سلطة القلب(باللهجة الجزائرية__مًکْتٌـمًلَةّ__)

بارت 17

الطريق كاملة وهوما ساكتين هارون يسوق وهي تخزر للطريق وصلوا اخيرا لدار لجين واخيرا قبل ماتهبط خزرتلو
لجين: مانيش حابة نحكي لبابا على واش صار ونقلقو يعيشك مام نتا ماتحكيلوش
خزرلها مام هو ودارلها ايه براسو هبطت باه تجيب لافاليز تاعها سبقها ورفد لافاليز وصلهم لباب دارهم وهي تمشي موراه كان رايح مي سي عمران كان وصل هذاك الوقت من الخدمة راحت تحضنت باباها توحشاتو بزاف
لجين: توحشتك يالعزيز
سي عمران: روحي واميرتي مام انا توحشتك
قعد يخزرلهم وهو يتبسم بعدت على باباها لي راح يسلم على هارون
سي عمران: مرحبا بنسيبي العزيز
هارون: مرحبا بيك عمي
بعد ماسلم عليه استأذن باه يروح مي سي عمران ماخلاهش
سي عمران: ارواح تفطر معانا مزلت ماذقتش من ماكلتنا وملحنا
تحشم منو وقبل طبطبو الباب فتحت مرا كبيرة لي زدمت تتحضن في لجين
___بنتي الزينة كي كبرت وتبدلت ورجعت مرا براجلها وبدارها
لجين: ههه خالتي فطيمة كي راكي نشوف فيك رجعتي كيف الغزالة تجري وتنطي
فطيمة: ايييه الحمد لله يابنتي العملية لي درتها رجعتني اصغر كي مولات 10 سنين
ضحكو كامل على هدرتها وسي عمران طلع يبدل لبستو قعدت مع هارون وحدهم في الصالون زادت شوي دخلت خالتي فطيمة وجابتلهم من كل خير موجود وريحت معاهم
فطيمة: محضرتش لعرسكم وقالولي البنات بلي راجلك تحطيه على الجرح يبرا مي ماصدقتش غير درك كي شفت بعيني بسم الله ماشاء الله ديتي من خيرة الرجال يابنتي
وجهها رجع الوان الوان خزرتلو وهو ماخزرش كامل فيها تبسم لخالتي فطيمة نص تبسيمة
لجين: الله يسلمك خالتي
فطيمة: هههه شوف كيفاه رجع وجه مرتك مزلتي تحشمي منو معليش مزالكم عرسان جدد مي درك مع الوقت هاذي الحشمة تروح كامل ماتبقاش... ايه يابنتي كاشما كاين بيبي على الطريق
كان يشرب غص ناضت خالتي فطيمة تخبطلو في ظهرو قريب قسماتو على زوج😭🤣🤣
فطيمة: بسم الله عليك ياوليدي بلاك انا ضربتك بعين اسمحلي
كان يخزر للجين وهي فهمت عليه
لجين: صايي خالتي كملتي عليه اكثر
فطيمة:  اااه اسمحلي ياوليدي
رجعت ريحت وكملت تهدر مع لجين
فطيمة: اهيه ماقلتيليش
لجين(تهرب في عينيها): واش نقولك ياخالتي
فطيمة: كاش صغيرون كيف باباه جاي للطريق
رجع غص مرة اخرى حكمت ضحكتها بالسيف وحكمت فطيمة لي كانت نايضة تزيد تقسملو ظهرو مرة اخرى
لجين: لالا ماكان والو
فطيمة: معليش هدا حال الدنيا مزلتو صغار والدنيا قدامكم اذا مش اليوم غدوة الذراري هوما لي يزينو محبتكم ويقووها ياولادي
لجين: اايه ان شاء الله مزلنا مش مزاربين ياك هارون
دارتلو براسها باه يحكي ماقال والو غير دار ايه براسو
لجين: واش محضرتلنا ياخالتي ريحة الماكلة واصلة لهنا
فطيمة: اااه نسيت الغراتان في الكوشة
خرجت وخلاتهم تنهدت لجين
لجين: بالعقل ياخالتي بالاكي تطيحي ترجعي من 10 سنين ل90 سنة 😂😂(تهدر مع هارون) من بكري وهي تخدم عندنا قلبها طيب مي جامي تسكت لي في قلبها على لسانها
ماقاللها والو رجعت سكتت مام هي
دخل سي عمران وقاللهم يتجمعو على الطابلة فطرو كان نايض باه يروح ولجين مزالت مريحة كان يحب يهدر معاها مي ماعرفش كيفاه فاق بيه باباها لي ضحك من تحت لتحت
سي عمران: نوضي نوضي يابنتي وصلي راجلك للباب وودعيه
ناضت كانت تمشي موراه وهو سبقها بخطوات
سي عمران: كنت عارف بلي فلخر ترجعو تتفاهمو مع بعضكم الحمدلله درك قلبي تهنى عليها
كان يمشي ويخمم كيفاش يهدر وعلى غفلة تلفت موراه كان عمبالو بلي بعيدة عليه مي هي كانت موراه لصقت فيه وتخبط راسها في صدرو
لجين: اسمحلي
هارون: انتي اسمحيلي
توحشت نبرة صوتو المبحوح بعدت خصلات شعرها على عينيها وقعدت واقفة تستنى فيه يهدر
هارون: معليش نحكو في الطوموبيل هنا ريح يقلق
راحت ريحت في الطوموبيل بجنبو
هارون: اسمعيني حكايتنا بدات من هنا في هاذي الطوموبيل متفكرة
دارتلو ايه براسها وكمل هدرتو: جيت وقتلك لوكان نتزوجو والا مش حابة انا نحكي مع باباك وانتي وافقتي والا الاصح باباك لي وافق ليصونصيال كيما بدات بالخير ان شاء الله تكمل بيناتنا بالخير
لجين: مافهمتش
هارون: لي نحب نقولو بلي صايي حكايتنا ماعندها وين توصل  انا باه نكمل معاك شغل ماصار والو ماتصلحش مام انتي ماتقدريش تكملي معايا كيما قبل على هك خممت مليح ولقيت بلي احسن حل هو.... الطلاق وبديت في الاجراءات معلباليش اسكو تطول و الا لالا مي حبيت نخبرك باه يكون عندك علم وتهدري مع باباك
تصدمت مكانتش تتوقع منو الهدرة هاذي.. هي صح علاقتهم رجعت باردة مايحكو مايضحكو ساكتين برك مي على اساس يتطلقو بعد 3 سنين مور ماتتخرج بصح المكتوب عندو كلمة اخرى ماتقدرش تقولو والو خاطر كلامو صحيح ماقالش حاجة غالطة
لجين: معليش لي تشوفو صحيح ديرو وانا موافقة