جازت سمانتين لجين على نفس الحالة ماتهدر ماتضحك حاكمة فراشها وخلاص كان حاب يبقى معاها مي الله غالب قانون لافاك لا يُعلى عليه مايقدرش يخلي الحصص والطلبة تاعو مام اماني ماقدرتش تبقى معاها خاطر كانت غيبت بزاف وقت مرضها
كانت تبقى وحدها اغلب الوقت ماتدير والو تخزر للفراغ حتى يجي الليل ترقد و تنوض ونفس الروتين يتعاود
طلت الشمس بأشعتها الذهبية ضربت في عينيه غطى وجهو بيدو وخزر لجيهتها لقاها فارغة ناض مخلوع سمع صوتها في التوالات كانت تتقيا طبطب الباب
هارون: راكي مليحة لجين؟؟!
ماردتش عليه زادت شوي خرجت كان وجهها اصفر كي حبة القارص
هارون: واش بيك؟؟
لجين: والو
هارون: كيفاش والو سمعتك كنتي تتقييء وجهك مافيهش نقطة دم كيفاش والو فهميني
لجين: خلاص مابيا والو مرض الموسم باينة الجو بدا يتبدل وانا مرضت هذا ماكان
مكانش حاب يضغط عليها بزاف سكت هبطو يفطرو فطور الصباح كان محطوط بيض اول ما شفاتو طلعت تجري حاكمة فمها وكرشها
اماني: مالها لجين
هارون: معلاباليش قالت مرض الموسم ولا مانعرف
اماني(بقلق): خير ان شاء الله
خرجو اماني وهارون راحو للافاك وبقات وحدها سمعت الباب تخبط عرفتهم راحو لبست لافاست تاعها وهبطت كانت خارجة ديراكت مي صوتو حبسها
هارون: وين رايحة درك؟
تلفتت ليه بالعرض البطيء مكانتش عارفة بلي هنا
لجين: انت راك هنا علاه مارحتش
هارون: نورمالمو هاذي الدار داري نروح والا نبقى انا حر
لجين: عندك الحق.. انا رايحة نتمشى شويا
هارون: اصبري نجي معاك
لجين(بزربة): لالالا... قصدي حابة نبقى وحدي من فضلك
هارون: مايهمنيش واش حابة بقيتي وحدك بزاف في البريود لخرة
نفخت بعصب بدا يمشي وهي واقفة في بلاصتها تلفت وراه لقاها مزالت واقفة
هارون: ارواحي ياك حابة تتمشي
قعدو يدورو اول مرة تخرج من هذاك النهار وجهها كان ذابل كيف روحها.. ريحو في كرسي مقابل البحر بلا مايهدرو والناس يمشو ولي يضحك ولي يهدر
هارون: راكي تشوفي
لجين: واش
هارون: شوفي الدنيا حبست بالنسبة ليك ياك مي حبست عند هاذو الناس؟؟ لالا... كل واحد فيهم عندو هم بداخلو مي الدنيا ماتوقفش عند بنادم ولا عند مشكلة... اصلا ربي كي خلق الدنيا هاذي سماها دار شقاء وفناء والآخرة هي دار البقاء يعني اي مشكل ولا بروبلام يصرا في الدنيا هاذي عندو حل ومع الوقت يروح مي كاين ناس يروحو هوما مع الوقت يهلكو ارواحهم بيديهم وهوما مش حاسبين حساب وقت يفيقو يلقاو كلش ضاع من بين يديهم وانتي راكي ماشية في طريقهم
نسمات الهواء الباردة زادت على مابيها دخلت ايديها في لافاست وتكمشت
لجين: كيفاش ماشية في طريقهم ماعنديش طاقة نكمل حياتي شغل ماصار والو
هارون: عندك سمانتين وانتي على نفس الحالة وين راهي لجين تاع قبل ماتت؟؟ ماتبقيش تلومي في روحك لي صرالك مش بسبتك ومش بسبة اي بنادم لي صرالك كان مكتوب من قبل ماتولدي سلمي امرك لله والعدالة رايحة تاخذ حقك وكملي حياتك انجحي واوقفي على رجليك ماتخليش هاذي الضربة تقتلك
تأوهت من الوجع زرب قدملها كانت حاكمة كرشها
هارون: واش بيك من الصباح مش قد بعضك نوضي نروحو للسبيطار بلاك عندك تسمم
لجين: سبيطار وتسمم واش مش لازم درك نروح نرتاح في الدار موالفة تصرالي مش حاجة جديدة
هارون: كيفاش...
لجين(قطعاتو): راني نعرف روحي هيا ديجا بردت هنا
ناضت بدات تمشي نحى لافاست تاعو لحقها وحطها فوق كتافها
لجين: درك تبرد مش تشوف في الجو كيفاش بارد
هارون: نورمال المهم انتي مرتاحة
خزرتلو وعينيها تعمرو بالدموع بعد شعرو لي هبط على عينو من الهواء
هارون: معلباليش وقتاه ينشفو دموعك
لجين: خلاص برك ماتبداش
هارون: مانبداش نهار انتي تسكتي صاي بركات سمانتين وانتي تبكي بزاف
لجين: عندك الحق تهدر هك خاطر ماعشتش لي عشتو
دخلت يديها في لافاست تاعو لي وصلت قريب لركبتها من كثرة طول هارون عليها
جبدها ليه بلعقل وهوما يمشو رجعت لاصقة فيه وهو محوطها بيديه
لجين: حركاتك اخر فترة زادت على حدها
هارون: زادت عن حدها هاذي مافهمتهاش
لجين: انا فاهمة عليك
هارون: كيفاش؟؟
لجين: مش لازم تعرف ايا واخيرا لحقنا للدار قريب نموت
هارون: ياك قتلك نديك للسبيطار
لجين: مش لازم والله درك نرتاح
طلعت لبيتها وهو قعد التحت
لجين:نعرف بلي قاعد تعامل فيا من باب زعما شفقة وغايضك حالي مي جامي ننسى الوقفة تاعك معايا
قعدت تضغط على كرشها الوجع زاد عليها كي خرجت البرا الحال بارد كمل على حالتها اكثر تكت في الفراش دخل هارون
هارون: عندي اجتماع درك اذا تحسي في روحك مش مليحة نورمال مانروحش ونديك للسبيطار
لجين: الف مرة نقولك لالا مش لازم
هارون: معليش تهربي وديري الف سبة مي اذا رجعت ولقيتك في نفس الحالة تروحي قدامي وبلا ماتهدري حتى حرف ني قتلك من درك
أنت تقرأ
سلطة القلب(باللهجة الجزائرية__مًکْتٌـمًلَةّ__)
De Todoكرونيك خفيفة ظريفة باللهجة الجزائرية مغايرة عن بقية الكرونيكات شوية تاع بزاف😁 ماعندي مانقول غير اقراوها علابالي تعجبكم وبسسس احبكم لا تنسوني من دعواتكم حبيباتي♤♤
