الكل نزل الا روز الي تأخرت وبعمد منها لكن بالنهايه جت وهي متوتره وكلها خوف
عبدالعزيز : روز بك شي ؟
روز : لاياعمي كان وجع خفيف وطبت الحين ، كانت تتصدد بعيونها بكل مكان الا مكانه ماتبي تشوفه عكسه هو الي احرقها بنظراته ولارمش من دخلت وعيونه عليها وعارف انها حاسه بنظراته الحاده ماكان يعرف وش يوصف مشاعره غضب ؟ او استغراب ماكان عارف وش المغزى من انه يناظرها لكنه احرق جسدها كله وحفظ شكلها كانت حاسه بنظراته وشوي وتبكي من الخوف وانتبهت عليها الماس وبدت تهديها
البارود : زين انكم تجمعتو والحين بنكمل كلامنا الي مابديناه من مصايبكم
تركي : اسلم
ملفي : حنا عندنا املاك وشركات كثيره وبيوت واراضي وعقارات وقررنا نقسمها بالتساوي علينا حنا ياعيال هذال لاجل يبقى لكم ماتورثونه
هنا ناظرها سلمان ينتظرها تبدا خطتهم وانتبه لجسار الي عيونه حمرت من قله رمشه ونطق بهمس ، اضبط حالك ! التفت عليه جسار وتغيرت ملامحه وسكت
مُرجان بتمثيل وهي تمسك وجهها : بابا احسني بدوخ مو قادره اشوف شي
فز ايهم لها ومسكها ونطق فيك شي ؟ وشبك
مُرجان بدموع مزيفه: ايهم احسني دايخه ماشوف شي طلعني !!
ايهم شالها واخذها ولحقوه اغلب الي داخل اذا مو كلهم ! ملفي : اعوذبالله مالقت تدوخ غير يوم جينا نقسم وضحك سلمان بقوه على كلام ملفي وعصب عليه والتفت له
ملفي : بهيمه انت على كلشي تضحك
سلمان : معليش والله السموحه
سيف وهو يطقطق على ملفي ويمزح معاه : جدي تكفى خلني اوكلك عشان تعتبرني عزيزه وتحبني
وضحكو العيال والبارود على سيف وملفي الي معصب لكنه يضحك معاهم ، مهما صار بينهم ومهما انجرحو من بعض بالنهايه هم أهل ومالهم سند غير بعض مهما وصلت القطاعه والتباعد بينهم يرجعون ولاكان شي كان وهذا كان قانون ملفي والبارود مع احفادهم الي ربوهم عليه
-
تركي : علامك يابنتي نوديك مستشفى شي ؟
مُرجان : لا جدو بس حسيت بغثيان ودخت
ساميه : خوفتيني عليك يابنت !
مُرجان : خلاص خلوني ارتاح شوي ، طلعو من الغرفه وكانت محاولة فاشلة من ملفي والبارود انهم يفتحون الموضوع وبقت روز عندها ومُرجان منسدحه بحضن روز
روز : مُرجان
ردت مُرجان بهمهمه
روز : ماكنتي تعبانه صح ؟
مُرجان : ايوا
روز : وشفيك ؟
مُرجان وهي كلها ضيق من كلام سلمان
طلعو العيال واتجهو للمجلس وجلسو
جسار : الله ياخذك يافارس جاء العصر وانا ماقيلت !
فارس : مانت بنايم لين تعلمني وين كنت
سلمان : مشغول مع واحدٍ من العيال ، اقولهم اسمه ؟
ناظره جسار بكل حقد ونطق ، قل وشف وش بيصير
سلمان بتحدي : مشغول مع بنت فيصل
فارس : منهي ؟ ووشلون ووشصاير !
جسار : ياشيخ يسوق امها الربحه ذا
سلمان بعصبيه : اجل ليه ماخذها لبيتنا !
سيف : بيتنا ؟ ووشلون ومتى
سلمان : ماخذها للبيت وهو عارف ان محد بجايه
فارس : جسار ؟ وش مهبب انت
جسار وشياطين الدنيا راكبته : ياشيخ يلعن ابو نيتك الوصخه ياكلب
سلمان : علمني وش كنت تسوي طيب !
جسار : اجل ليه ماتقولهم وش كنت تسوي مع خويتها !
سلمان : بتردها ولا شلون يعني ؟
سيف : يلعن ابو نظامكم زين كل واحد مهبب مع وحده وجايين تعاتبون بعض هنا وانا وفارس ماندري عن شي
فارس : والله نظامكم زق ياعيال
بدا جسار يشرح وش كان يبي من روز وسلمان الي علمهم بخطته هو ومُرجان
سيف بضحكه : ماهي بهينه والله قادحه هالباربي
فارس : ايه ياعيال اليوم جو الثنتين الثانيات وفكونا والله بهم مروءه ينشد الظهر فيهم بخليهم يفزعون لي كل ماتصلبت
سلمان وهو يرمي علبة الفاين : اجل مسوين زعلانين !
سيف وهو يردها له : عالاقل ماحشرت وحده ببيت
جسار : هو الي قايلكم كذا وشدخلني يوم تجيب طاريي
سيف : مدري بس حسيتني زعلان منك
جسار وهو يقرب من سيف بيحضنه : افا تزعل علي
سيف : ابعد ياولد بتخنقني
جسار : الشرهه علي احضنك ياكلب
فارس : ياعيال ابي اتزوج
سلمان وهو يضحك : وش الشطحه ذي
فارس : مدري شفت جسار يحضن سيف وجاني تصحر مشاعر
جسار : اقسم بالله انك معتوه
سلمان : ايه ياعيال يوسف اليوم يبينا نروح لهم بالاستراحه تخاوون ؟
العيال كلهم تم
سيف : وايهم ؟
سلمان : بناخذه اكيد
مُرجان : متخيله انو يقولي لو ماسويت خططه الغبيه ذي بيعلم بابا !
روز : معليك منه الغبي ذا مو صاحي اكيد ولاتسوين له الي يبيه
مُرجان : مابسوي
روز : بقولك شي
مُرجان : ايش ؟
روز : شفتي جسار ؟
مُرجان : ايوا وشبه
روز : تخيلي اليوم... وبدت تعلمها كلشي صار لها وبكت روز من جديد
مُرجان : وربي ماحخليه لاتصحين خلاص وحضنتها ، روز حبيبي لازم نعلم الماس ودُرر مابنقدر نسوي شي لوحدنا
روز : لاتكفين بيعصب علي
مُرجان : واذا عصب ؟ تستهبلين وشدخلو فيك ولاتقولين لهم انا بقولهم وكلنا بنروح له بالليل سامعه ماراح اخليك معاه لوحدك ذا مريض وكملت تطبطب على روز وتهديها ، مر الوقت باحداث عاديه وبسيطه لين المغرب بدو العيال يتجهزون لأجل سمرة يوسف
فارس وهو يبوس سلمان : يالبيه طالع مز ياحظ الي بتاخذك بس اخ
سلمان وهو يمسح بوسته بقرف : هذا وجهي اذا تزوجت
جسار : محد بيقبل فيك
سلمان : ازين
سيف : امشو ياعيال ، انا داخل اشوف جدتي واجيكم
فارس : لاتطول ترا بنسحب عليك
وراح سيف يدخل من باب المطبخ وابتلش لانه مقفول من البيت وجلس يدور بالادارج المفتاح ، التفت على صوت الكاس الي طاح وانكسر والبنت الي واقفه وراه
شرقت دُرر من الصدمه يوم شافت ولد وغريب ويدور بدروج مطبخهم
سيف فز لها ولا كان عارف من البنت اصلا
سيف وهو يطبطب على ظهرها : صحه صحه
دُرر : يامريض وش تسوي هنا !
سيف : اووهوه وبدينا
دُرر : وشجابك انت ؟
سيف : جابني الشوق
دُرر : سخييف وع
سيف : الا انتي مابتفكيني من شرك بكل مكان طالعه لي درينا اني حلو بس مو كل يوم جايتني
دُرر بقرف : انت شايف وجهك بالمرايا انت ودقنك ذا؟
سيف : وش به دقني ؟
دُرر : يبطبط
سيف بصدمه وضحك : وش !
دُرر : يبطبط ماتسمع انت !
وضحك سيف بعلو صوته على كلمتها الي استلطفها
سيف : اخ بس الله يخلف عليك يابنت
دُرر : اآه ابعدد
وانتبه رجولها الي تنزف دم ورفعها عن الكاس الي انكسر تحتها وداست عليه بدون لاتنتبه
دُرر : ياكلب كله منك عورت رجولي !
سيف وهو يطلع علبة الاسعافات من احد الدروج ويطلع معقم وشاش وبدا يعقم جرحها ودُرر الي دمعت من الالم وهو مستمر يطقطق عليها
سيف وهو يلف الشاش : وش اسمك ؟
دُرر : ماتعرفه
سيف: على خبري ديما بس وش طلع الحين
دُرر : دُرر
سيف : اسم على مسمى
دُرر : شكرا بس نزلني من الطاوله !
وفتح ذراعينه لها وحاوطت كتوفه الي طبع عليهم شوي من روجها الخفيف ورفعها من الطاوله ونزلها بالارض رغم الاحراج بينهم لكن شكرته وطلعت وراه من باب المطبخ الثاني
الكل ركب سيارة سلمان واتجهو للمخيم الي يوسف مضبطه ومزينه لاجل سهرتهم ،والكل متحمس الا ايهم كان الحماس ماخذه لان واخيراً بدا يتعرف على الناس الي بالديره واجوائها وهو ماكان متأقلم جداً معاهم
سيف: ايهم وراك تناقز من الفرحه
ايهم : يارجال زهقت من وجيهكم ابي اقابل ناس جديده
فارس : افا يالردي زهقت مننا
ايهم : ايه
سيف : البجيح يقول ايه بعد وقف وقف نزله هنا خله يجي كعابي
وضحكو العيال ، وصلو للخيمه الي بها يوسف وباقي العيال وبدو يسلمون وياخذون علوم بعض ، يوسف لمح كتف سيف ونغزه بنظره بمعنى الحقني وبالفعل قام سيف لكن يوسف تأخر ومشى ورا سيف عشان مايبان الي بكتفه
يوسف : وش مهبب انت ياسيف ؟
سيف بصدمه: وش مسوي
يوسف : الي على كتفك وش هو ؟
سيف وهو يسحب طرف ثوبه من فوق ويشوف وانصدم وتكلم باحراج ، والله مادري من وين جاء يمكن عند جدتي وعمتي قلت لهم يكوونه والظاهر جاء من البنات
يوسف : ماعليه حصل خير ولاتفهمني غلط لكني مو حاب يطلع منظرك بهالشكل قدام الرياجيل ، ودخلو داخل وسيف وجهه احمر وعروقه بارزه من العصبيه توقع هذا من اهمال الخادمات وجدته ومتحلف فيهم
سلمان : وين طرت ؟
سيف: شغله بسيطه
-
دُرر : روز توك تعلمينا !!
روز : دُرر لاتلوميني كنت خايفه ومرتبكه تكفين لاتزيدينها علي
الماس : والله العظيم لو تتحركين خطوه بدون ماتقولين لي بكسرك سامعه ! وماتتحركين الا وحده فينا معاك
مُرجان وهي تحط مناكير : طيب بنات هو يبيها اليوم ايش بنسوي !
دُرر : بنروح له كلنا
روز : لاتكفون بنات بتصير مشاكل ! بروح انا لوحدي
الماس : روحه لوحدك انسيها سامعه ! المطبخ وهو المطبخ انا معاك رجلي على رجلك تفهمين ؟
روز بضيق : بنات تراني مو بزر اشبكم عليّا!
دُرر وهي تعرج لروز وتمسح على شعرها : روز ياحياتي انتي افهمينا انتي مو طفله لكن هو تعدى حدوده معاك وين عايشين احنا يحبسك ببيته لاكثر من اربع ساعات ؟ بهيمه انتي ولا ايش اشبك ياروز ايش صاير معاك ماعدتي تفهمينا احنا مستحيل نترك
روز حست بالراحه بعد كلامها وقالت ، خلاص اسمعو انا بروح وانتم وراي عند الباب تمام ؟ لو صارخت ادخلو ، رفضو البنات الفكره واقنعت فيهم لين اقتنعو البنات وكانت الساعه 10 بالليل ومن عوايد الشيبان ينامون الحين ويقفلون البيبان متعمدين لان العيال تأخرو 2:41pm
سلمان وهو واقف قدام الباب : البلشه ياعيال وشلون ندخل
ايهم : دقيقه بتصل على وحده من البنات تفتح الباب
سبقهم سيف الي انبطح وجلس على ركبتيه وايديه وفوقه فارس يتسلق جدار البيت
جسار وهو يأشر على سيف وفارس : مايحتاج المنقذ موجود
ايهم : لو اتصلت على روز اشوا وفتحت بسرعه بدال الوهقه
تبدلت ملامح جسار وتذكر موعده معاها وتقلب وجهه وسلمان الي ناظره وهو يشغل الزقاره
وصل فارس وفتح لهم الباب ودخلهم بالمشب بسرعه والعيال ارتمو كل واحد بزاويه والاشمغه والطواقي والثياب الي مرميه بكل مكان وسحبو كم بطانيه من المخزن ونامو ، الا جسار الي اتجه لبيتهم وانصدم بالي واقفه ومتكتفه قدامه
جسار : وش تسوين هنا بالبرد !
روز : جيت لك
جسار تذكر موعده معاها وانه قالها بتجيني برجولك ، فتح الباب ودخل ولا انتبه للي كانوا ورا الجدار الثاني
ودخلت خلفه روز والرعب يتملكها وترجف
دخل جسار البيت وشغل الانوار والمكيف الحار وجلس قدامها عالكنب
جسار : اجلسي وش بك مستحيه ؟
جلست روز وهي ترجف وميته رعب
جسار : بردانه ؟ اجيب لك غطا صغير من داخل
روز : ابيك تبعد عني خلاص ! تراك اقرفتني بنظراتك الصباح وجيت اعلمك الي تبيه عشان تتركني بحالي توترني ترعبني تجمدني نظراتك مو البرد !
جسار وهو يناظرها ببرود : طيب وغيره ؟
روز : وشتبي تعرف
جسار : كل شي
روز وهي لسا ترجف رعب وبرد همست ، برد
نزل جسار فروته ومدها لها
روز : مابي
ورجع جسار لبسها
روز : احلف علي يمكن اني مستحيه طيب !
وضحك جسار وقام واتجه لها ولبسها الفروه وجلس بجنبها اما هي ابتعدت لاخر الكنب وحضنت كفوفها وبدت تحكي له عن كل الي صار وكيف وصلو لهم
جسار : وش سبب سجن عمي ؟
روز : مشاكل عائليه ومايخصك
جسار : دامنا مو عايله وش تعتبريني اجل ؟
ناظرته روز بحقد : سافل
جسار : الله يسلمك تسلمين
روز : خلاص بمشي
جسار : وين تمشين بالبرد ؟
