ချစ်ခြင်းဖြင့် နွေးစေလို

9.

💬 အစ်ကို အိပ်ပျော်နေလို့ မနှိုးလိုက်တော့ဘူး။ ပေါင်မုန့်ကြက်ဥကြော်ထားပေးခဲ့တယ်။ နွားနို့လည်းရှိတယ်။ အေးတာမကြိုက်ရင် နွှေးသောက်လိုက်။
💬ကျွန်တော် ဟိုတယ်မှာပဲ အိပ်ဖြစ်ရင်လည်း အိပ်ဖြစ်မယ်။

ညက အိပ်ရာဝင်တာ နောက်ကျသွားသည်မို့ စိုင်းလင်းကိုကို နေမြင့်မှနိုးလာခဲ့သည်။ ဖုန်းဖွင့်ဖွင့်ချင်းမြင်လိုက်ရသည့် စာကြောင့် စိုင်းလင်းကိုကို မီးဖိုချောင်ထဲကို ၀င်သွားလိုက်သည်။ စားပွဲပေါ်တွင် ပန်းကန်နောက်တစ်လုံးနှင့် အုပ်ထားသည့် ပန်းကန်ကိုတွေ့လိုက်ရ၏။ အပေါ်က ပန်းကန်ကို လှန်ကြည့်လိုက်ရာ သူ့အတွက် ကြော်ထားပေးခဲ့သည့် ပေါင်မုန့်ကြက်ဥကြော်နှစ်ချပ်က အဆင်သင့်လေးရှိနေသည်။ ကြက်ဥထဲကို ပေါင်မုန့်စိမ်ကြော်ထားတာမျိုး မဟုတ်ဘဲ ပေါင်မုန့်ကို ကြက်ဥနဲ့ပတ်ကာ ကြော်ပေးထားသည်က သွေးရန်စားနေကျပုံစံမဟုတ်ဘဲ စိုင်းလင်းကိုကို အကြိုက်ဖြစ်သည်။ 

"အစ်ကိုက ဘာလို့ ကြက်ဥထဲပေါင်မုန့်ကို စိမ်ကြော်တာ ဘာလို့ မစားတာလဲ"

"မကြိုက်တာတော့မဟုတ်ပါဘူး။ ဒီတိုင်း ပိုဆီ၀င်ပြီး အီတယ်ခံစားရလို့"

"သြော်၊ ဒီလို ကြော်တာကို အခု အစ်ကိုပြောမှသိတာ ကျွန်တော်က"

မနက်ခင်းတစ်ခုက သူတို့ရဲ့ စကား၀ိုင်းဆီ စိုင်းလင်းကိုကို၏ စိတ်တို့ ပြန်ရောက်သွားသည်။ သူ ထိုသို့ ပြောပြီးကတည်းက သွေးရန်က မနက်စာအတွက် ပေါင်မုန့်ကြက်ဥကြော်စီစဥ်တိုင်း သူပြောသည့် အတိုင်းသာ ကြော်ပေးတတ်သည်။ ထိုကောင်လေးက အမြဲ ထိုသို့ အလိုက်တသိ သူ့အပေါ်ဖြည့်ဆည်းပေးတတ်ကာ သူ့ဘ၀ထဲ ၀င်လာဖို့ ကြိုးစားနေတတ်သည်။

သက်ပြင်းတစ်ချက်ကို ချလိုက်မိပြီး  ရေခဲသေတ္တာထဲက နွားနို့ဘူးကို ထုတ်လိုက်ကာ ဖန်ခွက်ထဲထည့်လိုက်သည်။ အသင့်ဖြစ်နေသည့် ပေါင်မုန့် ကြက်ဥကြော်ကိုလည်း Microwave ထဲထည့်လိုက်ပြီး ရပ်စောင့်နေလိုက်သည်။ Microwave လည်နေသည့် အသံက တိတ်ဆိတ်နေသည့် အခန်းထဲတွင် ကျယ်လောင်လာပြီး စိုင်းလင်းကိုကိုအနေနှင့် အသားမကျသည့် ခံစားချက်တို့ကို မသိမသာခံစားလာရသည်။ ဒီမနက်ခင်းက သူတို့ အတူနေသည့်နေ့မှစ၍ ပထမဆုံး တစ်ယောက်တည်း ဖြစ်သွားသည့် နေ့ပင်။ နှစ်လကျော်လောက်ဆိုတော့လည်း သံယောဇဥ်က သူ့ဟာသူတွဲလာပုံပါပဲဟုပင် တွေးလိုက်မိသေးသည်။