ظلمات امرأة منسية

الفصل الثاني و العشرون - حقائق

الفصل الثاني و العشرون _ حقائق

مُشكلته ،
مَو كُلش فَطن
بارِد مَثل حايَط سَجن
و لا يدرَي آنا شبيهَ
وقررت أبادَر و أعترَف
هيَ الخسارة تظل عُمر
و الرَبح مَو يومية .

انتِ لشوكت ضلين مكفخة هينا
شكد احاول اسندج و اوكف بظهرج
بس ماكو فايده ..
عاجبج دور الخدامه الي عايشتو
ول افهميني داموت من القهر من ادحك هاي حالتج

وصلت بيج المواصيل تخدمين مرتو
وتوكفين ذليلة جدامها !
ول يابه راح يچتلني القهر عليج !

-ول يمه نصي حسك لا يسمعك ابوك
و الله لا يفين حظنا يمصكوع !

و انت تعرف لو كضبنا شيحيعمل
بينا ..

-انت ضلي جبانه هيج
خسرتي صحتج و كرامتج خاطر عيشتو
و من تالي نكر حتى ابنو
و لوما انه اوكف بوجهو جان
سموه النغل ..

-يول شهاب نصي حسك عش عتسوي هيج
تمنجدنا .. ياربي

-مسحي دموعج و رب العزة الا اخليها تتمنى الموت ما تطولو
هالمفرعة البلا اصل ......

اتسعت عيوني و غطيت حلكي ...
دموعي نزلن من الصدمة !
و اكتم حلكي بيدي لا تطلع صرختي
يعني شنو ...؟

هذه مرت وليد .......

صخام الي صخمني ..
حسيت حركة قريبة رجعت بخطواتي للحمام
و قفلت الباب عليه ... ابجي و الطم بسكوت
و ارد اغسل وجهي ..
اتمنى ابقى هنا و ما اطلع ..

اذا طلعت شحسوي، احاجي وليد
لا .. احتمال يفر الموضوع عليه و تصير مشكلة جبيرة
و اني هنا غريبة ...

شنو قصده ابنه ، اخليها تتمنى الموت ؟
هو گالي مُراهق ، مراهق و هيج شايل بـ گلبه حقد وكراهية
زين مرته شلون ساكته و شلون راضية بهيج عيشة !
و جتي خطبتني بنفسها !

لحظة .. لحظة

هو گالي .. تجربة حب فاشلة و زواج خرب باوله
قصده ويا فداء ؟
اذن شلون مخلف و عنده طفل !
يا زواج الي خرب بـ اوله !

لحظات و اندك الباب ..
و بنبرة مُتحشرجة .. رديت
نعم ..
جاني صوتها ..
انه خيه فداء .. شفتج تعطلتي جوه
خاف معتازة شي يولي ...

اعاين وجهي بـ المراية خريطة من البچي
و عيوني فصوص دم !

همست : هاا اي هسه اطلع
بس شويه بطني توجعني و عندي لعبان نفس

سكتت ..
عبالي راحت ..
رجعت صاحت بصوت يخوف فزز حواسي
وخلاني ارجف ..

-فتحي سارة اعرف سمعتي كلشي !
ضربت صدري ..
و رجليه صارت ما تعيني ع الوكفه ..

رجعت اكدت عليه و بنبرة حادة !
-فتحي تاكسرو والله ... بمصلحتج تحاجيني هسه
اذا ردتي ترجعين لهلج سالمة !!