Whirlwind Night [Completed]

Episode 16

ကြားနာမှုစတင်ခဲ့သည်။

ဆော့ဂျင်က သူစုစည်းရခဲ့သမျှ သက်သေများကိုတင်ပြသည်။

ဖခင်ဖြစ်သူစော်ဘွားကြီးထံ တိတ်တဆိတ်ပေးခဲ့သော ဖလင်ချပ်များနှင့် စာတစ်စောင်။

လက်လုပ် Pinhole Cameraကနေတစ်ဆင့် ရိုက်ကူးမိသော ခက်ဝါးဝါးပုံများပါဝင်သည့် ထိုဖလင်ချပ်များကို ဆေးကူးလိုက်သည့်အခါ အသုံးဝင်သည့်သက်သေအချို့ထွက်လာသည်။

ဓားပြအမျိုးသမီးများ ဘိန်းစေးထုတ်နေသည့်ပုံ၊ ဘိန်းစိုက်နေသည့်ပုံ၊ သူတို့ဖြတ်သန်းသော နေ့စဉ်ဘဝပုံစံများ၊ ရိက္ခာတဲအတွင်းမှ စုဆောင်းရရှိသော ဖလင်တိပ်များသည် ထိုမျှအသုံးဝင်ခဲ့သည်။

လက်လုပ် pinhole camera တစ်လုံးဖြင့် ဘိန်းဘုရင်၏နောက်ကြောင်းအစုံကို ဖော်ထုတ်နိုင်ခဲ့သော ရှေ့နေကင်မ်ဆော့ဂျင်ကို ပြည်သူတစ်ရပ်လုံးက လေးစားလာကြသည်။

အမှုစစ်အဖွဲ့သည်လည်း ရှေ့နေကင်မ်၏ ဉာဏ်ပြေးပုံကို ချီးမွန်းထောပနာပြုမဆုံးဖြစ်ကြသည်။

သို့သော် ရှေ့နေကင်မ်ဖော်ထုတ်လို့ မရတဲ့ ပြဿနာတစ်ရပ်ရှိနေသည်။

ထိုအရာသည် ဘိန်းဘုရင်ဝှက်ထားသော လက်နက်တွေ ဘယ်နားမှာရှိသလဲဆိုတာပင်။ ထိုကိစ္စသည် တရားရုံးအတွက်ရော စုံစမ်းရေးအတွက်ပါ ဆူးတစ်ချောင်းဖြစ်စေခဲ့သည်။

ရှေ့နေကင်မ်သည် သူနှင့်မျက်နှာချင်းဆိုင်တွင်ရှိနေသော တရားခံရှေ့နေချွဲဆူဘင်းနှင့် တရားခံဓားပြဗိုလ်တို့ကို ကြည့်ချင်စိတ်ပင်မရှိတော့ပေ။

သက်သေအထောက်အထားသည် အဘက်ဘက်ကပြည့်စုံနေပါလျက် သူတို့၏မျက်နှာသည် တစ်ချက်ကလေးမှ ပျက်သွားခြင်းမရှိ။ အဆုံးထိတောင့်ခံမည်ဟု ဆုံးဖြတ်ထားပုံရသည်။

ရှေ့နေကင်မ် ဓားပြဗိုလ်ကိုကြည့်လိုက်မိသည့် အချိန်တိုင်း ဓားပြဗိုလ်၏မျက်လုံးများက ရှေ့နေ့ကင်မ်ထံ ရောက်နှင့်နေပြီးဖြစ်သည်။

ဓားပြဗိုလ်သည် ရှေ့နေကင်မ်ကို စိုးရိမ်မှုမကင်းသောအကြည့်မျိုးဖြင့် ကြည့်နေတတ်သည်။ ဓားပြဗိုလ်သည် ဒီအမှု၌ လွတ်နိုင်မည့်လမ်းမရှိ။