وصل اماني وسندس للدار و جاء دوري انا لي راني شبه ميتة بالتعب طبعا نستاهل الرقص والرديح واللعب درك نخلصهم غاليين والصمت سيد الموقف بيناتنا كنت دقيقة اخرى ونرقد غير صوتو المبحوح نوضني
هارون: ماقلتيش
لجين: واش نقول
هارون: شكون بيدري
لجين: هفففف مام نتا اذا شديت ماتطلق واحد نحبو وصايي
هارون: كيفاش كيفاش عاودي؟؟
هبلت انا ياجماعة سور هبلت هذا مزال راجلي كيف ماقالها هو.. يعني شكون المرا لي تهدر لراجلها على حبيبها اكيد واحدة اسمها التافهة لجين مولات نص عقل🤧🙂
رفدت برطابلي ونخير ونختار في فوطو لبيدري كانوا عندي بزاف حصلت واش نخير حبيب قلبي نبض روحي شباب في كل الاحوال المهم وريتهولو
هارون(معلباليش حسيتو فارح): هذا هو حبيبك؟؟
لجين: ايه وي نعم ياس
هارون: هههه هذا راكي في عمر ماماه
كان يضحك عليا ماعرفتش واش نقولو كي تجو تشوفو صح انا كبيرة على بيدري بعامين والا ثلاثة مي الحب لايقاس بالعمر🤭😏😏 طفيتو ربي يسهل عليه روبوت مريض متكبر متعجرف واش يفهمو في الحب😑قاعدة نسب فيه في قلبي بكل انواع السب حتى فجاءني بسؤال تمنيت لو كنت نسيا منسيا
هارون: والرقص هذاك كامل قدام الرجال وعلاه
اكيد الجواب حاضر ناظر بلا نواظر😁
لجين: تحمست عرس انتيمتي يجي مرة في العمر
هارون: ماشاء الله على حماسك لي مايخلاصش وعلاه اماني وسندس ماتحمسوش كيفك تره؟
لجين(اكيد لازم نقلب الموضوع لصالحي): على ذكر سندس شوف روحك نتا لي عايش معاها في نفس الدار قبل ماتحاسبني
هارون: مانيش عايش معاها شكون قالك؟!
لجين: مش لازم يقولولي انا عندي دماغ شغالة مش بتنام تستنج النتائج في كل زمان تستنبط الخلاصة بالتمام(راني قلتلكم الليلة حكمني خيط الهبال)
كان يخزرلي هك sûr 🫤🫤 راه يقول هاذي واش شاربة
لجين: ياك قبيلا شفتها خارجة من داركم
هارون: ايه خرجت من دارنا وانا شفتيني خرجت من نفس الدار
لجين: لالا🙄
هارون: انا عندي دار برا مانسكنش مع بابا ومرتو
وانا هنا قلبي رجع يغني في منزل انثى السنجاب دق دق الباب تالمو كان مقلقني الموضوع مي كنت مقلقة روحي بلا سبة المهم عرفت كيفاش نكالمي روحي باه مايحسبش روحو حاجة كبيرة ومهتمة بيه وقعد يهدر ويهدر ويحاسب فيا على كل لقطة درتها ار يو سيريوس خويا؟؟ عرس انتيمتي وشريكتي يجي مرة في العمر وانا نفوتو حاطة يدي على خدي ونخزر؟!! المهم ممبعد انقطع الاتصال😴😴
كان يهدر ويفرغ في قلبو ركبتلو السكر والقلب في العرس هذا ماجاء يخلاص غير خلاصت روحو خزرلها لقاها في سبات عميق
هارون: وانا لشكون نحكي
لحق لدار باباها ماعرفش ينوضها والا يخليها راقدة الباب مصكر جبد الصاك تاعها لقى المفتاح رفدو وراح جبدها غير بلعقل باه ماتنوضش باين عليها التعب راسها في رقبتو ونفسها يضرب فيه فتح الباب وطلعها لبيتها نحلها الطالو تاعها لقى رجلها منفوخة وحمرا بزااف هبط للكوزينة رفد ڨلاص وطلع بدا يدور فيه على رجلها ناضت مخلوعة
هارون: هششش ارجعي ارقدي
لجين(بعين مفتوحة واخرى مصكرة): واش دير هارون
هارون: ارقدي برك
ماعندهاش طاقة اصلا باه تبقى تستجوب فيه رجعت غرقت في سباتها ناض يشوف كاشما يلقى Pomada يدهنلها بيها رجلها قعد يحوس بالسيف مالقاه دهنلها رجلها وغطاها راح باه يرجعو حتى فتح وحد الدرج كان فيه مذكرة صغيرة وتحتو واحد اوراق تاع رسم رفد لوراق ويشوف في رسوماتها فنانة في كلش هاذي الطفلة مبدعة قعد يدور في لوراق حتى طاح في ورقة كاتبة فيها روبوت المريض كانت راسمة شكلو يضحك كيف المهبول
هارون:هذا انا؟!!!
لجين: ايه قبل مانعرفك يعني قبل مانتزوجو
حط كامل واش في يدو ورجع ريح بجنبها
هارون: واش تبدل على قبل وبعد
لجين: قبل كنت نكرهك
هارون: ودرك
ماعرفتش واش تجاوبو سكتت كان باه ينوض مي كي سمع صوتها ريح
لجين: ني حكيتلك من قبل ونعاود نقولك وقفتك معايا جامي ننساهالك ربي يحفظك وشحال مانحكي قليل في حقك
هارون: واجبي لا اكثر
خزرتلو بعينين مدمعة وذابلة عرس اشراق نساها في لي فات ولو مؤقتا ودرك كلش راهو يتعاود
لجين: مش واجبك كنت تقدر تقولي انتي لي رحتي برجليك وتخليني مي نتا وقفت معايا وساندتني وانا ماقدمتلك والو اسمحلي بزاف تمنيت لوكان جينا في ظروف غير هاذي
كانت مهبطة راسها طلعلها راسها بصبعو قعدت مهبطة عينيها
هارون: حطي عينيك في عينيا اخزريلي نشوف
خزرتلو عينيه كانوا يقطرو بالحنانة: اسمعيني تفاهمنا فيه الموضوع هذا تصكر ياك ماتبقيش تفكري فيه قعد يكالمي فيها ويفهم فيها بلي ماغلطت في والو ولازم توقف على رجليها تحضناتو ومزال مامبا ماكملش هدرتو
لجين: سمحلي بزاف
هارون: علاه
لجين: على كلش سمحلي علابالي غلطت معاك بزاف وبلاك قستك بهدرتي وخطرات ماسمعتش لهدرتك اسمحلي
بعدها عليه ومسحلها دموعها
هارون: صايي السماح بيناتنا يابنت الناس وعلابالك كلش يجي بالسيف الا المحبة بالكيف عادي الدنيا ماحبستش عندك ولا عندي نكملو حياتنا ولي يكتبها ربي مرحبا
لسانو يقطر بالحلاوة انسان رزين بزاف اكيد رايح يتلاقا بطفلة تحبو ويحبها البنات بالصف موراه مي هي ماتقدر تدير والو قعدت بين نارين جيهة تكوي واخرى تحرق وقف باه يروح
هارون: ايا فات الحال درك لازم نروح وهاذي نديها معايا(على رسمة الروبوت المريض)
ضحكت وماقاتلو والو قبل مايخرج نطقت بلا ماتخمم
لجين: نقدر نعرضك لعشاء في كاش نهار قبل مانتطلقو تقدر تقول عشاء اعتذار
تلفت وتبسملها تبسيمة قعدت محفورة في قلبها قبل مخها
هارون: ان شاء الله تصبحي على خير وغدوة روحي للطبيب على رجلك
لجين: ونتا من اهل الخير ان شاء الله
وتوالت الايام وجاء نهار تكلمتلو باه تعرضو للعشاء وكيما كان الحال هو وافق جهزت روحها خرجت ملكة زمانها لبست غوب غوج ❤اول مرة تلبس هذا اللون مع هارون دارت ميكاب سامبل ترابي شعرها نصو طلقاتو وحكمت نصو لاخر
أنت تقرأ
سلطة القلب(باللهجة الجزائرية__مًکْتٌـمًلَةّ__)
Randomكرونيك خفيفة ظريفة باللهجة الجزائرية مغايرة عن بقية الكرونيكات شوية تاع بزاف😁 ماعندي مانقول غير اقراوها علابالي تعجبكم وبسسس احبكم لا تنسوني من دعواتكم حبيباتي♤♤
