ချစ်ခြင်းဖြင့် နွေးစေလို

11.

"အိပ်နေပြီလား"

မြင်လိုက်ရသည့်စာကြောင့် သွေးရန်စိတ်လှုပ်ရှားသွားကာ ကျေနပ်စိတ်ကလေးဖြစ်သွားရသည်။ မည်သို့ပင်ဆိုစေကာမူ စိုင်းလင်းကိုကိုဘက်က အရင် စာပို့လာလိမ့်မည်ဟု သွေးရန် မျှော်လင့်မထားခဲ့။ သွေးရန်အတွက် ဒီစာတစ်ကြောင်းက အိပ်နေပြီလားထက် အများကြီး ပိုသည်။ စိုင်းလင်းကိုကိုက သူ့ကို သူပြန်မခေါ်မချင်း ပစ်ထားတော့မည်ဟု တွေးကာ ၀မ်းနည်းနေသည့်စိတ်ကြောင့် နေမထိထိုင်မသာဖြစ်နေခဲ့ရတာဖြစ်သည်။

သူ့အနေနှင့် စိုင်းလင်းကိုကိုနှင့် ပြဿနာဖြစ်ရမှာကို ကြောက်ပါသည်။ အစကတည်းက သူ့အပေါ် စိတ်မရှိသူကို စိတ်ရှုပ်အောင်လုပ်မိမှာ ကြောက်သည်။ စိတ်မရှိသည့်အပြင် စိတ်ပျက်သွားမှာ ကြောက်သည်။ ထို့ကြောင့် သွေးရန်က စိတ်ဆိုးစိတ်ကောက်လည်း မလုပ်ရဲခဲ့ချေ။ သို့သော် ညနေကပဲ အရက်အရှိန်နှင့် ၀မ်းနည်းစိတ်တို့ တနုံ့နုံ့ရောကာ စိုင်းလင်းကိုကိုကို ရန်တွေ့ခဲ့မိခြင်း။

ထို့အပြင် စိုင်းလင်းကိုကိုဆီက သူကြိုတင်ပြင်ဆင်မထားခဲ့သည့် စကားကို ကြားလိုက်ရချိန်တွင် နှလုံးသားတို့ ကွဲကြေသွားခဲ့ရတာမို့ အပြေးထွက်လာခဲ့ခြင်းဖြစ်သည်။ တကယ်တန်းကျ သွေးရန် စိတ်အေးသွားချိန်တွင် စိုင်းလင်းကိုကိုသာ သူ့ကို စိတ်ရှုပ်သွားရင်ဆိုသည့်စိတ်နှင့်၊ ပြန်အဆင်ပြေဖို့ ဘယ်လိုလုပ်ရမလဲဆိုသည့် စိတ်တို့သာကြီးစိုးနေခဲ့သည်။

"သွေးအေးသွားတာနဲ့ ငါဘက်ကမှားတာပါတွေ ဖြစ်ကုန်ပြီ"

သွေးရန် ကိုယ့်ကိုယ်ကိုယ်ပြန်ပြောလိုက်ပြီး စာပြန်လိုက်သည်။

"အိပ်ပြီ"

"အိပ်တော့မှာ"

"အိပ်တော့မလို့"

"အိပ်..."

"မအိပ်သေးဘူး"

"အာ ဘယ်လိုပြန်ပြောရမှာလဲ"

တစ်ဖက်တွင်လည်း Typing အကြာကြီးရိုက်နေသည်ကို ကြည့်နေရင်း စိုင်းလင်းကိုကို စောင့်နေမိသည်။ အများကြီး ရိုက်နေတာမို့ အပြောခံရတော့မည်ဟု စိတ်ကို ပြင်ဆင်ထားစဥ် သွေးရန်ဆီမှ စာ၀င်လာ၏။