__فلاش باك_____
::: قبل ساعتين .::::
يعقوب يحكي:
نحبها اكثر من كلش في الدنيا هاذي نحبها وجامي نخليها تكون لغيري علابالي بحكايتها وحكاية زواجها من هارون كامل كذب في كذب زواج على ورق لا اكثر ولا اقل.... هارون جاء للولاية هاذي من الهواء؟؟ هههه لالا انا لي هدرت مع مدير لافاك وقتلو يقولو وكيما كان الحال هارون اكيد مايفوتش هاذي الفرصة من يديه سيرتو الجامعة هنا احسن ب100 مرة ملي كان يقري فيها مكانش يهمني هارون كانت تهمني لجين قلت كي هارون يجي لهنا يا اما يبطل من لجين واما الخطوبة تطول وتكون فرصة ليا ندخل بيناتهم مي العكس هارون مستغل الفرص ذكي اكثر من اللازم راح تزوج بالطفلة لي كانت ليا كانت خطيبتي كانت حياتي مالغري ديما تتمسخر بيا وتحشم بيا قدام صاحباتها مي مكانش يهمني لي كان يهمني انها ليا في ليلة ونهار راحت من بين يديا.. ماننساش نهار باباها كلم بابا وقالوا صاي المكتوب خلاص بيناتهم ربي يجيبلو الخير من جيهة خلاف منين يجيني الخير الا ماكانتش لجين معايا... الا حابين تقولو هذا هوس مش حب قولو انا نعرف بلي تجاوزت الحب معاها بأشواط واشواط صبرت عليها بزاف مي صاي اليوم نجيب حقي ومايهمنيش واش يصرا ممبعد مي جامي نخلي هارون يستمتع بحقي قبلي ولوكان نموت بعدها.. كيما كان الحال بقيت سمانة كاملة ماكلمتها ماديرونجيتها كنت نخمم كيفاش نطيحها في شباكي مي لجين صعيبة مش كي باقي البنات لي ينضحك عليهم بكلمة لازمني خطة مافيها حتى غلطة باه نضمن لجين تكون ليا ومكانش غير حاجة واحدة والا نقدر نقول نقطة ضعف واحدة للجين ولي هي الموت سيرتو الموت باكسيدو كيف ماماتت ماماها وكيما كان الحال وفقا للخطة قلت لواحدة من الطالبات تاعي(لي معميين بحبي اكيد) تكلمها وحفظتها واش تقول بالحرف والعنوان لي بعثاتو الطفلة للجين كان عنوان داري صح لجين مادخلتش لداري عروس مي تخرج منها عروستي كانت الخطة ماشية عشرة على عشرة واخيرا لحقت لجين مي لي صار بعدها مكانش في الحساب
لجين تحكي::::_
الطريق كامل وانا نخمم والذاكرة رجعت بيا ل4 سنين التالي نهار ماتت يما العزيزة تضربت باكسيدو بسبتي خفت اليوم نعاود نعيش نفس الشعور بالذنب صح علاقتي بيعقوب ماهيش مليحة خلاص مي مانحبش الموت لا ليه ولا لغيرو ولي ذاق طعم الموت لعزيز عليه يعرف مليح واش نحكي خاطر مايحس بالجمرة غير لي عفس عليها.... بعد نص ساعة هكذاك وصلت لعنوان الدار لي بعثتهولي الطفلة لقيت الباب مفتوح وكان صوت حس طبطبت الباب لعل بنادم يخرج مي لاحياة لمن تنادي دخلت نعيط يعقوب يعقوب مي مكانش رد قدمت شويا للصالون قابلتني ورقة صغيرة على الطابلة زربت فتحتها كانت مكتوبة بخط باين يرعش... اسمحيلي ماقدرتش نبقى اكثر واسمحولي كان حادث مش قصدي نقتلو... حسيت الدم جمد في عروقي كي قريت نقتلو يعقوب مات؟؟ لالا موحال يموت... عيطت بأعلى صوتي يعقوب يعقوووب حوست التحت مكانش والو ولا رد مي صوت الحس قاعد يدوي مافهمتش منين جاي ومكانش عندي عقل في اللحظة هاذيك كان كاين ايطاج الفوق طلعت بزربة قابلتني بيت دخلت لقيت يعقوب راقد في الفراش والدم داير حالة عيطت
__وين راهم الاسعاف لدرك
رحت نجيب في صاكي لي طيشتها التحت باه نصوني للاسعاف مي قبل مانخرج سمعت صوت وياريتني ماجيت مادخلت ياريت خممت قبل مانجي كان صوت يعقوب
يعقوب: الاسعاف ديجا راهي هنا انتي اسعافي
مزلت مادورتش وجهي لقيتو واقف قدامي مابيه والو يتبسم في واحد التبسيمة لدرك مزالت في عقلي كان عبارة عن شيطان في هيئة انسان هذا اكثر وصف يوصف حالتو وقتها
قعدت نخزرلو ونخزر للفراش لي معمر بالدم ماني فاهمة والو ضحك بالصوت عليا وبعد خصلة شعري لي لصقت في شفارتيا
يعقوب: مرحبا بيك في دارك مدام هارون... نن غلطت مدام يعقوب
لجين: واش راك تخلط لوين حاب توصل فيق على عمرك
يعقوب: كنتي ليا كنتي تحبيني دخل هارون فسد كلش بيناتنا
لجين(تعيط): قبل مانعرف هارون انا مانحبكش وجامي خممت نكمل حياتي مع واحد مهبول كيفك
كنت رايحة حكمني من يدي بقوة ودزني ليه ظهري لصق في صدرو همسلي في وذني
يعقوب: خليتك مرة ومانزيدش نخليك... صح تزوجتي بهارون وبلاك راكم تحبو بعضكم مي انا حلفت مانخليكم تتهنو مع بعض
مكانش عندي حتى حل ضربتو لولي العهد تاعو(فهمتو ياك😁👀) وهبطت بزربة جبدت تيلفوني كنت رايحة نعيط لهارون مي في دقيقة برطابلي طار تلفتت ورايا كان يعقوب يقدم ليا جيت رايحة نضربو ببونية مي حكملي يدي ودورني ليه
يعقوب: قوتك زادت كي كبرتي مي زايد تبقي بالنسبة ليا اضعف مخلوق ياخي فرخة
كلامو استفزني اكثر من تصرفاتو خنقتو بكامل قوتي وفي دقيقة حكمتلو يدو وضربتو على ركبتو وجبتو طايح في الارض هبطت على ركبتي ورجلي في رقبتو
لجين: خطرة اخرى كي تجي باه تصيد اعرف كيفاش تخير الفريسة تاعك
جيت رايحة نوض مي حسيت بضربة قاوية لراسي طحت على وجهي ماقدرتش نتلفت ونشوف شكون ورجع كلش اسود معلباليش واش صرا بعدها
أنت تقرأ
سلطة القلب(باللهجة الجزائرية__مًکْتٌـمًلَةّ__)
De Todoكرونيك خفيفة ظريفة باللهجة الجزائرية مغايرة عن بقية الكرونيكات شوية تاع بزاف😁 ماعندي مانقول غير اقراوها علابالي تعجبكم وبسسس احبكم لا تنسوني من دعواتكم حبيباتي♤♤
