاني فرحان وقلت لازم افرحكم معي
ميار : طيب ايش السبب
الطفل احمد : يمكن انه جاه بيبي
الطفله ميار : يمكن انه جاته فلوس
مالك هز راسه ب لا : لا الشي الغالي ماينشرى بفلوس
ميار : مافيه شي غالي مانقدر نشتريه بفلوس
الطفل سلطان : بس فيه ممكن الصحه
مالك وهو يضحك : صح عليك
ميار : بس انت بصحتك يعني مين تفرح له
احمد : يمكن زوجته طابت
هز راسه مالك بابتسامه عريضه ب ايه : وهو خلاص روق من كلمة " زوجته "
احمد : الله حتى انا احب بنت جيرانا وهي الحين مرتفعه حرارتها اذا طابت بشري لها حلاو
مالك ضحك وهو مبسوط : يلا مع السلامه وانت ياحلو اذا طابت اشري لها الي تبغاه
ودعوه الاطفال وهم مبسوطين مره
" عند بيت ابو مالك "
ساره الي مو سايعتها الفرحه من كلمتها ضي وارسلت لها انها بخير ودها ترقص وبكت من الفرحه وصل مالك وهي نزلت للصاله
ام مالك : وينك ياولدي من امس
ابو مالك : انت وينك غادي من امس
مالك : كنت بالمستشفى
ام مالك : وليه بالمستشفى فيك شي يعورك شي
مالك وهو يناظر ساره ويعرف انها بتفهمه : قلبي تعبان بس الحين طاب الحمدلله
ام مالك : بسم الله عليك وليه ماعلمتني
مالك : بسيطه بسيطه نغزات ( قصده خوفه ) شوي والرجال مايعيبه شي والا ياابو مالك
ابو مالك : مايعيبه الا الشي الخطأ وامك صادقه ليه مااتصلت من امس قالبين الدنيا ولا ترد بجوالك
مالك : جوالي طفى وماعليكم هذاني بخير قدامكم
ام مالك : استريح اجلس اجلس بشوف حرارتك
مالك : يااميمتي بخير الحمدلله والله هذاني بخير قدامك لو فيني شي بقول لك
ساره : ماعليكم متأكده انه بخير والله وابشركم ضي صحت
ام مالك : الحمدلله الحمدلله ماتشوف شر يارب
ابو مالك : الحمدلله اجل بتصل على ابو محمد اتحمد لهم بسلامة ضي
مالك : يبه شرايك بهالمناسبه نذبح وعشاهم علينا
ابو مالك : اي كفو والله قم روح وجيب خروف
مالك : خروف بس اقول والله خروفين واحد مني
ام مالك : ياولدي وش هالكلافه خروفين مره وحده
مالك : لا كلافه ولا شي حقهم اكثر
ام مالك : وانا بتصل على ام محمد واتحمد لها واشوف متى تطلع ضي اذا اليوم يصير عشاء
ساره تناظر مالك بابتسامه الي محد يفهمها الا هم
ساره : عاد يمه تستاهل ضي وحقها اكثر
مالك ابتسم الي وده يقول ايه ومليون ايه وهذا قليل بحقهم
"بالمستشفى "
وصلت موضي : الحمدلله على السلامه ياوخيتي
ضي : الله يسلمك من كل شر
دخل الدكتور : السلام عليكم
الكل : وعليكم السلام
الدكتور : الحمدلله على سلامة مريضكم وضي مافيها شي تقدر تطلع اليوم بس لازم اشاعه تأكد
ام محمد : الحمدلله الحمدلله
ابو محمد : جزاك الله خير يادكتور ويسلمك
نايف وهو يناظر ضي الي فاهم انها تبي تطلع باسرع وقت ماتحب المستشفى ابداً : طيب يادكتور تقدر الحين تشيع ؟
ابو محمد : وشوله مستعجل خل اختك ترتاح شوي
الدكتور : لا مش تقدر الا العصر  يلا انا استأذنكم
ضي : يمه مااحب المستشفى وانتي تعرفين وبعدين انتوا اسبقوني ارتاحوا بالبيت وانا اشيع واطلع مع نايف
ابو محمد : مانطلع الا ورجلك على رجلنا
محمد : يبه وهي صادقه وانا عندي دوام الساعه بعد ساعه ومافيه احد يجيبكم الا نايف والاشاعه بعد العصر
ابو محمد : نستنى بعد العصر والبيت مايصلح الا بوجود ام محمد وضي
نايف : اذا عن ام محمد ماتتحمل لازم قربها وانتي يانبع الحنان روحي معهم ارتاحي
ام محمد : هو وشو بقعد ابو محمد يقدر يتحمل
نايف : يمه نسيتي انا بصير دكتور مايحتاج بجلس جنب ضي
اتصل ابو مالك
ابو مالك : السلام عليكم ورحمة الله
ابو محمد : وعليكم السلام ورحمة الله وبركاته ارحب
ابو مالك : البقى الحمدلله على سلامة غاليتكم ماتشوف شر ان شاءالله
ابو محمد : الله يسلمكم الشر مايجيكم ان شاءالله
ابو مالك : وانا اخوك قالت لي ام مالك تو كلمة ام محمد تطلع ضي بعد العصر وبهالمناسبه عشاكم اليوم عندنا
ابو محمد : ماقصرت ومايحتاج تكاليف ياابو مالك
ابو مالك : افا لا تكاليف ولا شي اقول والله ان عشاكم الليله عندنا
ابو محمد : يمال العافيه والغنى ولا تقصر ولا هي غريبه عليك
ابو مالك : الله يعافيك
كملوا نقاش وقفل ابو محمد وطلعوا بعد نقاشات واقناع من نايف وهم قلوبهم على يدهم يعرفون ان اذا تجمعوا نايف وضي يقلبون الدنيا
___________
- ياكثر حبك بقلبي والغرام اكثر
واتخيل وش كثر احبك وانت غربالي
_____________
نايف : مشينا ؟
ضي : اصبر اصبر روح تأكد شوف مشوا والا لا
نايف : طيب
راح نايف وطبعاً مستحيل تسوي ضي اشاعه ولا همها رجلها ابداً ولا تحب المستشفى وطاريه ولا تقدر تستنى اكثر من كذا
رجع نايف : اذا انتي ماتدانين المستشفى اجل كيف لاتوظفت تزوريني
ضي بابتسامه : بسحب عليك ولا اجيك وليه ازورك
نايف بضحكه : اجل ماني بمتوظف
ضي : احسن والا اقول فيه بديل لي يجيك
نايف : مين هالبديل الله يستر على خير
ضي بضحكه : الله يتمم على خير بس
نايف : اذا فيه بديل مانبيه نبي الاصلي
ضي : يعني خلاص ماتبي
نايف بضحكه ومو فاهمها: اذا فيه بديل لضي مانبيه اما الي ببالك
ماله بديل
ضي : يالخفيف اقول الحين اذا صار عندك مرضى ومايحبون المستشفى زيي وين توديهم
نايف : وين اوديهم بيجلسون والا اقول بجيبهم المجلس عندك ويتقهوون
ضي : اجل حياهم الله
نايف وهو يضحك : صاحيه انتي حالتهم خطره اكيد بيجلسون
ضي : اقول امش امش بس
نايف : هاه يالحب وين تبينا نروح
ضي : تصدق للمزرعه والاسطبل
نايف : صاحيه انتي شكل السم مأثر عليك كيف بتركبينه منتي شايفه رجلك وبعدين اذا رحنا المزرعه ابوي بيكون هناك ويقفطنا واحنا ماحنا براجعين الا الساعه ٥
ضي : الخيل ماعليك بسيطه ياشيخ لو اني مكسره تكسير اركبه وعن المزرعه ابوي مو موجوده فيها بالبيت وعند ابو مالك بعد
نايف : لعيون ضي تكرم مدينه مشينا
مشوا وبالطريق كان فيه طاوله صغيره وفيها شاهي وجمر يبيع شايب فيها
نايف : السلام عليكم ورحمة الله وبركاته
البائع : وعليكم السلام ورحمة الله
نابف : كيفك ياعم
البائع ووجهه واضح عليه التعب : بخير الحمدلله
نايف : الله يوفقك ابغى كاستين شاهي
البائع : ابشر
نايف : تبشر بالجنه
ضي : شوف بالله وجههه تحسه مهموم مسكين الله يرزقه
نايف : اي والله اللهم امين
البائع : خذوها هذي هي جهزت بالعافيه
مد نايف الفلوس بيعطيها البائع
البائع : صدقه ابغى بس دعوتك
نابف : الله يجزاك خير بس بسألك فيك شي محتاج شي
البائع : الحمدلله دائما وابداً بس ماني ملاقي فرص عمل وبنتي لازم عمليه قلب مريضة قلب عمرها 5سنوات
ضي : اسمع نايف خله يجي المركز انا ناقصني موظفين بتنظيف الخيول والاسطبلات الله يرزقه ماعندي الا ذي الشغل
نابف : انا عندي لك عمل ان شاءالله يعجبك وكمل له نايف الباقي ..
البائع : والله انها شغلانه حلوه واهم شي انها حلال طيب عطني الرقم عشان اتواصل
عطاه نايف الرقم وقال له يتواصل وعلمه الموقع بكره يجي
البائع : روحوا الله يوفقكم ويرزقكم ويفرحكم ويحقق مافي بالكم مثل مااسعدتوني والله ان ربي سخركم لي
نابف : اللهم امين وياك واعذرنا على القصور
البائع : ماقصرتوا الله يسعدكم
مشوا ووصلوا المزرعه وعلى طول اتجهوا للاحصنه
وعند ضي الي تحاول تركب الخيل
نايف : ماني قايل لك لا تركبين ماتقدرين
ضي الي على طول ركبت بضحك: هه بسيطه يارجال مايمديك تكمل كلامك والا انا راكبه
نابف : احسب لك ٥ دقايق وتنزلين
ضي : ان شاءالله
قام نايف واخذ حصان ثاني وركب معها وجلسوا يسولفون بعد نص ساعه نزل نايف وهو يطقطق على ضي : الحين علميني كيف بتنزلين امانه
ضي: الحين بتشوف
ضي الي كل ماحاولت تنزل توجعها رجلها
نايف بضحك : اقول بس تعورتي قام وشالها ونزلها
ضي : بزر عندك انا تشيلني
نايف وهو يضحك : اذا ماشلتك من بشيل
ضي بغمز وضحك : حرمتك المستقبليه مب انا
قام ومانزلها كان شايلها ومشى فيها لين السياره وفتح الباب وحطها
ضي بضحك : ورع عندك انا ترا اقدر امشي لا تسوي تخاف
نايف : لا بس حبيت اعجل الوقت اذا مشيتي يبي لنا ساعه
ضي : طيب لو مشينا بالمزرعه شوي
نايف : لا والف لا
طبعاً كل هالموقف مين يشوفه مالك الي كان واقف عند شبك الغنم بياخذ خرفان لانه حلال ابوه هالفتره مع ابو محمد لين ماابو مالك يضبط امور مزرعته ويحط غنمه فيهن مااحكي لكم شعور مالك الي خايف عليها من الخيل كانت ضي لابسه نقاب وعبايه بس شاش رجلها واضح وكان وده يشيلها وينزلها من الخيل صابر عشان الحلال بس مايبي يسوي شي حرام
نايف وهو مار من عند شبك الغنم كان مالك جالس ومعطيه ظهره ولا هو مبين وجه مالك عشان كذا يحسبه العامل
وطلعوا من المزرعه وكانوا بياخذون فره لهم بالمدينه ويروحون البيت
مّتروا المدينه تمتير ماخلوا شارع ماراحوا له وضي منهبره بالمناظر اول مره تشوف المدينه كذا وبعد نايف وخلصوا رحلتهم وهم راجعين فيه حي قريب لحيهم وكان مالك ماسك الخروف بيوديه المصلخه
وكانت فيه سياره عاكسه وكانت سريعه ونايف كان بيروح للحي بس طلعت بوجهه نايف وصدمتهم مع الجنب من عند المرايه وكسرت المرايه
نايف وهو يرتجف : ضي فيك شي
ضي وهي كل هبوط الدنيا فيها : لا الحمدلله وانت
نايف : لا بس السياره انعدمت
ضي : في الحديد ولا العبيد بسيطه
نايف : الحمدلله بس ابوي ابوي بيكشفنا
ضي : صدق مصيبه
طلع مالك من المصلخ وشاف نايف الي نازل من السياره وراح له : سلامات يارجال وش فيه
نايف : فيه رجال كان عاكس وصدمنا
مالك وهو لامح ضي الي قدام وجالسه تهوجس : فيكم شي
نايف : لا
مالك ؛ تبيني اوصلك
نايف : لا ماتقصر معي اختي بس فيه مشكله
مالك : وش هي سلامات
نايف : الصدق ترانا هربانين من المستشفى قبل موعد الخروج
مالك وهو كاتم الضحكه  : صاحي انت واذا اختك فيها شي
نايف : اختي مافيها الا العافيه الحمدلله وهي صاحبة الفكره ولو يدري ابوي يذبحنا
مالك الي زاد الحب مجنونه زيه : اسمع اسمع خذ سيارتي وانا اخذ سيارتك الحين واصلحها
نايف : والله انك ماتقصر وخذ صرافتي للمبلغ تصليح السياره
مالك : اقول والله انك ماتدفع
نايف : يارجال وش هالكلام تاخذها يعني تاخذها والله
مالك : حلفت اني ماخذها واعتبرها هديه التخرج
نايف : للحين ماتخرجت ماشاءالله محتفل بدري
مالك : اي من بدري عشان افتك مره وحده ويلا توكل هذا مفتاح السياره
نابف راح وهو يضحك ودخل السياره بيكلم ضي : اسمعي
ضي : هلا وش صار
نابف : انزلي من السياره بناخذ سيارة مالك
ضي الي تحسب بتركب مع مالك : ووششوووو نركب مع الرجال
نايف : مانركب معه هو بياخذ سيارتي وانا اخذ سيارته يصلحها ويرجعها وموضع ابوي علي
ضي كشرت بطيب : طيب
نزلت وهي تناظر مالك الي نظراته يدل على انتصار مهما عاندت ومابينت له بترجع له وملكه
شمقت له ومشت وهو مبتسم ويناظرها اول مادخلت سيارته مشت ريحة عطره الي صدق مثل ماقلنا قبل تدل على فخامته وهيبته بنفس الوقت ريحة العطر مو ثقيله ولا خفيفه