ခရမ်းရင့်ရောင်သက်ရောက်မှု

Effect 4

🌼Unicode🌼

ဆေးလိပ်ငွေ့တွေ လွှမ်းခြုံထားတဲ့ ကြီးကျယ်ခမ်းနားတဲ့ ခန်းမကျယ်ကြီးထဲမှာ လူကုန်ထံအသိုင်းအဝိုင်းမှ လူအချို့သည် သူတို့ရဲ့ပိုင်ဆိုင်မှုများကို ပုံအောကာ အလောင်းအစားပြုလုပ်နေကြသည်။ဝါကျင့်ကျင့်မီးရောင်အောက်မှာ သူတို့ဝတ်ဆင်ထားတဲ့ ရွှေငွေများက လင်းလက်‌ေနေသည့်တိုင် သူ့ထက်ငါအပြိုင် ချမ်းသာကြောင်း ကြွားဝါနေသည့် လူကုန်ထံများရဲ့ လောင်းကစားဝိုင်းကြီးတွေက ခန်းမအနှံ့ပြည့်နှက်နေကာ သေရည်အရှိန်နဲ့ရယ်မောအော်ဟစ်နေကြသူများက တပုံတပင်။

ထိုလောင်းကစားရုံထဲတွင် သာမန်ထက်ပိုတိတ်ဆိတ်ကာ အလေးအနက်ကစားနေတဲ့ ဝိုင်းတစ်ဝိုင်းရှိသည်။အဲ့ဒိဝိုင်းမှာ ထိုင်ကစားနေကြသူတွေက မြို့မျက်နှာဖုံးဖြစ်တဲ့ ဒိတ်ဒိတ်ကြဲလူကြီးတွေချည်းမို့ အတွင်းဘက်ကျကျ သီးသန့်ခန်းလိုမျိုးမှာ အထူးစီစဉ်ပေးရတဲ့ အရေးကြီးတဲ့ဝိုင်းတစ်ဝိုင်းဖြစ်သည်။ထိုဝိုင်းရဲ့ အနိုင်အရှုံးသည် သူတို့မြို့ကမြေကွက်တွေ အဆောက်အဦးတွေကစလို့ လူတစ်ယောက်ရဲ့အသက်အထိပါ လောင်းကြေးစားကြေးကြီးတာမို့ တော်ရုံလူ ဝင်မကစားရဲတဲ့ ဝိုင်းလည်းဖြစ်သည်။

ဒီလိုဒိတ်ဒိတ်ကြဲတွေကစားတဲ့ နေရာမှာမှ သူဌေးကြီးတွေ ချွေးစေးတွေကျအောင် ရှုံ့မဲ့နေချိန် အားလုံးရဲ့အံ့ဩမုန်းတီးတဲ့အကြည့်တွေကို ရထားသူကတော့ စားပွဲထိပ်မှာ ခပ်တည်တည်ထိုင်နေတဲ့ မိန်းမပျိုတစ်ဦးပင်။ ထိုမိန်းမပျိုဟာ အနက်ရောင်မှန်ဇာဂျိုင်းပြတ်ရင်ဖုံးနှင့် အနက်ရောင်ပိုးထဘီနဲ့တောင် လှပတဲ့ခန္ဓာကိုယ်အချိုးအစားက ထင်ရှားနေသည့်အပြင် တင်းတင်းစေ့ထားတဲ့ နှင်းဆီရောင်နှုတ်ခမ်းနဲ့ စူးရှနေတဲ့မျက်ဝန်းတွေကိုကြည့်ရုံဖြင့် မျိုးရိုးမြင့်တဲ့မိသားစုကလာတဲ့ အထက်တန်းစားသူဌေးသမီးတစ်ယောက်မှန်း သိသာနေသည်။ဒါပေမယ့် ဒီအလှကို မခံစားနိုင်တာကတော့ ထိုဝိုင်းမှ လူတွေပဲဖြစ်သည်။

အားလုံးရဲ့ မျက်လုံးက သူမရဲ့အလှမှာထက် သူမလက်ချောင်းများရဲ့ လှုပ်ရှားမှုဆီမှာ မှင်သက်စွာ ကျရောက်နေသည်။ထိုမိန်းမပျိုက သူမရဲ့ ကတ္တီပါလက်အိတ်ဖြင့် ဂရုတစိုက် ကိုင်ထားတဲ့ဘူးတစ်ဘူးကိုဖွင့်ကာ စားပွဲဝိုင်းအလယ်မှ လောင်းကြေးများကြားထဲချလိုက်ချိန်မှာတော့ အားလုံးရဲ့မျက်လုံးဟာပြူးကျယ်သွားတော့သည်။