سلطة القلب(باللهجة الجزائرية__مًکْتٌـمًلَةّ__)

بارت وان ١

_ مدموزال لجين الشركة من نهار حكمتيها والاسهم هابطة وماحكينا والو mais صايي لازم نحكي ل سي عمران ونحطوه في الصورة

كان يهدر معاها وهي تطرطق في Chewing-gum وتهبط وتطلع في لي باج تاع ميكاب_ارتيست وصالونات الكوافير مش معاه كامل...
لجين(تهدر مع السكرتيرة): شوفيلي معاهم موعد نحبو اليوم والا غدوة الا ماعندهمش غي ماتحجزيليش فهمتيني
السكرتيرة: وي  كيما تبغي مدموزال لجين
لجين: آه سي احمد راك هنا يامرحبا بيك واش تشرب
احمد: لا حول ولا قوة الا بالله.... عندي ساعة وانا نهدر يا مدموزال
لجين: اييييه Malheureusement ماكنتش مركزة معاك معليش تعاود واش قلت الا مكانش مشكل
احمد: مانعاودش
لجين(في قلبها): تهنينا ياخاااه شحال يهدر....
__كيما تحب سي احمد
احمد: الهدرة مش معاك الهدرة مع باباك
لجين: ياويلي سي احمد راك في مقام بابا كيفاش تخطبني!!!؟
احمد(طلعلو الزبل): يابنتي مالك؟؟؟ مانعرف كيفاه سي عمران  أمنك على الشركة لي تعب عليها طول عمرو... معليش انا نحكي معاه وهو يشوف حل معاك رايحة تدخلينا في حيط

لحقها ميساج تريبوندي وهي تتبسم كي البهلولة وسي احمد يخزر فيها مصدوم... رفدت صاكها وخرجت مشات خطوتين ورجعت لسي احمد لي قعد واقف مشوكي
لجين: سي احمد الحياة تعيشها مرة واحدة ماتبقاش مصدوم... عيشها لحظة بلحظة تشاااو
كانت تمشي لحقتها السكرتيرة
السكرتيرة: يا مدموزال لجين عندك اجتماع بعد نص ساعة
لجين: احضري نتي في بلاصتي...
السكرتيرة: كيفاش؟!!!
لجين:  معلباليش يا ختي ربي يسهل الغيه والا احضروا بلا بيا

خرجت قعدت واقفة قدام باب الشركة
لجين: وينك عمي موح طووولت
بعد ربع ساعة تقريبا جاها الشيفور تاعها
لجين: طولت عليا عمي موح
الشيفور: الله غالب يابنتي علابالك الكبر وحاس روحي مش مليح شوية
لجين: عمي نتا مليح ياك... تحب نوصلك للسبيطار
الشيفور: لالا يابنتي كثر خيرك
لجين: شوف عمي تقدر تروح ترتاح في دارك وانا نورمال ضرك ندبر طوموبيل اخرى من الشركة توصلني مش مشكل
الشيفور: بارك الله فيك لجين بنتي ديما خيركم سابق
لجين: هيا عموو بالشفاء عليك لازم نروح طولت على صاحبتي راهي تستنى

راحت ل Le restaurant  لي موالفة تتلاقى بيه مع صاحبتها "اشراق" اكثر من مجرد صديقة بالنسبة ليها اختها وكلش
لجين: سمحيلي سمحيلي سمحيلي طولت مي مش بيدي الله غالب
اشراق: مش حاجة جديدة والفت بيك ديما روطار
لجين: ههه قولي والله
اشراق: ارواحي ارواحي ريحي ياخي تافهة
لجين: الله الله(قالتها كيما المسلسلات التركية) تأثير نسيبنا بدا يبان وغمزتها
اشراق: هههه لالا والو... ولا تبغي الصح حاسة روحي تبدلت معاه يابنتي واش نحكي عليه وواش نخلي
لجين: اصبري نطلبو حاجة ناكلوها راني ميتة بالشر ومنبعد نهدروا

كانت تهدر مع اشراق وتاكل سمعت برطابلها يصوني شافت لقاتو باباها
لجين: ويااااا خلات عليا الله اكبر
اشراق(مخلوعة): شبيك لجين غي الخير؟؟
لجين: هششش ماتهدري حتى كلمة
__انعم ياتاج راسي... كي راك كي راهي الخدمة في Paris؟؟ لوكان تشوف الخدمة لي فوقي مانيش قادرة نرفد راسي من كثرة الملفات
سي عمران: زيدي زيدي كملي زعما ملفات واش لي موراك.... ملفات صالونات ولبسة ياك... ارواحي للشركة نحتاجك دوك بعد
لجين: راك هنا... معليش دوك نجي