سلطة القلب(باللهجة الجزائرية__مًکْتٌـمًلَةّ__)

بارت 20

بعد مرور شهرين:___

لجين تحكي:

اماني: لجييين لجين وينك
لجين: درك نجيك دقيقة برك
نحيت العجينة من يدي ورحت نجري لاماني لي عندها ساعة وهي تعيطلي شكيت بلي احبالها الصوتية تقطعت من كثر ماعيطتلي مسكينة وهو كذلك😅 رحت لقيتها تتحسس في رقبتها
اماني: وينك لجين حتى بلعومي رجع يوجع فيا الف مرة نعيطلك
لجين: الله غالب شوفي الخدمة لي مخدمتهاش في حياتي كامل وجامي دخلت للكوزينة في دارنا رجعت نطيب ونصنف في ڨاطو عرسك
اماني: هههه حتى انا خممت فيك وقلت نهنيك من الخدمة الشاقة هاذي هههه
سوطيت عليها نعنق ونبوس كيف المهبولة🙄🥲
اماني: صايي برك وعلاه هذا كامل ونتي غير امس جيتي ودخلتي للكوزينة وزيد بزيادة خالتي فطيمة هي لي تصنف مي لي يشوفك يقول ضاربة عام وهي تعجن وتخبز
لجين(تنحي في طابلية الكوزينة): الله غالب انا جاية خاطيني التطياب وعلابالك على هذا الكادو تاعك وانقاذك ليا من الشبح لي تسموه الكوزينة شفتي لامبيونص لي درتو في عرس اشراق نديرلك الضعف المضاعف والله😎💃🏻💃🏻
اماني: هههه كي يخليك هارون تتحركي نص خطوة وقتها ساهل الحال
كانت تهدر وممبعد سكتت خاطر فاقت بروحها
لجين: كيفاش ياك قلتيلي هارون مسافر ومايقدرش يجي حتى لوكان جاء يجي مور عرسك ياك والا...
اماني(بزربة تنقض الوضع): لا الا لا سيدي زكري هيا يالا الى عملك الجديد
لجين: ياخوفي يطلع العمل الجديد اصعب من العمل القديم يابنتي ضحكتك هاذي لي من تحت لتحت مش عاجبتني😐
اماني: ههههه لالا نضحك من الفرحة برك... شوفي هاذي لاليست تاع الحوايج لي مزالت تخصني جيبيهالي وانا نوثق في ذوقك يعني مكالاه نروح معاك ونعيا باطل😁
فرحت وارتسمت ضحكة من الشرق للغرب الجزائري وفخر فات حدود تونس الشقيقة ملهيه 🤧😎وسرعان مازالت الضحكة وتحولت الى نظرات تاع"قولي راكي تتمسخري" كانت قائمة كبيييرة طوييلة عريضة شفتو مالا نهاية♾️ تاع الرياضيات لالا ماشفتوهاش مي انا اليوم شفتها ياخااااه وشنو هذا 🥴
لجين: حبيبتي اماني عيوني نعرف عرسك جاء على زربة وماحضرتيش روحك وكامل مي وشنو هاذي شكيت فيك كتبتي دستور جديد للبلاد مش قائمة
اماني: ايا لجين علاه هاذي الهدرة انا لوكان لقيت راني رحت وجبت وحدي مي راكي تشوفي في الحالة هنا مقلبة والعرس مابقالوش باه نخرج ونتعب اذا مش حابة صايي درك نبعث سندس والا  واحدة من البنات وندبر راسي
لجين: خلاص وشكون هدر على سندس وشكون قالك مانيش حابة اعطيني درك نروح امري لله مي ربي يسهل عليك دبريلي طونوبيل تديني من باب الدار وتجيبني مانروحش على رجليا
اماني: اكيد ديجا راهو يستنى فيك
لجين: كيفاش شكون لي يستنى في شكون
اماني: اه... ايه قصدي بابا راهو يستنى فيك حكيت معاه وقتلو... ايا بلا ماتطولي
لجين: راني نشم فيها قارصة وان شاء الله نطلع غالطة
اماني: هههه انا نشم فيها حلوة كيفك
شفتو شفتو كيفاش يبلعطوني بكلمتين ويروحو كنت رايحة ونتبسم وحدي كي البهلولة وصلت لبيتي لي هي في الاصل بيت هارون ونلقى القيامة قايمة الله اكبر ونعيط بأعلى صوتي
لجين: عمتي نعيييييييييييييمة ارواااااحي لجنونك😡
كنت في الايطاج الفوق ولالة نعيمة راهي التحت ضاربة كاس لاتاي وطالقة جنونها في بيتي جات تجري
نعيمة: خير خير واش بيك يابنتي حسبتك ضرباتك التريسيتي
لجين: ضربني الجن الاسود تعرفيه
نعيمة: لالا وشنو هذا اللهم خير
لجين: هاذو الجنون  تاعك شوفي بيتي كيفاش رجعت من تحت راسهم وانا واش ينظفني فيها درك
نعيمة: هههه بوه عليك بوه وعلى هكذا تعيطي هاذو ملايكة الرحمان ... ربي يرزقك توأم كيفهم
سمعتو واش سمعت والا انا نتوهم ونتخيل قالت ملايكة الرحمان الله اكبر
لجين: ربي حنين وكريم يرزقني ببرودة اعصابك ياعمتي🤲🏻🙄
راحت تضحك وخلتني واقفة ماعرفت ننصدم من الذراري ولا من امهم وبرودة قلبها خزرتلهم باه نخوفهم مي بداو يضحكو عيطت عليهم والو وشنو هاذو عفاريت اقسم بالله.. احسن حل ندخل ندوش ونخليهم يكملو تخريب البيت عادي ماهيش بيتي انا مقيمة فيها لمدة سمانتين برك هههه شفتو التخمام سيداتي وسادتي😎😂وبينما انا نضرب في دوش الله الله نسمع في حاجة تكسرت خلاااات لبست لي جاء قدامي وفي عقلي صورة برطابلي وهو مكسر على زوج ااه قلبي الصغير لا يتحمل يارب احفظلي وليدي ماعنديش من غيرو📱😭😭
خرجت رجلي اعلى من راسي
لجين: واش كسرتوووو يامصايب فوق راسي
اول حاجة خزرت لجيهة تيلفوني لقيتو سالم غانم سجدت سجدة شكر ونسمع في صوت الضحك طلعت راسي ليهم
انا: واش بيكم وشنو لي يضحك فيكم
قعدو يضحكو ويديرولي بصبعهم ليا
خزرت لروحي في المراية لقيت لابسة سروالي بالمقلوب والتريكو في بلاصة ماندخل رقبتي من جيهة الرقبة دخلتها من جيهة اليد
لجين: اضحكو اضحكو جننتوني بسبتكم نلبس في لبستي بالمقلوب وشنو لي كسرتوه
قعدو يضحكو وانا لاحقة موراهم ممبعد حبسو  ودارولي بصبعهم للحيط خزرت نلقى شهادة كان معلقها هارون مكسرة ماثبتش فيها مليح تاع واش
لجين: احمدو ربي ماهوش هنا لوكان راه قتلكم يالا برا ماما تعيطلكم روحو
خرجتهم من البيت بعد الف كذبة وخدعة مانفعت معاهم ولا كذبة الا واحدة ولي هي"روحو ستناوني التحت درك نديكم معايا للسوق"واكيد رايحة نخرج من الحكاية كيف الشعرة من العجين خاطر عمي موح ماراحش يقبل يديهم وهكذا نكون ضربت عصفورين بحجرة ههههخخخ شفتو المخططات تاعي ماتصفقوليش نحشم ههه🤭😌😌 وريڨلت لبستي هبطت لصقوني بالمناسبة هاذو ولاد عمة هارون"نعيمة"اسمهم "امير" و"سمير" منبعد نعرفكم بالعائلة الكريمة لهارون المهم نكمل
لجين: مالكم خلوني تحبو طيحوني قدام الناس
كانوا يخرجو فيا قريب جابوني على راسي ستر ربي برك
امير وسمير: عمو رون عمو رون
لجين: وشكون عمكم رون تاني روحو لمامتكم اخطوووني درك نشكيكم لعمي موح... عمو موح شوف اولاد اختك واش.... 😶
وجهي رجع هاك😶 مام هو نفس الملامح وشنو هذا بلاك راني نتخيل بلاك كي رجعت نرقد في بيتو وليت نتخيلو في كل بلاصة بلاك عمي موح رجع يشبهلو للدرجة هاذي لا اراديا نزل عليا الغباء من كثرة الصدمة
لجين: عمي موح؟؟؟
قعد يخزرلي و"امير"و"سمير"راحو يجرو ليه
__عمو رون
مزلت في طور الصدمة
لجين: عمي موح؟؟!
كنت نسقسي بلاك انا نتخيل فيه والا بلاك تضربت على راسي ورجعت نشوف فيه في كل بلاصة كيفاش ياك هو مسافر كيفاش راهو قدامي حتى قطعلي افكاري صوتو لي عندي شهرين ماسمعتوش
هارون: عمك موح اذا تستحقيه عندو مدة خرج
اااه لوكان تشوفوه كيفاش كان يخزرلي نفس خزرتو ليا اول مرة تلاقينا في لافاك واش بيه هذا هفففف نكرهو ياربي المهم قعد على ركايبو وامير وسمير يلعبو معاه ويبوسو فيه درك هذا الروبوت المريض يحبوه الذراري 😒😏قعدت نخزر وانا عقلي شغال يخمم في الف طريقة باه نهرب من الوضع لي انا فيه وبينما مزال عقلي يفكر في طريقة للهروب تزدم عمتي "سعادة" لي هي عمة هارون طبعا اااه ياعمتي علاه واش درتلك انا قتلتلك ولادك والا حرمتك من الورث والا كليتلك فطورك
سعادة: يوويوووووييييي
مالها هاذي العرس مزالو سمانتين بلاك هبلت اصلا انا بديت نشك بلي الدار هاذي كامل مهابل وانا الاولى طبعا🥲🥲
سعادة: الله يبارك على العرسان تاعنا
وين تشوفي فيهم العرسان ياعمتي الله يهديك حنا لوكان جينا تاع الصح متزوجين راكي تلقيني اونسانت في شهري الخامس😑😑
لجين: ربي يسامحك ياعمتي عرسان واش لي تحكي عليهم؟
سعادة: نتوما الله احد عليكم لي يشوفكم يقول لبارح تزوجو.. كي اليوم نشوف صغيركم بين يديكم ياربي
لجين: ماقعدش قد لي فات
سمعتوني واش قلت ياك؟؟ شفتو شفتو لساني وين يوصلني انا مشاكلي نصهم بسبة لساني علابالكم انا لوكان نروح للجنازة في عوض مانقوللهم عظم الله اجركم نقوللهم طلع البدر علينا واذا رحت لعرس في عوض مانقول مبروك ربي يهنيكم نقول انتم السابقون ونحن اللاحقون ايييه هذا غير شوي وخلي البير بغطاه احسن🤧💔 وانا كان قصدي ماقعدش قد لي فات على الطلاق لي تأجل (ومبعد نحكيكلم واش صرا بالتفصيل متخافوش علابالي مش فاهمين والو)
وياخياتي عمتي سعاد قلتلكم دايرة بروفا على التزغريت وتطلقها بوحد الزغروتة لي في الدار كامل رجعو قدامنا ياويلي ويانهار ابيض قال المصري😐
اماني: واش كاين علاه تزغرتي عمتي
سعادة: هاتو البشارة لجين قريب تجيبلنا حفيد صغيرون يويوويووييييي
في دقيقة رجعو كامل يزغرتو ولي تبكي وتعنق فيا وتعنق في هارون لي قاعد يخزرلي بنفس الخزرة روح العب بعيد واش بيه جدو هذا؟!!! اماني ساجدة معلباليش علاه وسندس وامها وخالتها لي هي مرت عمي موح يقحرولي بعصب هههه عجبني الوضع غير بسبتهم شح مح تستاااهلوو😉
هارون: ياجماعة علاه هذا...
زربت حكمتلو يدو وذبلت عينيا قدامهم كامل
لجين: كنا حابين هذا الموضوع يبقى بيناتنا مي شوف حبيبي فرحتهم معانا ماتتعوضش
الله اكبر كبروا الله اكبر لا نهاب الظالمين... علابالي راني غي نخلط مي والله نبرد قلبي في هاذيك سندس وامها وخالتها وهارون درك نتفاهم معاك كان هكذا علابالي مي بعد مابركولنا وراحو كامل قحرلي تقحيرة تاع موت شكيت فيه تحول لمصاص الدماء السيد متبدل كليا💀
هارون: وشنو هذا لي قاعدة تعملي فيه
جيت نرد مي دخلو بيناتنا سمير وامير اول مرة ينفعوني المصايب
امير وسمير: نلوحو معاكم(نروحو)
هارون: لالا ماتروحوش درك ماماك تقلق عليكم ايا روحو للدار ودرك نجيبلكم حلوى والعاب معايا
بداو يبكو وانا دماغي لي الله لا يحرمني منو مدلي خطة جهنمية قصدي خطة استراتيجية باه نهرب من هارون😁🥲
لجين: انا وعدتهم باه نديهم معايا ولازم نوفي بوعدي ليهم ماعنديش حل اخر ديجا على اساس  باه يوصلني عمي موح
وتفكرت هدرة اماني ورجعلي شاهد العقل اخيرا
لجين: اييه صح مش على اساس راك خارج البلاد وماتقدرش تجي للعرس كيفاش راك هنا والا نتا متفاهم مع ختك عليا
كنت نهدر بوحد الثقة تاع جبل مايهزك ريح
هارون: اولا هذا عرس اختي اذا انا ماحضرتش شكون يحضر ثانيا انا علاه باه نتفاهم مع اماني وثالثا انا ماكنتش خارج البلاد سامي(راجل اماني المستقبلي) كان يحتاجني وكنت معاه نهارين برك ورابعا ماتزيديش تسقسيني خاطر نفكرك بلي ماراكيش مرتي
شفتو شفتو ياررربي راني نكره عبدك هذا واش حاسب روحك زعما كي انا سقسيتك مهتمة بيك ياو حتى تروح لجهنامة الحمرا معلباليش بيك تفووو عليك متكبر متعجرف روبوت مريض😏😒 طبعا هذا الكلام كان في قلبي في الواقع انا سكتت وركبت كيف الشاطرة مع الذراري التالي اكيد مانركبش بجنبو بعد الكلام لي قالو و شرينا الف حاجة وحاجة وامير وسمير طاحت عليهم العقالة سبحان الله ماقالو والو غير يتفرجو المهم بعد اكثر من ساعتين رجعنا للدار ولي كانت مقلوبة بالعياط طبعا خليت هارون يدخل الحوايج وانا رحت نجري لبيتي والى سريري الجميل رميت روحي في النص كان سرير كبييير بزاف انا مانبانش فيه شكيت فيه الروبوت كي راح يشريه كان في بالو باه يرقد فيل معاه لا علينا كنت مغمضة عينيا ونستمتع بالهواء لي داخل من التاقة ونريح في اعظامي لي حسيتهم تكسرو سمعت الباب تفتح قلت سور يكونو التوأم المصايب حتى فقت على صوتو
هارون: شكون كسر هاذي نتي ياك
قلتلكم من قبل بلي نكرهو؟؟ حتى لوكان قلت نزيد نجدد الكره نكررررهوو وقفت بزربة تخلعت كي سمعت صوتو ياك عندو دار البرا علاه جاي لهنا
لجين: اذا تحب تعرف شكون كسرها سقسي ذراري عمتك نعيمة ونتا علاه جاي لهنا بيتي هاذي
راح يقدملي وانا متحركتليش شعرة غير كي رجع قدامي بديت نوخر حتى لصقت في الحيط قعد واقف قدامي ويخزرلي بلا مايهدر جيت نبعد حصرني بيدو جيت نروح من الجيهة الاخرى حصرني بيدو التانية
لجين: هابعد عليا ياك مانيش مرتك مايحقلكش تقربلي بعد والا نعيط درك
هارون: مزلتي مرتي واذا تهدري على الحقوق عندي كامل الحق ندير واش نحب معاك😉
تفوووو وقح جايح ياربي وقتاش يجي العرس ويكمل
هارون:ومزال حسابي معاك ماكملش
لجين(وانا نتنفس بصعوبة معلباليش علاه):حساب وشنو
  بعد عليا بلا مايجاوبني كان يمشي رايح للفراش زربت سوطيت فوق الفراش قبل مايلحق
لجين: مانرقدش معاك على نفس الفراش ياك عندك دارك روح لدارك ياخويا واش جابك لعندي
طفاني وراح رقد وانا نخزر يحمد ربي ليل مع نهار جينا في دار عايلتو سينو نقتلو بلا رحمة امري لله انا تاعبة بزاف ماعنديش طاقة حتى شوي باه نرقد التحت لبست بيجامتي التحفونة ولي كان مرسوم فيها بيدري حبيب قلبي❤😍 ومزلت ماقلتش بسم الله يزدم علينا الارهاب قصدي امير وسمير حطيت وجهي داخل الوسادة
لجين: ياربي ياربي وقتاه نتهنى ياربي
راحو يجرو لعمهم رون كيف مايقولو هوما قعدو بيناتنا وسطنا وكنا كامل نخزرو للسقف
امير: احكيلنا حكاية
لجين: مانعرفش انا خلوني نرقد
سمير: احكيلنا نتا عمو رون
هارون: منعرفش
سمير: لجن شكون هذا
لجين: اسمي لجيييين لُ... جيييين مش لجن وهذا حبيبي وعمري بيدري قلبي
هارون: زيدي زيدي غير شوي فيه
لجين: روح قلبي وعيوني و....
مزلت مكملتش نسمع في عياطو مساكن حتى الذراري خافو
هارون: بلعييي *** بلعيييي تحكي في الهدرة هاذي قدام الذراري
لجين: ونتا ماحشمتش كي راك تطيح في الهدرة قدامهم
هارون: خاطر مايفهموهاش شوفي نتي واش راكي تحكي ماتهبلينيش في الليل احسن ليك
لجين: حرية التعبير ياخويا مش عاجبك الحال ارجع لدارك وخليني انا ضيفة عندكم ماشفتش اكرام الضيف منك
هارون(يعيط): وخويا هاذي لي تعلمتيها واش معناها
مالو ياربي مالوووو واش بيه مافهمتش
لجين: لا اله الا الله واش تحبني نقولك زوجي العزيز والا قرقورة عيني ماتنساش غير الصباح قلت بلي مارانيش مرتك
مزال ماردش نسمعو في ضحكتهم بدات تعلى ضيقنا عينيا في بعضنا وانا هجمت على امير وهارون على سمير قعدنا ندغدغو فيهم لين عيينا ورقدنا...