Uljhe Dor (The Mehrotras book 1)

35. Kidnap

  Mom chaahti hain ham sab bhool kar Kunal aur apne rishte ko ek mauka dein. Lekin Kunal ke dil mein abhi bhi Maan hai. Aur ho bhi kyun na? Kunal Maan se pyaar karte the, bachpan ke dost hain, paanch (5) saal se dono saath hain, shaadi karne wale the. Kyunki kisi aur se shaadi ho gayi aur kyunki pariwaar wale unhe keh rahe hain, wo thodi bhula payenge Maan ko.

  Ham bhi to Rishi se... hamne Rishi ke baare mein socha hi kahan? Jab se hamne yahan kaam karna shuru kiya hai, tab se ham Rishi ko wakt hi nahi de paye hain. Ham uske saath theek nahi kar rahe hain. Hamari Kunal se shaadi ho gayi jab ki hamari shaadi Rishi ke saath hone wale thi aur ham Rishi se theek se baat tak nahi kar paye hain. Ham aaj hi usse baat karenge. Papa ke bare mein bhi puchh lenge. Ham to aise hi uth ke chal diye, Papa ko akele chhod kar. Hamein bilkul achha nahi lag raha hai lekin ham kya karte? Hamare paas koi vikalp hi nahi tha.

  "Dekho, tumne aaj jo dekha, uske baare mein jyada mat dimaag chalana. Waisa kuchh nahi hai jaisa tum soch rahi ho."

  "Aapko hamein safai dene ki koi jaroorat nahi hai. Hamari shaadi bhale hi ho gayi hai, lekin ham jaante hain apne pyaar ko bhula kar aage badhna aasan nahi hai. Hamein bura nahi lagega."

  "Aur lagna bhi nahi chaahiye. Maan aur Ansh ka jhagda ho gaya tha. Main jab Ansh ko bulane gaya tab Maan thoda dar gayi thi. Wo mujhe dekh kar mere paas aa gayi. Ham dono pehle saath the is liye wo mere saath comfortable hai."

  "Aapko apne bhai par bharosa nahi hai kya?"

  "Kya?"

  "Ansh aapka bhai hai. Aapka bachpan unke saath gujra hai. Aap dono ke andar ek hi khoon, ek hi sanskar hain, phir bhi aapko unpar bhasora nahi hai ki wo Maan ko kabhi hani nahi pohochayenge, chaahe wo kitna hi nafrat kyun na karta ho."

  "Mujhe apne bhai par pura bharosa hai," Kunal offend ho jaata hai. "Main use jaanta hoon, lekin Maan nahi. Wo dono bachpan se jhagadte aaye hain, kabhi ek durse ko nahi samjhe hain. Maan Ansh ko nahi jaanti, uske gusse ko dekhkar dar gayi hogi."

  "Ya phir wo bhi jaanti hai lekin aapko dekhkar naatak kar rahi thi. Kyunki chaahe jaise bhi jaane, lekin jaanti to hai wo Ansh ko. Un dono ko ab saath rehna hai. Kab tak aap unke beech jakar unke masle hal karte rahenge?"

  "Bas, Bela. Jab tum hamari family ke dynamics nahi jaanti ho to beech mein mat bolo. Tumhe hamesha se Maan se problem rahi hai is liye tum aaj bhi use samajh nahi pa rahi ho."

  "Aur shayad aap apne bhai ko samajh nahi pa rahe hain. Aapko unke taraf hona chaahiye tha. Unhe kaisa lagega, aapne socha?"

  "Wo baccha nahi hai, Bela. Wo khud ko sambhal sakta hai."

  "Lekin Maan nahi?"

  Bela galat nahi keh rahi hai. Yeh kaisi museebat hai? Mujhe chunna pad raha hai Ansh aur Maan ke beech. Ek taraf mera bhai hai aur dusri taraf wo ladki jiske saath main already bohot galat kar raha hoon aur uske saath aur galat nahi kar sakta hoon.

  Bela Kunal ki duvidha samajh jaati hai. Use guilt lagne lagta hai Kunal ko kadwa keh kar. Yahan hamein aapki patni banna chaahiye lekin ham aapki duvidha kam karne ke jagah aapke jale par namak chhidak rahe hain. "Agar aap hamari devrani ke taraf hain to ham bhi apne devar ke taraf hain."

  "Kya?" Kunal Bela ko dekhta. "Tum meri help karna chaahti ho?"

  "Ham to hamesha hi karna chaahte the. Hamari galti nahi hai aapko hampar bharosa nahi tha aur aap hamari madad lena nahi chaahte the. Ham ja rahe hain apne devar se milne."

  "Aaj tumhari muh dikhayi hai."

  "Haan, to?"

  "Tayyar ho jao."