اورطيغا: يخليلي الزين ديالي لي تيهزلي الهم ( تبسمت وهو قرر بغا يقولها على ديور) هو بغيت نقولك شي حاجة!!!
ملاك: (بالزربة قاطعاتو) نحتارمو قرار بابا حسن امراد!! حتى لمور العرس!!
اورطيغا: (كان بغا يقولها على املاكو) كفاش؟!
ملاك: (عرفات ماشي موضوعو) شنو كنت بغيت تقول؟؟
اورطيغا: آش جاب باباك للهضرة؟!
ملاك: بففف عاود غندابزو!! انا عييت صراحة نتا مكتفهمنيش وانا مكنفهمكش وخاصنا غير ندابزو بزااف (وقفت هنا كانت بغات تجيها لبكية حتى عيات من هادشي ومن هاد لخاصمات) ميمكنش تكون هدنة شوية!!
اورطيغا: باسم عليك شكون قالك غندابزو!!! انا باغي نهضر على حاجة اخرى!!
ملاك: (قلبت وجهها كتحبس دموعها مينزلوش.. وقف دار يدو على ظهرها مدورها لعندو) صافي انا ساكت.. ( زيدها داير يدو على كتافها مشيها باش يرجعو من الشارع لي جاو منو)
اورطيغا: نمشيو لأزرو؟!
ملاك: علاش؟!
اورطيغا: غير ياله (مفهمش مالهم كما قالت دغيا كيتخاصمو ومكيتصالحو حتى كدوز عليهم نفسيا.. واش كما قال باها العام اللول كيدوز قاسح وكولها فين كيبغي يفرض رأيو وشخصيتو وغيطيحو غير فلمدابزات!! بقاو ساكتين ومتأكد حتى هي كتفكر هاكا وفهادشي وهو لي خاصو يسالي هادشي باش يرجعو كيف كانو.. وصلو الطموبيل ركبو وقلب طريق)
تتعرفي ارزݣورو؟!!!
ملاك: لا
اورطيغا: ختك ساكنة فأزرو ومتتعرفيش ارزݣورو!!
ملاك: وراه ختي لي ساكنة ماشي انا!! (شافت نبرة صوتها زادت وهي تنقص) احم اصلا قليل فاش كنسافرو عندها وبابا ميخليماش نباتو عندها من غير فالمناسبات ديالها
اورطيغا: اممم (مشاو لتماك فين كانت غابة الأرز وعامرة بالقرود ومع الويكاند لقاوها عامرة خداو الكاوكاو لي كيتباع تماك باش تعطي لقرود ياكلو لي الا محضيتيش معاهم يطيرو ليك شنو عندك فاليد ولا فشعر.. جا عندهم خيال وركبو بجوج فالعود هو أصر متركبش بوحدها ركبت قدامو وهو شاد لجام ووحاط ذقنو على كتفها)
ملاك: (عاجبها الحال ومول الخيل قدامهم) كتجي هنا بزاف؟؟
اورطيغا: كنت.. شحال مجيت هنا
ملاك: اممم كنت كتجيب صحاباتك
اورطيغا: لا.. كنت تنجي مع دراري
ملاك: اممم تقتك..
اورطيغا: فين تبغي نسافرو؟؟
ملاك؛ لي نخسروه فالمغرب نمشيو بيه مثلا تركيا ولا شي دولة ما فيهاش الڤيزا حتى ندفعو الڤيزا شي مرات ونمشيو عند نعيمة ختي
اورطيغا: مصالحليش اكبيدة عندي شي بلانات فالمحكمة مزال متسالاو راه هادشي لي مخليني متنزطمش على برا
أنت تقرأ
جنون الغيرة
Любовные романыسلام عليكم.. بعد غياب فقصة #أحببت_رجلا رجعت برواية جديدة تحت طلب ديالكم قصة جديدة احداث متنوعة نايضة غيرة وتشوييق عقد كوميديا دراما مواااقف... #جنون_الغيرة #هاجر_ربيكا #مقتطف: ...: قبل متكمل هضرتها جمع معاها بتصرفيقة حتى طارت دمعة من عينيها ياله...
