ياقريب ويابعيد فيك امسي وحاضري

الجزء/٢٣

-
-
اخذ نفس ثنيان يتقدم لها وجلس امامها:وشفيك؟
غاده صدت عنه بنظرها ومد يده لفكها يرجع وجهها قدامه:ليه طردتيهم.
غاده مدت يدها ليده تبعدها عنها:يستاهلون.
هز راسه يسمعها وكملت غاده:حتى وهم بالعزاء يحشون!
عقد حجاجه ثنيان وناظرت فيه غاده بقهر:تشوفني قاسيه يقولون عني قاسيه عشاني مابكيت عشان ماسويت زي جود.
ثنيان ناظر فيها:وليه ماتبكين حتى امك هيله تبكي عليها وهي ماتعرفها.
غاده هزت راسها:حتى انت زيهم تشوفني قاسيه تشوف قلبي حجر.
اخذ نفس ياخذ كفها لحضنه:ماقلت كذا لاتقوليني كلام ماقلته لكن ليه مارديتي على الي جو يعزونك ابي افهم سبب حالتك ذي حزن او قهر او ايش؟
رفعت كتفها:قساوه قلبي قاسي بس.
ابتعدت عنه تقوم وتنهد ثنيان من حالتها الغريبه وقام يمشي خلفها ولفت تناظره:حتى انت بكيت شفتك بس انا بنتها ماقدرت تنزل دمعه من عيوني ليه ماعرف ولا افهم نفسي ولا افهم بعد الحاله داخلي حتى لو قطوه ماتت ابكي عليها كيف لو بني ادم والبني ادم ذا يكون امي وش هالقسوه الي وصلت لها زعلت منهم لمّا قالو قاسيه بس لمّا جلست مع نفسي وفكرت مالقيت الا انهم صادقين!
ثنيان عقد حجاجه يشوفها تشرح له بس بدون ولا دمعه تنزل من عيونها حتى هو مو فاهم حالتها ابد لاجل كذا رفع ذراعه يحضنها وغمضت عيونها تحس فيه يحضنها:عمرك كله ماعشتيه معها طبيعي طبيعي انك ماتحسين بذاك الحزن كلنا حتى جود عشنا معها حتى لو عشرتنا ماكانت حلوه الا اننا متعودين على وجودها بيننا ومتعودين على مشاكلها بس انتي ماتعرفينها طلعت من سنتين بس في حياتك وبالصدفه مو بالبحث ولا عاشرتيها انتي مو قاسيه ابدا انتي احن قلب مر علي في حياتي ذي كلها.
غاده بللت شفايفها بضيق:احس اني متبلده!
ثنيان ناظر في عيونها:انتي حزينه اشوف الحزن بعيونك.
غاده رفعت كفوفها:مافهم مشاعري الي داخلي خاطري ابكي بس مو قادره.
ثنيان شد على كفوفها الي رافعتهم:لاتضغطين على نفسك بالتفكير.
ناظرت فيه:لو جلست يغصبوني افكر طلعني من هنا ثنيان والله انخنقت.
ثنيان هز راسه:حتى انا مخنوق البسي عبايتك وامشي نطلع.
مشت من قدامه تلبس عبايتها ونزلت معه للأسفل يخرجون من الباب الاخر عشان الحريم
عقدت حجاجها تسمع صوت شهقات ولفت له:تسمع؟
هز راسه بإستغراب:فيه احد يبكي.
مشو بجهة الصوت وجمدت ملامحهم يوقفون بمكانهم لمّا شافو لؤي جالس على عتبة باب الشارع ويبكي
عقدت حجاجها غاده بضيق من صوت شهقاته الي تعور وتقدم له ثنيان يشوفه ملتوي على نفسه:ليه يالؤي.
لؤي بكى يناظر فيه: ننتظرها من زمان كنا ننتظرها مشتاق لها ثنيان مره مشتاق لها.
عض شفايفه ثنيان يحاول يتمالك نفسه عشان لؤي الي منهار قدامه:مايفيد شي يالؤي مايفيد هالكلام ترحم عليها.
لؤي مسح دموعه يناظر في غاده الي واقفه بعيد تناظر فيهم:الله يرحمها بس ثنيان هم يكذبون على سامي ويقولون بترجع مو حرام يقعد عمره كله ينتظرها.
ثنيان اخذ نفس:سامي ماتعدى احدعش سنه باقي صغير ماينفع ينقال له الخبر.
رق قلب غاده تشوف سامي يراقبهم من بعيد مر في بالها لمّا كانت تتسمع بكلام وفاء وامها وازياد عنها صغيره صح بس كانت تفهم انهم مايبونها بس سامي يعتبر في عمر يفهم وش ينقال حوله مشت بجهته ولانت ملامحه لمّا شافها وقفت قدامه:ليه متخبي؟
سامي صد عنها وقربت غاده منه تجلس بنفس مقدار طوله:اشبك؟
سامي ناظر فيها:ليه لؤي يبكي.
سكتت ماودها تكذب عليه ولا ودها تقول له الحقيقه
مشى سامي من قدامها واخذت نفس ترسل لرغد تنتبه له وقامت تخرج ناظرت في ثنيان يدورها:انا هنا.
لف ثنيان:وين رحتي.
غاده:كنت مع سامي سإلني ليه لؤي يبكي ماعرفت وش ارد عليه.
ثنيان تنهد:الله يكون بعونهم.
.
.
« بيت نايف »
ناظر فيها نايمه قبل راسها واخذ نفس يخرج للخارج وتنهد نايف لمّا شافه:وشلونها؟
مشاري مسح على ملامحه:نامت سحر كل شوي ادخلي شوفيها اخاف تفز ماتلقى احد جنبها.
سحر نطقت بضيق:ابشر.
نايف قام يودعه:ماقصرت يامشاري عز الله عطيت بنتي رجال.
مشاري:واجبي ياعمي.
خرج مشاري من البيت وناظرت فيه سحر:حالها يوجع القلب.
نايف بلل شفايفه بضيق:امها ياسحر ماتنلام.
.
.
« الساعه 7:00 المغرب مكان اخر »
كان يدور فيها بالسياره وكل واحد فيهم سارح في مكان نطق يقاطع سرحانها:ودك بمكان صار لنا ثلاث ساعات ندور.
هزت راسها تناظر فيه:ابي اشوف جود.
كان بيرفض لكن لمّا شاف انها فعلا تبيها هز راسه بالايجاب:ابشري.
لف طريقه يتجة لشقة نايف وبالفعل مامرت عشر دقائق الا وهو موقف عند بابهم نزلت ونزل معها يطرقون الباب وصلهم صوت صلاح:مين؟
تنحنح ثنيان:انا وغاده ياصلاح افتح.
فتح صلاح ومشى نايف يشوفهم:ياهلا بنتي غاده ياهلا.
غاده قربت تسلم عليه:جيت بشوف جود.
نايف:ادخلي يابوي لسحر توديك غرفة جود.
ورفع نظره لصلاح:قول لامك تجهز القهوه وتعال معي ياثنيان نقعد بالمجلس.
هز راسه بالنفي ثنيان:لا ياعمي لاتكلفون على انفسكم بروح للبيت ومتى ماخلصت غاده حيت اخذتها.
نطق نايف يرفض:اشرب فنجال وروح.
ناظر فيه ثنيان:ابشر.
مشى نايف ينفتح باب المجلس:الله يحييك.
.
.
« بالداخل »
عضت شفايفها تشوف جود جالسه بسريرها وتناظر بالفراغ نزلت عبايتها ومشت تجلس جنبها من الطرف الاخر للسرير لفت جود تحس بوجودها وبللت شفايفها غاده:ابي احضنك.
قربت منها وفتحت ذراعها جود تحضنها:انتي بخير؟
هزت راسها غاده بالنفي وبكت تنهار من سؤال جود
عضت شفايفها جود لانها تعبت هالثلاث ايام من كثر مابكت:كلنا غاده بس هذا حال الدنيا يمكن لو راحت وحنا مسامحينها افضل لكن الحمدلله على كل حال والله يرحمها ويغفر لها.
غاده مسحت جوف عيونها وهي مذهوله من دموعها:بكيت!
دخل نايف الي كان يتأمل بناته من فتحة الباب الصغيره وجلس مقابلهم صدت غاده تمسح دموعها واخذ نفس نايف:مو يقولون اذكرو محاسن موتاكم ويمكن انا واخوان رحاب اكثر من يعرف محاسن رحاب لاني عرفتها وحبيتها لمّا كان داخلها انسان امكم افضل وانقى قلب عرفته ويشهد الله على كلامي الي جالس اقوله.
تنهد يكمل :قبل سنين يوم جيت بخطبها الكل وقف بوجهي امي الله يرحمها قالت لي اخر وحده تفكر فيها رحاب لانها معروفه بدلع اهلها لها ان كل شي تقوله حاضر وسم وانا راس مالي حلال ابوي الي موزعه علينا فكرت في كلام امي وفعلا بديت اجتهد بهالحلال جمعت لي مبلغ حلو وطلعت قرض عليه ورجعت لاهلي امي كانت مصره على رفضها لكن ابوي الله يرحمه وقف معي وقال نخطبها له وبالفعل رحنا كلنا وخطبناها والشي الي صدم امي ان رحاب رضت فيني تزوجنا وعشت احلى سنين عمري وحملت فيك ياغاده وكانت الفرحه كبيره اول عنقود جيتي والكل كان يحبك من خوالك وجدك وجدتك الله يغفر لهم يوم جاء عمرك سنتين ونص حولها كذا عمتي توفت الله يرحمها انقلب كل شي من بعد وفاتها رحاب تعبت وتغيرت مئه واربعين درجه تعبت نفسيا وجسديا لان عمتي كانت الاخت والصديقه وكل حياة رحاب وانا اشهد لهالشي يوم توفت ماتت رحاب الي عرفتها معها يمكن غلطتنا حنا اننا ماعرفنا نتصرف مع حالتها النفسيه بالعكس كانو يهاوشونها على حزنها اخذتها وسفرتها للرياض تغيرت نفسيتها شوي ورجعت شوي احسن بعد هالوقت كله جتني وقالت انا حامل الي هو فيك انتي ياجود فرحت وعادت الحياه لبيتنا صرنا نفكر وش نسميك واذا انتي بنت او ولد وفي خلال اشهرها الاخيره من الحمل للأسف كثرت الديون علي والديانه صارو يطلبوني من كل جهه الي ماكانت تعرفه ان البيت الي هي فيه من دين وان مهرها دين والسياره دين رحاب ماكانت تدري ويوم سجنوني لان ماعندي فلوس ادفعها للديانه جرحتني جرح كبير جاني احمد اخوها وقال تبي الطلاق رحاب يقولون غرورها انكسر وحريم الديره تكلمو فيها وضايقوها بأنها هي السبب في سجني يعني بما معنى انها هي الي لعبت على الولد وامي كانت تتكلم معهم هذا كله عرفته بعد ماطلعت لكن الي كنت اعرفه يوم كنت بالسجن من الي حولي ان غرورها انكسر بسبب ان كل الي تملكه مني كان بديون ماكانت من مالي الحر طلقتها وانتهت رحاب من حياتي من ذاك الوقت لكن ماذكرها بالشر مهما صار تبقى ام بناتي والان اقولكم يمكن واجهتو رحاب الي تغيرت بسبب المرض الي صابها ومتأكد انه من بعد وفاة عمتي لكن ماواجهتوها قبل رحاب نقيه ورحومه وطيبه الله يرحمها ويغفر لها كانت ذهبه فعلا عشان كذا يابناتي امكم كانت افضل ام وافضل زوجه وافضل اخت لاخوانها وافضل بنت باره لامها وابوها بس الدنيا محت طيبتها كانت تخاف عليك خوف ياغاده وتحبك حب مايعلم فيه الا الله لدرجه ماحد شك انها هي الي تركتك برضاها يمكن انغرت بمال زياد ومنصبه وحياته وماودي اتكلم بهالموضوع ابد.
بلل شفايفه:ولا ابي ابرر لكن محاسن رحاب كثيره والي تسمعونه من الي حولكم كلام مثل ماهي كانت شرانيه معهم هم ماقصرو فيها لاتسمعون لاحد.
رفع عيونه لمّا انتهى من كلامه ولانت ملامحه يشوف انهيارهم:لا يابناتي لا ماقلت لكم عشان تبكون.
اخذ نفس يتقدم لهم وحضنها ثنتينهم:لاتعورون قلب شايبكم تراه على طريف.
.
.
ركبت معه السياره وحرك ينطق:كيفها جود؟
ردت بصوت مبحوح:بخير.
عقد حجاجه من صوتها:غاده تبكين؟
غاده ناظرت في كفوفها وهي تحس بالغصه:اول مره ثنيان احسه ابوي اول مره احس جود اختي صدق والله العظيم شعور غريب مره غريب مانزلت دموعي الا عندهم وما اثر فيني كلام الا كلامهم لأول مره معهم ماحس بالغربه.
اخذ نفس ثنيان يناظر فيها:عشانكم ماعطيتو علاقتكم فرصه غاده تعاملينه مثل ماتعاملين خوالك الي هم اعمامي وجود نفسها نفس البنات لازم تشوفينهم اكثر وتقعدين معهم اكثر انا مالومك يمكن الوقت كان ضدكم لكن له حق عليك يعني انا وانتي يمكن انتي بالذات كنت انا عادي بالنسبه لك واللي خلاك تروحين معي للخارج المواقف الي صارت بيننا وقبلها اني ولد خالك وزوجك شرعًا رغم اننا كنا في مرحلة تعارف لكن ماترددتي ابدا ويوم رحنا وصرنا اربع وعشرين ساعه عند بعض عرفتيني من قريب والحب جاء من بعد العشره ماكذب عليك لاني انا طايح عندك من اول لقاء صار بيننا بغرفتي بس كنت معجب ماحبيت الا لمّا عرفت داخلك فا يعني اي علاقه تنبني على رسميات وزيارات معدوده مستحيل يصير فيها شي اكبر مستحيل.
عضت شفايفها لان كلامه مليون بالمئه صحيح علاقتها معهم مو علاقه اهل ابدا:ماكنت قادره كنت اجاملهم يعني عشرين سنه مرت وفجأه يطلعون بحياتي طبيعي بيكون فيه حدود كثير.
مد يده يمسك يدها:قلت لك مالومك ابدا الوقت كان ضدكم المهم بالنهايه عرفتي انك مو قاسيه.
صدت تضحك وابتسم من ضحكتها:كنتي محتاجه نايف وجود بس يشيلون الفكره.
هزت راسها:ومره ارتحت معهم الحمدلله والله ندمانه اني ماعطيته فرصه من قبل حسيته حنون مره وطيب قلب لدرجه انه صان عشرة انسانه كانت زوجته من قبل ولا رضى اننا انا وجود نصدق الكلام الي ينقال عنها.
.
.
« بعد ثلاث اسابيع في جده »
طلع من عند الدكتور وهو مبتسم لانه بدأ يتجاوب مع العلاج بشكل كويس رفع جواله يتصل عليها:خلصتي دوامك بجي امرك.
غاده بللت شفايفها بإبتسامه:انا بالمستشفى حبيب خالته شرف.
لانت ملامح ثنيان:حلفتك بالله!
غاده ابتسمت:والله فهودي جاء ياعمه تعال.
سكرت منه ودخلت للغرفه تشوف الكل موجود
رفعت راسها احلام:ثنيان عرف؟
هزت راسها:جاي.
سلطان قبل راس فهد الي بحضنه:تبارك الرحمن الله يخليه لكم ويرزقكم بره.
لمى ابتسمت له:امين.
غلا لفت للمى:ياروحي خالد مقرود اخذ اجازه اسبوع وولده ماشرف الا لمّا رجع لدوامه.
ضحكت غاده:فهودي لعب فينا كلنا الله يستر لا الي ببطني يسوي مثل ماسوا فهودي.
هيله ضربتها على ظهرها بخفيف:لاتفاولين على نفسك!
طرق الباب ثنيان:انا جيت.
رفعت حجابها لمى تتغطى ومشت غاده تفتح له الباب تشوف فرحته تقدم للسرير الي عند ابوه:ماشاءالله ماشاءالله مبروك ماجاكم يالمى.
لمى ابتسمت:الله يبارك فيك وعقبال ماتفرحون بجية روح.
اتسع مبسم غاده ولفت غلا بذهول:بنت!
ثنيان ترك فلوس بسرير الطفل ولف لغلا:باقي ماعرفنا بس الاسم نبيه ان شاء الله.
تقدمت له غاده تصب له قهوه وابتسم سلطان يرد على خالد الي نطق بلهفه:ولدت راكان ورغد توهم داقين يباركون لي!
رق قلب سلطان يرد عليه:جاء فهد يا ابو فهد.
.
.
« الرياض »
كانت جالسه في بيت خالها احمد عند اخوانها رفع نظره سامي يشوفها تراسل بالجوال:جود من اليوم اكلمك شوفي رسمتي!
جود بللت شفايفها تلف له:واو حبيبي خيال مره حلوه.
سامي رفع حاجبه:لاتسلكين لي!
لفت تشوفه اتصل وابتسمت:والله حلوه وشفيك!
ومشت تخرج وردت عليه:هلا.
مشاري تكى مرتبة سيارته:وحشتيني.
جود عضت شفايفها تبتسم:وينك؟
مشاري اخذ نفس:والله بالسياره وققت بمحطه راجع للديره.
جود خرجت للحديقه تكلمه:ليه راجع هالوقت الخميس بعد بكره!
بلل شفايفه يبتسم:بخطب.
رفعت حاجبها تدري انه يكذب:والله ومين سعيدة الحظ؟
مشاري تنهد:جود بنت نايف تعرفينها جايبه راسي عجزت اشيلها من بالي تخطبينها لي؟
.
.
« جده بيت سلطان »
احلام نطقت بحب:يوه اقسم بالله هالفهد اخذ قلبي.
سلطان:الله يحفظه ويبلغ ابوه بشوفته متشفق خالد.
غلا عضت شفايفها:ياعمري خالد احلا اب.
تنحنح ثنيان:دام اليوم اخبار حلوه بقولكم وش عندي.
ناظر فيهم يترقبون الخبر بفضول اخذ نفس يبتسم:الحمدلله بديت اتفاعل مع العلاج بشكل سليم.
لانت ملامح غلا تلف له وابتسم له سلطان:الله يتمم عليك السلامه ويفرح قلوبنا بعافيتك.
قام ثنيان يقبل راسه:امين يارب الله لايحرمني منكم.
وعض شفايفه يجلس عند رجول امه:ليه يايمه الدموع؟
سلطان بلل شفايفه بإبتسامه:يتعب ثنيان تبكين يجي يقولك الحمدلله بديت اتفاعل مع العلاج تبكين وش تبين يا احلام؟
احلام مسحت دموعها ورفعت كفوفها على رأسه الخالي من الشعر بسبب الكيماوي:والله من فرحتي ياحبيبي.
قبل يدها ثنيان:الله يجعلك دايم فرحانه ياحبيبة قلب ولدك انتي والله يقدرني على الاشياء الي تفرحك.
احلام:امين ياحبيبي انت روح ابوي روح لزوجتك فوق فرحها.
هز راسه بإبتسامه وقام يقبل راسها ومشى يصعد للأعلى دخل للغرفه وعقد حجاجه مايشوفها بالجناح مشى لدوره المياه وطرق الباب:غاده انتي هنا؟
ماردت ومسك مقبض الباب يفتحه لكن مقفل لانت ملامحه بخوف يطرق الباب بشكل اكبر:غاده تسمعيني!
رجع للخلف ودف الباب بكل قوته الى ان فعلا فتح الباب وعض شفايفه لانها طايحه بالارض وبسبب دفعه للباب بهالقوه ضرب في جسدها نزل لمستواها بخوف يضرب خدينها وقام يفتح الدش عليها لاجل تصحى وبالفعل فتحت عيونها بخفيف ورجف قلبه يقوم لدرجه انه حمد الله بوسط دورة المياه دون استيعاب منه موقف رحاب تركهم يخافون من الاغماء المفاجئ مسح على ملامحه يرجع لها يشوف بلل ملابسها:وشفيك غاده تعبانه؟
غاده شدت على يده تغمض عيونها بإرهاق:احس اني دايخه.
هز راسه يشيلها بين يدينه وخرجها يحطها بالسرير ونطق بخوف يبعد شعرها عن ملامحها:وش جاك!
غاده رفعت كفوفها على جبينها ونظقت بتعب:ماعرف ثنيان جتني لوعه وقمت لدورة المياه واول ماقمت حسيت الدنيا تدور فيني الدكتوره قالت لي ان عادي تجيك هالدوخه عشان كذا تجاهلتها ودخلت لدورة المياه اخر شي اذكره اني كنت واقفه قدام المغسله استفرغ وبعدها طحت بالارض.
عقد حجاجه ثنيان:لازم ارجعك لها عادي الدوخه بس ماقالت عادي الاغماء اقسم بالله خفت.
هزت راسها بالنفي:لا عادي اليوم ماكلت زين يمكن عشان كذا من فرحتي بجية فهودي ماركزت اني على فطوري من الصباح.
وسع عيونه بذهول:غاده تستعبطين!
غاده اخذت نفس:والله ثنيان نسيت لاتعصب.
عض شفايفه ثنيان:انا الي بذكرك.
غاده هزت راسها:بعد بقوم ابدل ملابسي كلها مويه.
هز راسه بالنفي:خليك بجيب لك ملابسك انا.
قام لغرفة تبديل الملابس يختار لها لبس وتقدم لها مدت يدها تاخذ البحامه من بين يدينه: بنزل اسوي لك اكل وبتركك تبدلين على راحتك.
هزت راسها ومشى يخرج من عندها ونزل للأسفل يشوف احلام وغلا جالسين:ابوي نام؟
هزت راسها احلام:انت ليه نازل.
بلل شفايفه ثنيان:اغمى على غاده لقيتها طايحه فوق بالحمام تكرمينـ.
ماقدر يكمل من احلام الي قامت بذهول:اعوذ بالله وش برودة الدم الي عندك زوجتك مغمى عليها وانت تسولف عادي!
تنهد ثنيان:يمه الدكتوره قالت طبيعي تدوخ بس عشان غاده ماكلت طاحت ماعليك بسوي لها اكل الحين هي صحصحت وتقول انها احسن.
احلام:بسم الله عليها اهتم فيها ياثنيان ترا اول حمل يتعب يابوي.
ثنيان هز راسه:ابشري بعيوني هي.
قامت احلام:بروح اشوفها وغلا قومي ساعدي اخوك سوو لها شي دافي.
غلا هزت راسها:ابشري.
مشت احلام تتجه للأعلى وطرقت باب الجناح
لبست بلوزتها تسكر ازرارها وتنهدت ترد:ادخل ثنيان.
فتحت الباب احلام تدخل:ماني ثنيان انا احلام.
ابتسمت لها غاده:هلا خاله سمي.
احلام ناظرت فيها:امي انتي بسم الله عليك وش جاك ياغاده؟
غاده عضت شفايفها:ثنيان خوفك اكيد مافيني شي بس دايخه عشان ماكلت شي من الصباح.
جلست احلام امامها وحطيت كفها فوق كفوف غاده:شوفي يا امي انتي الحين داخلك روح غير روحك يعني مو بس انتي تاكلين مقدار الاكل الي دايم تاكلينه يوم تاكلين احسبي مقدار شخصين وانتي حتى الاكل حقك ماتاكلينه مايصير ياحبيبتي لازم تغذيه زينه يمكن انتي تمرين بمرحله انك مو مشتهيه شي وهذا عادي لكن لازم تاكلين واي شي مشتهيته اشري بس يتحضر لك.
اخذت نفس غاده:اعرف خاله والله بس عشان اليوم جية فهودي سهيت ماركزت اني ماكلت شي ماتنعاد ان شاء الله.
دخل ثنيان وابتسم يشوف امه تطبطب على غاده:جاء الاكل ام روح.
ابتسمت غاده ولفت احلام له:تعال حبيبي عند زوجتك توني اقولها اي شي تبيه يتحضر لها ياثنيان بدون نقاش لو هي الساعه ثلاث الفجر لو تصحيك من وسط نومك.
عض شفايفه ثنيان يناظر في غاده:باقي ماتوحمت غاده والا هي تدري لو تطلب عيوني عطيتها.
احلام:نشوف ياثنيان نشوف.
ناظرت فيها غاده بإبتسامه:ياعمري خاله ماتقصرين.
احلام ابتسمت:بنتي انتي المهم الحين بترككم بروح انام.
غاده:نوم العوافي.
احلام:يعافي قلبك.
خرجت احلام وتقدم ثنيان يعدل الطاوله قريب منها وحط فيها الشوربه الي مسويها ناظرت فيه يحط الملعقه بوسط الصحن ورفعها يأكلها
ابتسمت لمّا تذوقتها:والله تعرف تطبخ ثنيان!
ثنيان هز راسه: افا عليك حبيبتي اعرف اسوي اي شي تبينه.
ضحكت بخفيف من سخريته بعد مانتهت من الاكل بعده عنها ونطق يتنهد بإبتسامه:ترا باقي على وعدي مانسيت.
عقدت حجاجها بنسيان:ايش؟
قام يفتح احد الادراج وخرج منه اوراق يقربها منها ومد لها القلم:ذي الارض الي قلت لك عنها وقعي عشان تصير بأسمك.
بللت شفايفها بإبتسامه تاخذ القلم ووقعت بعد ماقرأت كل المكتوب وابتسم يقرب منها وقبل جبينها:مبروك حبيبتي جعلها خير عليك ماقلتي لي وش قررتي تسوين فيها؟
ناظرت فيه تبتسم:بسوي فله لنا ان شاء الله وباقي المساحه بفكر وش اسوي فيها.
ثنيان هز راسه:طيب كنت جاي فوق اقولك الخبر وماصار لانك كنتي تعبانه ودامك صرتي احسن بقولك.
ناظرت فيه بفضول وابتسم ثنيان:اليوم لمّا دقيت عليك كنت توني طالع من الجلسه وقال لي الدكتور ان الحمدلله العلاج ماشي تمام وبديت اتعالج.
لانت ملامحها تناظر فيه:قول والله!
ثنيان هز راسه:والله العظيم.
نزلت رجولها للأرض وعقد حجاجه:وين بتقومين!
قامت من مكانها تمشي له وابتسمت لمّا فهم انها جايه تحضنه قام لها ورفع كفوفه يحضنها عض شفايفه يحس بدموعها وبعد وجهها يحاوطه بكفوفه:افا جاي لك بالاخبار الحلوه وتبكين.
مسحت دموعها تناظر فيه:عشت معك كل المراحل كيف ماتبيني ابكي وانا مر علي وقت فقدت فيه الامل بصحتك.
قبل جبينها يرفع كفوفه لمدامع عيونها ومسحها بخفه:فكري في اليوم تدرين انها كانت خيره وجودك معي بمرحلة العلاج انتي من بعد الله الي ساعدتيني في اني اكون اقوا و وجود روح ببطنك بهالوقت بالذات كان دافع لي بشكل كبير كانت امنيتي بس اشوف فهد ولد خالد اخوي والحمدلله اليوم شفته والله يمد بعمري واشوف روحي.
غاده ابتسمت وسط دموعها:بإذن الله بتعيش وتذوقه او تذوقها حنيتك وحبك انا واثقه ثنيان بتكون افضل اب.
.
.
« الرياض الساعه 12:00 منتصف الليل »
لبست عبايتها ورفعت طرحتها تلف على اخوانها:جاهزين؟
لؤي هز راسه:شلت الاغراض كلها.
ومد لها شنطته سامي:بس باقي السوني بالمجلس عندهم وايبادي.
هزت راسها:تعالو ننزل ولاتردون على احد.
مشو معها ولفت لسامي:ادخل عندهم وخذ اغراضك اخلص عشان نروح.
مشى سامي ومشى خلفه تركي وهو شايف الشنط معهم يوقفه:سامي انتظر حبيبي وش فيه؟
سامي ناظر فيه:مافيه شي.
تركي:ليه اختك معصبه!
سامي:خاله فوزيه زعلتها بعدين هي جت وقالت يلا ناخذ اغراضنا وبنروح مستحيل نقعد عندهم وقال لؤي ايوا عشان هو بعد مخنوق من المكان.
عض شفايفه تركي يدخل للمجلس ودخل سامي معه قرب تركي من ابوه:يبه امي زعلت عيال عمتي رحاب جود ماخذه اخوانها وتقول مالنا جلسه عندهم.
لانت ملامح سطام الي سمع كلامه:تطلع الحين هالوقت صاحيه هي!
سامي لف لهم:ايه بنروح الحين لشقة جود واخوها صلاح.
قام سطام وقامو خلفه اخوانه يخرجون لجود
اخذت نفس تشوفهم جايين ونطق احمد:تطلعين اخر الليل عشان شوي كلام هذا بيت عمك مو بيتها!
جود ناظرت فيه:معليش عمي لاتحرجني والله مابي اضايق الانسانه في بيتها معها حق يعني بيتها وحنا الدخلاء وحنا عندنا شقه ماحنا محتاجين لاحد!
مشت تتركهم لمّا شافتهم ساكتين وركبت للسياره تتصل في مشاري لان صلاح مايرد عليها رد ونطقت:مشاري صلاح بالديره صح مايرد علي.
مشاري عقد حجاجه:ايه ليه فيه شي؟
جود نطقت بغضب:مخنوقه مشاري مخنوقه.
لانت ملامحه من صوتها والي جاء بباله انها رجعت لحالتها بيوم وفاة امها:بسم الله عليك وشفيك؟
اخذت نفس جود:فوزيه زوجة خالي سمعتني كلام ماينقال وانا عزت علي نفسي وماقدرت اقعد زياده شافوني خوالي وانا طالعه وحاولو يردوني بس رفضت.
رفع حاجبه بذهول:يتركونك بإنصاف الليالي لحالك انتي واخوانك صاحين هم ولا وش!
جود عضت شفايفها:حتى لو حاولو اكثر انا مستحيل ارجع بيته!
مشاري نطق بغضب:ياشيخه سطام والا حسام يقولون لك تعالي مو ضروري ترجعين لبيت احمد صدموني صراحه صدموني ماتوقعتها من عيال شاهر!
سكت يسمع لؤي الي يسأل جود:وين بنروح الحين الاوبر يسأل.
تنهدت جود:يلا مشاري بروح استأجر لنا جناح بفندق الى بكره.
شد على كفه مشاري:طيب وبكره الصباح انا عندكم بس ارسليلي اسم الفندق الي بتكونين فيه.
جود:تمام.
سكرت منه ولفت تعطي الاوبر اسم الفندق واخذت نفس تناظر في سامي الي نطق يسألها:يعني معاد بنرجع بيت خالي احمد؟
هزت راسها بالنفي جود وعضت شفايفها تسمع اقتراحه:طيب جود ليه مانروح لابوي ونعيش عنده بدون زوجته هذيك.
شد على كفه لؤي ولف يشوف ردة فعل جود على كلام اخوه لأنه مايعرف بسجن ابوه ونطقت جود بتوتر من طاريه:هو مسافر اذا رجع اكيد تقدرون تروحون له.
سامي عقد حجاجه:وانتي ليه ماتبين تروحين معنا؟
جود حست بكتمه زود على كتمتها ونطق لؤي يفهمها:لانها ماتحبه مو ابوها هو.
جود هزت راسها بالنفي وتتفهم شعور اخوانها مهما كان كرهها لابوهم مايصير انها تبين لهم هالكره:لا اكيد بس هو انتم عياله وانا عندي بابا اكيد ماراح ياخذني.
حست بالراحه لمّا شافت الفندق مقابلهم هذا يعني نهاية حديثهم الي تكره طاريه نزلو من السياره بعد مادفعت للاوبر ومشى قبلهم سامي ووقف بجانبها لؤي يهمس لها:الي عجزت افهمه وماحد راضي يفهمني ليه ابوي انسجن وش مسوي متأكد انك تعرفين جود انا كبرت الحين وابي اعرف ابي اشوفه.
جود اخذت نفس تلف له:لؤي مو وقته الان خلنا نحجز سويت وبعدين نتكلم طيب؟
هز راسه وعضت شفايفها جود تصد عنه لانها مانقدر تقول له ومستحيل تقول اساسا عقدت حجاجها تشوف رساله نصيه وعضت شفايفها لانها حواله من مشاري
.
.
« الديره »
رجع يجلس مع امه وموسى بعد مانتهى من مكالمته ولفت مناير له:الي كنت تكلمها جود؟
هز راسه بالايجاب ونطقت بإستغراب:داقه هالحزه وش تبي؟
مشاري:كان فيه موضوع تبيني فيه.
هزت راسها مناير:وش صار على زواجكم؟
مشاري ناظر فيها:امها توها متوفيه الله يرحمها والاوضاع متلخبطه مو حلوه بحقي اجي لهم وافتح موضوع الزواج لكن اشوف حفله بسيطه بيني وبينها تكفي.
رفعت حاجبها مناير:وعلى كيف مين حفله صغيره ولدي ابي افرح فيك الله يرحم امها ماقلنا شي لكن يتسوى زواج يليق فيك مو اي كلام.
موسى ناظر فيها:يمه اذا هو راضي وهي راضيه انهم يسوون حفله صغيره ليه نتدخل؟
مشاري هز راسه يناظر فيها:كافي ملكتي اساسا ماشاءالله حضرو كل الي بالديره واحتفلنا حفله كبيره احس ماله داعي وبالنهايه بعد باخذ رأيها يعني اذا ماكانت مستعده الان ماني ضاغط عليها تخلص جامعه لانها بترم التخرج وبعدين نتزوج هي الي بتقرر.
مناير ناظرت فيه وهزت راسها بأسف:اهم شي رأيها وانتي يا امي مايخصك فينا صح؟
عض شفايفه مشاري:يمه الموضوع يخصها ويخصني وانا ادري فيك بتفرحين لي بكل الحالتين.
.
.
« الرياض بيت احمد »
عقدت حجاجها تسمع نداء عمها احمد لزوجته فوزيه بللت شفايفها تدري بتصير الحرب العالميه الثالثه لان الي سوته فوزيه مايرضي اي احد والكلام الي قالته بحق جود يبين حقدها الدفين على رحاب وعيالها رغم وفاتها لفت لها ليلى:امي رغد دقي على راكان شوفي وينه نطلع معه.
هزت راسها رغد:ابشري.
.
.
« بنفس المكان »
خرجت له وهي تدري وش بيكون حوارهم عنه:لاتحاول تناقشني لانها هي الي قلت ادبها علي وهذا بيتي بيتدخلون فيه هي واخوانها تخيل تقول اطردك انتي من هالبيت احترمتها وقلت مسكينه يتيمه هي واخوانها اكسب فيهم اجر لكن اقسم بالله الخير فيهم حرام.
احمد شد على ذراعها بغضب وشد على سنونه:اقسم بالله لتتحاسبين يافوزيه لو كان كذب كلامك.
فوزيه نفضت يدها من يده:روح اسأل يا احمد روح.
صعدت لغرفتها تحت انظاره ومسح على ملامحه يشوف رغد الي تكلم بالصاله وفاتن جالسه تنتظرها تنتهي من مكالمتها ومشى بجهتهم ونطق بعد مانهت رغد مكالمتها:قولولي الي صار بالمجلس.
فاتن عضت شفايفها ولفت لرغد الي قالت:جيت بنهاية الموضوع ياعمي.
ولف على فاتن وهزت راسها تشرح كل شي من البدايه:بكون صادقه معك ومستحيل اكذب عليك بحرف.
هز راسه احمد وبدأت فاتن تشرح كل شي من البدايه
.
.
« قبل ساعات »
دخلت تشوف بنات اعمامها وامهاتهم جالسين بالمجلس:السلام عليكم.
جلست تسمعهم يردون السلام وابتسمت لها نادين:تبين قهوه؟
هزت راسها جود ولفت لفوزيه:بكرا عندك عزيمه صح عمي احمد قال لي.
فوزيه هزت راسها بالايجاب:ايه خواتي بيجوني ليه ماتبينهم ست جود بتسوين مثل ماسوت اختك في العزاء حلوه ذي بيتي وبيخاشروني فيه كافي متحملتك انتي واخوانك بتتحكمون فيه بعد!
عقدت حجاجها جود من اسلوبها:لا واضح مره عليك شايله بقلبك علينا كثير لكن انا واخواني في عازه عنك وعن بيتك وغاده ماغلطت بشي خواتك الي مايحترمون اي احد يحشون بوسط العزاء واصلين مرحله عجيبه من البجاحه.
نزلت فنجال القهوه ولفت للباقي:مو كنتو تكرهون امي الله يرحمها بسبب اسلوبها اقسم بالله ان هذي الانسانه اسوء منها بمليون مره تستقوي علي عشان الي كانت توقفها عند حدها اندفنت تحت التراب بس ماعرفتي باقي من جود مو اطرد خواتك بس اطردك ان بغيتي وخوالي تعرفين انهم مايردون لي طلب.
قامت بعد مانطقت جملتها ولفت ميساء لامها:ماما ليه تقولين كذا حرام عليك وش سوت جود!
فوزيه رفعت حاجبها:تلوميني تلوميني وهم توهم حبو امهم الي حتى سلام ماكانو يسلمون عليها قليلة الحياء سمعتي وش تقول اطردك تخسي وتعقب ماكون فوزيه اذا خليتها تقعد في بيتي هي واخوانها عاله علينا هذا حالها رحاب تحمل وترمي!
دخلت على هالكلام رغد وعقدت حجاجها بذهول من كلام فوزيه:اعوذ بالله تكلمتو بالاحياء وخلصتو وصل انكم تتكلمون على الاموات!
ميساء شدت على يدها وقامت:والله مره عيب ماما مره عيب واذا غاده غلطت على خالاتي وطردتهم هذا مايعني ان جود مثلها!
ليلى هزت راسها:ايه والله تعوذي من الشيطان البنت ماقالت شي اكلتيها اكل سألتك بس!
فوزيه لفت لها:انتي شفتي وش قالت انا اعرف بالنوايا الخبيثه اعرفها.
فاتن عقدت حجاجها:ماقالت شي واذا على كلامها بالنهايه ردة فعل على الكلام الي قلتيه يعني فوق ما انك غلطتي عليها تظلمينها بعد مايصير والله مايصير انتي انسانه كبيره وفاهمه!
.
.
انهت كلامها تناظر في عمها:اقسم بالله مانقصت بحرف ولا زدت بحرف وجود ابدا ماغلطت ياعمي ابدا.
شد على كفوفه احمد:ماشك فيكم انتم بالذات عيال سلطان ماتقولون غير كلمة الحق اقسم بالله اني متفشل مادري وين اودي وجهي من حقدها على رحاب الي خلاها تسوي اشياء بدون عقل.
رغد ناظرت فيه:الله يرحمها مشكله صراحه اذا الانسان يحقد حتى على الميت الي ماتجوز عليه غير الرحمه!
احمد مسح على ملامحه وناظرت فيه رغد:بعد هالكلام مستحيل جود ترجع عند اي واحد فيكم يا اعمامي مستحيل وانا اعرف هالانسانه زين لكن لو لها قدر عندك خل فوزيه تعتذر منها.
لفت تسمع ليلى تناديها:يلا يارغد راكان عند الباب.
اخذت شنطتها رغد تخرج وقامت فاتن تخرج خلفها يتركون احمد الي غارق بتفكيره
.
.
« اليوم التالي »
وقف قدام السويت حقهم وطرق الباب وصله صوت سامي:مين؟
مشاري:انا افتح ياسامي.
فتح له سامي وابتسم مشاري ينزل نفسه لمستواه:وش اخبارك؟
سامي ابتسم له:بخير تبغى جود صح هي بالبلكونه حقت غرفتها ومعها لؤي يتكلمون بموضوع وقالت لي ماتدخل معنا.
عقد حجاجه بإستغراب لان وش ممكن يكون موضوعهم الي مايبون يسمعونه سامي اخذ نفس وقام يدخل للغرفه الي اشر عليها سامي وعقد حجاجه يشوفهم جالسين مقابل بعض وكل واحد يتأمل الثاني بطريقه غريبه وكانهم يتكلمون عن موضوع يخصهم الاثنين قرب يشوف لؤي الي ملامحه ساكنه قرب يجلس جنب الكرسي حقها:وش فيكم؟
لؤي ميل شفايفه وقام من عندهم يخرج من الغرفه وتقدم مشاري يجلس مقابل كرسيها:وشفيه؟
جود مسحت على ملامحها:يعرف اني اكذب عليه بس مشاري ماقدر اقوله الصدق ابدا عن ابوه.
مشاري هز راسه:اكيد ابوه ياجود ماتقدرين تقولين له المصايب الي مسويها.
جود فركت كفوفها ببعض:بس واضح انه يعرف.
مشاري ناظر فيها:لاتحملين نفسك مسؤوليه كل شي صدقيني كل شي بينكشف مع الوقت سواء منك او من غيرك انتي لاتفكرين كثير.
هزت راسها جود وناظرت فيه:جاي فيه شي بخاطرك تقوله؟
ناظر فيها:امس تكلمت مع امي اني افكر نسوي حفله بسيطه واخذك بدون زواج كبير عشانك يعني.
جود ابتسمت تناظر فيه لانه رغم كل شي يفكر فيها هي:من البدايه قلت لك ماودي بزواج كبير وفعلا كانت كافيه الملكه بالنسبه لي وبعد وفاة ماما الله يرحمها مابي حفله ابدا.
هز راسه:كنت عارف عشان كذا فكرت بهالشي وجود اذا ماكنتي حاهزه قوليلي انتظرك للوقت الي تبينه انا مايهمني الا راحتك انتي.
جود ناظرت فيه:عادي يتأجل شوي لان عارف الحين الوضع كيف اخواني ماقدر اتركهم ابدا بعد الي صار في بيت خالي.
ناظر فيها مشاري:اخوانك مو عائق ابدا يجون يسكنون معنا وصدقيني مثل ماهم اخوانك اخواني متفهم هالموضوع بالذات وش يعني لك.
لمعت عيون جود بحب:تصدق مشاري اني احس معك بالامان اكثر من اي شخص احسك وجهتي بعد الله في مشاكلي مره احب هالشعور.
بلل شفايفه وتنهد بإبتسامه من شعوره:احلى من كلمة احبك والله العظيم.
صدت بإبتسامه ودخل سامي يقاطعهم:شوفو هالرسمه تعبت عليها.
اخذت الورقه جود من بين يده وعضت شفايفها لمّا بدا يشرح لها:هذي ماما وهذي انتي وهذا ابوي وهذا لؤي.
جود اخذت نفس تكتم غصتها لانه راسم رحاب باللون الاسود وراسم زياد باللون الاسود بس هي ولؤي وهو الي ملونهم ولفتها لمشاري:حلوه.
مشاري فهم انها تخبي غصتها وابتسم يشوف الرسمه:مين ذولي الي بالاسود؟
سامي ناظر فيه:هذولي ماما وبابا عشان هم مو موجودين وهذولي انا وجود ولؤي.
ندم انه سأله لانه بيجدد مواجعهم ولف عليه:ماشاءالله فنان عندك رسمات ثانيه تورنياها؟
هز راسه سامي وركض بحماس يخرج مسحت على ملامحها جود:ارحمه صغير والله على هالافكار.
بلل شفايفه مشاري:مكتوب ياجود مانقدر نقول غير الحمدلله على كل حال لكن هذا يبين لك انك لازم تصيرين اقوى لانهم مابقى لهم من الذكريات غيرك.
رفعت اناملها لمدامع عيونها تمسحهم وتأففت من دموعها:احاول وبكل جهدي هم اغلى مابقى لي لكن قوتي تتلاشي لمّا اشوف حاجتهم.
اخذ نفس يقوم يجلس جنبها وحضنها يقبل راسها:انا معك وجنبك.
تنهدت تمسح دموعها ولفت له:عادي نسافر جده ابي اشوف غاده وحشتني مابي اروح الديره هالويكند.
هز راسه:من عيوني يصير الي تبينه.
.
.
« صباح يوم جديد جده »
نزلت للأسفل تشوفهم متجمعين على الفطور وابتسمت احلام تشوفها:صباح الخير.
ابتسمت غاده:صباح النور.
لف لها ثنيان:بتداومين؟
هزت راسها:احس اني احسن ليه ماداوم كافي غايبه يومين.
سلطان:ابد يابنتي سليمان وسعود يقولون ابد ماتجي الا اذا حست نفسها بخير معك عذرك يعني اذا بتداومين عشان غياباتك كثرت هم سامحين لك.
لفت له غاده:لا خالي والله الحمدلله انا بخير والدكتوره امس طمنتنا ان الامور بخير.
هز راسه سلطان:سوي الي يعجبك اجل.
ثنيان لف لغلا الي تأكل بصمت:وشفيك سارحه بعيد عننا؟
غلا رفعت عيونها بإنتباه:معكم.
عقد حجاجه سلطان يناظر فيها:واضح فيه شي شاغل بالك قولي ابوي؟
غلا ناظرت فيه وابتسمت: صدقني لو فيه شي بقول بس عادي عشان اليوم فيه تدريب متوتره المهم بقوم اطلع اساسا تأخرت مره.
قامت تخرج وقامت غاده خلفها تخرج وشافتها واقفه تنتظر السواق قربت منها:تعالي بنزلك بطريقي.
هزت راسها غلا وارسلت للسواق انه يجلس بغرفته ومشت تركب بالبورش حقت غاده وابتسمت تلف لها:جاني فضول اعرف وش سبب انه اهداك البورش.
ابتسمت غاده لانه ماهداها البورش بس اهداها اشياء كثير ويمكن تعني لها اكثر من البورش:عشان انه مابين لي فرحته بخبر الحمل حس انه لازم يعوضني وانه بعد طول فترة زواجنا ماقد اهداني فهمتي كنّا مشغولين بعلاجه ماهتمينا للتفاصيل الصغيره الي بيننا.
عضت شفايفها غلا:انصدمت تصدقين عمري ماتخيلت ثنيان رومانسي ولا حتى خالد فهمتي اخواني مايعرفون يحبون بس لمّا تزوجو صدموني صراحه.
ضحكت غاده ولفت لها بغرور:متزوجين بنات هيله وش كنتي متوقعه!
ضحكت غلا:اوف يالغرور.
ابتسمت غاده معها وتوقفت عند المستشفى الي تتدرب فيه غلا ولفت عليها:بالتوفيق حياتي.
غلا ابتسمت لها:اجمعين يارب.ونزلت من السياره وعقدت حجاجها غاده من هدوء غلا الي تدري ان فيها شي بس ماتبي تقول حركت سيارتها تتجه لدوامها وهي تفكر بغلا
.
.
« بيت هيله »
ابتسمت هيله تشوفه جالس مع لمى بالمجلس وولده بحضنه:نايم هنا ياخالد.
هز راسه خالد وابتسم:من فرحتي امس ماقدرت اتركه.
ابتسمت لمى ولفت لهيله:دودي وخاله احلام بيجون اليوم؟
هزت راسها هيله:بيجون بعد نوريه ومها وجميله ووعد وياسمين وبكره بيجون حريم عيال شاهر الباقي بيجون من الرياض لك.
هزت راسها لمى ولفت لخالد الي منهار على فهد:خالد وش تسوي فيه صغير باقي على الجلوس!
لف خالد عليها:خليه ولدي سابق الي بعمره.
وسعت عيونها هيله:جيب الولد جيبه!
ضحك خالد وضحكت لمى من ردة فعل هيله:بسم الله على حفيدي سمي جده.
عضت شفايفها لمى من طاري فهد وابتمست:الله يجعله مثل سميه.
تنهدت هيله بإبتسامه:ايه والله يجعله مثل طيبته ورجولته ولا قصور بأبوه وجده سلطان كلهم والنعم فيهم.
ابتسم خالد:رغم اني ماعرفه لكن الله يرحمه ويجعله في جنات النعيم ومن كلامكم عنه تمنيت اني عرفته وقابلته.
بللت شفايفها لمى تناظر فيه:من افضل الناس الي قابلتهم بحياتي يمكن ماعشت معه كثير لكن كان انسان اخلاقه تتكلم عنه اسأل عنه اي احد بتلقاهم يتذكرونه بطيب افعاله.
.
.
« المساء »
مستلقى بسريره يتأملها قباله تفك لفافات شعرها وقام يمشى لها وتوقف يتسند على الجدار الي مقابلها:واضح متحمسه للعزيمه.
ابتسمت تلف له وتنهدت:مره اشتقت لوعد وخاله جميله وخاله مها وخاله نوريه ولارا كلهم وحشوني من زمان عن جلساتنا.
ابتسم ثنيان لابتسامتها وتقدم لها يساعدها بتنزيل اللفافات الي بالخلف:بتروح مكان؟
هز راسه بالايجاب:برجع للعياده عندي اربع مواعيد.
.
.
« بالعياده »
دخل وهو يرتشف قهوته الي بين يدينه ابتسم طارق يشوفه:تدري حسنة هالمرض الي جاك خلاك تترك الدخان.
هز راسه ثنيان:بس قصر صوتك مو حلوه بحقي دكتور ويدخن!
طارق ضحك:المهم ترا فيه واحد ينتظرك بالاستراحه يقول يبي يكلمك والواضح انه مو مراجع عندك.
رفع حاجبه ثنيان:قول لهم يدخلونه بروح للغرفه انا.
هز راسه ومشى ثنيان يدخل لغرفته ينتظر وبالفعل ماهي الا ثواني ودخل هالشخص انذهل من شكله الي فعلا مايوحي انه جاي لمشكله جلس مقابله ورد السلام ثنيان يناظر فيه:ياهلا من معي؟
رفع كفه يصافحه:معك ناصر بن سهل جراح تجميل.
ثنيان رفع حاجبه يتذكره:سامع فيك يامرحبا والله.
ابتسم ناصر:تبقى ياخوي والي خلاني اليوم اجي هو اختك غلا متدربه عندي.تنحنح يناظر فيه:عندنا يعني بالمستشفى.
هز راسه ثنيان ينتظره يتكلم ورفع نظره لثنيان هو يكمل كلامه:وخلال هالفتره الي دربتها فيها ماكنت عارف هي بنت مين وامس كنت ابحث بملفاتهم وانصدمت لمّا عرفت انها بنت سلطان واختك بعد وتبي الصراحه اختك والنعم فيها ومتربيه زين وانا ابيها على سنة الله ورسوله ويشهد الله علي اني جيت بدون تفكير لاني ابيها وتشعجت اكثر يوم عرفت انها اختك وبنت سلطان بن شاهر من يحصله نسبكم ويرده وجيت بعد اتكلم معك عشان نحدد يوم نجي فيه رغم ان الوالد بيكلم ابوك بس كان ودي تكون بيننا معرفه قبلها.
ابتسم ثنيان:والنعم فيك ياناصر وحنا الي لنا الشرف بنسبكم وابد شوفو الوقت الي يناسبكم وحياكم الله ابوابنا دايم مفتوحه.
ناصر هز راسه بإبتسامه وقام:ماعليك زود وبيننا اتصال ان شاء الله.
ثنيان مد جواله له:حط رقمك وابشر.
وبالفعل نقل رقمه ناصر وخرج بعدها يترك ثنيان يدخل في دوامه البحث عنه
.
.
« بيت هيله »
رفعت جوالها تشوف اتصال جود وعقدت حجاجها تخرج من المجلس وردت:هلا جود.
جود عضت شفايفها:تونا طلعنا من بيت خالي قال لنا ان عندكم عزيمه في بيت خاله هيله؟
غاده وسعت عيونها بذهول:انتي في جده!
جود:ايه جيت لانك وحشتيني بس مالقيتك.
غاده:والله حتى انتي وحشتيني يعني ارسلت لك امس ماتوقعت تسوينها المهم تعالي بيت ماما عشان تشوفين فهودي واه ياجود لو تشوفينه.
ابتسمت جود من وصفها:ياروحي هو بجي عشانه بس مين فيه عشان اذا فيه ضيوف بكشخ.
غاده لفت لوعد الي خرجت لها تناديها:صاحبات ماما بس و وعد وياسمين وخاله احلام وغلا بتجي بعد.
جود:تمام برجع للفندق البس واجي ان شاء الله.
غاده ابتسمت:زين حياتي.
سكرت منها ولفت لوعد:هلا وعد؟
وعد مسكت ذراعها:تعالي بقولك شي.
رفعت حاجبها غاده ومشت معها يدخلون لاحد الغرف وسكرت الباب:ايش؟
وعد عضت شفايفها:احس اني دايخه.
غاده قربت تمسكها:بسم الله عليك اشبك؟
وعد بعدت يدها عنها:لا مو دايخه صدق بس يعني دايخه ام سعود بتجي هنا توها كلمت خاله هيله.
ضربت يدها غاده:خوفتيني احسب فيك شي ام سعود مين سعود مديري بالداوم؟
هزت راسها وعد:ايه بتجي.
غاده فهمتها وضحكت:يمامي يعني مستحيه؟
عضت شفايفها وعد:بموت من الحياء احس اذا جت تتفحصني بعيونها وانا اتوتر مره.
غاده ضحكت:اذا تموتين من الحياء عند الام كيف سعود!
وعد:دودي يرحم اهلك لاتزودينها علي شكلي مرتب اوف احس ان النفس انقطع.
غاده ابتسمت تناظر فيها:والله قمر حاصلهم انتي اساسا خذي شهيق زفير وبعدين قومي عدلي روجك وزيدي بلاشر وتعالي.
وعد اخذت نفس وهزت راسها ومشت تخرج غاده من عندها وشافت غلا الي واقفه امام المرايا تنزل عبايتها:قمر قمر.
لفت غلا بإبتسامه:حياتي انتي.
وشدت فستانها تعدله على جسدها ورجعت تناظر في غاده بتساؤل:جو كلهم؟
هزت راسها غاده:الاغلب تعالي معي.
دخلت غلا معها وابتسمت هيله لغلا:ياهلا بدكتورتنا.
ابتسمت غلا وقربت تقبل راسها:كنت ناويه اقول بسوي لك اجراء تجميلي بس جمال من الله ماتحتاجين شي.
هيله ضحكت تناظر فيها:الله يرفع قدرك بس عاد نحتاج شد وحركات.
لفت غاده:والله ماما بسم الله عليك ماتحتاجين شي.
لمى لفت لياسمين:راحت عليك ياسمين ماما كانت تقولك انتي بس يادكتورتنا الحين صارت لغلا.
صدت ياسمين تتظاهر الزعل وابتسمت هيله لها:غلا دكتورتنا الجديده انتي من سنين ياروحي.
لفت لها نوريه ام طارق وابتمست:ياحبيبتي ياسمين انتي دكتورتنا مني اقولها لك.
ابتسمت ياسمين:ياحظي والله.
غلا ناظرت فيها:يمه يالغيره خليني استانس شوي.
ياسمين ضحكت تناظر فيها:ماعليك مني الحين وش صار مع التدريب؟
غلا بللت شفايفها:حلو والله.
ياسمين ناظرت فيها:وبعدين بتشتغلين عند ثنيان.
هزت راسها غلا:ايه ان شاء الله.
ياسمين:حلو الله يوفقك.
غلا ابتسمت لها:اجمعين يارب.
.
.
« الفندق »
ناظر فيها امامه ترسم ايلاينر:وحنا بنجلس هنا؟
لفت له وهزت راسها بالايجاب:ليه تسأل كثير ماتبي تجلس مع مشاري ولؤي؟
هز راسه بالنفي:ابي اروح اشوف البيبي الجديد.
بللت شفايفها تناظر فيه وهزت راسها:بروح ابدل وانت البس التيشيرت الابيض والشورت الاسود عرفته صح؟
هز راسه بالايجاب وركض من عندها بفرحه ومشت تاخذ فستانها ودخلت للداخل تبدل
.
.
« بالخارج »
كان جالس يتأمل حال لؤي هو يعرف لؤي من كان صغير لانه يشوفه بالديره بكل مناسبه ويفهم تغير لؤي المذهل سواء بشكله او افعاله لانه طلع من مرحله عمريه ودخل بالاخرى بدون وجود اهله ويفهم حاجته لهم بهالعمر خصوصا لكن هو عاش بين خواله والاكيد مو مقصرين معهم لكن مستحيل يصيرون بمقام امه وابوه قاطع تأمله سؤال لؤي:ليه تناظر فيني كذا؟
بلل شفايفه مشاري يناظر فيه:افكر بس وصار النظر عليك.
لؤي هز راسه ولف لجود الي خرجت لهم وعبايتها بيدها ولف مشاري تنحبس انفاسه من كثر حلاوتها لنظره:باخذ سامي معي.
لؤي ابتسم يناظر فيها:حلوه ماشاءالله.
عضت شفايفها جود بخجل من نظرات مشاري الي تتفحصها وابتسمت للؤي:حبيبي انت.
صدت عنهم تلبس عبايتها وخرج سامي من الغرفه وتقدم لها:هذا اللبس.
هزت راسها ونزلت كفوفها لشعره تعدله ولفت لهم بعد مانتهت:يلا نطلع عشان تأخرت مره.
قام لؤي ولف لمشاري:يلا مشينا.
هز راسه مشاري وخرجو لؤي وسامي قبلهم ومشت هي تخرج خلفهم لكن مشى جنبها وهمس قريب منها:الله يصبر قلب مشاري.
رفعت حاجبها تلف عليه بإبتسامه:ماعتبرها مدحه ترا.
رفع كفوفه بإستسلام:عيوني ماتكفيك مايكفيك اني انخرست قدام اخوانك.
.
.
« الساعه 12:00 بالليل »
جالسين بالحديقه هي وغاده لوحدهم لان الضيوف راحو وهي وسامي بينامون عندهم نطقت تهز راسها بالنفي:مستحيل غاده مابي اضايق نفسي مابي اشوفها.
غاده ناظرت فيها بذهول:جود اشبك حبيبي صحصحي ترا هي الي المفروض ماتجي مو انتي هي الي غلطت قليلة الادب والمشكله خوالي تكلمو قالو شي؟
جود ناظرت فيها:رغد قالت لي خالي احمد دخل وعصب عليها وسألهم عن الي صار وقالو له كل الي صار واتوقع قبعت بينهم بس مايهمني ابدا مايهمني مكان تنهان فيه كرامتي انا واخواني مايلزمنا.
عضت شفايفها غاده بقهر ومسحت على ملامحها:كيف كنتي متحملتها من قبل انسانه يملئ قلبها الحقد معميه عيونها بسببه اعوذ بالله منها.
جود رفعت كفوفها:اعيش في بيتها عشان ماترك سامي ولؤي كنت مجبوره اتقبلها غاده ماكان عندي اي خيار ثاني.
غاده ناظرت فيها:ولؤي كيفه كيف وضعه؟
جود اخذت نفس تناظر فيها:خصوصا هو ماني قادره افهمه غاده يعني سامي من زمان فاهمته واعرف كل شي ممكن يمر فيه لكن لؤي دايم مافهمه ولا افهم وش يعيش مشاري قال لي انهم مثل اخوانه ومستحيل يتركهم عند اي احد وانا احس مايصير لان احتمال كبيره نسكن عند امه مناير وانتي عارفه وش بيصير احس اني ضايعه ولا اعرف كيف بتصرف.
غاده عضت شفايفها تناظر في جود وتفهم الضياع وكبر المسؤوليه الي تحس فيها جود:خالي سلطان تدرين ان بيبانه مفتوحه لعيال اخته وتدرين ان ثنيان وخالي سلطان الى الان يحسون بالذنب اتجاهـ.
بلعت غصتها تنطقها بصعوبه:ماما الله يرحمها ويبون يسوون شي يخفف شعور الندم داخلهم ويمكن هذا افضل شي يسوونه بكلم خالي سلطان انا بالموضوع وانا متأكده انه ماكان يدري عن الي صار في بيت خوالي لانه مستحيل يرضى مهما كان المهم خليك من هالموضوع كيف علاقتك مع مشاري تبينه؟
جود ابتسمت من طاريه وابتمست غاده تلاحظ ابتسامتها:يمه الحب يمه.
ضحكت جود وعضت شفايفها:مشاري غير الوحيد الي حسيت معه بالامان غاده يدللني كاني اغلى ماكسب بهالحياه يمكن بحياتي ماحسيت اني اساسيه بحياة احد الا مشاري يعني ماما الله يرحمها كنت طرف ثالث بعائلتهم ونفس الشي عن ابوي رغم انه مايقصر وزوجته سحر عسل لكن بعد ماحس شعور اني اساس في حياتهم فهمتيني اول مره احس فيه شخص يحبني عشان انا جود مو عشان شي ثاني ويقدرني جدا.
.
.
انتهى