Love Blaze { အချစ်မီးလျှံ } [ Season 2 ]

Part 26

"ဒါဆို အိမ်ထဲကိုယ့်ဘာသာကိုယ်ဝင်လိုက်ကြတော့နော် ဘဘနောက်ရက်မှ ဒီအိမ်ဘက် လာခဲ့တော့မယ်...."

"ဟုတ်ကဲ့ ဘဘ"

"ဘဘ ‌ကောင်းကောင်းပြန်ပါရှင့်...."

မြေးဖြစ်သူကို နှုတ်ဆက်နေ‌ချိန် မျက်နှာချိုသွေးပြီး ဝင်နှုတ်ဆက်နေတဲ့တစ်ယောက်ကို ဦးဝဏ္ဏမင်းလည်း မျက်နှာချိုသွေးကာ ပြန်နှုတ်ဆက်လိုက်တယ်။

"အော်....အေးပါ။ ထိပ်တန်း ငါ့မြေးမလေးကိုသေချာဂရုစိုက်ပေးလိုက်နော်။ နည်းနည်းလေးတောင်အပွန်းအပဲ့မခံနဲ့။ ဘဘသွားပြီနော်....."

"ဟုတ်ကဲ့...."

ထိပ်တန်းအဖိုးဖြစ်သူကို နှုတ်ဆက်ပြီးတာနဲ့ မေသွန်းဆက်တို့မောင်နှမနဲ့အတူ အိမ်ထဲဝင်လာလိုက်တယ်။

"သွားနားတော့နော်....ကျွန်တော်လည်းသွားတော့မယ်......"

"ဟို...."

ထိပ်တန်းအပေါ်ထပ်တက်မလို့ လုပ်နေတုန်း မေသွန်းဆက်က လက်ကအင်္ကျီစကိုလှမ်းဆွဲတာကြောင့် ထိပ်တန်းလှည့်ကြည့်လိုက်တယ်။

"ပြောစရာရှိလို့လား....."

"ဟို.....ကျွန်မပြောသင့်မပြောသင့် သိပ်မသိပေမယ့် ကိုယ်ဝန်ရင့်လာလို့ ဗိုက်ထွက်လာတဲ့အခါ ကျွန်မမှာတရားဝင်လက်ထပ်ထားတာမျိုးမရှိဘူးဆိုရင် လူတိုင်းကလက်ညှိုးဝိုင်းထိုးကြမှာ...အဲ့တာကြောင့်....."

"ကျွန်တော်လည်း စဉ်းစားနေပါတယ်။ အဲ့ကိစ္စအတွက်ဆိုရင်တော့ စိတ်ပူစရာမလိုပါဘူး....."

"ဟုတ်ကဲ့ ကျေးဇူးပါရှင့်...."

"ရပါတယ်။ ခွင့်ပြုပါဦးနော်...."

"ဟုတ်ကဲ့...."

ဒေလီယာ ထိပ်တန်းမဟာကိုမြင်တိုင်း တကယ်ကိုလူရွေးမှန်သွားသလိုခံစားရတယ်။ သူထင်ခဲ့တာက တော်တော်လှည့်စားရခက်ပြီး ဝင်အောင်းရတာလည်းခက်မယ်လို့ထင်ခဲ့တာ။ ခုတော့အထင်နဲ့အမြင်ကတက်တက်စင်အောင်လွဲတော့တာပဲ။

ခန်ညားခက်ထန်ပုံပေါ်တဲ့ အသွင်အပြင်အောက်မှာ နူးညံ့တဲ့နှလုံးသားလေးကိန်းအောင်းနေတာမျိုး။ တစ်နိုင်လုံးရဲ့ အချမ်းသာဆုံးမိသားစုထဲက ဆင်းသက်လာတဲ့အပြင် ဘယ်သူနဲ့ယှဉ်ယှဉ် ချောမောခန့်ညားနေတဲ့မျက်နှာမျိုးနဲ့ မော်ဒယ်တွေထက်တောင် မြင့်မားတဲ့အရပ်နဲ့တောင့်ဖြောင့်နေတဲ့ ခန္ဓာကိုယ်မျိုး.......