جنون الغيرة

الجزء 149

سعد: (عرفو من طبيب حالة الحاج حرجة شوية هوما كيديرو خدمتهم والباقي على الله المشكل كان فالجهاز التنفسي ديالو ماشي القلب كما اعتاقدو صيفط العائلة للدار وبقا هو حيت تسالات موعد الزيارة صونا شريف عليه كان وصل لكازا ومن تماك غيجيو نيشان، عيط على شفيق دار داكشي لي وصاه عليه سد المحال ديال اورطيغا وطرد الدري لي معاه)
صافي مزيان دوزلي الساروت ياك بدلت الفرخة؟؟؟

شفيق: اه، ومن هنا نقولهالك المحال غيبقى لية

سعد: لا ليك لا لية المحال غيشدو شريف

شفيق: وعلاش شريف؟!

سعد: ياك هوما خوت هو والشمكار ارا نشوفو الأخوة لي بيناتهم كدايرة منين توصل للمحال

شفيق: ولكن شحال وانا باغيه وحتى ولدي من ديما تنواعدو هو لي غيشدو

سعد: وحتى ولدي باغيه وفضلت خونا عليه

شفيق: هاد الساعة اللهم فشريف حتى نشوفو القسمة من بعد هادشي الا مكانتش كاتبو للݣرسيفية وولدها

سعد: كاين الطعن راني سولت متخافش

شفيق: هي مقاد كولشي

سعد: مغنخليش رزق با داااايع للمنوالا عاشو معانا وبخيرنا كلاو وشربو ولبسو بزاف، من مور الحاج هاد الصداقة غتسالا وكولها يشد طريقو ياك هو روييييجل والنفخة يمشي يقلب على طرف الخبز فقنت اخر

شفيق: والدار لي فالسعادة

سعد: (زفر) هاديك مكتوبة ليها من اللول بيع وشرا من شحال هادي، انا لي تنفكر فيه هو الطموبيل لي عندو كفاش نحايدوها ليه

شفيق: الله يسمح للحاج وصافي داكشي زايد اولا فولادنا وفينا وهو كيعطي البراني

سعد: مهم هو ماشي بعيد غيجي غدا

شفيق: علمت البوليس؟!

سعد: حتى يدير علاش ولكن قلتها لواحد صاحبي قالي خاصو حتى يتعدى باش يتشد متلبس باش نصيفطو فين يتعاودولو ترابي

شفيق: الا كانت شي حاجة علمني

سعد: صافي..

شفيق: متأكد مغيكونش كاتب ليه هاد المحال

سعد: لا مكاتبوش ليه وعاد شي يامات قالهالي كولشي مزال فسميت الواليد من غير ديور دياولنا..

اورطيغا: (وقفو فساحة الاستراحة مشات لطواليط كان فيها شوية دالحريق وخاصها تبدل بقا كيتسناها برا كيكمي رجع صونا على مو لي كتعرف اخبار الحاج من الفرملية لي واخا غتخرج غتعطيها نمرة لصاحبتها لي غتشد عليها لݣارد)
أنا جاي

أمينة: أحاااااي على جاي

اورطيغا: وشنو نخليك بين دوك لكلاب؟!!!

أمينة: نعل الشيطان اولدي وخليك نتا ومرتك انا راه معايا ولد خالتك ومرتو

اورطيغا: بقاتلي شي 150 كلم ونكونو تماك