مثايل العرب

20

غايه : عفان الله هالهيس شو يبا ( ردت عليه )
علي : قولي حق مثايل شي فار فالحجره ماقدر ارقد
غايه : احجز غرفه فندق
بندت و دق مره ثانيه وقال : دخيلكم حسو فيني شي فار عود
غايه : شو اسوي يعني اكيد مثايل راقده وبعدين هي شو بتسوي
علي : ساعدوني اذبحهه
غايه : لا لا مستحيل ماقدر
علي : أترياكم
بند و ردت دقت هي : لا تترياني أنا مابيي كلم مثايل
علي : والله تين و خبريها وانتي يايه أنا ييت عشانكم كيف ترقدوني ويا الفار
دشت مثايل و قالت : مرتاحه ؟
غايه : ييتي ويابج الله شي فار فحجره الدريول
مثايل : اويه ها الفار مامات
علي : مامات يعني مامات
غايه : علوه يقول كيف يعني مامات
مثايل تضحك : معمر فالحجره هاييج ها من زمان موجود اتحرا مات
علي : كيف بتخلوني ارقد هني !!!! أنا بحجز فندق يالله بندي
غايه : ههههههه بيحجز فندق
مثايل : لا لا تعال شي حجره زياده
علي : اكيد ؟
غايه : يقول اكيد
مثايل : هيه بس لا تطلع منها إلا يوم بتقولنا عشان نلحق نتستر
علي : زين بشل اغراضي و بييكم جهزو الحجره
غايه : بيي
( بند )
مثايل : بييب فراش يديد حق الشبريه انتي بخري الحجره
غايه : ليش ابخرها ترا كله علوه
مثايل : استحي ع ويهج انتي ع الطاوله الي فالزوايه برع شي دخون و مدخن وفحم سوي و بخري المكان على مايي
غايه : زين زين
مثايل ابتسمت : تشوفين هالعطر
غايه : هالكحيان؟
مثايل : حرام عليج مابقولج سالفته ترا
غايه : شو سالفته
زخت مثايل العطر و شمته و تنهدت : احب ريحته وايد
غايه : انزين و بعدين شو قصته
مثايل : عطتني ياه معلمتي الي احبها من زمان
غايه : أتحرا شيي
مثايل : بخري بخري بييب الفراش
غايه : ماقلتيلي اي حجره
مثايل : الي عدالج بالضبط
غايه : تمام
بخرت غايه الحجره ويابت مثايل الفراش و حطت فازه ورد و اكياس زباله وطلعت الاغراض الي حاطينها هناك لانها بتكون غرفه علي لأسبوعين ولازم ياخذ راحته فيها غايه : أنا احس ببدل وياه الحجر الحجره الحين تفتح الننفس
مثايل : عرفتي ليش لازم ننظف حبيبتي ؟
غايه : امم هيه
مثايل : امي تتصل
غايه : شوفيها تطمن عليج اكيد
مثايل وهي طالعه من الحجره : هلا ماما
نوره : هلا حبيبتي شو مسوين
مثايل : حصلنا فار فالحجره الي فيها علوه قلتله يدش داخل
نوره : زين تسوين
مثايل : بغيتي شي ؟
نوره : حصلنا اقرب موعد فحص تاريخ 29
مثايل : وابويي و اليوم كم
نوره : 26 نحجز ولا نتريا ؟
مثايل : عادي عندي بس وين
نوره : عندكم فدبي
مثايل : خلاص تمام
نوره : زين حبيبتي يلا أنا بخليج ارقدوا انتو
مثايل : ان شاء الله ( بندت وقال ) غايوووه بلاج تباغمين
غايه : شي نملتيين يتزاغدوون
مثايل وهي تضحك : حايزي بينهم وفكينا أنا بدش بتسبح
غايه : زين مثايل بيتكم بارد
مثايل : خفي ع المكيف
علي : هوود هود
مثايل : هدا
علي : اسمع بغيم هالصخله من تحت شو فيها
مثايل : تقول نملتين يتزاغدون
علي : ايواا عيل نملتين يتزاغدون
مثايل : ههههههه هاي حجرتك دش ومثل ماقلت خبرنا قبل لاتطلع
علي : زين زين ( دش علي الحجره و سكر الباب ) اعوذبالله
غايه وقفت : منو صخله ؟
علي رفع ايدينه الهنتين بأستسلام : والله العظيم بالغلط
غايه : سامحتك خوز عن دربي ( وطلعت )
دشت مثايل حجرتها و يلست ع شبريتها بطلت فونها ودشت واتس على الاساس ترمس ابوها بس جافت مسج من رقم غريب كاتب فيه " منو بيطبخ أنا و لا انتي " عقدت حواجبها و ردت " منو " حطت فونها ع يمب وحصلت كتابها الي كانت تكتب يومياتها فيه شبه يوميا وبدت تكتب عن آخر تطورات حياتها و في آخر سطروها كتبت يالله يامحلا شعور السعاده ودشت فدوامه تفكير عميقه عن مستقبلها لين رقدت