ظلمات امرأة منسية

الفصل الخامس و العشرون - رذاذ حلم لم يكتمل

الفصل الخامس و العشرون -
التصويت + التعليق

كَون تَدري
شگِد احَبك؟
چِا بچَيت.

  - اياد عبدالله

...

فتحت عيوني على كيف ..
بعد بيه دوخه ..
و لعبان نفس ..
و اكو ريحة ماطيبه مجلبه بـ انفي

لحظات ..

تذكرت آني وين ...
اخر شي اذكره من حط وصلة على وجهي !

عاينت الغرفه نصف ظلمة

بس گدرت اعرف اني وين ... هذهِ غرفته !
يعني الحقير جابني ابيتهم ...
لحظات و ادركت اني نايمة لفترة من الزمن !
لطمت على وجهي مرعوبة خاف سوه بيه شي
شلت الغطا و عاينت لجسمي ..

تنهدت بـ راحة الحمدلله بعدني بملابسي
بس حذائي ماكو !

كمت امشي بتوجس لازمة صفحة راسي
توجعني من أثر الضربة بجامه السيارة
اثناء ما جان يسوق مثل الارعن !!

هسه شسوي ..
دورت بكل ركن بـ الغرفة
لا تلفوني موجود و لا جنطتي الي بيها مستمسكاتي ..

تمشيت بِخلسة ..
وكفت يم الباب ، درت المقبض بيدي ماكو مقفولة
يعني حابسني الافندي ابن الافنديه ..
اسمع هوسه جوا .
زلم و نسوان ترعد ...
الظاهر علّكت ...
شكد حاولت التقط الكلام و افهم شديكولون ماكو

اكلت اظافري بـ قلق
و الندم اكلني من راسي لـ رجليه
شبيه ما خابرته .. غرت و اخذتني العزة بـ الاثم
الله لا ينطيج هند المفلفلة ..

كعدت يم الباب أبچي بودي اصيح و اكللهم طلعوني
و امنع نفسي ما اريده يصعد و اشوفه و اتصادم وياه

ياربي افرجها ..
لهناك و سمعت وقع اقدام تصعد ع الدرج ..
ابتعدت بنفسي و رجعت للفراش اسوي نفسي نايمة ..

اندار القفل و فاتوا ..

و عرفتها من صوتها .. فدوى ام الطلايب ..
اكعدي سارة احاجيج ..

فتحت عيوني بملل فـاني لستُ ممثلة بارعة .

عاينتلي بعتب : عش هيج سويتي
شفتي وين وصلتينا بعنادج
نصحتج و خبرتج ياخذج ياخذج
بـ اللين او بـ الغصب ياخذج
تهز بإيديها بآسف !

همست : انتِ شنو من مرا ما تغارين على رجلج
ماعندج حرص عليه بيدج تسلمي لمرة ثانية
و تتوسلين بيها تاخذه ؟؟

-بعمرو ماكان الزوج الي ردتو ، بس احبو و اتمنى اشوفو مرتاح ..
و راحتو ما تتحقق الا معاج !
ان خسرتو حبيب ماريد اخسرو ابو اولادي ..

-منطقج غريب !
عموماً الي ببالج ما يصير
نطيني تلفوني اترجاج ..
اعتبريني اختج و لا تكسرين بيه
نطوني غراضي خل اروح

-وين ترحين يمصكوعة
تدرين الساعة شكثر الحزة

-ليش شكد صارلي نايمة