سلطة القلب(باللهجة الجزائرية__مًکْتٌـمًلَةّ__)

بارت22

بعد مرور سمانة:::_____::::

لجين تحكي:

اوك نختصرلكم السمانة لي فاتت كيفاش جازت خاطر مانيش قادرة نحكي بزاف والا تحبو الصح خاطر ماصرا والو في السمانة لي فاتت🤐... كيما حكيت من قبل هذيك ميلا بنت عمة هارون لي من تركيا علابالي بيها تحب هاارون تقولولي كيفاش عرفتي عندك دليل؟؟ ماعنديش دليل مي احساسي في الامور هاذي جامي يخيبني خزرتها ليه قريب تنطق و النهار كامل وهي لاصقة فيه لوكان مش عيب من ربي وعبادو راهي تبات معاه لي يشوفهم يقول عليهم متزوجين وعماتو يقولولي مسكينة من بكري متعلقة بهارون ههه متعلقة؟؟😏😏 مش قصدهم متعلقة قصدهم مهووسة مهبولة بيه اما انا رجعت طرف ثالث بيناتهم هي صح  تحبو وهو يحبها زعما؟؟ معلباليش اسكو يحبها ولا نن ومانقدر نقول والو خاطر معلاباليش والا خايفة من الحقيقة وخايفة يطلع يحبها 😔انا اصلا مارجعتش عارفة علاه مقلقة روحي حنا درك رانا مطلقين هو وقع وانا وقعت على اوراق طلاقنا يعني عندو كامل الحق يشوف حياتو مي مش درك فهمتوني يعني انا وياه مزالنا متزوجين قدام فاميلتو وقدام العباد مي مع بعضنا رانا مطلقين ليصونصيال كنت نخمم في السمانة لي فاتت كامل كيفاش نخدم كيدي العظيم باه نهبل هارون مي علابالكم واش خممت واستنتجت... انا علاه نقلق روحي على خاطرو ونكسر راسي بالتخمام فيه وعلاه نتعب قلبي بيه وهو في المقابل مش سامع بيا احسن حل هو نريح راسي وقلبي الحل هو التجاهل ايه التجاهل يحبها ربي يسهل عليه مايحبهاش ربي يسهل عليه مايهمنيش فيهم ماعندي مادخلني فيهم انا هنا مزالي شحال من نهار ونرجع لدارنا التجاهل صدقوني يريحكم ويرجع كل بنادم لمكانو الصحيح السمانة لي فاتت كامل ماهدرتش معاه واذا هدرت نقول ايه والا لالا برك مانزيد ولا نص كلمة اخرى نهبط ونضحك ونتمسخر خطرات يكون هو معانا وخطرات لالا مي حتى كي يكون معانا بالنسبة ليا مش موجود مانيش نشوف فيه كامل وفي الليل كي نسمعو طالع للبيت نلعبها رقدت باه مانحكي معاه مايحكي معايا هكذا جازت السمانة لي فاتت نفس الروتين كل يوم التجاهل والقدام ولحق عرس حبيبتي اماني🥹🫶

الليلة ليلة حنتها نضت الصباح بكري شويا نلقى هارون مزال راقد لبارح رقدت مافقتش بيه كامل وقتاه جاء خاطر كان ساهر مع ولاد عماتو وخالاتو واكيد معاهم لالة ميلا كي الملح بيناتهم جامي تخطيهم المهم توضيت وصليت هبطت التحت لقيتهم يستقهواو ريحت معاهم شويا وقعدت نهدر مع اماني وزعما ننصح فيها باه ماتخافش وتعيش اللحظة خاطر كل لحظة في العرس ماتتعاودش(زعما انا مجربة ونمد في النصائح كيما يقول المثل من برا الله الله ومن الداخل يعلم الله😂) كنت مزلت نهدر معاها حتى يدخل سي الشباب وشكون غيرو
هارون: صباح الخير
اماني: صباح النور ياتاج راسي
باسها من راسها وانا قاعدة نخزرلهم ونقول في قلبي لوكان انا تاني جاء عندي خويا ذراعي وكتافي وقوتي مي الله غالب والحمد لله على كل حال صح ماعنديش خويا مي عندي بابا عوضني بيه ربي كان ليا نعم الاب ونعم الام بعد ماتوفات روحي الله يرحمها وكان ليا خويا وكلش ربي يخليه سندي الدائم❤🫶
زادت شويا خرجت اماني قالت تروح تشوف البنات واش يديرو هههه علابالي بيها ستوتة دارتها باه تخليني انا مع هارون وحدي المهم قعدنا مريحين بلا مانحكو حتى حرف كرهت جيت خارجة حبسني صوتو
هارون: علاه تبدلتي؟
ضحكت باستهزاء هذا هو لي يقولك انا نوريلو القمر وهو يشوف في صبعي زعما ماشافش روحو واش عامل ويجي يحاسب فيا من فوق والله لا مليحة هادي
تلفتت ليه وتبسمت علابالي تبسيمتي الباردة تقتلو هذا انتقامي البرود والتجاهل
لجين: كيفاش؟
كنت نستنى فيه يهدر باه نشعل فيه ونبدا نهدر ومانسكت ونفرغ قلبي مي هذيك لي خلقها ربي غير باه تقلقني جات زادمة بلا احم ولا دستور😏😑😑
ميلا: هارون راك هنا عندي بزاف وانا نحوس عليك