"بالمجلس"
مُرجان : هاي جدو شوفني صرت بدّويه
تركي : ياملحّك يابدويه انتي
ونزلت مُرجان راسها بخجل وراحت جلست جنب ابوها تصور
ملفي : ماضنتي بدويه والله
ناظرته مُرجان بحقد وسكتت ، بعد فتره تذكرت الجوهره وطلعت برا تدورها
-
صحى فارس وقام يقعد العيال
فارس : ياولد انت وياه قم
سلمان ويده على عيونه : ياولد طف الضوء بنام
فارس : قومو صلو العشاء
جسار بثقل صوته : فروس تكفى والله تعباان
سيف قام ولا عطاه أي رد
وقامو العيال كلهم وراه
سيف : ياولد مصدع ذي ضريبه نومة العصر
جسار : تصدق مالي نفس لأي شي ابي انام وبس
سلمان دخل وهو رافع ثوبه وشماغه على كتفه : اقول بس قم انت وياه تركي يبينا نصلخ الذبيحه
فارس : لاياولد قل غيرها
سلمان : اي بالله طلعو عازمين العرب كلهم قم قم
جسار : وتوه يقول ؟
سلمان : اندري عنه؟
سكت فارس وعرف ان اليوم صعب والحدث بيكون اليوم وبيحط الكل بالأمر الواقع ، قام ولحق اخوانه
-
دخلت روز تركض لغرفة البنات الي كلهم مستمرين يصورون والجوهره معاهم تحاول ماتحس بشي
روز : بنات جدو عازم ناس والحين قالوا ! متى حيمدينا نتجهز
مُرجان : اماانه كذابه !
دُرر : بنات شرايكم بالكيرلي حقي اليوم مرا ضابط
الماس : بنات نخرج لهم كذا ولا ايش يعني ؟
الجوهره : مستحيل ! ببدل انا
بدو يبدلون البنات كلهم وكان لكل وحده منهم اطلاله مميزه !
دُرر : شرايكم ؟
الماس : مراا يجنن عليك
كانت دُرر تتمايل وتتغنج بالفستان وتوري البنات
وروز توثق اللحظات وتكبشرها ، والغرفه كانت مزحومه من البنات والي كانت تحط ميكب والي تجرب فساتينها
" تجهزو البنات واخيرا وبدت فترة التصوير"
الماس : روز يامجنونه يجنن فستانك !
روز : كيف بس
دُرر : خلاص بنات خلونا ننزل تحت
مُرجان : انتظرو لسا ماخلصت !
الماس : بنات فستاني حلو ؟
دُرر : الابيض عليك يجنن دايم ، بس احسو قصير شوي يعني
الماس وهي تناظر فستانها : جد ؟ معرف اشوف طولو مُناسب ومدت يديها لدُرر توريها المناكير والاكسسوار
ونطقت ، حلوين ؟
دُرر : والله انك حلوه بكل حالاتك يا الماس وشبك متوتره ترا كلو عشاء يعني مو زواج ، وهدت الماس
الجوهره بتافف من تأخر مُرجان : اوف يامُرجان دايم تأخرينا
مُرجان : شوفو خلصت انتظرو شوي بس ، وفتحت غرفة التبديل وكالعاده كانت متزينه بالاحمر الي مايزيدها الا جمال وفتنه ، كان راسم جسمها
روز : اه يامُرجان تبهريني كالعاده !
مُرجان : طالع حلو؟
الماس : انتي كل احمر يطلع حلو عليك
مُرجان : دُرر كيرلياتك حلويين ، ورووز اه ياروز الازرق عليك دمااار
دُرر : شايفه مرا ضابطين اليوم
روز : احببك جوجو
الجوهره : لاتمشون مع بعض يفكرونكم شرطه
وضحكو البنات الا روز عصبت وراحت تعدل شعرها
"واخيراً نزلو البنات وبدو يسلمون عالكل وانصدمو ان الحضور ماكان قليل بالعكس كانو كثير واستغربو لان بالنهايه كله عشاء ، ماكانو عارفين عن المصيبه الجايه
بعد ماخلصو العيال من الذبايح بدو يتجهزون ، وكلهم اتجهو لبيتهم يتجهزون
جسار : ياولد وين فارس طول
سلمان : اندري عنه ، بعدين وراك ماخذ الكبك حقي
جسار : مالقيت حقي واخذته
سلمان : لاتضيعه بدوسك
سيف : ياعيال ، جدي ينادي والمعازيم كثرو وين فارس ؟
سلمان : يافارس اطلع طولت تراك ورانا ناس
فارس : خلصت جاي ، وطلع فارس وصدمهم لانه لابس بشت
سيف : ويين يابوالشباب عشاء مو عرس
فارس : دز بس ومشى وسحب عليهم
سلمان : وراه ذا؟
جسار : امش بس
واتجهو العيال للمجلس وكان ملياان رجال وكانها مناسبه كبيره مو مجرد عشاء عادي وعزيمه لكن ماعلقو وسكتو ، وبدو يسلمون عالحضور وماهي الا دقايق معدوده وصعقهم صوت تركي ينادي الشيخ
تركي : ياهلا ويامرحبا شرفتونا بحضوركم ، نبدا المراسم ؟
انصدمو العيال الا فارس كان ثابت وشامخ بمكانه ولاهزه شي وكان تحت نظرات ايهم الي تخترقه وتحرقه ونطق بكل هدوء ، نبدا
جسار لقط الموضوع بسرعه وداخله صراعات يقوم ويحوس الدنيا عليهم ولا يسكت ويهجد هم للان ماعرفو وش الموضوع بالضبط !
وبعد فتره وقع فارس ورفع راسه لاخوانه وكان عارف انه مابيسلم منهم ابد ! ودخل مع ايهم وفيصل وجده البارود داخل مجلس خارجي داخل البيت وارسلو ايهم ينادي الماس
اتجه ايهم يناديها لكن وقف عند الباب لانه مقفول ولانه يفتح على ممر المطبخ وغرفة الجلوس وبدا يطق الباب
دُرر : مين يطق ؟
الجوهره : معرف بروح افتح، راحت الجوهره ونطقت مين ؟ سكت ايهم من سمع صوتها وابتسم والجوهره ماجاها الرد لكن فتحت الباب وانصدمت بايهم الي قدامها ارتبكت وخافت رجعت ورا على طول ابعدت عن الباب ، ايهم ابتسم من شافها بكامل زينتها وقرب منها اكثر ومسك يدها وشدها له وهمس بأذنها ، الاسود يعذبني عليك لاتلبسينه ارحميني ، وتركها ومشى
كانت تحت اثار الصدمه هي ماتخطت لمسه لها قبل كم ساعه ليه يرجع يسوي هالحركات منجديد !
دخل ايهم ومالقى احد بالمطبخ وبدا ينادي الماس
بعلو صوته
دخلت الماس مفجوعه منه
الماس : وشبك جاي ؟ وكيف جيت هنا اصلاً
ايهم : ماعندي وقت تعالي معي
الماس : فين ؟
ايهم : امشي وراي وبس ، بالفعل مشت الماس وراه وجاهله وش يبي منها ولمحت الجوهره واقفه عند الباب وساكته كانت بتسألها وشفيها لكن اختارت الصمت ولحقت ايهم
دخل ايهم عالمجلس ووراه الماس الي اول مالمحت فارس رجعت ورا بحكم ان فستانها قصير وهي مو لابسه عبايه
لمحها فارس وطلع برا الغرفه ينتظر عند الباب الي كان مردود ، ودخلت الماس وهي مصدومه وراحت لابوها
الماس وهي تلمس ابوها : بابا فيك شي ؟ وشصاير
فيصل : لا يابنتي ، بعدين وش هالحلا وش الزين كله
نزلت راسها الماس بخجل ، ورفعت راسها من نطق البارود : وقعي
الماس باستغراب : اوقع على ايش ؟
مد لها البارود وانصعقت
الماس : وش ذا تستهبلون ؟ نزل راسه ايهم ومسكها فصيل ، ياعيوني وقعي ونعلمك السالفه
الماس : بابا ايش اوقع مستوعب الي موجود انت ؟ ونزلت راسها تقرا ولمحت اسمه "فارس بن فهد بن البارود "
وصارخت الماس بكل صوتها منجدكم انتم تبوني اتزوج فارس ! ناسيين ايش قال عني هو ! مستحيل والله مارضى ومخليني اتجهز عشان اوقع على عماي ! لا بالله ماعشتو كلكم مرضى وناظرت لفيصل بخيبة امل
وتكلمت ببحة صوتها توقعتها منهم كلهم الا انت يابابا البارود ارتفع ضغطه من كلامها وعصب عليها ونطق بحدة صوته الي ارعبتها
البارود بعصبيه : وقعي !
الماس : اقولكم مابوقع تستهبلون ! تبوني اتزوج دا !
منجدكم انتو ؟
البارود : الماس وقعي دام النفس عليك طيبه ورانا رجال ينتظرون !
فارس كان ساكت ويناظرها من ورا الباب ، عصب ودخل عليهم ونطق ياتوقعين ياتطلعين برا ولا ابوك ولاجدانك راضيين عليك سامعه ! انصدمت الماس من دخوله
دخوله ونست نفسها ونست فستانها وشكلها وبدت دموعها تنزل بدون شعور ساكته وتناظر فيه بفراااغ وصدمه ، وقف ايهم قدامها وركض بيضرب فارس لكن هالمره غير فارس حفظ تحركاته ! واول مامد يده لفها ورماه عالجدار وعصب ايهم وقام
فيصل بصراخ : تبون تعيدون كرتكم ! زي ذيك المره ؟ والله لو تعيدونها لاشرشحكم بالمحاكم ولا اهتم عيال اخوي ولا اعرفكم اعقلو !
وسكت فارس يناظر الماس وينتظر رد منها
فيصل بعصبيه : الماس وقعي يا الماس وماهو بصاير شي وحتى ماهو بماخذك كلها سالفه ووعد مني يطلقك وقعي هالفتره وبس
ناظرته الماس وعيونها دموع وتتصدد عنه ومسحت دموعها بتأفف ، اجل ليه اوقع علموني ايش صاير وانا بساعدك يابابا والله مالو داعي كل هذا !
فيصل : محتاجين شغله ولازم فارس يكون فيها ويتزوج
انصدم فارس وايهم من صدمته ! فيصل كذب على الماس
"فلاش باك قبل ايام"
~بالمجلس
دخل فارس وسلم عاللي موجودين
وناظره ايهم وسكت
ملفي : وراك ماترد السلام يهودْي انت ؟
ايهم : استغفرالله العظيم ، مابتكف شرك عني ؟
وقف فارس بنص المجلس ونطق انا جاي اعتذر عن خطاي وجاي من اقصاي ورمى شماغه ونزل على ركبه وكمل آسف ووالله اني آسف واعتذر ومستعد اسوي كل الي تبيه ، وبنتكم لابالله انها شريفه وطاهره وبنت اجاويد ولافيها من الكلمه وصف ، اتجه فيصل يرفعه بالنهايه هو ولد وطايش وكانت لحظة غضب وغيره على بنت عمه ومارضى يكون شكله كذا قدام الرجال وحط يده على كتف فارس الي مسكها وباسها وهو يعتذر ، كمل فارس مستعد اسوي كل الي تبيه بس ترضى علي وتسامحني انت وبنتك ياعم والله لو تطلب سهيل لاجيبه !
فيصل : على عيني وراسي انت بس قم اي بالله انك شهم ورجال اجودي
ملفي : دامه كذا اطلبها من ابوها !
انصدمو الموجودين وكمل ملفي ، كانك صادق اطلبها وتزوجها ولا بس كلام
انصدم فارس ونطق ، بس ياجدي موضوعنا غير !
ملفي بعصبيه : اطلبها ! واثبت صحة اقوالك وكلامك ولا للحين مقتنع انها رخيصه ؟
فارس : حاشى والله بس
البارود : مافيه بس ابوها مستعد يعطيك اياها وجدها موافق
تركي : متى صار ذا الحكي يارجال ؟
البارود : ملفي اكبرنا هنا وحكيه ينطبق ياتركي ولا تبي تختلف؟
وسكت تركي وكمل ، لا بالله ماختلفت الي يقوله ملفي يصير وابتسم ملفي بخبث ومكَر هو كل همه يزوجهم لجل يسنع خطته ويصفاله الجو
ونطق فارس : علامكم يارجال ماتفقنا على هالحكي
وانا ماني مستعد للزواج الحين !
تركي وهو كاره للموضوع ولاوده يغصب حفيداته على شي : يافارس مالك محال للرفض والبنت هنا بين اهلها وناسها ولاهي بعيد وحنا بنصرف عليها وبالفتره ذي تكون نفسك انت
سكت فارس وناظر لعمه فيصل الي راضخ للأمر وعارف ماباليد حيله
فيصل : كانك تبيها وتبي تطيع شور اجدادك عطيتك اياها والبنت لك يالفارس بن الفهد .
وسكت المجلس كله ونزل راسه فارس ورفعه وعيونه على ايهم ونطق تم .
"الحاضر"
بدت الماس تقلب الفكره براسها لكن الماس ماكانت غبيه ابد ، وعارفه ان الوقت ضيق عليها ونطقت
بشرط مايلمسني ولايعيش معايا الا لمن تخلص شغلتو ويطلقني ! فارس تقطع قلبه عليها هو عارف ان شرطها مابيغير ولاشي ابد لكن كذب عليها أعز الناس لها وشرطها باطل مافيه شيء يخلصه فارس ابد يعني بيكون كلشي عادي وكان هذا حال ايهم برضو يشوف اخته ينلعب عليها من مُجرد اعتذار ! كان يمديهم يسامحونه ويعذرونه لكن وصل الموضوع للزواج وكله بسبب لعب وخطط ملفي
ونطق فيصل تم موافقين
ووقعت الماس وطلع البارود ولحقوه الا ايهم الي جلس وشاف الماس جلست عالمجلس بقلة حيله وتعب هي فعلاً انهلكت من الموضوع وكيف صار كلشي بسرعه وكيف حياتها انقلبت ! وهي مو متقبلته ابد هو تلفظ عليها قدامهم كلهم ويرضون يسامحونه ؟ ويزوجونها اياه لجل شغلهم حست وكانها شي رخييص وينلعب فيه لاشغالهم بالنهايه هي بنت وتنجرح انوثتها بسوالف الزواج واكيد الناس بيتكلمون لو تطلقت بسرعه وهي مو عارفه كم بتدوم شغلة فارس معاها وتفكيرها ياكلها عذبها وعذبتها نظرات ايهم الي ملياانه ندم وحزن وشفقه على حالها ، مسحت دموعها وابتسمت ولاكان شي صار بالنهايه هي معروفه انها الماس القويه والي مايهزها شي ولاراح تمشي حركتهم هذي وبتقلب الوضع لصالحها وطلعت برا الغرفه تنتظر العزيمه تعدي على خير وانتبهت للبنات الي اول ماشافوها ركضو لها يسألون عنها
حاولت تتماسك وماتنفجر ومحد فهمها غير دُرر وكانت تنتظر الوقت يخلص لجل تسألها عن الي فيها
الماس : بنات كليتوني اشبكم وش هالاسئله
روز : الماس حبيبي تراك طولتي ! وشصار ؟
الماس ناظرتهم ونطقت بغصه : تزوجت !
انصدمو البنات
مُرجان : يليل مو وقت استهبالك !
الماس : شايفتني اكذب عليك ؟ تزوجت جد ولابعد مين ؟ فارس ، وماقدرت تمسك نفسها وانهارت بالبكاء هي فعلاً انهارت بمعنى الكلمه استوعبت كل شيء ومشاعرها جتها دفعه وحده وجلست بالارض حاضنه رجولها وتصيح
انصدمو البنات من حالها واستوعبو ان كلامها صدق وروز بكت معاها هي مو عارفه وشتسوي بهالوضع أختها القويه الي تستمد منها قوتها وطاقتها انهارت قدامها وفجأه راحت ورجعت متملكه! ماكانو عارفين وش يسوون ودُرر بدت تهدي الماس والجوهره اتجهت تجيب لها مويا
، لكن الماس كانت تشهق بقوه وتصيح بحضن دُرر ، دخلت ساميه عليهم وانصدمت من منظر الماس وراحت لها تسأل وشفيها والماس اول ماشافتها زادت بالبكاء والشهقات وطاحت بحضنها وماسكه نحرها الي تغير للاحمر من شهقاتها الي عورت حلقها ومسكتها له بقوه واظافرها،وروز تصيح معاها وقلبها متقطع على اختها انصدمت ساميه توهم يضحكون معاها والحين بناتها اثنينهم يصيحون
جلست فتره على هالحال وهدت بعدها لكن مانطقت بولا كلمه ودخلوها الغرفه بحكم انو مايصير تطلع قدام الناس ، قضت فتره لوحدها بالغرفه مدة وراحو الناس ودخلت دُرر عليها تاخذها فوق تبدل وكانت تمشي جثه هامده بدون روح او حياه ، هي استوعبت انها انجبرت وكل ماتفكر بأنها اداة لجل فارس يخلص شغله تحترق تشتعل هالافكار بداخلها وتحرقها اتجهت فوق تبدل ملابسها ، دخلت تاخذ شور تريح نفسها من الافكار الي تراكمت عليها والمصيبه الي جتها وماتعرف من وين جت توها قبل ساعتين مبسوطه وتضحك ! والحين تصارع افكارها وهي متملكه على شخص بنظرها وتفكيرها واخر حدث صرلها ، مايقدرها ولا ويعزها جاهله عن الي سواه فارس قدام اجدادها وعمامها الي تلفظ عليها قدامهم ، وجاهله انه جثى على ركبتيه لجل يعتذر لها واهلها ماوصلو لها الاعتذار الغلط منهم مو من فارس هم الي دمروها وضيعوها اهلها الي تحبهم مو فارس الي تكرهه جاهله عن الوضع كله ومابعيونها الا حقد وكره لفارس تعبت من التفكير وجدا ورجعت تبكي ونزلت ايديها عالبانيو وحطت راسها على ايديها وبدت تصيح هي مو قادره تستوعب الي صار بحياتها كانت تحتاج شخص يواسيها مو خواتها ولا ابوها ولا ساميه تحتاج امها ! تبيها توجّها تعلمها لكن للأسف امها بمكان ماتقدر توصله والسبه ابوها الي طلق امها مندون سبب توها تحس بالفقد والوحده كان ابوها مالي الفراغ ويسمع لها ولا مره بحياته غلط عليها او اجبرها تسوي شي هي رافضته لكن هالمره شلون بتشكيه وهو سبة زعلها ؟ كانت بمثابة الام لروز لكن هي محرومه من هالشعور وزادت انهياراتها وتعبت كل شيء تراكم عليها وانفجرت هي ماتبكي بسبب زواجها من فارس تبكي على نفسها وعلى حالها وحياتها الي انقلبت ومشت بسرعه وهي ماستوعبتها كانت عايشه بدون عقل او انها تتناسى ؟ ماكانت عارفه ابد وظل هالتساؤل بداخلها يعذبها
-
طلع فارس وكله غضب وحزن على الماس الي ماتدري وش بيصير فيها وطلع زقاره يشغلها بعيد عنهم ومتجه بخطواته لبيتهم لكن وين بيروح من اخوانه ؟ كانو مستقعدين له قدام عتبة الباب وسلمان الي اول
مالمحه قرب ثار فيه واتجه له بسرعه ودفه بكل قوته لين ماطاح فارس ونزل سلمان يكمل ضرب بفارس لكن فارس ابدا ماعطاه أي ردة فعل وهذا الي زاد جنون سلمان
لين ماسحبه جسار وقوم فارس الي ماتأثر بضرب سلمان وكان عارف انه يعبر عن غضبه وقهره بهالطريقه
سيف : أجل تتكلم عليها قدام الملا وتملك عليها ! غريب امرك يالفارس
فارس بعصبيه وقهر : وش بلاكم انتم ! تراني فارس هذي مو سواياي سوايا ملفي التبن يشهد الله اني رحت اعتذرلهم ورميت نفسي قدامهم لكن ملفي لعبها واجبرني اطلبها وهم زي العبيد عنده محد فتح فمه والبارود شغال يعزز له ولعبو بعقل المسيكين تركي الي لعب بفيصل وورطوني بها
انصدمو العيال وصفقه جسار كف ، ونطق يوم انك سويت كل هالسوايا وراك ماعلمتنا ؟ كان رحت ومسحت فيهم البلاط يالخبل تترك ملفي يلعب فيك ويورطك وأرّك هالحين متزوج
فارس وهو يمسح خشمه الي بدا يرعف ونطق علامكم تصفقوني !
