لجين تحڪي:
ڪانت تحڪي معايا اشراق وانا نبڪي ونخمم بلي صايي حڪايتنا خلاصت و اشراق تڪالمي فيا حتى نسمع صوت انا نعرفو مليح زربت اشراق خرجت باه تشوف وانا نسمع ودموعي شلال😭😭😭 طحت على ركايبي رجليا فشلو قلبي يضرب قريب يحبس مانقدرش نوصف الشعور لي حسيتو في ديك الدقيقة تخلطولي المشاعر ههه شفتو كي تقولو صايي هاذي هي النهاية وخلاص كلش وفي دقيقة يرجعلك الامل لي يرجع الحياة في قلبك وحياتك هكذاك بالضبط صرالي المهم سمعت صوت هارون مي ماسمعتوش زعما بحذا البيت والا نن كان يهدر بالميكروفون قدام الناس وقدام لافامي كامل كان يهدر معايا قدامهم كامل متخيلين😭❤ وانا لي قلت مايزيدش يشوف في وجهي كامل مي فغيمون معلاباليش واش الحاجة لي درتها وربي جازاني بيه💕🫶 كان هكذا يقول بالحرف الواحد
هارون: لجين معلاباليش وينك مي علابالي صوتي راهو لاحقك وراكي تسمعي فيا... باه نخرج ونهدر الهدرة هاذي قدام الناس هاذو كامل مش ساهلة مي صدقيني انا ماراني نشوف في والو درك بخلافك انا عيوني وقلبي رجعو مايشوفو والو من غيرك...علابالي غلطت معاك ومام نتي غلطتي معايا يعني غلطنا في حق بعضنا بزاف مش شوي مي كلش يتصلح بإذن الله ويمكن هاذي اخر محاولة ليا معاك خاطر تاع الصح عييت ماتعبتش من حبك بالعكس حتى لوكان قدر ربي وتفارقنا انا نبقى نحبك انا تعبت من الجري موراك وانتي ماتقدمتيش حتى نص خطوة ليا تعبت من انا نقدم ونتي تهربي... لي بغيتك تعرفيه بلي انا مزالني نحبك ونبقى نحبك انا قدام ربي وعبادو قلتها ونعاودها(يعيط) نحببببك لجين راكي تسمعي فيا نحبببببك.... شوفي لي يعرفوني كامل يعرفو بلي الضحكة تاعي ماتت مع يما مي انتي لي رجعتيني للدنيا ولونتي دنيتي بعد ماكانت كامل ظلام نتي لي رجعتيلي الضحكة لي تفارقت معاها من سنين نتي الوحيدة لي دخلتي لقلبي ونتي الوحيدة لي ملكتيه ماعندي مانقول غير مدي فرصة لحبنا باه يعيش لجين
قعدت نبكي ونبكي رجليا مش حاميلني معلاباليش واش نعمل كيفاش نقابلو كي شغل ماصار والو مزلت على الحالة هاذيك تدخل اشراق تجري مام هي كانت تبكي نوضتني وقعدت تحرك فيا من كتافي
اشراق: روحي لراجلك عيشي حياتك الحب حاجة بزاف مليحة ماتدمريش روحك و تدمري هارون معاك ماتبقيش خايفة روحي
لجين: مانقدرش مانقدرش انا مكانش كلمة ومقلتهالوش سمعتو وسخ وذنيه كيفاش نقابلو لالالالا مانقدرش😭😭
اشراق: لوكان جاء داير حساب لهدرتك لوكان ماخرجش قدام فاميلتو وهدر معاك هكذا لوكان راهو ماحاولش معاك مي هو يحبك افهمي الحب يغفر الذنوب كامل روحي
بديت نتفكر كيفاش تلاقينا وخطوبتنا عرسنا تبهليلنا كي كان يقريني المهم شريط حياتي مع هارون كامل تعاود قدام عينيا مسحت دموعي وضحكت بفرحة حاسة روحي طايرة فوق السماء والسحاب
لجين: اكيد هارون يسامحني
اشراق: يويوييوويووووييي واخيييرا الحمد لله اكيد يسامحك روحي لراجلك
رفدت لاغوب وكنت هابطة نجري مي حبستني اشراق
اشراق: هارون قعد يستنى فيك وصبر بزاف نورمال اذا صبر 5 دقايق اخرين
حكمتني من يدي وقعدت تمشي فيا وانا نعيط حابة نروح لهارون درك يقول مش حابة تمد فرصة ليه وصلنا لبيت بعيدة شويا وكانت مغلوقة خرجت اشراق المفتاح وفتحت الباب ودخلت هي قبلي وبعدها انا والصدمة كانت سندس وميلا مريحين تم وفوق راسهم امجد كي شافونا ناضو وقفو
اشراق: قبل لازم تصفي حسابك مع هاذو
ميلا: حساب واش هبلتو نتوما سور غلقتو الباب علينا وحطيتو علينا هذا السيد فوقنا يخلع الميت في قبرو
اشراق(حكمت ميلا من شعرها): نقتلك مزلتي تهدري كلمة على راجلي ياخطافة الرجال😡😑😑😑
قدمت منهم ومرة نخزر لميلا ومرة لسندس
لجين: قولو هاذي الهدرة قالتها لجين مرت هارون سمعتو مرت شكون؟؟ مرت هارون لي حبيتو تفارقونا وتبعدونا على بعضنا مي جامي الحب الحلال يبعد ويتفارق نتعاركو ويصرا لي يصرا مي موحال نسمحو في بعضنا الله يعطيكم العز التالي الذل راكم غارقين فيه درك نوريلكم بلي اللعب مش معايا ياخامجات واحمدو ربي الف مرة بلي كاين عرس التحت لوكان راني قتلتكم بلا مانشفق عليكم
حكمتهم من شعرهم في زوج وضربتهم بكفوف لين حسيت قلبي برد يستاهلو ومبعد جابتلي اشراق قراعي ماء هههخخخ شمختهم بالماء رجعو كيف الدجاج😂😂 خسارة المكياج والمشطة والدراهم لي خسروها على الكوافاز وبعدها اشراق سمعتهم فوكال وخزرو لبعضهم بكره وخليناهم يتعاركو كيف الجنون هاذي هي لي يقولك من حفر حفرة لاخيه وقع فيها المهم قبل مانهبط سمعتهم يعيطو باسمي زعما يشجعو فيا باه نهبط مانحتاجش تشجيع انا هارون برك وهدرتو تكفيني هبطت نجري لقيتو مقابلني بظهرو كملت نجري والمعروضين كامل يعيطو لجين لجين لجين( هههخخخ حسيت روحي في سباق المارطون😂) واخيرا وصلت لحبيب روحي وقلبي حسيت المسافة لي كانت بيناتنا بعيدة تحضنتو من التالي وهمستلو في وذنو
لجين: سمحلي حبيبي تعيش
حسيت ببدنو كيفاش تكهرب وكهربني معاه حكملي يديا وباسهم وتلفت ليا وطلعلي راسي ومسحلي دموعي
هارون: ماتبكيش انا هدرتك مكانتش تعنيلي خاطر نعرفك لسانك مش ليك
بدينا نضحكو والغاشي يعيط ويصفر ويزغرتو ويبكو ياودي حالة وخلاص 😂😂❤رجعنا تقول انا وهارون العرسان مش اماني وسامي
هارون: صايي ماتبكيش نوعدك ونعاهدك قدام ربي وعبادو بلي دموعك هاذو مايهبطوش واذا هبطو يكونو دموع فرح
وبدات غناية ليلة اليوم ليلة احلامي❤ (ياك تعرفوها) وغلقو كامل الضوء رجعو ظلام غير عليا انا وهارون وبدينا نرقصو اليد مشبوكة في اليد والقلوب قريب تخرج من قفصها الصدري😭💕 مزالت ماكملتش الغناية رفدني على غفلة قدامهم كامل وخرجني وانا متت بالحشمة ياخاااه غرست راسي في صدرو
هارون: شوف كيفاش حاشمة وكي كنتي تعايري فيا وتبعدي فيا عليك علاه ماحشمتيش
لعبتها متت مش نسمع فيه ركبني في الطوموبيل ولحقنا للاوتال هبطنا وشبكنا يدينا مع بعضنا وطلعنا لبيتنا كان هارون ديجا حجز عندهم قال كنت عارف رايحة تجي(واثق من نفسو اوي😂😂) طلعنا للبيت وهارون خلاني وهبط باه يجيب نتعشاو وانا قلبي بدا يضيق عليا ورجعت نعرق فتحت الشباك مي والو مافهمتش واش صرالي وطول شوية هارون وكي دخل كان رفد السنيوة وكان يخزرلي بشهوة وبحب كبير مي انا بديت نتعرق كثر وكثر ورجعت نرجف جاء يجري باه يقدملي وانا نعيط عليه لا اردايا
لجين: بعد عليا بعد عليا ماتقربليش بعدددني
معلاباليش واش صرالي مي رجعت نشوف فيه يعقوب ونشوف في شهوة يعقوب واغتصابو ليا اااه علاه يصرالي هكذا ياربي 😭😭💔
تكمشت على روحي في الفراش وقعدت نبكي ونرجف ونتعرق ومسكين هارون قعد واقف بعيد ويخزرلي ومبعد بدا يقرب بشويا وانا نجبد للفراش اكثر
هارون: راكي عيوني وملكة قلبي وصغيرونتي صدقيني مانأذيكش خليني نقدملك لجين
لجين: لالالا بعد كامل كيف كيف كامل كيف كيف
كنت نهدر بزربة معلاباليش اسكو فهمني والا لالا غطيت وجهي بيديا وقعدت نتحرك كيف المهبولة في دقيقة حسيت بيه حوطني بذراعيه
هارون: هششش راني معاك انا هارون ماتخافيش
بديت نبكي بغصة كبيرة نبكي على روحي وعليه نبكي على الدنيا لي عكسنا في كلش نحبو مي مانقدرش نتعامل معاه كزوج
لجين: والله نحبك سمحلي نحبك
هارون(بعدني عليه وحكملي يديا بيديه): اسمعيني حبيبتي يشهد ربي بلي شوفتك برك تكفيني نشوف ضحكتك تسوى الدنيا بحالها عندي كي نوض الصباح واول حاجة نشوفها هي وجهك الدنيا ومافيها ماتقلقيش روحك انا جامي نقربلك الا برضاك فهمتيني لجين
قعدت نبكي وهو قعد يهدي فيا ومافقتش بروحي كيفاش رقدت......
أنت تقرأ
سلطة القلب(باللهجة الجزائرية__مًکْتٌـمًلَةّ__)
عشوائيكرونيك خفيفة ظريفة باللهجة الجزائرية مغايرة عن بقية الكرونيكات شوية تاع بزاف😁 ماعندي مانقول غير اقراوها علابالي تعجبكم وبسسس احبكم لا تنسوني من دعواتكم حبيباتي♤♤
