ခရမ်းရင့်ရောင်သက်ရောက်မှု

Effect 16

🪷Unicode🪷

' ငါအခု လင်းသခင်မဟုတ်တော့ဘူး။ ငါ့နာမည် သျှား '

သျှားက ကောင်းတော်ဝင်ရဲ့လက်ကို သူ့လည်ပင်းမှတွန်းထုတ်ကာ နံရံတွင်ဖိကပ်ခံထားရသည်မှ ရှောင်လိုက်သည်။ ကောင်းတော်ဝင်က နာကျည်းမုန်းတီးသည့် အရိပ်အယောင်များဖြင့် တောက်ခေါက်ကာ သျှားကို ကြည့်နေသည်။

' ခင်ဗျားဘာသာ ဘယ်သူကြီးဖြစ်ဖြစ် ကျွန်တော် စိတ်မဝင်စားဘူး။ ကျွန်တော် သိချင်တာ ခင်ဗျား ကျွန်တော့်အစ်မနားမှာ ဘာလုပ်နေတာလဲ။ အရင်ဘဝက ခင်ဗျား ကြေးမုံကို ဘာလုပ်ခဲ့လဲဆိုတာ မှတ်မိသေးရင် မမနားမှာရှိမနေသင့်ဘူးဆိုတာ ခင်ဗျား မသိဘူးလား။ ခင်ဗျားမှာ အရှက်မရှိဘူးလား...ဟမ်! '

' မင်းတောင် ဆက်ကုဋေ ဘာလုပ်ခဲ့တယ်ဆိုတာ သိသိကြီးနဲ့ မာန်ထည်ဝါနားကို ပြန်ရောက်လာသေးတာပဲ မဟုတ်လား '

ကောင်းတော်ဝင်က မတူဘူးလို့ပြောလိုက်ချင်ပေမယ့် သျှားပြောတဲ့စကားက မှန်နေတာကြောင့် ပါးစပ်ပိတ်သွားသည်။ သျှားက ကောင်းတော်ဝင်ငြိမ်သွားတာကို အခွင့်ကောင်းယူကာ ဆက်ပြောလိုက်သည်။

' ကြေးမုံ၊ လင်းသခင်၊ မင်းခန့်လျှံ၊ ခေတ်သော်စစ်၊ ဆက်ကုဋေ၊ သွန်းငွေစံ...ငါတို့အားလုံး တစ်ချိန်တည်း တစ်နေရာတည်းမှာ ဘာလို့ပြန်မွေးဖွားလာတယ်လို့ထင်လဲ ကောင်းတော်ဝင်။ နောက်ပြီး ငါတို့ပဲ လူပြန်ဝင်စားတယ်လို့ ထင်လား '

' ထပ်ပြီး ရှိသေးတာလား '

' ဘယ်သူလဲဆိုတာတော့ မှန်းလို့မရသေးပေမယ့် ထပ်ရှိဦးမယ်ထင်တယ်။ နောက်ပြီး အဲ့လူက အတိတ်ဘဝက မှတ်ဥာဏ်တွေကိုသုံးပြီး တစ်ခုခုလုပ်ဖို့ကြိုးစားနေတယ်လို့လည်း ငါထင်တယ်။ ငါ့အစ်မ မမြတ်လေးရုံက အတိတ်ဘဝကအကြောင်းကို စုံစမ်းနေရင်းနဲ့ အသတ်ခံလိုက်ရတာ။ ငါတို့မသိသေးတဲ့ အရင်ဘဝက မှတ်ဥာဏ်ရှိတဲ့လူကို မမြတ်လေးရုံ မသေခင်မှာ ရှာတွေ့ပြီး တစ်ခုခုကို သိသွားလို့ နှုတ်ပိတ်ခံလိုက်ရတာ ဖြစ်နိုင်တယ်။ နောက်ပြီး အခင်းဖြစ်တဲ့နေရာမှာ ရိပ်လည်း ရှိနေတယ် '