سلطة القلب(باللهجة الجزائرية__مًکْتٌـمًلَةّ__)

بارت فور 4

لجين: شوف انا مانقدرش نقول لالا لبابا وهو طلب مني نوافق على الخطوبة هاذي مي انا مش حابة ... بصح نتا تقدر ماتوافقش فهمتني
هارون(كالم لاخر درجة): يعني تحبيني نقول لالا؟؟
لجين: ايه اكزاكت
ناض وقف ورايح يقرب للكرسي لي مريحة فيه وبطبيعة الحال لجين متخافش معلابالهاش كامل بيه
هارون: اولا ياطالبة انا مش ميت على الزواج سيرتو من واحدة كيفك
لجين طلعلها الزبل للراس من الصباح وهي تستنى باه تكلمو وفلخر يقوللها هدرة كيف هاذي بالساهل ناضت قابلاتو
لجين: مليح كي راك مش ميت على الزواج... واش تقصد بواحدة كيفي اهدر اهدر ماتخليهاش في قلبك مبعد تغص
هارون(وهو يشوف فيها من راسها لساسها): جامي تكون مرتي واحدة زينها شابعين بيه كامل الناس
لجين(وهي تعيط): اسمع مليح ياوسمك احترمتك كأستاذ وجيت نهدر معاك بلعقل واش هاذي الهدرة راك تسمع واش تقول؟؟؟
ودرك نوريلك زيني لي شابعين منو كامل الناس جبدت لونجات من صاكها ومسحت بيها وجهها قعدت بيضا صافية قريب دخلتها في عينيه
لجين: شوف شوف الزين زين هذا وضرباتو على صدرو جهة قلبو... لي قلبو زين مايحتاجش يعرض زينو للناس... وننصحك روح داوي باين عليك مريض تحب الانظار غي عليك تغار من طفلة هففف واش العقلية لي عندك ياخويا
حكمها من يدها وقرب ليها
هارون: ثانيا انا بابا خدم عندكم ليل مع نهار باش يكبرني يعني ماوصلت لهنا غير من تعب بابا واول مرة يقصدني في حاجة وموحال نردو فهمتيني
ثالثا حلك موش عندنا الاحسن تروحي لباباك هو عندو الحل خاطر باباك هو لي قال لبابا عليك لا انا لا بابا جيناكم فهمتيني
اول مرة تحس بالذل اول مرة يهدروا على باباها وهي لوكان تصيب تدخل تحت الارض موالفة كي يهدروا على باباها راسها يولي مرفوع في السماء تعمرو عينيها بالدموع نطرت يديها بقوة منو
لجين: و.. واش راك تقول بابا؟؟
هارون: وي باباك الا مش مصدقة تقدري تسقسيه وبالنسبة ليا انا جامي نرد بابا يالوكان واش يطلب مني... بقات عندكم تقدروا ماتقبلوش مايهمنيش بزاف هذا الامر
ودرك فاتو 5 دقايق تاعك تقدري تتفضلي
خرجت تجري واش يخلط هذا باباها يرمي فيها موحال جامي يديرها اكيد يكذب مسحت دمعتها لي هبطت وكلمت الشيفور يجي يديها
بعد ماخرجت خبط بيروه بعصب
هارون: زدت فيها بزاف... مي هك لصالحنا اكيد يفسخوا الخطوبة كي يسمع باباها بالهدرة هذا كان الحل الوحيد
وصلت للشركة هبطت من الطوموبيل تجري حست الطريق طوييل دخلت للبيرو كان في اجتماع قعدت تستنى مي طول وهي صبرها خلاص راحت زدمت للاجتماع
لجين: اسمحولي بابا نحتاجك دقيقتين برك
ناض ورجعو للمكتب تاعو
لجين: بابا صح لي سمعتو
سي عمران: واش سمعتي خير ان شاء الله
لجين: نتا لي قلت لعمي موح يجي يخطبني لولدو يعني مش هوما لي جاو خطبوني نتا طيشتني ليهم صح ولالا
سي عمران: ريحي اشربي شويا ماء وخليني نفهمك
لجين: يابابا واش تفهمني يابابا انا مثقلة عليك انا حمل كبير عليك رايح ترمي فيا ليهم(سكتتها دمعتها لي طاحت)
سي عمران: جامي كنتي ثقل عليا يابنتي نتي امورتي ونور عيني.. اسمعيني خديجة رضي الله عنها هي لي بعثت للرسول ﷺباش يخطبها وقت نشوفو انسان صالح مش عيب ولا حرام نقولولو على بنتنا فهمتيني
لجين: لالا مافهمتش كل زمان وزمانو..الجاست لي درتها درك في وقتنا هذا عندها معنى واحد ولي هي راك رميتني ليهم
سي عمران: مارميتكش وموحال نرميك انا خممت في صلاحك الزواج هو لي يرجعك مسؤولة وهارون ماشاء الله عليه رزين ومثقف يعني يوالمك والرسول ﷺ امرنا كي نشوفو انسان صالح مافيها والو نخطبوه في بنتنا... درك علابالي ماتفهمينيش مي ان شاء الله كي تولي ام تفهميني
لجين: Malheureusement نتا لي مش فاهمني بابا
خرجت رجعت لدارهم لبست لبسة sport وراحت للاصال دو سبور تخمم في كلام هارون وخزرتوا كيفاش كان يشوف فيها شغل زبالة قطع عليها تفكيرها تيلفونها وهو ينوڨز
اشراق: وينك لجين قلبت عليك لافاك
لجين: خرجت
اشراق: كنت خارجة مع امجد قلت نكلمك تروحي معانا
لجين: واش يديني معاك ونتي مع خطيبك ابقاو وحدكم عصافير الحب مندخلش بيناتكم
اشراق: ههه غدوة تخرجي بالسيف عليك... هدرتي مع الاستاذ هارون؟؟
لجين: ايه وياريت ماهدرت
اشراق: علاه واش كاين
لجين: غدوة نحكيلك حبيبتي ايا تبقاي على خير سلمي على امجد