روزالين

الفصل الواحد والعشرون

كانت نادين وساندي بغرفة روزالين ، وكانت ساندي تقص عليها ماحدث ، كيف عانقت نادين أخيها بالشارع وكيف لم تهتم بأحدا ، ونادين تشعر بالغيظ والحرج لأنها فعلت ذلك ، انها لاتدري كيف عانقته ، لقد سارت دون إرادتها إليه عندما ظنت أنه يبكي ، لم يتحمل قلبها رؤيته وهو يبكي ، أما روزالين فكانت تستمع إلى ساندي وهي تضحك على ردة فعل نادين التي كانت تضرب ساندي كلما تذكرت أمرا آخر لتقصه عليها .

قالت روزالين بمرح : عادي ياساندي هي حضنته عشان تخفف عنه ، انتي عارفه نادين قلبها طيب ومش بتقدر تتحمل تشوف دموع حد .

ضحكت ساندي وهي تقول : يابنتي هو أصلا ماكانش بيعيط ، ده كان بيمسح وشه من العصبية عشان يهدى ، ودي ماصدقت خدتها حجة ونزلت حضنته قدامي ، شوفتي البجاحه بتحضن أخويا قدامي .

ضربتها نادين وهي تقول : اتخرسي بقى ، خلاص ، عرفنا انه ماكانش بيتزفت بيعيط ، أنا فهمت غلط ، كان يوم مش باين له ملامح يوم ماحضنته قدامك ياشيخه ، ده انتي ناقص تعملي إعلان تعرفي الناس كلها اني حضنت أخوكي .

قالت ساندي وهي تتفادى ضرباتها : ده أنا ماصدقت فرصتي جاتلي ، عشان أرد لك كل اللي عملتيه فيا ، كل مااروح عند خالي تسمعيني كلام اد كده ، مع اني ماحضنتوش زيك .

قالت نادين بعصبية: أنا همشي ، وافضلي انتي بقى اتكلمي براحتك .

جذبتها ساندي من ذراعها وهي تضع يدها على فمها كعلامة للسكوت وقالت : خلاص أهو والله هسكت مش هقول حاجه ، أنا بس حاسه اني لسه مصدومة مش مصدقه انك انتي وحسام بتحبوا بعض .

قالت نادين: أنا وحسام بنحب بعض فين انتي مجنونه ، هو انا عشان حضنته وهو بيعيط أبقى بحبه ، يابنتي ده عادي انا عشان بس ...

لم تستطع الاكمال فهي لاتجد حجة لقولها ، فتابعت ساندي قائلة: عشان ايه؟! حضنتيه عشان جارك ؟! ولا عشان متربيين سوا ؟؟ بصي يانادين انا مش متأكده من مشاعرك ناحية أخويا بصراحه بتحبيه ولا هو صعب عليكي ، لكن أنا متأكده ان أخويا بيحبك .

جلست نادين بجوارها وهي تقول باستغراب : بيحبني أنا ؟! يابنتي أخوكي بيحب واحدة تانية وهو اللي قايلي بنفسه .

قالت ساندي بجدية : أخويا بيحبك انتي يانادين وعمره ماحب غيرك ولا يعرف بنت غيرك أصلا ، أنا كنت شاكه من زمان بس امبارح غيرته عليكي ونظرته ليكي خلتني اتأكدت ، ممكن يكون قالك بيحب واحدة تانيه عشان ماتنتبهيش مثلاً انه بيحبك ، لأني عارفه أخويا ، بيحب أخوكي أوي وعمره مايحب انه يعمل حاجه من ورا ضهره ، خاصة لو الحاجة دي هي انه يعترف لأخته بحبه أو يكلمها من وراه .

قالت روزالين: عندك حق يا ساندي ، أنا قولتلها من زمان انه بيحبها هي ، ولما قالها بيحب واحده كان يقصدها هي ، بس هي غبية نعمل ايه ، وأخوكي أغبى منها ، فهم من كلامها بردو انها بتحب واحد تاني غيره .