ချစ်ခြင်းဖြင့် နွေးစေလို

8.

"Hiiiiiiiiii"

လေဆိပ်မှာစောင့်နေရင်းမှ လျှံ့ကိုတွေ့လိုက်ရတာမို့ သွေးရန် လက်ကို အသားကုန်ရမ်းပြကာ အော်ခေါ်လိုက်သည်။ ဘေးတွင်တွင်လည်း နှစ်ယောက်စာ Luggage တွေတင်ထားသည့် trolley ကိုတွန်းကာ လျှောက်လာသည့် သတိုးပါပါလာသည်။ သူ့ကို မြင်သည်နှင့် လျှံက ခုန်ကာ လက်ပြလိုက်ပြီး ပြေးလာတော့၏။

"ရန်ရန်"

အင့်ကနဲ ဖက်ခံလိုက်ရသည်နှင့်အတူ သွေးရန် ပျော်ရွှင်စွာရယ်လိုက်မိပြီး ပြန်ဖက်လိုက်သည်။ ထို့နောက် ဖတ်ရင်းခုန်ပေါက်နေမိကြသေးသည်။ သတိုးက ခေတ္တမျှ ပြုံးကြည့်ပြီးမှ trolly ကိုဘေးကပ်ကာ နှစ်ယောက်လုံးကို သိုင်းဖက်လိုက်သည်။

"ကဲ ဘေးဖယ်ပေးလိုက်ဦး ပြီးမှ ဆက်ဖက်ကြ"

လူအသွားအလာများနေသည့်လမ်းကိုသတိထားမိသည့် သတိုးက အရင်ဆုံးခွာလိုက်ပြီး သတိပေးလိုက်သည်။

"နောက်ဆုံးတော့ ရောက်လာပြီ"

"ရောက်လာပြီ ဟီးဟီး"

"ဘာစားကြမလဲ"

"ဟော့ပေါ့စားကြမလား"

"ဆူကီစားချင်‌လား အပြန်ဝင်စားကြမယ်လေ"

"Luggage တွေဘယ်လိုလုပ်မလဲ"

"ယူခဲ့လေ မများဘဲနဲ့ဟာ"

ရောက်ကတည်းက တွတ်ထိုးကာ တိုင်ပင်နေကြသည့် သွေးရန်နှင့် လျှံတို့က သူ့ကိုပြိုင်တူလှည့်ကြည့်လာသည်။ အခုပဲရောက်၊ အခုပဲစားဖို့သောက်ဖို့ မဆိုင်းမတွ တိုင်ပင်နေသည့် နှစ်ယောက်က သူ့အား လှည့်ကြည့်လာသည်။ သတိုးမှာ စကားတစ်ခွန်းကလွဲ ဘာမှပြောစရာမရှိ။

"သဘော"

"ရေးး ဟော့ပေါ့စားကြမယ်"

"ရေးး"

လေဆိပ်ထဲတွင်ပျော်မြူးနေကြသော သူငယ်ချင်းနှစ်ယောက်ကြောင့် သတိုးပါအသံထွက်ရယ်လိုက်မိသည်။ ဒီနှစ်ယောက်က ဘယ်တော့မှ ပြောင်းလဲမည်မဟုတ်။

"ရေး သွားကြမယ် ဖေ့သားလေးတို့"

Luggage နှစ်လုံးကိုပူးကာလက်တစ်ဖက်ထဲနဲ့ ဆွဲလိုက်ပြီး အရှိန်တင်ရင်း သံယောင်လိုက်ကာ ပြောတော့ မျက်စောင်းနှစ်ခုက ဒိုင်းကနဲရောက်လာသည်။