الشيب الطلع بالرأس غصه على غصه
ولو تحسب الشيبات كل وحده قصه
نغمة الفراق
• • •
ياهو مثلي فتحت عيني انبعت
شكبره صبري عمري ما بادي وضعت
مو لحضن امي خذوني لجيب ابوي
سلعه شافوني ابرود اتسعرت
حتى لتبنوني لو حضنوني اخاف
ارد احس مرة بأمان شكد خفت
• • •
لارا
كعدت الصبح كالعاده حتى اسبح قبل لا تكعد باقي البنات كملت وطلعت جانت الدنيا بارده بطانيات قليله وما يدفن نشفت شعري ومشطته وكعدت على ضوء صغير اراجع دروسي طلعت للمدرسه ومثل كل يوم نظرات الشفقه تلاحقني بكل مكان
ملابسي خفيفه ما اكدر ادفه رحت لمدرستي
كملت دروسي جانت بس المدرسه تنسيني همومي
جنت كلش جوعانه المبلغ الي نحصله قليل وانا ادخله لان احتاجه بغير اوقات كمل يومي المدرسي ورجعنا للميتم لازم مثل كل يوم انضف غرفنا وبعدها نكعد ناكل الاكل الي ما يتسمى اكل
لا يشبع ولا يغني من جوع
كملت رحت للغرفه جانت بيها سبع بنات واني الثامنه
لازم انسى شي اسمه انام الظهر
كعدت ادرس واذاكر دروسي وغفيت على الكتاب
رغم الضجه بس التعب غلبني
كعدت جانت الساعه ٩ فات وقت الاكل ما اكدر اكل هسه رجعت ادرس واني حتى الغداء ما اكلت زين
كملت دراستي كلها ورحت نمت
كعدت نفس وقتي كل يوم سبحت وكعدت اراجع او احاول الكه شي انشغل بيه
بس ماكو اي شي
مرت الايام هيج جنت اتمرض بس اعرف ماكو احد يهتم اذا تمرضت لو لا ماكو ام تخاف عليه هنا اذا ضعفت يعني احسب نفسك متت
نغم
رجعت ضي بس مو نفسها ضي الي راحت جانت مختلفه كلش
محد يكدر يلومها الي مرت بيه مو قليل
احتمال جانو متوقعين هذا الشي بعد ما ماتو عمو وأبنائه بس هسه محد متوقع منها هالشي
حبيت كلش موقع همام من كعد ووكلها
حسيت بيه جدا حنين
حلوه حنيته عليها مبين يعرف بشنو تفكر
يعرف شلون يجبر خاطرها مرت كم يوم
كعدنا الصبح كعدنا كلنا على السفرة
عدا همام وضي
سليمان : جدو وين اخوانج
روح : جدو همام سافر الفجر راح يجيب أوراقه ويرجع حتى يستقر يمنا بس ضي يمكن نايمه
سليمان : روحي شوفيها شلونها اذا نايمه لا تكعديها
راحت روح بعدين طلعت من الغرفه مصفرة كانت بيدها ضروف سلمت واحد الجدو
فتح جدو الظرف وبدأ يقرأ بصوت عالي
ضي
السلام عليكم ورحمة الله وبركاته
جانت رجعتي مو مثل ما متوقعين
ولا اني جنت متوقعه ارجع بهذي الطريقه
تعب ايام مشاعر مضمومه كتمان
كلها طلعت بوقت واحد وجان وقت العمليه
بيوم شفت نفسي ادخل وحدي
ماكو اب يبتسملي ويطمني انو هوه جنبي
ويمسح على راسي
ماكو ام تبجي وتنتظر طلعتي وتخاف عليه من الهوا
هنا عشت أقسى لحظات عمري
جنت اصارع الموت وحدي
علمود اعيش
فجأة انتبهت اعيش؟
شلون راح تكون حياتي وهمه ما موجودين
شنو المعنى من حياتي
وبين كل هذي المشاعر المتخربطه
وقعت ضحيه بأرض المعركه
جانت هذي الضحيه روحي
من رجعت شفت نظراتكم
تعبانين مقهورين ما حابين الشكل الجديد من ضي
بعد ما نكسرت وصارت تكسر الكل
حتى لو ما الهم ذنب
وهنا أيقنت ان بقائي هنا راح يخليكم تكرهوني
وما تطيقوني فجأه انسب حل هوه الهجره
وحتى ما احن قررت اخلي الموضوع سر
لان ادري بنفسي بس اشوف دمعات روح
وبس اسمع صوت النور والنيزك راح أتراجع
واترك كلشي وراح
احب اكوللكم انا هسه بأمان
بمكان مريح وراح اكمل دراستي بيه
راح ارجعلكم بيوم من الايام
اقوه من قبل
راح ارجع ابني ذاتي
احبكم من كل أعماق قلبي
اعرف راح تعتبون ما راح ترضون
بي والله اتخذت هذا القرار حتى ما اذيكم وياي
جان قرارها صحيح
حسب رأي الكل جدو سد الرساله وأشر لروح تفتح
الظرف الثاني
روح
اني اسمع كلمات ضي ودموعي تجري
اعرف بيها تعذبت بس ليش تتركنا
اشرلي جدو افتح الظرف الثاني
جان بأسمي
فتحته جانت كاتبه
حبيبتي روح
تدرين بيه شكد احبج
انتي روحي من الدنيا اعرف قراري هذا راح يأذيج
بس تيقني اني ما سويت هذي الخطوه اله
واني اعرف انها الحل الوحيد والمثالي
لأن جان بقالي هنا راح يتعبك ويأذيكم وياي
تدرين طبعي
جنت كل فتره اخذ وقت عزله
ابقى بيه ويه نفسي حتى اعيد النظر بتصرفاتي
وهسه نفس الشي بس احتمال الفتره تطول
روح لا تضوجين
صيري قويه
ابني حياتج
ابقي نفس مستواج
وعلي طموحاتج
تستحقين الأفضل
افديكِ
ضي
وجانن اكو رسائل للنور والنيزك وهمام
خابرما همام وحيل تفاجأ برحيلها من ردت فعله
استبعدنا ان هوه الي مسفرها ..
ضي
مرت الايام عاديه بديت اتأقلم ويه حياتي الجديده
همام خله أوراقي بأفضل مدارس تركيا خلصت سنه
واني هنا استقرت حياتي بديت ادخر فلوس حتى
افتح مشروع خاص الي
مع ذلك الحزن ما فارقني بس صرت احسن شوي
جهة من شعري جانت متروسه شيب
جنت كل فتره اصبغها بس هيهات تختفي تماما
جان الوضع اعتيادي خلصت سنتي واني من الأوائل على الفصل
جنت اتلقى المديح من الكل وخبرني باللغات جانت السبب بهذا الشي
من وعيت على الدنيا جنت احجي ٣ لغات
عربي وروسي وانكليزي
وبعد الست سنوات تعلمت الفرنسي والالماني
بعدها تعلمت لغة تركيه من المسلسلات ومن الانمي تعلمت اليابانيه وسفرتي هاي قوت من لغتي التركيه
رغم كلشي جنت حذره ما اروح لكل مكان
بس المولات المعروفه اتسوق منها وارجع
زميلاتي بالسكن ما تقربت منهن جان اغلب وقتي دراسه جانت بداية السنة وبدت المدرسه تستقبل الطلاب الي يحصلون منح بعد اختبارات صعبه
وجانت الأولى عليهم بنيه اسمها لارا
مبين عليها طيبه بس ملابسها شويه قديمه ..
ملاذ
مرت سنه على فراق ضي
كلما جنه نفاتح جدو بموضوع العرس جان يأجله
ويكون من ترجع ضي
جان لواء يضوج بس اني افرح لان كلما تأخر العرس كلما حافظت على نفس مستواي الجامعي الي راح يأهلني لاختيار الاختصاص الي احبه والمناسب الي
لان اذا تزوجت فراح انشغل اكيد وهنا راح أهمل دراستي او أهمل لواء ..
تاليا
عشت حياتي يتيمه الاب
جان غيث هوه الي ساد هذا الغراغ بداخلي
غيث اكبر مني بعشر سنوات بعد موت بابا
من جان عمري ٣ اسنين بسبب مرض من الأمراض
قرر غيث يعتني بيه جان يشتغل حتى يجيبلي احلى الاكل واحلا الملابس رغم كان كل عمره ١٣ سنه
كلش تعب بحياته بعدها دخل الكليه العسكريه
وصار ضابط استعدلت أمورنا شويه اليوم صار عمري ١٥ فاجأني بكيكه وحلويات وفستان حلوو
حضنته حيل من الفرحه بعدها فتح علبه جانت بيها
سلسلة بأسمي كلش حبيتها حضنته حيللل بعدها ماما
اجتي حضنتني وباركتلي بعي
ميلادي
شنو رأيكم بالشخصية الجديده ؟
شنو صار بغيث بعد سفر ضي ؟
وهل غيث يحبها لو لا ؟
شنو راح يصير ويه ضي ؟
انتظرونا بالبارت الجاي
