ياقريب ويابعيد فيك امسي وحاضري

الجزء/٨

-
-
قرب منها ولف للشايب:تعرفها؟
مشاري هز راسه بقلق وقرب منها اكثر لمّا مشت سيارة الشايب:جود وش صاير كيف جيتي هنا؟
مشاري بلع ريقه من بكائها الموجع:تعالي معي جود تعالي.
مشت معه وهي ترجف من خوفها ركبت السياره وركب بالمقعد الامامي يسمع شهقاتها عض شفايفه يلف عليها:جود يا امي تكلمي وشفيك فيه احد سوالك شي!
جود نطقت برجفه:لحقوني ثلاثه ثلاثه بغيت اموت.
مشاري عقد حجاجه بذهول:من الي لحقك كلاب!
جود هزت راسها بالنفي وبكت:عمّال اثنين وذيب.
مشاري وسع عيونه بذهول:وين كنتي انتي كيف لحقوك!
جود عضت شفايفها وبدت تشرح له كل شي صار وسط رجفة صوتها الي دمرت مشاري: كنت عند ماما وتهاوشنا انا وهي انا كنت متضايقه وابكي ماكانت ابي ابوي يشوفني وانا ابكي وتصير مشكله مشيت بعيد مره ولمّا استوعبت مكاني شفت شبك النياق حق ابوي قربت منه وجلست ومادري كيف مر الوقت على جلستي لكن مضى وقت كبير وانا بنفس مكاني وخوفني صوت الكلاب والذيابه قمت لمكان الراعي حقنا لان ظلام وماقدر ارجع لوحدي طقيت الباب وطلع لي واحد ومن صوته عرفت انه مو جميل الراعي حقنا قلت له اني ضيعت وابي جميل يرجعني بس هو قالي تعالي غرفتي وبكرا ارجعك.
عض شفايفه بقهر يشوفها سكتت تبكي من غصتها بلعت ريقها ورجعت تكمل:بعدها ركضت انا منه وطلع واحد ثاني معه يركضون وراي انا خفت مره حتى اغراضي ما اخذتهم وبنص ركضي لمحت عيون قريب مني وماطلع الا ذئب وصار بدال مايركضون وراي اثنين صارو ثلاثه بس الحمدلله ان الذئب خوفهم وبعدو عني وصار يركض وراهم وانا جيت هنا والله قلبي يرجف من الخوف.
مشاري ناظر فيها بذهول:المكان بعيد كيف رحتي رجليه جود!
جود ناظرت فيه تبكي:قلت لك ماحسيت بنفسي من ضيقتي بس كنت ابي ابعد عن عيون الناس.
مسح جبينه بقهر:وكيف اشكالهم الي تعرضو لك؟
جود مسحت دموعها:ظلام ماشفتهم.
مشاري هز راسه وشد على يده من خوفها:انتي معي جود هدي لاتخافين.
جود سكتت تحاول تكتم شهقاتها ولف مشاري يتنهد ورفع جواله يتصل على سالم بعد المكالمه الرابع رد عليه:هلا خالي.
مشاري حرك سيارته يمشي بإتجاه الديره:اطلع من بيتكم بسرعه وتعال بسيارتك للمحطه الي قريب من المزارع.
سالم عقد حجاجه:ليه صاير شي.
مشاري عض شفايفه يلف لجود الي باقي تبكي:لاتكثر اسئله ياسالم تعال وحاول ماتبين لاحد طلعتك.
سالم فز بخوف:طيب جاي. كان توقعه ان خاله مسوي حادث وهذا الي جاء في باله لانهم يعرفون ان جود في بيت جدها شاهر مع امها
.
.
ماهي الا دقائق معدوده وشاف نور سيارة سالم قريب منهم نزل من سيارته سالم يركض بإتجاه سيارة خاله لمّا نزل مشاري:خوفتني خالي احسبك مسوي حادث.
مشاري ناظر فيه بضيق:احضنها.
سالم عقد حجاجه:من الي احضنها خالي وشفيك!
مشاري مسح على وجهه:جود اختك ترجف احضنها يمكن يخف خوفها.
سالم وسع عيونه بذهول يناظر في سيارة خاله المظلله:جود وش بيجيبها معك خالي انت صاحي؟
مشاري ضرب كتفه:بعدين افهمك انا مابغيت نرجع للديره مع بعض عشان مايطلعون علينا كلام خذها معك وارجعو وانتبه لاحد يشوفكم.
هو يدري ومتأكد ان جود تكلمت معه من خوفها مافرقت الشخص الي تتكلم معه عشان كذا قالت له كل شي حتى هوشتها مع امها
سالم ماكان مستوعب كلام خاله ابد الا لمّا مشاري فتح الباب الي بجهة جود ولانت ملامحه يشوف حالها:جود!
جود بكت تناظر فيه:سالم.
سالم ناظر في خاله الي تنحنح يأشر له وتقدم لها يحضنها وعقد حجاجه بقلق من رجفتها بحضنه:بسم الله عليك جود تعوذي من الشيطان.
جىد بكت اكثر من حضن سالم لانها كانت محتاجته فعليًا من خوفها ورهبتها مسكها سالم واستندت عليه تنزل من السياره واشر له خاله:بعدين افهمك امشو الحين.
هز راسه سالم ومشى من قدامه يركب السياره مع جود وحرك لف مشاري لسيارته الي تحركت وركب سيارته يرجع لمكانهم الي قبل وصل ونزل يركض لنفس مكان النياق حقت نايف لكن مالقى لهم اثر عقد حجاجه بإستغراب رغم انهم رعيّه ويعرفون كيف يتصرفون مع الذيابه والكلاب مشى للأماكن الي جنبها لكن بعد ماحصل شي ومشى بيرجع لسيارته لكن استوقفه تجمع ذيابه والدم يسري من تحتهم وسع عيونه بذهول لانهم ماكانو الا العمال:اعوذ بالله اللهم احسن خواتمنا.
كشر من المنظر لانهم توفو هذا الواضح رفع جواله يتصل على الاسعاف والشرطه يبلغهم
.
.
« اليوم التالي جدِه »
عدلت شعرها تدخل :السلام عليكم.
احلام رفعت عيونها:ياهلا ومرحبا طولتي علينا.
ضحكت غلا:حبيبتي زوجة اخونا وخاله هيله جو بدري انتي طولتي.
ضحكت غاده تسلم عليها:ياخي والله قبل شوي راجعه من الشغل.
جلست بعد ماسلمت عليهم كلهم
ولفت رغد لها:جهزتي ماما وخاله هيله ماخلو احد ماعزموه الحفله بعد اسبوع.
ضحكت غاده:ماما حبيبتي تتحلم بالحفله.
رغد هزت راسها:والله حمسوني اقوم على رجولي.
غاده ناظرت فيها:على هالطاري فيه تطور.
رغد هزت راسها بإبتسامه:ناظري تحت.
وسعت عيونها غاده بفرحه تشوفها تحرك اصابعها:قلبي انتي الحمدلله!
رغد هزت راسها:رجولي ثقيله مع التمرينات ان شاء الله تتحسن قالت لي الدكتوره اني مره كويسه.
احلام ناظرت في بناتها:اعزم عمتكم رحاب ولا تحسون مالها داعي بما انها مو جايه؟
رغد لفت تشوف حال غاده الي تبدل:ماله داعي احس.
غلا ناظرت في امها:لا ماما اليوم سمعت عمي سطام يكلم ابوي وقاله ان عمتي رحاب جايه لوحدها للديره عشان خطبة جود.
غاده لفت بإهتمام تسمعهم وتكلمت احلام بذهول:خطبة جود!
هزت راسها غلا تحس بصدمتهم الكبيره:اي سمعتهم يقولون وجود ماتبي تتزوج وشكلهم جابرينها السالفه كبيره ماما لاتقولين اني قلت لك بس اسمع عمي سطام يقول بنروح لها كلنا لان عمتي رحاب معصبه عليهم مره.
غاده عقدت حجاجها بذهول:كيف يجبرونها وين عايشين فيه!
رغد عضت شفايفها من اندفاع غاده المبالغ فيه
وناظرت فيها هيله بإستغراب
غاده بللت شفايفها:معليش اندفعت بزياده بس يعني انقهرت هالمواضيع تزعجني مره.
فاتن ناظرت فيها:معك حق والله قهر الموضوع.
غاده هزت راسها وقامت بتوتر من نظرات لمى وهيله هي تدري انهم يشوفون ان مالها دخل بالموضوع عشان كذا استغربو ردة فعلها وتدري ان هيله انحرجت من كلامها لكن ماقدرت تسكت لانهم يقصدون اختها مسحت وجهها ولفت لرغد الي قربت منها:تعالي للمجلس.
غاده ناظرت فيها وتنهدت تمشي خلف الكرسي المتحرك حقها دخلت للمجلس بعدها تولع الانوار
وجلست قريب منها:تحبها؟
رغد عقدت حجاجها تناظر فيها:كيف تحبها؟
غاده بلعت ريقها:يعني رحاب تحب بنتها جود؟
رغد ناظرت فيها:مادري تصدقين جود اكثر وحده غريبه بيننا ماتحب تجلس معنا كثير احيان انا الي انشب لها بس البنات يشوفونها مغروره بس هي عسل اعرفها يعني مو مثل مايقولون بس الي اعرفه ان عمه رحاب بغت تموت لمّا راحت بيت ابوها جود.
غاده عقدت حجاجها بضيق لانها تتكلم عن الي المفروض يكونون عائلتها
كملت رغد تشوف سرحان غاده:تبين تشوفينها واظن شفتيها من قبل اساسا.
غاده ناظرت فيها وهزت راسها
طلعت جوالها رغد تتصفح صورها وطلعت من بينهم صورة جود ومدت الجوال لغاده:هذي هي.
غاده بلعت رسقها تناظر في ملامحها:تشبهني؟
رغد هزت راسها:بالبدايه ماكنت اشوف شبه بس لمّا جيتو في مكان واحد حسيتكم خوات فعلا.
غاده بلعت غصتها تمد جوال رغد لها:عادي تكلمينها ابي تشوفين وضعها كيف.
هزت راسها رغد واتصلت على جود اكثر من مره لكن ماكان فيه رد:غريب مغلق!
غاده هزت رجلها بتوتر:كلمي اي احد عندهم.
رغد:ياخي ما اعرف كل الي اعرفهم بعيدين عن جود يمكن نَسم بنت اخت زوجة ابوك.
غاده عقدت حجاجها بغرابه من نطقها لأبوك
رغد اتصلت عليها وماهي الا ثواني ووصلهم صوتها:ياهلا رغد كيفك.
رغد ابتسمت:الحمدلله بخير ياروحي انتي كيفك.
نَسم:والله حتى انا بخير الحمدلله سمي انتي وش بغيتي؟
رغد بلعت ريقها تناظر في غاده:كنت بسألك عن جود بنت عمه رحاب عندكم هي بالديره صح.
نَسم:ايه تخيلي رغد كنت ماخذه فكره عنها غلط طلعت تهبل مره لطيفه واسلوبها حلو بس ارحمها والله انتي تعرفين اهل الديره ماعندهم سالفه غير بنات نايف وخالتي وعيالها متأذين من زمان لكن الان تطور الوضع شهاب اخو نايف خطب جود لهادي قدام الجماعه عشان يحرجه ونايف وافق مايقدر يرده لانه ولد اخوه وصل الموضوع لرحاب ولا احد يعرف كيف وصلها لكن جت وعثت بالدنيا قلبتها فوق تحت لكن الي سمعته ان شهاب قال لنايف يا تزوجهم يا توصل للقطاعه بيني وبينك.
غاده عقدت حجاجها بذهول
وتكلمت رغد:وجود كيف حالتها تبي تتزوج او ايش اكلمها ماترد؟
نَسم:ما اعرف شي عن جود الصدق بس هي ترا غيرت جوالها وشريحتها.
رغد:اعطيني رقمها.
بدت تسرد لهم الرقم وغاده تكتبه بجوالها انتهت منه
وهزت راسها رغد:شكرا نسم ياقلبي الله يعطيك العافيه.
نسم:ماسويت شي حبيبتي.
سكرت منها ولفت لغاده الي تدق على جوال جود
.
.
« الديره »
كانت متكوره حول نفسها وتبكي بإنهيار من الي سمعته في صباح هذا اليوم سمعت الخبر الي زلزل جميع اركانها الي لحقوها توفو من الذئاب الي ماتركت فيهم عظم صاحي كانت هي بتكون مكانهم ماحست بجوالها الي يدق حولها ابد
طُرق الباب ودخل سالم يناظر فيها غمض عيونه بضيق من حالها خاله مشاري شرح له كل الي صار ماتوقع ولا واحد بالمئه ان الموضوع كان كبير على اخته:جود ياعيني جوالك يدق.
جود ماكان منها رد غير انها تبكي
سحب الجوال وخرج من عندها يرد عليه:هلا من معي.
هو فهم انه رغم غريب لانها مو مخزنته عندها
غاده عضت شفايفها تلف لرغد وتنحنحت رغد تتكلم:جود وين ابي اكلمها.
سالم عض شفايفه:انا سالم اخوها جود نايمه.
غاده سحبت الحوال من رغد:نايمه لهالوقت!
سالم عقد حجاجه وكملت غاده تفهم استغرابه:انا نادين بنت عمها.
مسكت راسها رغد بذهول تسمع سالم:هلا نادين جود نايمه اذا صحت بقول انك اتصلتي.
غاده شدت على يدها:ادري تكذب علي انا عرفت بالخطبه وادري جود متضايقه ابي اكلمها.
سالم رفع حاجبه:ياليل النشبه خلاص قلت لك جود تعبانه نايمه وشفيك انتي اذا صحت اقول اتصلتي مع السلامه.
سكر في وجهها ورفعت حاجبها غاده بغضب:هذا الي بيخليني اروح للديره الحين وينها ديرتكم هذي!
ضحكت رغد غصب عنها من كلام غاده:غاده هدي وشفيك اكلتي الولد ترا اكيد نايمه صدق.
عضت شفايفها غاده:ابي اروح لها.
عقدت حجاجها رغد من جدية غاده:صادقه انتي!
.
.
رفع عيونه يشوف سالم خرج من بيتهم وملامح الضيق واضحه عليه:سالم ماقلت لك انا الموضوع عشان تضيق خاطرك موضوع راح خلاص بخيره وشره.
سالم ناظر في خاله:بس حالتها تعور القلب خالي هي سمعتهم اليوم يتكلمون الي صار للعُمال وانهارت مادري وش السيناريو الي تتخيله بعقلها بس عورت قلبي والله حتى مناهل تقول بالليل مانامت زين.
تنهد مشاري بضيق ورفع عيونه لنايف الي تقدم لهم:جود في البيت؟
سالم مسك ذراع ابوه بخفيف:يبه يرحم والدينك جود نفسيتها متدمره مره اذا بتتكلم عن موضوع الخطبه مو وقته.
هز راسه نايف يتنهد:بدخل اشوف وشفيها.
تركه سالم ولف لخاله الي تكلم بإستغراب:موضوع الخطبه للحين ماخلصنا منه!
تنهد سالم:اهخ ياخالي الموضوع كبر صارت عناد براس عمي شهاب وخالتي رحاب واحد يقول غصب يتزوجون والثانيه تقول مايتزوجون ومادري من الي بيفوز بس هي بتوصل للقطاعه بين اعمامي كبر الموضوع والله.
عقد حجاجه مشاري:انا جايبها عون صارت فرعون كبرت الموضوع بدال ماتدفنه!
هز راسه سالم:كبر بزياده كبر.
مشاري مشى من عنده بإتجاه بيت شاهر وطرق الباب اكثر من مره ولا كان فيه رد استغرب ولف يناظر بالبيت ورجع يطرقه بقوه الى ان وصله صوتها المُرهق:مين؟
مشاري تنفس براحه:افتحي الباب بكلمك.
رفعت الطرحه على راسها وفتحت الباب توقف خلفه:نعم جاي؟
مشاري تكتف:الحين اجيبك عون تقلبين فرعون بدال ماتدفنين الموضوع مكانه تشعلين ناره زياده!
رحاب تكلمت بصوت مبحوح من كثر مابكت بيومها الماضي هي ذُهلت لمّا جود قال لها" انه يحاول يتحرش فيها":وانت وش عليك مهتم خلاص كفيت ووفيت انا وابوها موجودين لاتتدخل في بنتي!
مشاري سكت لانه ماله دخل فعليًا ضربت الباب في وجهه تسكره صدع راسه من قوة تسكيرتها للباب
تحرك من مكانه يفكر في كلامها هو من فعلا في حياة جود يعني مايقرب لها من كل النواحي ولا تعني له اي شي عقد حجاجه يستوعب مكانته في حياتها حتى لو هي اخت عيال اخته ماتصير له شي دخل لبيتهم وهو مذهول لان رحاب بكلامها وعّته من الي جالس يسويه
مناير ناظرت فيه تلاحظ تعقيدة حواجبه:مشاري وشفيك يا ابوي؟
مشاري قبل راسها وجلس يناظر في خواته الي موجودين بعد:مافيني شي يابعد الدنيا.
مدت له فنجال القهوه سحر:وش صار بالموضوع؟
مشاري هز كتفه بعدم المعرفه:رجالك ذا في راسه موال وطليقته في راسها موال ومن الي بينجح بالنهايه ماندري.
مناير ناظرت فيه:انا لقيت لك بنت تناسبك ودي افرح فيك يا قلبي انت العنقود ابي اشوفك عريس ان شاء الله.
مشاري عقد حجاجه من الموضوع:حبيبتي انتي بس يمه مابي اتزوج الحين توني ماكونت نفسي.
مناير:وشفيها يمه تكون نفسك معها انت موظف وعندك من ورث ابوك.
مشاري بلع ريقه وقام:بعدين يمه بفكر بالموضوع انا الحين استأذنكم بنام تعبان.
هزت راسها مناير:نوم العوافي يا حبيبي وفكر زين.
مشاري مشى من عندهم وقامت خلفه سحر تناديه:مشاري.
مشاري لف عليها:سمي؟
سحر لفت تناظر بالبيت ورجعت تناظر فيه:يمكن لو قلت لك عن البنت الي تبيها امي بتفكر زين.
ناظر فيها بإستغراب وكملت سحر تراقب ملامحه:جود بنت نايف البنت قمر يامشاري واظن انك شفتها ذاك اليوم والله انها تهبل وتناسبك مره حتى انت تناسبها والله ماتلقى احسن من جود مشاري فكر زين.
مشاري ناظر فيها بذهول:سحر انتي مستوعبه وش تقولين البنت ماتبي الزواج تبي الفكه من ولد عمها اروح انا ازيد الطين بله وفوق ذا مافرقتي عن زوجك وعمها بهالكلام اسألوها هي وش تبي مو انا وبعدين مو امي ماتحبها وش الحب المفاجئ ذا!
سحر عقدت حجاجها:فهمتني غلط يامشاري امي اساسا كانت تبي وحده ثانيه وانا كلمتها امس وحسيت يمكن توافق ماعطتني رد واضح بس هي تبي تزوجك نهى من قبل شايفه انها تناسبك بس انا اشوف جود مناسبه لك اكثر منها عشان كذا قلت لك وامي امرها هين اذا بغيت انت مستحيل تمنعك.
مشاري هز راسه بالنفي:سكري على الموضوع يرحم والدينك وخلوني بحالي وخلو جود بحالها فيها الي كافيها تزيدونها هم فوق همها ليه الزواج مو حل ابد!
زفرت سحر تشوفه مشى من عندها هي كانت نيتها طيبه بس فهمها غلط
.
.
« قبل ساعه »
دخل للغرفه خلف ابوه وعض شفايفه يشوفه جالس عند سرير جود:والله ياجود ما اغصبك على شي خلاص يابوك اسف انا غلطت وادري لكن ماتنجبرين على شي ماتبينه اسف والله العظيم ولا ابن امه يغصبك.
جود ماردت عليه وكمل نايف يناظر فيها بحنيه:ودك تروحين للرياض تكملين دراستك وتبعدين عن الديره واهلها انا عرفت انك تركتي الجامعه مستعد ادخلك حتى لو هي بفلوس.
ابتسم سالم من قرار ابوه الي جاء في محله
جود رفعت نظرها لابوها تمسح دموعها وهزت راسها بالايجاب:مابي اجلس هنا ولا ابي ايطاليا ابي ابعد.
نايف هز راسه:ابشري ياعيني ابشري صلاح حول لجامعة الملك سعود وبندور لك جامعه بالرياض تروحون انتي وياه للرياض.
سالم هز راسه بإبتسامه يشوف نظرات جود لابوها الي يداريها:وانا علي اقدم لك اول مايفتحون التسجيل بكل جامعات الرياض.
جود عضت شفايفها:شكرا.
ابتسم نايف وقبل راسها:لاتشكريني انتي تامرين امر.
جود ابتسمت له وهي تدري انه رحمها
خرج نايف من الغرفه يداري خطواته وكتمته الي يحس فيها هو في صباح هاليوم حلم في غاده بنته المخطوفه حلمه عنها كان غريب جدا ولمّا صحى من حلمه حس انها رساله من الله له انه يراجع جميع حساباته ويخاف الله في عياله لانه مبدي الناس عليهم وشاف اول خطوه انه يعدل علاقته مع جود الي شبه تدمرت
.
.
« اليوم التالي جده »
كانت واقفه في البلكونه حقتها تكلم رغد:يعني راحو؟
رغد:ايه غاده كلهم راحو انتي تدرين لو رحتي بتدمرين الدنيا زياده ثنيان راح معهم قلت له يروح عشان يطمنّا على جود.
زفرت غاده:زين رغد بسكر الحين اذا طمنك ثنيان قوليلي.
رغد:ابشري من عيوني.
سكرت غاده وارتشفت اخر رشفه من قهوتها تتركها بالطاوله كانت نيتها الروحه هناك لكن استوعبت انها بتلخبط الوضع زياده بس قرارها بعد الي صار انها مستحيل تسكت عن حقها صح هي عاشت طفوله جميله مع هيله وحتى لمّا كبرت ومستحيل تنسى ان امها الاساسيه هي هيله ولا احد بيحل محلها لكن غيرت رأيها بأنها بتتركهم عايشين حياتهم عادي يمكن لو كان قبل لايحذفهم زياد بالبحر بتمشّي الامور وبتنساهم لكن الان حطتهم براسها وماهي مرتاحه الا لمّا تشوفه بالسجن
ابتسمت تحس بيد هيله الي على شعرها:امي غاده مسويه قهوه وحلا تعالي تقهوي معنا انا ولمى.
غاده تنهدت واخذت يدها الي على راسها تقبلها:الله لايحرمني منك.
هيله ابتسمت بحنيه:ولا يحرمني منك ياحياتي انتي.
غاده ابتسمت لها وقامت معها تنزل للمى
لمى رفعت عيونها تشوفهم نازلين:دودي جيتي وجابك الله ماما اعطتني اكثر من تصميم واحس محتاره بينهم.
هيله ابتسمت تراقب ملامح غاده الي جلست:تصاميم ايش؟
عقدت حجاجها بذهول تشوف فساتين زواج بتصاميم مختلفه من رسم هيله:حددتو الزواج!
لمى عضت شفايفها وهزت راسها:كلموني يستشيروني ووافقت رابع ايام العيد يعني بعد شهرين ونص.
غاده ناظرت فيهم بذهول:يمدي تجهزين لمى احس مايمدي.
هيله ابتسمت:يمدي ان شاء الله يمدي.
غاده هزت راسها ولفت للمى الي تخيرها:كلهم خيال والله.
هيله ناظرت في غاده الي حابسه دمعتها:دودي!
غاده عضت شفايفها تهف على وجهها:مابي ابكي بس مو متخيله بتتزوج لمى!
لمى تركت التصاميم وقربت من غاده تحضنها:غاده بتبكينّي الحين ماينفع والله.
هيله تنهدت بإبتسامه:الله يفرحني فيكم كلكم والله ماتدرون قد ايش انا سعيده وحزينه بنفس الوقت سعيده وانا اشوف بناتي كبرو بيتزوجون وحزينه انكم بتبعدون عني.
لمى ناظرت في امها:اشبكم بتبكوني اليوم انا مستحيل ابعد عنكم!
.
.
« الديره »
اصطفت سياراتهم خلف بعض مثل عادتهم قدام مجلس الديره واخر سياره دخلت هي سيارة ثنيان وابوه نزل من سيارته ونزل نظارته يناظر في رِجال الديره الي خرجو يستقبلون عيال شاهر واحفاده
سلطان كان بالمقدمه لانه كبيره وله الاحترام منهم رفع صوته يتكلم بصوت جمهوري لاجل الكل يسمعه:يامرحبا بكم جميع ماتقصرون وحنا عيال هالديره ما حنا ضيوف.
اختلفت ردودهم عليه بـس كلهم يجتمعون على معنى واحد والي هو "اكيد"
دخلو كلهم بعد ماسلمو عليهم كان بيدخل خلف اعمامه وعيالهم لكن استوقفه صوت من خلفه وماكان الا مشاري:ثنيان!
ثنيان لف له وابتسم مشاري يتقدم له:والله انها مليون مرحبا وانا اشوف اليوم الديره منوره اثاريك موجود.
ثنيان ابتسم يسلم عليه:منوره بوجودك يامشاري.
مشاري:غريبه جاي بالعاده مانشوفك الا كل عيد!
ضحك ثنيان:والله الديره مابها زود عشان اترك جده واجيها.
مشاري هز راسه:ايه والله انك صادق عاد تدري اني كنت ماشي للرياض لكن دامك جيت ماني متحرك من مكاني.
ثنيان ناظر فيه:غريبه وش عندك بالرياض رايح تتمشى!
هز راسه مشاري بالنفي:توظفت بالرياض الحمدلله.
ثنيان:مبروك وان ماناسبتك الرياض تعال جده بتلقى وظيفتك جاهزه.
مشاري هز راسه:ابد خيرك سابق مرتاح الحمدلله المهم ندخل عشان لانطول عليهم.
ثنيان هز راسه ومشو يدخلون على كلام سلطان:هذا هو ثنيان ولدي ياشهاب.
شهاب ناظر فيه بسخريه لكن ثنيان ماعطاه اهميه يجلس:ماشاء الله نعرفه ثنيان وان كانك فاضي ياثنيان فيه موضوع عندي ابي اكلمك فيه.
ثنيان عقد حجاجه ياخذ الفنجال من صلاح:عسى ماشر ياشهاب.
شهاب عض شفايفه:اسمي عمي شهاب احترام لعمري ياثنيان ماني بعمرك ياحبيبي!
ثنيان هز راسه يتجاهله:ماقلت لي ياشهاب وش بغيت؟
هادي رفع حاجبه بإستفزاز من اسلوب ثنيان
وناظر فيه شهاب:بعدين اقولك.
لف سطام يناظر في شهاب:وينه نايف؟
على كلامه دخل نايف:السلام عليكم ورحمة الله وبركاته.
قامو كلهم يسلمون عليه وعقد حجاجه لمّا وصل لثنيان:ثنيان.
ثنيان رفع حاجبه من نبرته يأكد له انه ثنيان:ايه نعم ثنيان نسيتني يانايف؟
نايف شد على يد ثنيان يهمس له:ابد بس ابيك بموضوع اذا خلصو من جمعتهم.
ثنيان عقد حجاجه يشوفه مشى قبل يرد عليه لف على مشاري الي جالس وجلس جنبه:الاخوان فيهم شي كلهم يبوني ولا ادري وش يبوني فيه!
ضحك مشاري:وش مسوي ياثينان اعترف.
ثنيان هز راسه:ياشيخ ماعندي علم.
لف ثنيان لراكان الي تقدم له بجواله وتنحنح يمده له:جوالك من اليوم يدق رغد اختك.
اخذ الجوال ثنيان وخرج من عندهم:هلا رغد سمي.
رغد:جود شفتها كيفها؟
ثنيان:لا ابوي واعمامي بيروحون لها شوي.
رغد تنهدت:اسأل اخوانها طيب.
ثنيان لف يناظر في سالم الي ماشي بإتجاه المجلس رفع صوته يناديه:سالم.
سالم عقد حجاجه وتقدم له يسلم عليه:هلا والله.
ثنيان بادله السلام:هلا فيك بسألك عن جود اختك كيفها؟
سالم ناظر فيه:وانت وشعليك في اختي؟
ثنيان تنهد:رغد اختي تكلمني تسال عنها.
سالم هز راسه:اليوم احسن الحمدلله.
ثنيان لف يكلم رغد:سمعتي رغد يقول احسن اليوم.
رغد:زين.
سكر منها ولف يسمع صوتهم الي ارتفع:اللهم اجعله خير.
دخل خلف سالم يناظر فيهم يتهاوشون
نايف هز راسه:بنتي ماودها وانا ماني غاصبها اسمحو لي.
شهاب شد على يده بغضب:انت سامع وش تقول يانايف انت عطيت ولدي جود قدام الجماعه وش تغير الحين يوم جو خوالها غيرت كلامك!
سلطان رفع صوته يسكتهم:عيب عليكم انتم اخوان والزواج مايصير الا برضى الطرفين ودام البنت ماهي راضيه كل واحد يروح بطريقه والله يوفقهم جميع.
تكلم واحد من جماعتهم:بس والله مايصير دام نايف عطى ليه يغير كلمته عيب والله!
عقد حجاجه مشاري:وش الي عطى البنت الي بتتزوج ولا نايف وشهاب مجانين انتم!
سالم هز راسه:جود ماتبي ولا احد فيكم بيغصبها على شي ماتبيه.
شهاب لف على سلطان وهز راسه:طيب دام الجماعه موجودين ودام اخوان رحاب موجودين انا بقولكم عن شي صار قبل سنين جتني اختكم ياسلطان وحذفت علي بنتها غاده الكبيره تقول ماتبيها خذوها انتم اعمامها اولى فيها.
ولف يناظر في ثنيان:وثنيان شاهد على هالكلام لانه كان معها.
ثنيان عقد حجاجه بذهول يشوف كل الي بالمجلس توجهت نظراتهم عليه
سلطان وسع عيونه بذهول من صمت ولده
وتكلم احمد عمه بغضب:تكلم ياثنيان هالكلام صدق!
ثنيان عض شفايفه وتقدم لشهاب:صحيح صارت لكن عمتي ماعليها شرهه كانت بزر عمرها ماتعدا العشرين سنه انت الي عليك شرهه ياشهاب انت بعد قلت ما نبيها دام ابوها مايبيها بدال ماتاخذها هذا وانت كبير عمرك وقتها صاك الاربعين.
شهاب عقد حجاجه لان ثنيان لفها عليه:وانا صادق ابوها وقتها كان مسجون وحنا باليالله في عيالنا.
نايف مسح على وجهه ولف صلاح على عمه بصدمه من كلامه
هادي ناظر في ابوه المتورط لانه جاب العيد زياده وصارت نظراتهم اتجاهه استنقاص:طيب ياخوال جود اختكم ترفع صوتها على رجال عادي عندكم حتى على طليقها واتوقع انكم تفرقون بين الحلال والحرام!
راكان تقدم لهادي بغضب:مابقى غيرك ياولد شهاب تعلمنا الحلال والحرام!
هادي تكتف:وهذا الواقع ليه زعلتو!
سلطان:اقضب لسانك وتكلم زين لا اقصه لك.
نطق جملته وخرج من عندهم وخرجو اخوانه خلفه
ثنيان عض شفايفه لمّا شافهم متجهين لبيت جده وعرف ان الوضع بيصير حرب بين الاخوان واختهم
طلع مفتاحه سلطان يفتح باب بيت ابوه ودخلو ينادونها
.
.
« بيت نايف »
قامت من سريرها بتعب ومسحت وجهها تخرج من غرفتها عقدت حجاجها ماتشوف ولا اي احد موجود وهذا شي غريب عليهم بالعاده مايتركونها لوحدها سحبت عبايتها تلبسها وطلعت من بيتهم وسعت عيونها بذهول تشوف سيارات خوالها مشت تدخل لبيت مناير وناظرت في سحر:خاله شفت سيارات خوالي برا هم موجودين؟
سحر هزت راسها بالايجاب:ايه جايين سمعو باللي صار.
هزت راسها جود وجلست مقابلها:طيب خاله امس ابوي جاني وقال لي انه مستعد يدرسني بالرياض صلاح مثل ماتعرفين حول لجامعه الملك سعود وبيبدأ مع بداية هالسنه ان شاء الله وقال انه بيقدم لي معه نروح انا وياه للرياض بعيد عن اهل الديره ومصايبهم خاله شفت ابوي نادم مره يعني صدق تغير.
سحر تنهدت بإبتسامه هي كانت ناويه تكلمها بموضوع مشاري لكن دام نايف اخذ هالخطوه الي يتمحي المشاكل الي صارت كنسلت انها تقول لجود شي:الحمدلله هذا نايف الي اعرفه وتزوجته نايف ابوك طيب مره ياجود واعرفه لكن من بعد هالمجالس صار شخص مختلف تماما كل يوم يجيني بحال لانه يسمع كلامهم تدرين ياجود يمكن اول مره اقولها لاحد واتكلم بس بقول لك هالشي قبل زواجنا ايام السالفه الي صارت لغاده وصل لابوك الخبر وهو في السجن طلع بعد خطف غاده بشهر تقريبا نفسيته كانت بالحظيظ لان كان عليه ايقاف خدمات مايقدر يسافر مايقدر يروح يدور بنته متخيله جالس بالديره مكتفه يدينه ويوم شافوه عمي وعمتي بهالحال ماقدرو انهم يسكتون لان العالم عاشت حياتها الا هو المهم خطبوني له بنفس طريقة الخطبه الي صارت لك ابوي عطاهم وانا كنت ياغافلين لكم الله مادري عن شي وكان زواجنا بعد شهر من الخطبه تزوجنا وبأول ليله من زواجنا عرفت ان نايف ماكان يدري عن الخطبه حتى هو يعني جدك خطبني من ابوي لان جدتك شافتني بزواج وعجبتها ونايف حتى بالخطبه ماكان موجود رغم اني انصدمت من هالشي وكنت حاطه في بالي شي واحد هو الطلاق بس نايف قالي خليها بعد اشهر من هالزواج لانهم بيحطون مليون عيب فيني وفيه وانتي تدرين وش يعني طلاق من اول اسبوع كملنا وشفت انه انسان زين وطيب وفعلا حبيته بعد الاشهر الي مرت وهو تغير الحمدلله وفي السنه الاولى من زواجنا انا حملت بصلاح وجاء صلاح وامتلت علينا حياتنا بوجوده واجتهد ابوك بالورث حق جدك وتعدل وضعه المادي ولله الحمد هذا شي عمري ماقلته لاحد بس لك انتي.
عقدت حجاجها جود لان فعليا لاول مره تسمع هالشي عن حياة ابوها وعمتها سحر :الكل ظلموه حتى جدي الله يرحمه كانو يقولون انه ردي حتى بنته ماراح يدورها ليه ماقال لهم ان عليه ايقاف خدمات.
سحر:ماسألته بس وقتها ترا جدك شاهر اخذ عياله واشترى لهم بيوت بالرياض وصارو بس يجون بالاعياد والمناسبات ونايف كانت علاقته بالناس شبه مقطوعه اساسا.
جود تنهدت وناظرت في سحر:خاله تعرفين غاده اختي بما انكم كنتو هنا كلكم.
ابتسمت سحر:اكيد اعرفها هالبنت الصغيره كانت تلازم جدك بكل اوقاته اكثر حفيده يحبها من بين احفاده وهالشي معروف كانو يقولون الي بيخطبها لازم يعرف انها حفيدة شاهر لان كل الي تامر فيه يتلبى لها بنفس الدقيقه.
جود عضت شفايفها وهي ماتبي تبكي من هالطاري لان امها كانت سبب في ضياع غاده بلعت ريقها تغير الموضوع:وينها خاله مناير؟
سحر حست انها تضايقت:راحت لوحده من جاراتنا.
سالم دخل عندهم:ثواني خالي جود تغطي خالي جاي.
جود رفعت طرحتها تتغطى ودخل مشاري لغرفته
لف سالم لجود:ياخي بسألك جود عندك بنت خال جداويه؟
جود عقدت حجاجها:جداويه لا!
سالم ناظر فيها بإستغراب:امس كلمتني وحده جداويه تقول انها نادين بنت خالك.
جود رفعت حاجبها:نادين بنت خالي احمد جداويه لاتستعبط سالم!
ضحك سالم من ردة فعلها:والله العظيم هي قالت.
.
.
« قبل ساعه من الأن في بيت شاهر »
قامت برعب من مكانها تسمع صراخ اخوها"احمد"
الغاضب مسكت قلبها بخوف وخرجت لهم تشوفهم موجودين كلهم:وش فيكم!
احمد تقدم لها بغضب:وين رجالك وينه مخليك تصارخين على طليقك!
عض شفايفه سلطان:هذي تربية شاهر كذا ربّاك ابوي!
رحاب بلعت ريقها بخوف من غضب اخوانها وبكت:زياد طلقني.
جمد وجه ثنيان لانه كان شايل فكرة ان عمته رحاب وزياد ممكن يتطلقون
قرب احمد بجنون:متى طلقك ليه حنا ماندري!
رحاب ناظرت فيهم ورجفت بخوف:قبل اربع شهور.
سلطان وسع عيونه يناظر فيها
وتقدم لها حسام اخوها:وليه طلقك!
سطام ناظر فيها يسمع صمتها:تكلمي يارحاب وش مسويه عشان يطلقك وساكته ولا علمتينا انه طلقك وجالسه اربع شهور في ايطاليا حنا وش في حياتك قوليلي!
رحاب بكت وهزت كتفها بعدم المعرفه
احمد قرب منها يضرب ذراعها من قهره الي يحس به منها:انتي مريضه والله العظيم انك ملبوسه فيه حرمه ترضى على نفسها تقعد بنفس المكان الي فيه طليقها وش مخليك تقعدين هناك ليه اول ماتطلقتي ماعلمتينا انا متأكد كله بسبايب دلع ابوي لك شوفي وين وصلك صرتي حتى خطواتك ماتحسبينا ماتقولين وراي اخوان سمعتي من سمعتهم الحين العالم لو درو انك مطلقه لك اربع شهور وحنا ماندري وش بيقولون هاه انا متأكد ان رجالك ماعافك الا انه شي كبير.
وسع عيونه سلطان بذهول من كلام اخوه والادهى من كلامه انه قاله بوجود عيالهم:احمد عيب عليك وش هالكلام!
احمد لف لاخوه:من حرقتي يا اخوي من حرقتي!
حسام رفع صوته:خلاص عاد وشفيكم انتم لاتنسون وصية الوالد بتقعد الحين رحاب وتقول كل شي بهدوء.
عض شفايفه احمد وجلسو مقابلها ينتظرونها تتكلم شدت على يدها الراجفه:بقولكم كل شي بس تسمعون مني لاني تعبت من خوفي منكم.
ورفعت عيونها لأحمد اخوها:تأكدو اني ماتكلمت الا اني احس بالندم داخلي وعرفت ان الي بعت كل شي عشانه مايسوى حتى جزم بناتي تكرمون.
وسع عيونه بذهول ثنيان لانها بتقول لهم كل شي وهذا الواضح له لف لمهند المذهول نفسه
قاطع عمته قبل تتكلم:عمه!
سلطان لف لثنيان:اسكت ثنيان اسكت.
ورجع يلف لرحاب الي تناظر بالارض من خجلها:تكلمي رحاب.
كان خايف ان كلام عياله يكون صحيح وحتى لو كان صحيح يمكن يسمعه من اي شخص عادي بإمكانه التصديق وبإمكانه مايصدق لكن من لسانها هي يسمع اعترافها بتكون مصيبه
كملت كلامها وهي منزله راسها للأسفل عشان ماتشوف نظراتهم:انا تركت غاده بإرادتي يعني ماضاعت بإيطاليا هي ماراحت اساسا كانت بالسعوديه كان شرط من زياد انه مايبي غاده جود يقدر يربيها بس غاده عشانها تعرف نايف مايبيها انصدمت بالبدايه وماكنت عارفه ايش اسوي لاني كنت احبه وابيه وشرطه ضيعني جدا كلمت اخته وقالت لي اتركي غاده عند اعمامها سويت الي قالت لي عنه وكنت متوقعه بيقبلون فيها بس حذفوها علي وقالو مانبيها ماكنت ادري وش اسوي لان زواجي ماكان باقي عليه شي كنت افكر وين اودي غاده بعدين فكرت بيني وبين نفسي يمكن زياد يتقبلها لو يعرفها لكن بيوم الزواج جتني اخته وقالت لقينا حل لغاده عرفت وقتها ان زياد مصمم على رأيه كملت الزواج وانا قلبي يعورني خايفه من حلّهم وكان معي حق بخوفي لمّا عرفت ان اخت زياد كلمت عامله كانت تشتغل عندهم وكانت بدار في جده وقتها قالولي ان زياد بيروح لجده سيّاره ويودي غاده هناك قدام الدار والعامله بتتصرف بدون مايعرف احد بسريه تامه يعني وفعلا تركها زياد وراقبها لين اخذتها العامله ورجع للرياض اول ماتأكد انها دخلت واول مارجع اتجهنا للمطار ودخّلنا ولد عمه للطياره بدون ما احد يشك ان البنت الصغيره الي معنا مو غاده وصل لكم الخبر اليوم الثاني ان غاده ضاعت بس هي ماكانت ضايعه ولد عمه بعد فتره انسجن بسبب امور كثيره بس هم عندهم حب لبعضهم مايغدرون في بعض مهما كان كنت متوقعه يقولهم عن زياد بس ماقال.
هي مارفعت رأسها ابد لأخوانها لانها تحس بردة فعلهم كان الصمت الشي الوحيد الي صادر منهم
ثنيان بلع ريقه يشوف اعمامه يناظرون في اختهم بصدمه كبيره وخيبة امل
رحاب عضت شفايفها ترفع عيونها الدامعه لثنيان الوحيد الي قدرت تحط عينها بعينه هو لانه يدري:ثنيان وخالد كانو يعرفون ولا ادري كيف عرفو بس انتم ماصدقتوهم.
حسام مسك راسه يناظر فيها بذهول:لاننا كنّا واثقين فيك وياخسارة هالثقه يارحاب ياخسارتها معاد بقيتي لنا كلام اقسم بالله معاد نقدر نقول شي.
سطام ناظر فيها بقهر:بسألك سؤال يارحاب سؤال واحد ابوي ماكنتي تشوفين حاله ماكنتي تشوفين كيف هو مات من قهره على غاده كيف قوى قلبك يارحاب كيف!
رحاب بكت تناظر فيهم:عشان كذا ماكنت اجيكم.
احمد قام من مكانه بغضب يقرب منها:كذابه اقسم بالله انك كذابه لو يهمك شاهر ماسكتي الله ياخذك يالقذره نزلتي روسنا للأرض اقسم بالله لاربيك يارحاب والله العظيم لاربيك على يدي.
تركي قرب من ابوه يبعده عن عمته:يبه خلاص تكفى ماينفع كذا.
وجه نظره لابوه الصامت سلطان كان النسخه الثانيه من شاهر يشبهه بالشكل والاطباع
قام سلطان وقرب منها:عطيني سبب واحد يخليك تسوينها كيف قوى قلبك تتركين بنتك يارحاب؟
رحاب رفعت كفوفها وبكت:ما اعرف.
هز راسه سلطان بخيبه:ياخسارة تربية شاهر هذا الي اقوله بس اقسم بالله لو انك مانتي بنت شاهر ومحسوبه علينا اني لا اتبرا منك قدام الملئ واسجنك لكن عشان شاهر الي تحت التراب عشان وصيته وقدام الناس بس انتي اختي لكن بيني وبينك مافيه اخوّه ياما ضربنا ثنيان وخالد عشانك يالرديه وعشان زوجك الي ماقوا عوده الا انتي وفوق ذا ابوي مات موب راضي على عيالي بسببك وينه الي بعتي كل شي عشانه وينه ما اقول غير حسبي الله عليك ياللي ماتخافين ربك حسبي الله عليك كانك هديتي حيلي.
ثنيان بلع ريقه من طاري جده ومسح على وجهه يقرب من اعمامه:استهدو بالله مايصير الي تقولونه والله مايصير انتم تبقون اخوان مهما كان وعمتي حست بغلطها وهذا اهم شي واذا على جدي رحمة الله عليه تراه مسامحنا انا وخالد كلمناه يمكن لأول مره اقولها بس انا قلت لجدي كل شي قبل يتوفى الله يرحمه لمّا كان متنوم بالمستشفى هو مثل ماتعرفون مانعنا من الزياره انا وخالد ولا يبي يشوف وجيهنا وانا من ضيقي من هالموضوع قلت له كل شي سمعته من عمتي واخت زياد وقلت ان شكوكنا ماكانت بدون سبب.
عض شفايفه يذكر دموع شاهر:بكى وحلفني بالله اذا كنت صادق وانا حلفت له بس قال مستحيل بنتي تسويها لكن اليوم الثاني كلمني وقال انه يبي يشوفني وقال تبي اصدقك طلع غاده لو هي تحت الارض وفعلا كملت بحث عن غاده لكن توفى الله يرحمه قبل القاها.
يمكن اسوء شي تسمعه رحاب ان ابوها يعرف وانه بكى بسببها
هز راسه حسام بأسف يناظر في ثنيان:الله يرحمه الحمدلله انه توفى قبل يسمعها من لسانها.
هي كانت تسمعهم وتشوف انهم مايشوفون لوجودها اهميه عرفت انها من هالليله بتكون شيئ ماله قيمه في حياتهم
لف سطام يناظر فيها جالسه بالارض وتبكي:لاتقعدين تنوحين سوي في حياتك شي زين وعلمينا عن مكان الدار الي حطيتو غاده فيه.
هزت راسها بعدم المعرفه:مادري.
ضحك احمد بقهر:كذابه تدرين والى الان ماتبين تقولين ماتبين نطلعها ونحطها قدام عيونك بعد هالسنين مالك وجه!
رحاب بكت من اتهاماتهم:والله العظيم مادري الي اعرفه انها بدار في جده بس.
ثنيان عض شفايفه لانه يعرفها زين وهم يعرفونها لكن مستحيل يتكلم ويقول لانها ماتبيهم
سلطان هز راسه:لمى زوجة خالد هي الي بتساعدنا هي مديره بدار في جده واكيد لها معارف.
وسع عيونه ثنيان يشوف ابوه رفع جواله يدور رقم لمى
ولف عمه سطام للعيال:جهزو سياراتكم بنمشي لجده.
ولف لرحاب الي جالسه تناظر فيهم بحزن:وانتي قومي ضفي اغراضك بندفنك بالرياض.
شد على يده تركي لانه قال بندفنك هو فاهم قصد عمه وقرب من عمته يمسكها:قومي معي.
رحاب ناظرت فيه وقامت معه لغرفتها وفتح شنطتها تركي يناظر فيها:وش ودك احط علميني وانا ارتبها لك.
رحاب بكت من ردة فعله الي ماتوقعتها ابد لان كل عيال اخوانها الي بالخارج نظرتهم قرف منها وهذا التصرف الطبيعي
تنهد تركي يناظر في نظراتها له ترك عطرها من يده:يمكن انتي نستي الموقف بس انا عمري ما انسى وقفتك معي في اكثر وقت كان وضعي المادي فيه سيئ اعطيتيني ونسيتي هالعطيه.
رحاب ماقدرت توقف مكانها تقدمت له تحضنه وبكت في حضنه لانها لمست الحنيه بكلامه بوسط دمار مشاعرها يمكن لأول مره تسمع شي حلو عنها عض شفايفه تركي من حضنها له:لا ياعمتي لاتبكين دموعك غاليه ابوي واعمامي ترا من قهرهم ماعليك يومين وبيتعدلون انتي اختهم.
بكت رحاب اكثر:ما اتوقع ياتركي يمر الموضوع.
.
.
« بالخارج »
شد على يده وهو مايدري وش يسوي ابوه بالداخل يكلم لمى ومايدري وش وصلو له بالكلام هو ماوده تنكشف الامور كذا بالهداوه افضل وبرضاها هي ماوده تنفجع بجيتهم لجده عشانها رفع جواله يدور رقم رغد لكن تردد يكلمها ياخذ رقم غاده اتصل على احد العمال المسؤولين عن المدرسه ويتمنى وجودها عض شفايفه يسمع رد العامل:ايوا لطيف غاده موجوده؟
لطيف لف يناظر فيها:ايوا موجوده.
ثنيان تنهد:قول ثنيان يبي يكلمك.
ماهي الا ثواني وسمع صوتها:اهلا.
ثنيان بلع ريقه:غاده ابوي واعمامي جالسين يكلمون لمى يبونها تطلع مكانك عمتي رحاب قالت لهم كل شي والحين يجهزون سياراتهم بنجي جده كلنا عشانك عشان نطلع مكانك بمساعده لمى اختك انا متأكد انهم بيستوعبون انها انتي بس الى الأن ماحطوك في بالهم.
غاده وسعت عينها بذهول تترك كل شي بيدها تستوعب ان هيله عند لمى بتعرف ان غاده بنتها هي المقصوده: ثنيان ماما هيله بتعرف!
.
.
عقدت حجاجها تشوف سياراتهم تحركت خلف بعض  ولفت تستغرب انهم ماجو لها ولا كلموها عضت شفايفها تشوف امها وتركي الي خرجو يركبون السياره ويحركون خلفهم وخرج ثنيان يقفل الباب خلفه عرفت انه اخر واحد موجود لان سيارته الوحيده الي موجوده اساسا وقف ثنيان يتنهد ولف لنايف الي يمشي متجه لبيته:نايف وش بغيت مني؟
نايف لف له وهز راسه بالنفي:كنت بسألك عن موضوع شهاب اخوي وعمتك بس خلاص وضح لي كل شي.
هز راسه ثنيان وركب سيارته يحرك ومشى يدخل لبيته نايف شايل هم كبير بعد الي سمعه من الشيخ هو من يوم حلم في بنته غاده مو راضيه مشاعره تهداء من خوفه ومن حلمه الغريب اتجه لأحد المفسرين الي بديرتهم وكانت صدمته بتفسير الحلم الي حلمه
عقد حجاجه بذهول يشوف سحر رجعت للبيت:سحر!
سحر ابتسمت تهز راسها:قلت لك ماني راجعه الا لمّا يرجع عقلك والحمدلله رجع.
ابتسم لها يخفي همّه:انتي نور هالبيت يا ام صلاح.
جلس جنبها ومدت له فنجال القهوه:فيك شي احسك مو على بعضك!
نايف هز راسه بالنفي:لاتشغلين بالك موضوع اخواني مضايقني شوي بس.
سحر مدت يدها ليده:نايف وش رايك نسافر قبل رمضان نروح ناخذ عمره وبعدها نمر على جده ومنها نحضر حفل سلامة رغد بنت سلطان عزمتني احلام زوجته وبخاطري اروح هناك ومنها بعد نغير جو انضغطنا هالفتره.
هز راسه نايف يقبل يدها:ابشري الي ودك فيه يصير.
سحبت يدها سحر لمّا دخل صلاح:يامرحبا بالي له الخافق يهلي يمه اقسم بالله اقول ريحة القهوه ذي ماتجي الا من امي.
تقدم يقبل راسها وهزت راسها سحر:هلا فيك ياحبيبي انت.
نايف لف له:قول لأخوانك يجهزون اغراضهم بنمشي لمكه بإذن الله بكره.
وسع عيونه بذهول صلاح ولفت سحر:باقي على الحفل اربع ايام اعتقد بدري!
هز راسه نايف:نروح نعتمر ونتمشى على مايجي الحفل.
ابتسمت له سحر وهز راسه صلاح يقوم:ياسلام من زمان عن السفرات المفاجئة بقوم اقول لأخواني.
وبالفعل قام يترك ابوه وامه
ولفت سحر لنايف:احس فيك شي بس ان شاء الله خير.
هز راسه:لاتشيلين همي.
.
.
« جده »
هي صار لها نصف ساعه واقفه بنفس مكانها ماتحركت من الي سمعته عضت شفايفها لأنها تأخرت كثير وصل لهيله ولمى الموضوع كامل صار الي هي خايف منه ماودها تدخل تشوف نظرتهم خفق قلبها لمّا حست بالباب ينفتح وما كانت الا لمى
لمى ناظرت في غاده بغرابه من الموقف الي طاحو فيه
مستحيل تتخيل ان غاده فعلا تكون بنت رحاب الي هي شافتها بملكتها وبالزواج الي حضروه بلعت ريقها تشوف غاده انتهت قدامها:اشبك غاده؟
غاده تأكدت من تفكير امها ولمى وين بيروح وتدري انها من هالدقيقه بتتغير حياتها وبتبدأ مرحله جديده بعيده عن الراحه والهدوء الي هي تعرفهم وعايشتهم من يوم جت عند هيله:الشمس ضايقتني بس.
لمى هزت راسها:ادخلي طيب.
دخلت تمشي وهي تحس خطواتها ثقيله خايفه والخوف اكبر حاجز بحياة اي شخص خايفه ان هيله تتغير عليها خايفه من القادم تعوذت من الشيطان تشتت تفكيرها عن هالموضوع ورسمت ابتسامه على ملامحها تناظر في هيله الي منقلب حالها وتفهم انقلابها زين:جوعانه مره مسوين غداء صح؟
هيله ببلعت ريقها تناظر في غاده وهي ماتتخيل لو بنتها عرفت ان تسعين بالمئه شاكين انها تكون حفيدة شاهر وش بتكون ردة فعلها القصه الي قصوها كانت عن غاده بنتها فعلا او مقاربه لها بشكل كبير عضت شفايفها تبتسم:روحي غيري ملابسك على مانجهز الغداء انا ولمى.
هزت راسها غاده وتحركت من عندهم تداري دموعها من التوتر والمسافه الي حست فيها مع امها ولمى مين هم عيال شاهر ومن هي رحاب عند هيله مايسوون شي بعين غاده حتى لو هم عائلتها الحقيقه وحتى لو يجمعهم دم واحد بتبقى غاده بنت فهد ولاتعترف بغيره اب لها ولا تعترف بأم غير هيله يمكن الشي الوحيد الي بتتقبله اخوانها لانهم مالهم ذنب
بدلت ملابسها وجلست بسريرها تفكر هي مهما كانت قويه تخاف المواجهة تخاف ان احلامها الي تحلم بهم يكونون واقع تخاف تعيش احلامها بكت وهي ماتتحمل الضغط الي تحس به تحس انها مضغوطه من كل ناحيه واول شخصين في بالها لمى وهيله
مسحت وجهها تسمع نداء لمى لها:يلا جايه.
جمعت شعرها واخذت نفس تقوي نفسها ونزلت لهم تشوفهم جالسين بطاولة الطعام ينتظرونها:يمي مسويه كبسه من زمان عنها!
ابتسمت لها هيله:ايوا لمى قالت بخاطرها وطبخنا انا وهي.
هزت راسها غاده وبدأوا يأكلون كان الصمت سيد الموقف رفعت عيونها تتأمل صمتهم وكل واحد سارح في مكان ويفكر بلعت ريقها تترك الملعقه:اذا خلصتو اكل بتكلم معكم.
.
.
« الرياض »
احمد سحبها قدامهم رغم انها تستنجد في اخوانها لكن ولا واحد فيهم تحرك حتى تركي الي عصب عليه عمه سلطان:لاتتدخل ياتركي هي اختنا وحنا ادرى فيها.
تركى عض شفايفه لمّا دخلها ابوه لوحده من غرف السواقين رفع صوته احمد يطلع السواق:قوم قوم روح للغرفه الي عند بيت سلطان اخلص.
السواق فز من مكانه بإستغراب يشوف حال رحاب الي تبكي واستسلمت للأمر الواقع حذفها بالغرفه لمّا طلع السواق:انقبري هنا اقسم بالله يارحاب حركه ولا كلمه اني لادفنك ولا يرف لي جفن مكانك بالسجن المركزي بس ذا يحل محله عشان سمعتنا.
لفت تناظر في سطام لانها فقدت الامل في احمد:بتخلوني اجلس مكان السواق!
احمد ناظر فيها بذهول:والله اننا ظلمنا السواق يوم جبناك غرفته قدرك واكثر من قدرك بعد.
سطام هز راسه يقرب منها:انتي الي جبتي لنفسك هالعناء.
رحاب بكت تناظر فيهم:بس قلت لكم لاني تغيرت لاني ندمانه والله.
احمد جلس بنفس مستواها وضحك بقهر: تدرين لولا الله ثم ابوي الي داعي علينا من يوم كنا صغار ان اي احد يمد يده عليك تحل عليه مصايب الدنيا كان ضربناك الي بيشفي غليلي انا واخواني نضربك بالسوط وهو قليل في حقك اقسم بالله قليل انتي لو ماتركك زوجك المنحط كان ماشفناك كان ماعترفتي يالكذابه لكن شفتي كل شي راح من يدك قلتي بعترف والواضح انه مهددك اساسا!
سكت يأشر على قلبها:ذا اسود ذا وصخ عمره مايتعدل يارحاب داخلك دنيئ ماتفكرين الا بمصلحتك والباقي طز لا حنا ولا ابوي ولا بناتك اثرو فيك من يأثر فيك زياد هو الي طلع كل الي داخلك قدرك زياد يابنت ابوي هو قدرك.
قام من مكانه يسمع الصمت منها لف لسطام اخوه:ياخي سطام ماتحس الغرفه يبي لها تعديلات.
رحاب بكت وهي تتمنى يغيرون السرير لكن ذهلت لمّا سمعت اخوها يكمل:الشبابيك نشيلها ماودي حتى الشمس تشوفها ونغير لون الغرفه اسود الارضيه اسود والجدران سوداء حلو!
عض شفايفه سلطان الي توه جاء يشوف صدمتها:تسوي خير يا احمد من بكره ناد العمال.
احمد هز راسه:ابشر بس متى بنمشي لجده عشان نشوف غاده؟
هي تحس بأسلوب اخوها احمد المُستفز عشان يقهرها
سلطان:الحين لمى بنت هيله تقول بتصل عليهم كلهم على مانوصل جده بإذن الله يمدي يطلعون مكانها.
طلعو من الغرفه وقفل الباب احمد قفلتين يتركونها لوحدها ولف لأخوه سلطان الي بدأ يستوعب نوعًا ما:غاده بنت هيله معقوله!
سطام مسك كتفه:وراك وقفت!
هز راسه سلطان يلف لهم:مستحيل اقسم بالله مستحيل!
.
.
« جده »
رفعت عيونها على امها ولمى الي جلسو قدامها وبلعت ريقها:انا قبل الحادث الي صار لي عرفت شي عن عائلتي القديمه ماكنت ابي اصدق انهم طلعو في حياتي فعلا لأجل كذا حاولت اتناساهم لكن ثنيان ورغد اصرو انهم يذكروني في عائلتي نادتني رغد لليخت وقالت لي كل شي عن الي صار قبل واعطتني صور لمّا كنت صغيره عرفت اني فعلا بنت عمتهم بس انا مابيهم قلت لرغد مابيهم ولا ابي اي شي يربطني فيهم بعدها صار الي انتم تعرفونه هديه ثنيان الي الكل يسأل وشفيها كانت اشياء تخص طفولتنا ورساله منه انه بيوقف معي لو كنت باخذ حقي.
بلعت غصتها ترفع عيونها لهم من تشتت بالها:الحين هم جايين لجده يدوروني انا مابي اكون بالمدفع لوحدي ادري ان وصلكم شي وادري انكم شكيتو بس شفت فيكم الغرابه والبعد وانا مابي هالمسافه تكون بعلاقتنا مهما كان.
.
.
انتهى