بِربكَ بادِر ألستَ بِمُشتاقٍ ؟
نغمة الفراق
• • •
هيه حيرة
وحيرة النثية جبيرة
من تحس الحيل راخي
بلا وعي تكص الضفيرة
• • •
ضي
كعدت الصبح على صوت ضوضاء الفاتحة
لفيت جرحي باكياس وسبحت باوعت بالمرايا
كل مره بابا يمشط شعري هالمرة منو يمشطة
ضليت صافنه بيه
حاولت امشطه
مشطته على السريع ولبست ملابس سود
نزلت جوة لكيت النسوان كلها جوه ناس اصلا ما اعرفها حتى أهل بابا ما اعرف منهم بس جدو وعمو علي
مباشرة طلعت من البيت جانت اكو خيم جبيرة وكاعدين بيها الزلم يمكن يسموها جادر وكراسي
ضليت افتر اريد اشوف اخواني ماكو لمحني جدو صاحني
سليمان : بويه تعالي
ضي : ها جدو
سليمان : انتي ياهي من التوأم ضي لو روح
ضي : انا ضي
سليمان : اي جدو شلونج اخوانج وينهم ؟
ضي : الحمد لله زينه ما ادري جاي ادور عليهم
طلعت من يمه ودخلت جوه لكيت روح
ضي : ها روح شلونج
روح ببجي : ضي يكولون راح يجيبون الجنائز
ضي : من سمعت اختنكت بعبرتي حضنتها وهيه تبجي
ابجي روح ابجي يستاهلون البجي
لا تكتمين بداخلج مو زين عليج
روح : ضي انتي شلونج شتحسين متوجعه
ضي : لا حبي ما بيه شي ما تشوفيني صل
صدك روح وين التوأم
روح : تركتهم نايمين فوك البارحه الليل كله يبجون
رحنا صعدنا للغرفه ضلينا كاعدين همه يبجون واني أهدأ بيهم
بعد ساعات ارتفع صوتهم نزلنا جوه
اتصنمت بمكاني واني اشوف الجنائز تدخل
يعني صارت صدك ؟
تحسست كلبي
ليش لسه بعدك تنبض ؟
راح اعيش من بعدهم
حسيت احد يمر من يمي
نزلوا روح والنور والنيزك وذبوا روحهم على جثامينهم
نزلت شويه شفت جدو
ضي : جدو تكدر تطلعهم
نريد ناخذ مساحتنا ونودع ابونا
طلعوا كل النسوان وهمه طلعوا بقينا بس احنه
تقربت عليهم شويه شويه كل جسمي يرتجف
حضنت جثمان بابا
ضي : بابا هيج عفتنا
شلون نعيش بدونك
اترجاك كوم فدوة
منو النا بعدك
ليش اثنينكم يتمتونا
بابا ما نكدر نعيش بدونك
بابا شلون نشوف الي بعمرنا ويه أهلهم واحنا ما عدنا أهل ليش من صغرنا نتحسر على الاب والام
بابا بعدك نتعب
بابا بمعزة ماما كوم
ليش تحملونا ثقل الحياة
الي الكبار ما متحمليها
بابا منو النا بعدك
حبيبي اترجاك كوم
روح
جانت ضي تحجي ويه بابا بصوت يقطع القلب
شوفت جثامينهم جانت لحظه الموت النا
متنا حرفيا
رغم ذلك ضي ما نزلت دموعها
كتمانها فد شي مو طبيعي
ما اعرف ليش تعذب نفسها هيج
انتقلت بعدها لجثمان مهيمن
ضي : مهيمن حبيبي منو البناتك بعدك
ولك والله بعدهن زغار ما خلصن سنتين
حرام حرام والله حرام
والله البنيه تحتاج أهلها
ليش من زغرهن تيتمن
ليش عفتونا بلا اخوان
ولك مهيمن ليش تعوفنا بدون ظهر
المن نميل لو تعبتنا الدنيا
لمنو نشتكي والمن نفضفض بعدك
