رجعوا للاستراحه
كان مافيها الا الجد وعياله راحو الناس
الجد : بدري يمحمد
محمد : معليش التهيت شوي
الجد : الضربه الي فراسك وش
محمد ضحك : ترف ضربتني
الجد : كفو بنيتي
محمد : امزح يجد ذي حبه
الجد : طيب يلا ناموا ناموا
قاموا الكبار ينامون والباقين جلسوا برا انسدحت ترف على رجل محمد وحاسه بغثيان وكانوا البنات يسولفون
ريما : ترف نفسيتك تقل نفسية حوامل وش ذا حتى دموعك جاهزه
ريماس : على اساس قديم ماكان عندها دموع ؟
ترف : اص انتي وياها بس ماعندكم محتوى غيري
طيف : صراحه خلوها من هذا فيه وحده تتكلم عن الحج ظني انها خالتك عايشه صح ؟
ريما : ايه ذي خالتي ام مسك واخوانها
محمد : احلفي اخوانها !! تستهبلين صح؟
ريما : لا احنا نعرف مسك واخوانها اما مسك لوحدها ذي بنت خالتي نوير
محمد : ياكثر المسكات ، الا ابو نوير جاي له ولد ؟
ريما : ايه وسماه مشعل
محمد : ماشاءالله الله يربيه بعزهم وابو نوره؟
ريما : انت من تزوجت وانت سوالفك سوالف حريم ترف اعترفي وش مسويه به
محمد : ريما ترى بصفقك
ترف : والله ماسويت شي
طيف : محمد صدق انه تزوج واخذ دور الامهات المفروض الي تاخذه ترف مو انت
محمد : هيههه خلاااص
ترف : اهخ تعب محمد عطني شنطتي جنبك
محمد اعطاها الشنطة
ريما : ترف ذلحين انتي ولو زكمه تموتين من التعب كيف لحملتي الله يستر منك
ترف : ريماا وش هالسوالف الخاثره انطمي
ريماس : ترف واعرفها انسانه استغفر الله الحمدلله هي وشادن مجرد مايتعبون يتعب البيت كله منهم
محمد : اثااريه الوضع كذا اجل يارب ماتتعب
ريما : بدري يالاخ البنت منصرعه جنبك
محمد : اقول لها خليني اوديك تقول لا شسوي
ترف : عارفه انه زي تعبي كالعاده لكن هالمره غثياننن
ريما : الله يعينك بيب
محمد : ترف جوالك يدق
ترف : عطني بالله
محمد بدا يطقطق: والله مانتي طبيعيه
ترف بصراخ لما قرت الاسم : محمد اعطني بسرعه
محمد : طيب ينفسيه
اخذت الجوال وكانت شادن : الوو
شادن : هلا
ترف : شفيه صوتك
شادن : جبت نونو حلو اكيد بتعب
ترف عدلت جلستها : احلفيي
شادن : وربي
ترف : بجيك الحييين
شادن : تمام
قفل ترف ووقفت بتروح تجيب عبايتها لكن استوقفها محمد : هيه وين بتروحين
ترف : شادن جابت ولد
جت ريما من بعيد تصايح : ماشاءالله مبروك
ترف : الله يبارك فيك
ريما غمزت لها وترف سوت نفسها غبيه وراحت تجيب عبايتها
محمد ضحك: انتظرك بالسياره
ترف : يلا
راحو المستشفى وانتشر الخبر وجو بنات ساره والجد للمستشفى كونها اول حفيد لساره
ترف : محمد
محمد : لبيه
ترف : بروح قسم النساء على بال ماتفتح الزياره
محمد : ليه
ترف : امور نساء ماتخصكيش
راحت ترف لقسم النساء بس كذا فيها فضول عن الغثيان ذا
الدكتوره : شوفي النتايج بتطلع بعد ربع ساعه
ترف : تمام انا بروح وشوي بجي
الدكتوره : كويس
طلعت ترف لمحمد عشان يزورون شادن
محمد : وش صار؟
ترف : تقول تحاليلي بتطلع بعد ربع ساعه
محمد : حلو
دخلوا ترف ومحمد على شادن كان بين شادن ومحمد ستار وكونهم متاخرين مافيه الا هم: مبروك المولود والحمدلله على سلامتكم
شادن : الله يبارك فيك ويسلمك
محمد : انا استئذن خذو راحتكم
طلع محمد وقعدوا يسولفون
ترف : ودي اشوف النونو
شادن : انا ماشفته الا لمحه
ترف : يوهه صوريه لنا اذا جاك
شادن : ابشري
ترف : يلا عاد انا بطلع محمد اكيد ينتظر تحت
شادن : يلا استودعتك الله
طلعت ترف لمحمد الي كان عند احمد باركت له وخبرت محمد انها بتروح تستلم التحاليل وتجيه وراحت فعلًا اخذت التحاليل
الدكتوره : كم عمرك ؟
ترف : 18
الدكتوره : ياحبيبي الله يعينك توك صغيره ومتراكمه عليك الامور اضبطي امورك معليش حتى بالدوره اهتمي لنفسك مره الفيتامين ب اشت انواعه ناقص والكالسيوم ناقص وفيك حمى وعندك نقص بالاملاح والقولون والضغط ضاغطين على معدتك زياده عشان كذا ماتقدرين تتقبلين شي بعطيك وصفه وروحي للصيدليه خذيها
ترف سكتت وهزت راسها بالاجابيه فقط
عند محمد بالسياره دق على ترف : وينك تاخرتي
ترف : بصرف العلاج واجيك
محمد : ليه شفيك
ترف : اعلمك لما اجي
محمد : اخلصي شعندس
ترف : مادري ماودي اقول
محمد عصب : طلع فيك شي !؟
ترف : خلاص محمد لجيتك علمتك
محمد : زين
ترف سكتت وقفلت مو قادره تمشي من قو الغثيان
راحت للصيدلي تاخذ علاجاتها وبعدها راحت للسياره فتحت الباب : سلام
محمد : ي هلا شفيك لهدرجه تعبانه
ترف : والله ي انها هرجت فوق راسي وابغى انام مالي خلق اتكلم
محمد : وش طلع فيك طيب
ترف : نقص بالفيتامين والكالسيوم وحمى ومادري شنو كلامها واجد خلاص خلني انام
محمد : لحول ولا قوة الا بالله ي عليك تزبيد
ترف سكتت وحطت طرحتها على وجهها ونامت
لحد ماوصلوا
محمد : ترف قومي وصلنا
ترف : ......
محمد : ترففف قومييي
ترف : .....
محمد : يالليل ذلحين ذي شلون اقومها ، قام شالها ودخل من الباب الخلفي لغرفته وحطها على السرير ولحفها وطلع برا للبنات
ريما : وراكم تاخرتوا ؟
محمد : ترف تعبت وراحت تحلل
طيف : صدق توتي وينها
محمد : نايمه داخل
ريما : يع من تزوجت ماعاد سهرت معانا ولا مره
محمد : ورعه اقولك تعبانه
ريما : الله يصبرها واضح انك رافع ضغطها
محمد : ايه ايه رافع ضغطها عندتس شي ؟ اهرجي
انس : يقلع ابو سالفتكم البيض الا اقولك شفت ابو شنب تزوج الرابعه
محمد : اوف اوف ذا ماعنده بريكات
نواف : عقبالك حمودي
محمد من الصدمه قعد يضحك ضحك المخروش ماعرف وش يرد
ريما : ورع انت وياه وش عقبالك انطموا
ريماس : والله لعلم ترف
محمد : انا قلت تم؟
ريما : عيونك قالته
شهق محمد : اعوذ بالله من سوء الظن طسي لا اهبدتس الحين
الجد : خلاااااص بسس يلا نوم بكره ورانا فطور
قاموا كلهم وكل واحد لغرفته ومحمد دخل عند ترف الي ماكانت نايمه من الاساس بس ميته تعب
محمد : ادري انك مانمتي قومي جبت لك اكل
ترف : محمد ما ابغى
محمد : الا تبغين ونص انتي كذا تساعدين التعب يهزمك
ترف بكت : محمد والله ما ابغى والله
محمد انخرش : افا افا ي ترف تبكين امسكي المويه اشربي
ترف شربت وانسدحت على رجله وقعد يلعب بشعرها ويسمي عليها كون نفسيتها مره خاايسه هالفتره وماهي قادره تتحمل اي حرف قعدت تفكر متجاهله سوالف محمد الي يحاول مايخليها تفكر نامت بوسط سوالفه لحفها ونام
...............................................................
النهاية ...
نبتدي بعايلة ابو محمد
اولًا ناصر وليلى تزوجوا وجابوا توأم بنت وولد "اميره وسند "اعمارهم ٣ سنين
ثانيًا محمد وترف جابو بنت وولدين "ساره" عمرها ٦ "عز" عمره ٣ " فيصل" عمره شهرين
ثالثًا احمد وشادن جابو ولد وبنت "حمدان" عمره ٧ "رهف" عمرها ٣
عايلة عبدالعزيز
انس و ريما تزوجوا السنه الي فاتت وحملت بالشهر السابع
نواف وطيف كان زواجهم مع ريما وانس ولكن جابوا بنوته كتكوته عمرها شهر "لميس"
عايلة غاليه
تركي وتالين جو بعض وباعدين عن العالم وعايشين بحب بعض تزوجوا وجابوا ولد عمره سنه "رعد"
سلطان وريماس تجمعوا ادج خلق الله🤣 جابوا بنت وولد "عبدالمجيد" عمره ٤ "معالي" عمرها سنه
خاله اميره : جابت ٣ عيال وبنوته (محمد،مطلق،هتان،كادي) اعمارهم من ٨ الى ١
والخال سالم : جاب بنت عمرها ٥
وكبروا الباقين ومكملين حياتهم
...............................................................
انا اسفه جدًا اني قطعت فجاءه رجعت ببارت سامجه ولا لها معنى ولكن انا بنيت الروايه وقت كانت مشاعري مره قويه لحب شخص وانا احدى الاشخاص فالروايه كنت قاعده ابني مستقبلي وخيالي ولكن انصدمت بالواقع المر ف قطعت عنكم انا اسفه جدًا لاني ماقدرت اكمل الروايه كرهتها من كل قلبي وكرهت اني اكتب مستقبلي معه وكرهت اني افكر حتى اسفه واسفه واسفه .. اتمنى تعذروني واتمنى اسعدتكم بالبارتات السابقه 🤍.
الله يسعدكم ويرزقكم استودعتكم الله التي لاتضيع وداعة 🤍🤍🤍.
2024/1/16
