ايا غيمه امطري دنيايّ

البارت الخامس عشر

_
_
_
_

بادلها الحضن ورفع راسها يمسح دموعها : تعالي بوريك شيء !
راحت معاه وشافته يفتح غرفة امها فتح اول درج يخرج منه صندوق متوسط الحجم فتحه وتقدمت تشوف الذهب الي توسطه وساعات رجاليه ونسائيه مسابح ملونه وصور كثيره ، رفع كميرا من جيبه يصور فيها انفسهم ويستخرجها بسرعه منها ، وضعها بالصندوق ونطقت اخيرا تساله : وش هذي
اشر لها : امي قبل تموت الله يرحمها وصتني اعطيك ذا بيوم زواجك يكون لك ذكرى لنا وهذي الصورة عشان ما تنسيني
حضنته بشده و....

صحّت من شرودها على صوت دقّ الباب الخارجي
رفعت راسها تسمع الباب وقفت تسحب طرحتها وتمسح دموعها بخفه ، فتحت باب غرفتها غلى خروج سيّوف الي صحت من صوت الباب : وش فييه يمه ؟
هزت كتفها بـ ما ادري ، ونطقت من عند الباب : مين ؟
سهم : سهيمان يمه ، معي ضيوف
هزت راسها بتمام : المجلس مفتوح يمتس
راحت المطبخ برفقه سيّوف يسوون عشاء خفيف وبراد شاهي

دخل سهم يفتح المجلس وخلفه ناصر وعزيز المندهشين من جمال البيت الهادئ ، اما منصور رجع بيته بتعذر يبي ينام بعد اليوم الي عاشه ...

جلسوا ناصر وعزيز وشوي دقّ الباب وقف سهم يفتحه خذا العشاء يدخله وثم الشاهي نزّلهم يرتبهم وبعد ما انتهى قفل الباب يرحب فيهم : ارحبوا نورتوا الدّار
عزيز: البقى يا سهم منوّر باهله
جلسوا ونطق ناصر بفضول : الا انت و اخوك كم أعماركم
سهم بابتسامه : انا 23 و منصور 22 ، مو اخوان ميّر أن مع بعض من زمان أخته زوجة اخوي التسبير
ناصر بذهول : ماشاءالله سبحان خالق الشبه بينكم
عزيز بابتسامه : اييه ماشاءالله يتشابهون بالجمال مو انت الي من يوم قابلتك ولاحقني الهمّ
ناصر : ولا يا الطيب تراك جاي بعدي بيومين كان تبي اعلمك ، اصلا حاصلك نويصر يقعد معك
عزيز : حشّى مافي احترام لعمك !
سهم بصدمه : انت عمه !
ناصر بجديه : لا والله هو خالي و مابينا واجد نفس العمر 31 بس يقول انه عمي غصب
سهم بصدمه : تقوله صادق!
هز رأسه عزيز: اي والله صادق ، وبعدين ما كان كبينا العفش يا ابو سهم عاد اعذرنا ، لكن ملامحك قريبه من اخواني عشان كذا انطلقت بالسوالف
سهم بابتسامة : ماعليس يا رجال تحصل ، على العموم استاذنتسم شوي
هز رأسه ناصر وطلع سهم للمطبخ
الي كان فيه سيّوف نايمه على الطاوله واصايل الي تناظر بالمدى البعيد
دخل سهم وسلّم على اصايل الي فزت من سرحانها و سيّوف الي حست بوجود احد وقامت ، نطق سهم: اعذريني يمه واعذريني عمه م قصدت اصحيتسم من عز نومتسم ميّر انتس ي يمه تزعلين علي لا جاء الضيف ولا ضيفته بالبيت
ابتسمت له أصايل بخفه : ما عليس ي روح اميمتس
بس انشدني عنهم عساهم خير ناس
سهم : لا ماشاءالله عليهم ونعم بهم هم اثنين واحد و ولد اخته بنفس العمر ماشاءالله ، وترا اول مره يجون هنا عشان شغلٍ(ن) لهم ظنيّ بالعسكريه
اصايل : ماشاءالله ، الله يوفقهم ، بس ما دريت لوين يرجعون
سه‍م بتذكّر : الا للرياض وقبيلتهم تسذا فيها آل بس ظني انها آل مطلق قريبه لقبيلتس بس هم قالوا ما يعرفون حد بحايل
عقدت سيّوف حواجبها تشوف امها الي دمعت عيونها بشوق ولهفه تسبقها عتاب : وش ينقال له ؟
سهم بتوتر : عبدالعزيز آل مطلق ما طرا ابوه
هزّت راسها تشرب من الماء تنطق : روح لهم يمه بين اهلهم وناسهم ، وقفت تطلع من المطبخ تدخل غرفتها ترفع طرحتها وتتمدد على سريرها تحضن مخدتها ...