فتحت تيلفونها وضحكة خبيثة ترسمت على وجهها 😈
ميلا: بلاك ماصدقتينيش لبارح مي كلش بالدليل يتصدق.. شوفي هذا ميساج من راجلك العزيز هو بعتلي قالي اطلعي لبيتي نحتاجك كي طلعت هو فقد السيطرة على روحو وباسني وبلاك لوكان ماجيتيش نتي ودخلتي لوكان صرا اكثر من... 🫢
لعبتها حشمت ومكملتش هدرتها هارون مش مصدق واش يسمع بوذنو كبس بونية يدو وكان رايح يضربها
هارون: نقتلك ونشرب من دمك ياوحد الكلبة العاهرة
وقفت قدامها لجين وبعدت هارون لي رجع كيف المهبول
لجين: واش قاعد تعمل هبلت رايح تضرب طفلة
هارون: راهي تخرط وتألف من راسها وشنو انتي من واش مخلوقة شيطانة في هيئة ملاك
ميلا: كان يحبني من بكري شوفي هذا الوشم بحرفو هو قالي وشمي حرفي باه لي يشوفك يعرفك ملكي
هارون(يعيط): اليوم يسموني نقتلك ياوحد الكلبة الخانزة
لجين قاعدة تبعد فيه باه مايمسش ميلا مايهمهاش فيها ماتت والا حيات مي رايح يدير المشاكل في عرس اختو
لجين: قتلك بعد عليها نتا سور هبلت نقولو راهي تكذب وانا تاني بعثتلي ميساج معناها انا نكذب ياك
هارون(زادت الصدمة تاعو): ميساج واش لجين انا مابعثت حتى ميساج لا ليك ولا ليها
كانت تضحك مورا لجين شافها فهم الحكاية كامل
هارون: نتي خططتي لكلش ياك كلش من تحت راسك ياك جاااااوبي
لجين(تعيط عليه): صايي صايي رجعت تكذب فيا انا تاني استعرف بغلطتك وريح روحك درك لي يجي قدامك تكذبو
هارون: ماتصدقيهاش كل كلمة قالتها كذبة حابة تخرب دارنا وتفسد زواجنا
لجين: تخرب دارنا وزواجنا هههه لي يسمعك يصدق علاه حنا كانت عندنا دار وكنا متزوجين كيف خلق ربي باه تخرب علاقتنا فيق على عمرك واش قاعد تخلط
هدرت من وراها وتطلق في سمها
ميلا: هذا هو الرسمي نتوما علاه مقلقين مافهمتش لي يشوفكم من بعيد يعرف بلي مكانش بيناتكم حب ههههه
طلعلها الزبل و استفزتها ضحكتها
لجين: براااا اخرجي من بيتي
قعدت تضحك حتى حكمتلها يدها وطردتها
لجين: مانزيدش نشوفك في بيتي فهمتي
نفخت بعصب وتلفتت لقاتو يخزرلها شغل يلوم فيها على هدرتها
لجين: شوف سي هارون مايهمنيش فيك اعمل لي تحبو مي انا عندي كرامة ماتجيش نتا وتحطلي كرامتي في الارض كي نطلقو ربي يسهل عليك مي درك مادام اهلك واهلي في بالهم متزوجين خلينا نكملو في هاذي التمثيلية لوقت قصير وممبعد كل واحد في طريق
هارون: تمثيلية؟؟!!! رجع زواجنا تمثيل ياك
لجين(تعيط): ومالا واش تشوف فيه ياك نتا لي خممت في الطلاق ونتا لي ريڨلت الاوراق ونتا لي امضيت عليهم لول ماكنتش عارفة علاه مزارب للطلاق هكذا مي درك فهمت كلش
هارون: معليش ماتصدقينيش مي يجي نهار وتفهمي كلش ونحي الطلاق من بالك انا جامي نطلقك
لجين(هبلت عليه تضرب فيه لصدرو وتبكي): وعلاه ماطلقنيش علاه باه تخليني نتعذب معاك والا باه كل ليلة نشوف خيانة جديدة منك
هارون: جامي نشوف في طفلة من غيرك افهمي ياربي واش ندير باه تفهميني
لجين: هه ماعندك مادير نتا اصلا ماحاولتش معايا انا نعرف لي يحب صح يحارب الدنيا كامل في خاطر لي يحبها ونتا واش درت ماقبلتش بعرضك كنت رايح تطلقني لوكان جاو المحاكم مفتوحين رانا مطلقين درك
هارون: كيفاش ماحاولتش واش عندي ندير نتي مش حابة تحبيني نخطفك والا نفورصيك و نقولك حبيني بالسيف عليك
لجين(تعيط): انا نحبك وبالسيف على قلبي
حبس بيهم الوقت كل واحد فيهم يخزر للاخر بصدمة هارون مش عارف لي سمعو صحيح والا غالط وهي مش عارفة اسكو هدرتها كانت في قلبها برك والا قالتها وسمعها حطت يدها على فمها واليد لوخرا على راسها
لجين: انا واش قلت ياربي واش قلت
كانت هاربة تحب تخرج مي هيهات هارون كان ليها بالمرصاد حكملها من يدها ودورها ليه
هارون: لي سمعتو صحيح؟!!
لجين: خليني نروح تعيش
هارون: اخزري فيا وجاوبيني لي سمعتو صحيح
لجين: ايه صحيح
بدا ينط ويضحك كيف الذراري الصغار مش مصدق بلي جاء اليوم لي كان يحلم بيه ويشوف فيه مستحيل من المستحيلات السبعة كان رايح يرفدها ويدورها مي حبساتو وبعدت عليه
لجين: راك فارح ياك؟؟ ماعندك علاه تفرح انا كنت نحبك وصدقني درك حبي ليك راح ورجع كره ليك وليا خاطر حبيت بنادم كيفك
كانت رايحة مي قطعلها طريقها وصكر الباب بالمفتاح ورفدها في يدو
هارون: اسمعيني لجين مدي فرصة لعلاقتنا ولزواجنا تعيشي
لجين: افتح الباب بلا مشاكل
هارون: مانفتحش ماعندك وين تروحي قبل ماتجاوبيني
لجين(تعيط): على واش نجاوبك؟؟ نتا تعرف مليح لي جوزتو بعد عملة يعقوب مكانش ساهل واني نحبك بعد كامل لي صرالي اصعب ومع هذا كامل قلت نعمل خطوة ونحافظ عليك وعلى زواجنا مي في الوقت لي انا كنت نحارب فيه ونخمم كيفاش نصلح علاقتنا نتا واش كنت تعمل؟؟ كنت تمضي على اوراق الطلاق اذا نسيت نفكرك نتا لي قلت بلي الطلاق احسن حل لينا ودرك جاي وتقول مانطلقكش علاه واش تشوف فيا انا حجرة والا كلبة عندك والا تشوف فيا كاش لبسة باه نهار تخليني معاك ونهار تبعدني انا جامي نرضى بالمعيشة هاذي واذا نتا ماطلقتش انا نطلقك وندير الخلع وندفعلك دراهم الدنيا كامل ومانزيدش معاك نهار زيادة هذا لي عندي ومايتبدلش ودرك افتح الباب خليني نروح حاسة روحي تخنقت معاك
قدملها وحصرها على الحيط كانت مهبطة راسها طلعلها راسها بطرف صبعو خزر في عينيها لي غرقوه في حبها وكملو على مابيه
هارون: عندك الحق انا كان لازم نحارب باه نديك وعلابالي غلطت معاك بزاف حتى لوكان ماقصدتش وعلابالي تاني بلي مزالك تحبيني وصدقيني ورحمة يما في قبرها مانفرط فيك ولا نخسرك انا خسرتك مرة وماتتعاودش انتي برك كوني معايا وانا نحارب الدنيا كامل على خاطرك
كانت تبكي كان يهدر باحساس كبير وبحب اكبر مي كلش يتغفر الا الخيانة وكلش يتجاوز الا التخلي هو تخلى عليها في وقت من الاوقات ودرك حاب يرجعها واذا دارها مرة يقدر يعاودها مرة اخرى
لجين: قتلك بلي رجعت نكرهك ياك وابعدني الحاجة اذا تكسرت ماتتصلحش
ماحبش يزيد معاها في الهدرة مدلها المفتاح فتحت الباب وخرجت تجري
هارون(يهدر مع روحو ويتبسم):جامي نخسرك علابالي تحبيني لوكان ماتحبينيش علاه تبكي وقلبك يدق هكذا؟؟انا كنت باه نحارب عليك ومكانش في بالي بلي تحبيني مي درك عهد عليا قدام ربي لا نخليك ولا نسمح فيك وحط يدو على قلبو: بلاصتك هنا جامي تتبدل ولا تروح علاه انا والا نتي عندنا كلمة فوق سلطة القلب؟؟
قلبها يدق بالقاوي شوي ويحبس مست وجهها لقاتو نار شاعلة فيه مسحت دموعها وراحت للبيت لقات اشراق مع اماني ومع البنات بخلاف ميلا مكانتش معاهم(ايه راجل اماني سامي من ولاية خلاف غي هو خدام(بوليسي👨🏼✈️) في الولاية لي تسكن فيها اماني يعني لبارح جابولها الحنة وبعد 3 ايام يجو يدوها)
اشراق: واخيرا شرفتي لالة مولاتي
اماني: واش بيه وجهك احمر
اشراق: اشششش اسكتي اسكتي باين خوك ذوبها بكلامو وحنانتو🤣🤣🫢
قعدو يضحكو عليها وهي تقلقت منهم دخلت للتوالات غسلت وجهها وخرجت قعدت مريحة معاهم بلا ماتهدر حتى كلمة خاطر قلبها وعقلها خلاتهم الفوق في بيت هارون زادت شويا ناضت اشراق لي رايحة تشوف واش تاكل مي الوجهة كانت لبيت هارون🏃♂️ دقدقت الباب ودخلت
اشراق: اوووه يانسيبي الغالي واش درت للطفلة وجهها رجع كيف الطوماطيشة🍅😁
قحرلها وعدى يدو على لحيتو وتبسم وهو يقول في هدرتو
هارون: اشراق لجين تحبني
اشراق(تعيط):امبوسيبل يااااه ماكنتش متوقعة حكايتكم تتحل بالسهولة هاذي وياك قتلك لبارح بلي تحبك هي صح ماحكاتليش والو مي انا نفهمها من خزرة عينيها واكيد افكاري الجميلة هوما لي خلوها تجي وتعترفلك ياك🫤
هارون: لالا افكارك ماعندها حتى نتيجة بوكي الورد راهو في لابوبال والدبدوب يلعبو بيه الذراري
اشراق(تضحك على روحها): معليش في النهاية لجين استعرفت وهذا هو الصح
هارون: قالت بلي تكرهني يعني كانت تحبني ورجعت تكرهني معلباليش المهم قوليلي واش ندير درك
اشراق: مافهمتش فهمني
حكالها واش صرا كامل وهي تسمع فيه وتاكل في الشيكولا
اشراق: امممم هاذيك اللفعة بنك عمتك لوكان نحكمها ونقتلها وندفنها واحد ماسمع واحد ماشاف واش رايك🙄🙄
هارون: ماتهبلينيش نتي تاني صاحبتك راهي مهبلتني ماتزيديش نتي
اشراق: هذا لي ينفع معاكم نتوما المهم متخافش خليها عليا الحكاية لجين باه تصدقك لازمها دليل وعلابالي راهي مصدقاتك غير عقلها يخوف فيها برك معليش خلي هاذي الحكاية عليا انا باه نجمعكم مع بعضكم ياعصافير الحب المستحيل😁❤️🩹❤️🩹
كان يقحرلها بعصب هو يحكيلها في همو وهي تاكل وتهدر وتتمسخر
اشراق: اسمعني هارون خويا لجين تحب لي يضحك ويتمسخر مش لي يبقى قالب وجهو كيفك يعني افهم شوي واعملك حركات رومانسية اكثر بلا مانقولك انا وديجا هي قالتهالك بكل وضوح حارب على خاطري ايا حارب عليها مش بالساهل تديها بنتنا ذهب ومانمدوها غير للذهب ايييه لوكان نحكيلك على امجد شحال تعب مسكين باه يديني
هارون: ايه على هكذا راكي هاربة عليه ياك
اشراق: شكون قالك لجين الخاينة هي لي هدرتلك كلش ياااه كي خاينة وتقولي سرك في بير
سكت وقعد يقحرلها بلا مايقول والو لوكان يقوللها بلي امجد لي قالو تروح تقتل ولد الناس نورمال مالا يسكت احسن ملي تموت روح خسارة
وبدا اللعب تاع الصح خطة من اشراق مع هارون لميلا ولجين في نفس الوقت رايحين يضربو عصفورين بحجر واحد مي لي صرا مكانش متوقع كامل.....
___________________♡______________♡____
كالعادة آرائكم تعليقاتكم تشجيعكم مابقاش قد لي فات وتكمل الكرونيك تحمسووو وحمسوني معاكم يلاااا🥹🥹❤
I love you 💞💞💞
أنت تقرأ
سلطة القلب(باللهجة الجزائرية__مًکْتٌـمًلَةّ__)
Acakكرونيك خفيفة ظريفة باللهجة الجزائرية مغايرة عن بقية الكرونيكات شوية تاع بزاف😁 ماعندي مانقول غير اقراوها علابالي تعجبكم وبسسس احبكم لا تنسوني من دعواتكم حبيباتي♤♤
