සූකිරි පුළුන්

සූකිරී පුළුන් 17

සූකිරී පුළුන් 17

අයේෂ් එක්ක තරහා වෙලා තෙත පිටින්ම ඇලෙන් එගොඩට යන්න හදපු නිම්නව අයේෂ් ආයෙම නතර කළානෙ..

" ඒ ඔහොම ඉන්නවා..දෙයක් කියන්න ඕනේ"

ඒවචන ටික එක්ක ගමන නතර කරලා ආපහු හැරිලා නිම්න අයේෂ් දිහා බැලුවා...

" මොකක්ද ?"

" තරහාද මං එක්ක?"

" කියනවයි අහනවයි කියන්නෙ දෙකක්.. දෙයක් කියන්න තියෙ කිව්වට ඔයා දැන් කළේ අහපු එක."

නිම්න එහෙම කියලා ආපහු හැරිලා ගල් තලාව දිහාට යනකොට නිම්නට කලින් ගොඩට දුවපු අයේෂ් එයා ඇඳුම් වනපු ගල් ගොඩ උඩින් තුවාය අරගෙන නිම්න ගාවට ඇවිල්ලා තුවායෙන් නිම්නව කවර් කළා.. එකපාරටම වතුරට පැන්න නිසාමයි වතුරෙ තිබ්බ සීතලටයිද කොහෙද නිම්න ලාවට වෙවුලුවා. අයේෂ්ම තුවායෙන් නිම්නව පිහදැම්මෙ නිම්න ඇස් දෙක ලොකු කරන් එයා කරන දේවල් අදහගන්න බැරුව වගේ බලන් ඉන්නකොට.

නිම්න ඊටපස්සෙ උදුරලා වගේ තුවාය අරගෙන ඔලුව පිහදාගෙන වතුරට පනින්න කලින් ගලවලා ගල් ගොඩට දාපු සරම අරගෙන ඇඳගත්තා. සරමට යටින් යට ඇඳුම ගලවලා වතුර මිරිකලා උස ගලක් උඩින් වනපු නිම්න ස්කිනි එක කරට දාගෙන ගලක් උඩින් වාඩිවුනා. අයේෂ් වචනයක්වත් නොකියා තෙත යට ඇඳුම පිටින්ම ඒ ගලෙන්ම නිම්න කිට්ටුවෙන් වාඩිවුනා..

" තමුසෙ තරහා නෑ නේද මං එක්ක?"

" තරහා වෙනවනම් මීට කලින් ඔයා කරපුවට මං තරහා වෙලානේ මිස්ටර් අයේෂ්"

" ඒත් මං තරහයි"

" මං මොකක් කළාටද මං එක්ක තරහා වෙන්නෙ?"

" කිව්වනෙ මං...මිස්ටර් මිස්ටර් ගාන්නෙපා ආයෙ කියලා.. ඇයි අයියෙ කියලා කතාකරන්න බැරිද කලින් වගේ"

" අනේ නිකන් ඉන්න "

අයේෂ් දිහා බලාගෙන එහෙම කිව්ව නිම්න අනික් පැත්ත බලාගත්තෙ හරියට තරහා පිටිමහන්න වගේ. නිම්න අහක බැලුවා කියලා අයේෂ් හේම අතෑරියෙ නෑ. අයේෂ් නැගිටලා නිම්න බලන් හිටිය පැත්තට ගිහින් ඒ පැත්තෙන් ගල උඩ වාඩි වුනා.. නිම්න හිත යටින් ඒ හැම හැසිරීමකටම මාර විදිහට කැමති උනා. ඒත් වචනවලින් ඒක එලියට දුන්නෑ. මොකද අයේෂ් ඒ කරන්නෙ ඇත්තක්ද නැත්නම් රගපෑමක්ද කියලා නිම්නට හරි තේරුමක් තිබ්බෙ නෑ. ඉතින් නිම්නගෙ වචනවල තිබ්බෙ මවාගත්ත බොරු මුරන්ඩුකමක් විතරයි.