အချစ်အပိုင်းအစလေးများ [completed]

Part.15

အဖူးမျက်စိရှေ့မှာမြင်နေရတဲ့အိမ်လေးကိုကြည့်ပြီးမျက်လုံးလေးတွေအရောင်တလက်လက်ဖြစ်သွားရ၏။

''ကိုကို ဒီအိမ်က''

''ဒီအိမ်ကဖေဖေကမေမေ့ကိုမွေးနေ့လက်ဆောင်ပေးခဲ့တဲ့အိမ်လေး ဒီခြံထဲကပန်းတွေကတော့ဖေဖေ့အစွမ်းပေါ့''

သူအဖူးလက်ကိုဆွဲပြီးခြံတံခါးကိုတွန်းဖွင့်ဝင်ခဲ့လိုက်သည်။

''ဒီတစ်ခြံလုံးကပန်းတွေအကုန်လုံးကကိုကို့အဖေကိုယ်တိုင်စိုက်ထားတာ ဟုတ်လား''

''အင်း''

''ကိုကို့ဖေဖေကကိုကို့မေမေကိုသိပ်ချစ်တာပဲနော်''

''အဖေတူသားဖြစ်တဲ့ကိုကိုကလည်း အဖူးကိုသိပ်ချစ်တာပါကွာ''

အဖူးခေါင်းလေးအသာငုံ့ရင်းပြုံးလိုက်မိသည်။

''အခုကိုကိုတို့ဒီအိမ်မှာနေကြမယ်''

''ဟင် ဘာလို့လဲ''

''အဖူးစိတ်ထဲသံသယတွေနဲ့ပူလောင်မနေစေချင်လို့ပေါ့ ကိုကိုကအဖူးကိုစတွေ့တုန်းကအေးအေးချမ်းချမ်းပုံစံလေးအတိုင်းပဲမြင်ချင်တာ တစ်သက်လုံးအဲလိုဖြစ်အောင်လည်းကိုကိုကထားမှာ''

''ဒါပေမယ့်အဖူးအဝတ်အစားတွေမှမပါသေးတာ''

''ကိုကိုအကုန်ဝယ်ပေးပြီးပြီ ကိုကိုနဲ့အဖူးနဲ့ဒီမှာရှိတာဘယ်သူမှမသိဘူး ကိုကိုတို့နှစ်ယောက်တည်းလွတ်လပ်တယ် ကဲလာ''

သူအဖူးအားအိမ်ထဲခေါ်ခဲ့ပြီးဘယ်နေရာမှာဘာရှိလဲလိုက်ပြကာ

''အိမ်မှာကပစ္စည်းတွေအကုန်ရှိတယ် ရေခဲသေတ္တာ အဝတ်လျှော်စက်အားလုံးအစုံပဲ ဟင်းချက်စရာတွေလည်းအကုန်ဝယ်ထားတယ်''

''အဖူးတို့ကဒီမှာဘယ်လောက်ကြာအောင်နေမှာလဲ''

''မပြောတတ်ဘူး ယွန်းယွန်းပြန်တဲ့ထိဆို အလွန်ဆုံးသုံးနှစ်ပေါ့''

''ဟင် အကြာကြီးပဲ သူ့ကိုအဆောင်နေခိုင်းလို့ရရဲ့နဲ့ ဘာလို့အဖူးတို့ကအိမ်ကထွက်လာပေးရတာလဲ ပြောင်းပြန်ဖြစ်နေသလိုပဲ''

''အဖူးကဒီမှာမနေချင်လို့လား''

''မဟုတ်ပါဘူး အဖူးက​​ပြောပြတာပါ အဖူးဒီအိမ်လေးကိုကြိုက်ပါတယ်''