ချစ်ခြင်းဖြင့် နွေးစေလို

6.

မှာထားသည့်ဟင်းတွေက များတာမို့ သွေးရန် တစ်ယောက်တည်းစားဖို့ အတော်အချိန်ယူနေရသည်။ ကြက်သွန်မြိတ်ကင်က ပါးစပ်ထဲတွင် ခါးနေသလိုလိုရှိလာပြီး မာလာဟင်းကလည်း စားလေစပ်လာလေလားမသိ။ သွေးရန် မျက်ခမ်းလေးတွေပင်နီပြီး အရည်လဲ့နေပြီဖြစ်သည်။

ငါးကင်ရဲ့ဘယ်အပိုင်းကိုသူညှပ်ယူနေသလဲလည်း သေချာမသိတော့ဘဲ ထူပူထိုင်းမိုင်းနေသည့်စိတ်သာရှိသည်။

စိုင်းလင်းကိုကို သူ့ရည်းစားဟောင်းနာမည်အား ရေရွတ်ကာ ဆိုင်ပြင်ပြေးထွက်သွားခြင်းသည် သွေးရန်အား ကန်ဘောင်ထဲကငါးကလေးအဖမ်းခံလိုက်ရသလို တုန်လှုပ်သွားစေမိသည်။ တစ်ချိန်တွင် ဒီလို အကင်ဇကာပေါ်ကို မီးမြှိုက်ခံရမှာသိသိရက်နှင့် ငါးကန်ထဲကနေ ဘယ်တော့မှ မလွတ်မြောက်နိုင်သူသည် သွေးရန်ဖြစ်သည်။

ဖြစ်လာမည့်အရာတွေကိုကြိုတင်သိနေလျက်နှင့် တကယ်တမ်း ဇကာနှင့်အဆယ်ခံလိုက်ရသည့်အချိန်တွင် အမြီးတဖျက်ဖျက်နှင့် ခြောက်ခြားနေသည့် ငါးကလေးအဖြစ်သည် အခုသွေးရန်နှင့် မထူးမခြားနား။

အကယ်၍ အဲဒီမိန်းကလေးသာ သဒ္ဒါယံဖြစ်နေမည်ဆိုလျှင်၊ သူတို့ပြန်တွေ့ကြပြီဆိုလျှင်၊ သွေးရန် တုန်လှုပ်ခြောက်ခြားနေရသည်။ သူ့ကိုမေ့ထားခဲ့ကာ ပြေးထွက်သွားသည့် စိုင်းလင်းကိုကို၏ ခြေလှမ်းတွေသည် တုံ့ဆိုင်းခြင်းမရှိ။ သူ၏ ဖြစ်တည်မှုသည် ဒီအတောအတွင်း ဘာမှဟုတ်မနေခဲ့။ ဘာမှအရာမထင်ခဲ့။

သွေးရန် ငိုချင်သည်။ ဝဲတက်လာသည့် မျက်ရည်တို့အား အစပ်ကဲသည့် မာလာဟင်းအပေါ်ပုံချရမည်။ သူ့ကိုကိုက သူ အစပ်မစားနိုင်တာကိုမသိဘဲ ဒီလိုစပ်သည့် မာလာဟင်း မှာပေးသွားသေးသည်။

သွေးရန် မစားနိုင်တော့သည့်တိုင်အောင် စားပွဲမှမထရဲသေး။ သူ့ခြေထောက်တွေခွေယိုင်လဲသွားမည်ကို စိုးရိမ်မိသည်။ ထို့ပြင် စိုင်းလင်းကိုကို ပြန်လာပြီး သူ့ကို လာခေါ်နိုင်သည်၊ ထို့ကြောင့် သူ ဒီနေရာမှ မထချင်သေး၊ အိမ်နှင့် ဘယ်လောက်ပဲ နီးနီးလေးဆိုဆို သူ့ကို ထားခဲ့မိတာကို သတိရပြီး ပြန်လာခေါ်နိုင်သည်မဟုတ်ပါလား။