Whirlwind Night [Completed]

Episode 15

မနက်ခင်းသတင်းစာမျက်နှာတွင် ဘိန်းဘုရင်ဟုတင်စားကြသော ဓားပြဗိုလ်ဂျွန်ဂျောင်ကု အဖမ်းခံရသောသတင်းသည် ခေါင်းကြီးပိုင်း၌ပါဝင်ခဲ့သည်။

လူအများ၏ပါးစပ်ဖျားတွင် ဓားပြဗိုလ်ဂျွန်ဂျောင်ကုကို တောင်ထိပ်လွင်ပြင်ရှိ ပန်းခင်းကြီးထဲမှဖမ်းဆီးမိခဲ့ကြောင်း၊ ထွက်ပြေးတိမ်းရှောင်ခြင်းမပြုဘဲ အသာတကြည်အဖမ်းခံခဲ့ခြင်းဖြစ်ကြောင်း၊ ထို့အပြင် ဓားပြဗိုလ်ဂျွန်ဂျောင်ကု၏ဓားပြစခန်းတစ်ခုလုံးကို စီးမိခဲ့ခြင်းနှင့် ဘိန်းခင်းဧကပေါင်းရာနဲ့ချီကို ဖမ်းဆီးရမိခဲ့ကြောင်း စသည်တို့ကို ပြောမဆုံးဖြစ်နေကြသည်။

သတင်းစာတိုက်အသီးသီးကလည်း ဓားပြဗိုလ်ဂျွန်ဂျောင်ကုကို ဖမ်းဆီးရမိခဲ့ပုံများအား အမှန်တစ်မျိုး၊ ချဲ့ကား၍တစ်မျိုး ရေးသားဖော်ပြလာကြသည်။

တစ်ချို့ကတော့ ဓားပြဗိုလ်ဂျွန်ဂျောင်ကုသည် ထွက်ပြေး၍ရပါလျက် လက်အောက်ငယ်သားများအပေါ်ညှာတာစိတ်ကြောင့် အဖမ်းခံခဲ့ခြင်းဖြစ်ကြောင်း ပြောဆိုကြသည်။

တစ်ချို့ကတော့ ဓားပြဗိုလ်သည် သူမလွတ်နိုင်မှန်းသိလို့ ထွက်မပြေးဘဲ အသာတကြည်အဖမ်းခံခြင်းသာဖြစ်ကြောင်း ပြောဆိုကြပြန်သည်။

မည်သို့ပင်ဖြစ်စေ ဓားပြဗိုလ်ဂျွန်ဂျောင်ကုလို အဖမ်းရခက်သည့် နောက်ခံကောင်းသည့် ဘိန်းဘုရင်ဓားပြခေါင်းဆောင်တစ်ယောက်ကို အရှင်လတ်လတ်ဖမ်းဆီးခဲ့ခြင်းသည်ပင် ပုလိပ်ဋ္ဌာနများအတွက် ဂုဏ်တက်စေသည့်ကိစ္စဖြစ်ခဲ့သည်။

အစိုးရအာဏာစက်တည်ရာ မြို့လယ်ခေါင်တစ်နေရာတွင်...

စက္ကူဘုတ်ပြားများကိုင်ဆောင်ထားသော ရာချီသည့်လူအုပ်ကြီးသည် ဘိန်းဘုရင်ဂျွန်ဂျောင်ကုအား သေမိန့်ပေးရန် ဆန္ဒပြတောင်းဆိုနေကြသည်။ ထိုစဉ်အချိန်က မူးယစ်ဆေးနှိမ်နင်းမှုသည် အရှိန်အဟုန်အကောင်းဆုံးသို့ ရောက်နေသောကာလဖြစ်သည်။

မူးယစ်ဆေးရောင်းဝယ်ဖောက်ကားမှုဖြင့် အာဏာရှိဝန်ကြီးနှစ်ယောက်သည်ပင် သေမိန့်ကိုစောင့်ဆိုင်းနေရသည့်ကာလဖြစ်သည်။