الماس : دُرر أيش صاير ؟
ماردت دُرر وكانت جالسه تصيح ومغطيه وجهها بيديها وتقدمت الجوهره لها بخوف وأخذتها بدون لاتسأل أو تتكلم مع البنات وطلعتها لغرفتها تبدل
ومر الوقت وبدو المعازيم يختفون بالتدريج ولحد الآن مُرجان مانطقت بولا حرف للبنات وكملوا العزيمه مجبورين ، طلعت دُرر بعد مأخذت شور وهي تفكر باللي حصل وأيش بتقول لمُرجان وكيف بتبرر موقفها ؟
دخلت عليها الجوهره الي جلست بنص سريرها قريب منها
الجوهره : دُرر أشبك وشصار بينكم ؟
نزلت دُرر رأسها بخجل وماتكلمت
مدت الجوهره يدها لكفوف دُرر ونطقت بحنيه ، صدقيني بوقف معاك مهما كان الي سويتيه سواء غلط أو صح بعذرك وأعلمك
دُرر : لو قُلتلك مابتعصبين ؟
الجوهره : دُرر مهما قلتي انا بعذرك ولابعصب
دُرر : نايف
الجوهره : مين نايف ؟
دُرر : كنت أعرفو من ايام كنا بالكويت كانو جيراننا وكنت دايم أكلمة ومُرجان تعرف بالموضوع لين صارت مشكله بينه وبين ايهم وتكلم علي عند ايهم وعلمه بعلاقتنا ومن وقتها تركته ولاكلمته ومُرجان حلفت علي أني ماجيب طارية ولا أكلمه ، بس قبل ثلاث ايام اتصل علي وبدت تأخذنا السواليف وصرت اكلمه طول اليوم
الجوهره : بس دُرر دامه تكلم عليك وفضحك عند ايهم ليه ضامنته ؟
دُرر : انا جالسه أكلمه بدون شعور ، ومُرجان أول ماشافت أسمه عرفت الموضوع
الجوهره : حتى لو غلط يادُرر هالشخص ماينوثق فيه وليه تكلمينه دامكم بعدتو عن بعض
دُرر : ماعرف بس والله سوالف عاديه ، لا أكثر ولا أقل ومستحيل أرجع أحس بمشاعر له
تقدمت الجوهره تحضن دُرر ، عارفه شعورك يادُرر وصدقيني مجربته بس أنتي افهمي مايصير تكلمينه بالنهاية هو شخص ماينوثق فيه أبد بعد حركته
دُرر : يقول أنه تغير وأنه هالمره جاد وبيجي يخطبني !
الجوهره : عارفه لو أحد عرف بعلاقتكم وشبيصير ؟ وغير كذا ايهم أعرفه مابيوافق بسبب المشكله الي بينهم
دُرر : مأعرف يالجوهره بس هالمره أحس غير يمكن صادق ومصور لي أنو حاجز بعد أسبوع للسعوديه ويبي الموقع متخيله ؟ يعني صادق ولو جاء انا مابرفض طبعًا
الجوهره : هذا كله وتقولين ماتحسين بمشاعر أتجاهه ؟
صدت دُرر بخجل وعدلت جلستها ، مأعرف يعني شعوري غرييب مو قادرة أوصفه لنفسي حتى شفتي لمن تحسين داخلك كله قلوب وفراشات وورود وأشياء كيوت من تكلمين شخص تحسين بالأمان وأن كلشيء ماتغير ونفس قبل ؟ هالاحساس أعيشه مع نايف بعييد عن هالمكان وزحمة المشاعر ولوعة الأفكار الي تجيني هنا
الجوهره : ماقول غير أن كان به خير يقربة لك وأن كان به شر يصرفه عنك يارب
دُرر : أمين ، بس مُرجان ؟
الجوهره : بكلمها بكرا الصباح انا
قام الصبح وشاف غرفته الي امس مانتبه لها وكلها مكياجات وعطورات وأغراض روز الي ممتليه بكل مكان
وأستغفر ربه ودخل يتوضى ، خلص وهو متورط وشلون بيشيل أغراضها وبدا يجمعها كلها وحطها عالسرير وطلع برا وشاف العيال متجمعين يفطرون
جسار : وش هالخيانه ؟
سلمان : قومناك بس معد قمت وغرفتك كانت كارثة وماقدرنا ندخل
جسار : أخ بس كل هالاغراض عشان عشاء وشلون لو عرس
وفز سلمان من جته رساله على جواله برقم غير مسجل وكان محتواها عبارة عن فيديو لكن مافتحها وكمل سواليف مع العيال ، وقاطعهم صوت طق ملفي عالباب وفتح جسار ودخلوا
ملفي بهدوء : واحد منكم يجي ينقل عفش ابوخالد لبيتهم
انصدموا العيال من هدوء ملفي وفز فارس ونطق فيه شيء ؟
ملفي : لاحول ولاقوة الابالله يعني لازم أعصب عشان تقومون
سيف : ايه كذا أحسب خربت اعداداتك
وابتسم ملفي واخفاها عنهم وطلع
سلمان : فارس قم الحقه شكل فيه احد ميت ويمهدون لنا
فارس : فال الله ولافالك يالمشؤوم انقلع ماني رايح
سلمان : أنثبر اجل انا طالع لابوخالد
سيف : واخيرًا بينتهي موضوعه ونخلص منه
جسار : لاتستانس تراه بنفس الحي معنا
-
طلع سلمان وهو يشوف ابوخالد معاه شناط واغراض كثيره وبناته ومرته وراه وركب السياره وركبوا معاه وابوخالد يتعذر عشانه اشغلهم معاه وسيارته خربت
سلمان : افا بحسبة الولد ياعم
ابو خالد: ماقصرتو والله ونعم الرجال
وبهاللحظه مدت ريهام يدها لسلمان ولامست يده وسحبتها على طول وكأنها مو متقصده الحركه وصد يستغفر عنها لين ماوصلهم البيت
-
صحت مُرجان وهي كلها حزن وغضب من تذكرت دُرر وحركتها البشعة امس بالليل واتجهت لغرفتها تشوفها نايمه والجوهره نايمه عندها برضو ، التفتت على وجود ساميه وراها
مُرجان: ماما ايش تسوين ؟
ساميه : انتظر البنات يصحون
مُرجان: ليه
ساميه : جدك يبيهم
مُرجان: ماما محد له خلق والكل نايم وتعبان قولي له عالعصريات بنجيه ، وطلعت روز من الغرفه بهالوقت
مُرجان: بدلي وتعالي عندي ، هزت روز رأسها بإيجاب وهي كلها نعَس
ودخلت روز لمُرجان الي بدت تحكيها السالفه وروز كل مالها تنصدم
روز : مستحيل كذابه !
مُرجان: اسأليها وشوفي
روز : غريبه دُرر تسويها مو من عوايدها
مُرجان: عشان كذا انا معصبه هو الكلب يلعب عليها وهي مصدقه تدرين من امس جوالها معايّا وأشوف محادثاته ويكذب عليها يقُلها جاي بخطُبِك ومأعرف أيش!
روز : منجده ذا ؟ بس تخيلي يطلع صادق أيش بيصير بعدين
مُرجان: لو فعلًا صادق بفرح لها وأعترف أني غلطانه بس والله كذاب ياروز كلها فترة ويترك دُرر وانا مابيها تزعل وتتحطم ، ودخلت عليهم الماس وبدوا البنات يصحون بالتدريج وكانت دُرر أخر وحده والكل عرف بالموضوع وبدأ النقاش لين توصلوا لحل لمدة شهر لو ماجاء نايف وخطبها مابتكلمه
دُرر : بس بنات مدة شهر قليله !
الماس : مو تقولين الزفت جاي هنا ؟ خلاص يمديه يخطبك
دُرر : بس لازم يكون نفسه
الماس : مو ضروري أهم شيء خطوبه بعدين لى ننتظر عشرين سنه قدام مافيه مانع بس مايسوي حركات السرابيت ويجي من ورا أهلك
دُرر : بنات خلاص قفلوا الموضوع ، وبدت تبوس مُرجان تراضيها وتعتذر منها لين رضت مُرجان واستسلمت
روز : حقيقي وين ايهم بكلمو بموضوع ؟
الجوهره : موضوع ايش ؟
روز : موضوع مو مهم مرا بس وينه
مُرجان: اتصلي عليه ويجيك خلاص سهله
روز : ماعرف مايرد
الماس : مين تجيب اغراضنا ؟
مُرجان: يووه خليها بالليل بجيبها
ومر الوقت لين غربت الشمس وصلوا المغرب
-
جلس سلمان على سريرة بتعب وتنهد تنهيده قويه وفتح الواتس حقه ودخل عالرقم الغريب الي كان محتوى رسالته مقطع فيديو وكلام تحت " يرضيك هالمقطع ينتشر ؟ أذبحها وفك نفسك وأهلك من العار " جن جنونه من شاف هالرساله وشاف مقطع مُرجان ترقص وكان يعيده مره ومرتين وثلاث تعدت الأربع مرات والمقطع ينعاد حفظ كل تفصيل بالمقطع من أشخاص وأغنيه ورقص حفظ حتى تحركاتها بالمقطع
وطلع وهو كله عصبية ومابعيونه الا النار ويدور مُرجان ولسوء حظها صادفها عند الباب وضحك بسخريه ونطق : جابك الله ! وسحبها بأقوى ماعنده ودفها عالارض
مُرجان بعدم استيعاب : يامريض !
سلمان : ياللي ماتستحين وش مهببه انتي ؟
مُرجان: شقاعد تقول أنت يامتخلف وعلى أي اساس تسحبني ؟
سلمان بعصبيه : والمقطع الي مصورينك اياه وشهو ؟ لو المقطع يوصل لأبوك والله لايدفنك حيّه لكن انا بعجل بسواته وتقدم بيضربها لكنها مسكت يده ودفته بأقوى ماعندها
مُرجان: يمين بالله ياسلمان لو تفكر تمد يدك علي مابتشوف خير والمقطع انا مو عارفه مين الي صورته لاتحط الذنب علي ! وابوي متفهم ماهو سفيه مثلك
سلمان : أجل امشي معي اوريه المقطع !
مُرجان بتوتر : تحسبني بخاف مثلاً ؟ وسحبها سلمان من يدها وطلعها ومتجه للمجلس ووقفته قبل يقربون من المجلس بشوي ونطقت بغضب
مُرجان: سلمان أنت متوقع أني عارفه وراضيه بهالشيء ؟ شوفني حتى ماكُنت منتبةة للتصوير ولاعارفه مين الي صورت أصلًا !
سلمان : وشلون وصلني المقطع ؟
مُرجان: ايش عرفني ؟ هذي شغلتك أنت روح دور وعطني جوالك بحذف المقطع
سلمان : حذفته
مُرجان: مأبي مشاكل مع أبوي او جدي أبعد عني ولاتفتح سيرة هالموضوع وحتى لو عرفت مين إلي أرسله لاتقولي !
تنهد سلمان وهو يحاول يخفي غضبه ونطق : ان شاء الله ارجعي البيت الحين
ومشت مُرجان وسَالت دموعها هي كانت ماسكة نفسها ماتنفجر عنده لكن الحين مافيه شي يمنعها وجلست قدام بوابة المزرعه وحضنت نفسها وبكت ماتدري تلقاها من دُرر ولا من المقطع
-
كانت روز تتمشى بالصالة وتنتظر خالد يجيها وحست أنه طول وأتصلت على ريهام بأستغراب البيت قريب ومابيتأخر أكيد
ريهام : هلا والله روز
روز : فين خالد؟ طول عليّا
ريهام : جالس يلبس أنتظري شوي
روز : خلاص اسمعي انا جايتكم باخذه
ريهام : طيب
وطلعت روز تتجهز وتأخذ مفتاح سيارة ايهم وتطلع
الماس : على وين ؟
روز : طالعه باخذ خالد وامشي
الماس : تمام لاتتأخرين
وطلعت روز وهي تقفل الباب وراها متجهه للباركينق ولسوء حظها جسار كان راجع توها
جسار : على وين ياولد ؟
تجاهلته روز ومشت ولحقها للسياره
التفتت روز بعصبيه : نعم ؟ وشتبي مو قلتلك مابشوفك ؟
جسار : الا قلتي
روز : وشتبي الحين
جسار : مارأيك لو نذهب لنزهة ونحتسي القهوه !
روز : مارأيك تنقلع عني ؟
جسار : يالليل مالك داعي هذا وانا مسوي مثقف واتكلم فصحى ، ضحكت روز وركبت السياره وركب جنبها
روز : أحد عزمك ؟
جسار : لا
استغفرت روز وحركت السيارة وجسار يضحك
جسار : وين رايحه ؟
روز : بأخذ خالد نتمشى
جسار بخبث : حلو غلا بتجي ؟
ناظرته روز وشمقت له
جسار : وش حركات المراهقين هاذي ؟
روز : جسار أسكت والله انزلك !
دخلت مُرجان الغرفة وعلى غير عادتها كانت هاديه جدًا وباين على ملامحها الزعل والحزن
دُرر : اشبك ؟
مُرجان:مافيني شيء
دُرر : مُرجان انا أعرفك أكثر منهم كلهم وشفيك ؟
جلست مُرجان عالسرير وأشرت لدُرر تجي جنبها وبدت تحكّي دُرر الي صايرلها
مُرجان: يعني مو عارفه أحس المصايب بدت تجيني من كل ناحيه وكل مكان أنتي متخيله وقت رحت لسلمان ايش وراني ؟ وراني مقطع لي وانا أرقص
شهقت دُرر بصدمة ، كيف وشلووون ومنين جاه المقطع ؟
بدت مُرجان تغطي وجهها بيديها تمنع بُكائها ونطقت بصوتها المتحشرج : كان بيوديني لأبوي يبي يوريه المقطع متخيله ! وش تتوقعين ردة فعل أبوي وقت يشوف المقطع ولا كمان بجوال سلمان
حضنتها دُرر ونطقت ، ماعلمك من وين جاه المقطع ؟
عضت مُرجان شفايفها وهزت رأسها بالنفي
دُرر : تبيني أتكلم معاه ؟
مُرجان: خلينا نخلص من موضوعكِ أول بعدين نلتفت للمقطع
دُرر : موضوعي مو أهم من المقطع ولاتغيرين السالفه أوكي ؟
مُرجان: بس دُرر لازم يِخلص موضوعك
دُرر : كلمته يقول بيجي بعد أسبوع مع أهله ويخطبني وحضنت جوالها تبتسم وتكمل كلامها ، أحسُ صادق معايا مأعرف كيف بس الحكي منه غيير وكلامه معسول
مُرجان: وش رأي ايهم ؟
دُرر : ما أعرف خايفه كثير
مُرجان: أوف يادُرر أوف
-
سيف : يارجال والله ياهو جاني اكتئاب من هالعكّاز عقدني
فارس : عشان ياسربوت ماتنطنط لغرف بعض الناس
سيف : مالك داعي ياولد
دخل سلمان وهو معصب وساكت
فارس : علامك ؟
سلمان : مافيه شيء
سيف : ياولد كل هذا ومافيك شيء ؟
سلمان : قلت مافيه شيء ماتفهم أنت ؟
فارس : لاترفع صوتك !
سلمان : هذا الي ناقص تعلمني أنت ؟
سيف : ليه مو مالي عينك ؟
سلمان : يمين بالله لو ماتسكتون بثور فيكم خلاص عاد ! وقام دخل لغرفته
غمز سيف وحرك رأسه : وشفيه ذا ؟
فارس : شدراني عنه هالخبل قم قم بس
سيف : ياولد وليد يقول يبي يرجع هاليومين
فارس : لاعاد صادق ؟
سيف : اي بالله مكلمني قبل شوي
فارس : قم علمهم وش مقعدك عندي
سيف : تبي تصرفني عشان تكلم وتسولف على كيفك ؟
فارس : ايه يلا قم
سيف : الله يعين بس
