بالمساء كانت روزالين تجلس مع نادين بغرفتها لتقص عليها ماحدث صباحاً بالجامعة ، فبعدما عادت روزالين مع نديم كانت قلقة على الفتيات فهي لم تخبر نديم بماحدث لكنها تعلم أن نادين قد قامت بضرب بعض الفتيات كما أخبرتها ، لذا بعدما تناولت طعامها وأخذت حماماً لتستعيد نشاطها ارتدت ملابسها واتجهت إلى نادين ، وبعدما حياها الجميع وجلست معهم قليلاً أخذتها نادين إلى غرفتها كي يستطيعا التحدث بحرية ، وبعدما علمت مافعلته نادين بالفتاتين ضحكت بقوة وهي تقول : انتي بجد مشكلة ، يعني رحتي ضربتيهم بجد ، ماخوفتيش يضربوكي هما الاتنين أو الموضوع يوصل للعميد ويعملك مشكلة .
قالت نادين بغيظ : لا ماخوفتش دي بنات نايتي ، وبعدين هما يستاهلوا ، كل مايشوفوا ساندي يفضلوا يرموا كلام وهي بتسكت النهارده بقى البت بتقولها أخوكي الجامد بقاله كتير ماجاش ليه ، ابقي سلميلي عليه ، مش فاهمه انتي ازاي أخت كتلة الرجولة دي ، أنا لما جات حكت لي مقدرتش أمسك نفسي ، رحت جبتهم من شعرهم من غير ماتكلم ، عنصر المفاجأة ساعدني بردو ، بصراحة خدتهم على خوانة ماكانوش مستعدين للضرب .
ضحكت روزالين ثم قالت لاغاظتها : اه قولي كده ، عشان قالوا على حسام كده انتي اتدايقتي ورحتي ضربتيهم ، عاملة فيها ڤان دام حضرتك .
قالت نادين بتوتر : حسام ايه وبتاع ايه ، أنا ... أنا اتدايقت عشان ساندي اتدايقت ، أنا مالي ومال حسام .
قالت روزالين : بس انتي لازم تهدي شوية يانادين ، حاولي تتحكمي ف انفعالاتك شوية ، امال بقى لو كنتي مكاني وسمعتي الكلام اللي بيتقالي كنتي عملتي ايه .
سألتها نادين بقلق : كلام ايه ده اللي بيتقالك ومين اللي بيقولهولك .
قالت روزالين: بنات معايا ف الجامعة ، معرفهمش أصلا ، بس كل مايشوفوني يفضلوا بقى يتريقوا على لبسي وازاي واحدة زيي تمشي مع ٣ شباب زي القمر وكلام من ده .
اعتدلت نادين وقالت بغضب : وانتي ليه ماقولتليش الكلام ده ، أنا هاجي معاكي المرة الجاية ونشوف الكلام اللي بيقولوه ده ، ان ماخليتهم مايبصوش ناحيتك مابقاش نادين .
ضحكت روزالين وهي تقول : انتي يابنتي مجنونة، انا لسه بقولك اهدي شويه ، وبعدين انا مابتدايقش لأنهم مايخصونيش وكمان مش بيهمني كلامهم ، أنا بطنشهم .
قالت نادين: ماشي بس بردو ليكي زيارة ونبقى نشوف الموضوع ده.
قالت روزالين بيأس : انتي مفيش فايدة فيكي ، يابنتي كبري دماغك شوية ، هما اللي بيتكلموا دول ناس تافهه وفاضية وعندها نقص ، انا أشغل تفكيري بيهم ليه .
أنت تقرأ
روزالين
Romanceفتاة تعرضت لحادثة ما بأمريكا التي كانت تقطن بها منذ كانت طفلة صغيرة ولعدم مقدرتها على تخطي ماحدث لها قررت العودة الى مصر موطنها الأصلي الذي هجرته منذ كانت بعمر الثالثة ، ولكنها عندما عادت تفاجأت بالجار الملاصق لشرفتها ، ترى ماذا حدث لها وهل ستستطيع...
