جنون الغيرة

الجزء 163

غيثة: (قطعت وشافت فمها) متنظنش يقتانع حتى فاش كنت تنقولو هادشي حسيت بيه غير ... غير متبع هضرتي فين توصل وصافي

الغالية: خليه يقتانع اش عندك مديري فصفرو الناس كيترقاو ونتي باغا تسكتي فعروبية

غيثة: صفرو عروبية؟!!!! لواه اماما زدتي فيه

الغالية: انا بعدا من هنا نقولهالك محمد مغيتبعكش تماك بغيتي نتينا تمشي سير ولدي أنا نربيه ونتهلا فيه ماشي غنخليه يمشي لتماك

غيثة: صفرو مخيباش لديك الدرجة

الغالية: صفرو غديري فيها مشروعك لي باغيا؟!!!!! صفرو فيها المدارس لي كاينين فاس باش يقرا ولدك؟! فنظرك غيبغي يجيبلك خدامة تماك وعاد فنظرك غتاخدي راحتك كما واخداها هنا هاديك فاللول والتالي غتبقى دار مو هي مولاتها ونتي غتمشي على نظامها هي

غيثة: مو تتبان ظريفة ودرويشة

الغالية: نقولو درويشة غتجي نتي غتولي هي الراس ديالها!!! الواحد منين يكون درويش متيعنيش غيتساهل فكولشي

غيثة: (زفرت) اوا؟!!!

الغالية: الا كان باغيك نييييت غيبغي يسكنك هنا ففاس وينبغي راحتك كما منين شافك وهو يقولها

غيثة: عاد قلتي الواحد يكون درويش وداكشي

الغالية: انا هضرت على مو ولكن الراجل خاصو يدير لمرتو شنو باغية هااااا خاك عزل علينا واخا كان تيقول يسكن معانا ومشا سكنها وداير ليها بحال لما لقليل

غيثة: نسكن بوحدي ماشي هي نخليه يخوي مدينتو

الغالية: وعلاش نتي تخوي مدينتك وهو لا ياك عاد باغي يبدا مشروع يبداه هنا نيت ونتي ديري مشروووعك وتعاونوا بجوج

غيثة: معرفتش

الغالية: خليني انا نهض..

غيثة: لا لا لااااا... الا كانت شي حاجة يهضر معاه بابا ولا يوسف هو معندوش مع هضرة نساااا

الغالية: يشويني فيك لا نتي لا هو خلاااااص علية!!!

غيثة: ماماااااا عنداك تمشي تهضري معاه حمزة عزييييييز علية بزاف مابغاش نخسرو

الغالية: سيري سيري قالك عزيييز!!!

غيثة: مهم انا غنخرج نتلقاه وغندي معايا محمد فلعشية ونشوف فين غنخرجو

الغالية: (مهيرة كمارتها) سير تعلملك شوية من مرت خوووك هي لي تتعرف ليهم اما نتي ابنتي غير ضعاااانة هاااا وجهي الا مجيتيش فالليل وقلتلي صافي غنسكن معاه فصفرو

غيثة: (بقات غير كتشوف هي بالصح مابغاش تسكن فصفرو واكترية فدار مو فين كان مزوج بمرتو اللولة!!!!).

اورطيغا: (كان فالݣرنة كمل ذبيحة لي توحشها بزاااف هاد نهار استمتع وهو كيذبح ويسلخ عمر الكاميو ديالو بالسلعة حتى جا سعد قالو يتجمع هو ودراري تبعو لبيرو فين كيكون الحاج لقا شريف وخوهم لاخر تماك سعد سد لباب)
اش تما!!!